Iner Kasi so Tuplegan Mo Parad Maong a Simbawa?

Say “advice industry” so nagmaliw la natan a negosyon bilyon-bilyon a dolyar ed sakey taon. Labay na totoo so patulongan. Oniay inkuan na eksperto’d bunigas nipaakar ed mental a si Heinz Lehmann: “[Diad sosyedad natan] walaray deperensia ed edukasyon tan sosyal. Aliwa lan singa dati iray estandarte nipaakar ed relihyon. Agla tanton maligen iray pamilya . . . , tan lapud satan et agmakareen iray totoo.” Kuan na autor a si Eric Maisel: “Saramay datin onaasingger ed albularyo na tribu ra, pastor odino doktor na pamilya pian patulongan ed saray problema ra nipaakar ed mental, espiritual tan pisikal so ontutupleg la natan ed dilin-makatulong iran libro parad solusyon.”

ANGIYAREGLO so American Psychological Association na sakey a grupo pian mangimbestiga’d sayan onaadilantan industriya. Inkuan na grupo ya anggaman saratan a libro so walaan na “balbaleg a posibilidad ya ontulong ed saray sinansakey pian natalosan day inkasikara tan say arum . . . , saray nipaparungtal ya ibabaga tan paulo a nitekep ed sarayan programa so alablabas lan maong tan pinaparakep.” Kuan na managsulat na Toronto Star: “Manalwar ed dakerakel a mankuankuanan a maespiritual a relihyon. . . . Nagkalalo lan manalwar ed amin a dilin-makatulong iran libro, tape odino seminar ya alablabas so iyoopresi ra diad antiktikey labat a panaon, balet ta agtanton pansagpotan odino mainawa.” Tua, a dakerakel so talagan malabay ya ontulong ed saray mankakaukolan. Balet, say makapaermen a katuaan et dakel ya andiay prinsipyon indibidual a mangaanamot ed inkabegtebegtew tan paniirap na totoo, ya anggapoy talagan niiter dan tulong odino solusyon.

Lapud saya, anto so manunan lapuan na tulong a napanmatalkan tayo? Iner so pakaromogan tayo na praktikal a simbawan lawas a makatulong?

Lapuan na Ag-onsaew a Giya

Onia so inkuan na koma-19 siglon managkaral ya Amerikanon si Henry Ward Beecher: “Say Biblia so intarya na Dios a pinagka-mapa pian pakagiyaan, agpakateneban, tan pakanengnengan no iner so daongan, tan no panon a nasabi itan ya agnadalanan iray bato odino buer.” Oniay inkuan na sakey a laki nipaakar ed Biblia: “Agbalot napalumbasan na siopaman so Kasulatan; diad ilalabas na panaon tayo et onlalaknab tan onaaralem so aplikasyon na satan a libro.” Akin a nepeg mon konsideraen a maong iyan libro?

Oniay irerekomendan mismo na Biblia: “Amin a Sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo komon so pankulangan to, a nabangatan a maong ed amin a gawa a maabig.” (2 Timoteo 3:16, 17) Saray lugan na Biblia et manlalapu a mismo ed mismon Subol na bilay, si Jehova a Dios. (Salmo 36:9) Sirin, amta ton maong no panoy inkagawa tayo, a singa ipapanonot ed sikatayo na Salmo 103:14: “Sikato kabat to so inkagawa tayo; sikato nanodnonotan to a sapok itayo.” Sirin,  sigpot itayon makapanmatalek ed say kablian na Biblia.

Diad tua, lugan na Biblia so dakel a prinsipyo tan giya a makagunggunan niyaplika ed antokaman a sirkumstansian kidungetan mo. Diad panamegley na satan et kuan na Dios ed sikatayo: “Saya so dalan, ondalan kayo ed sikato.” (Isaias 30:21) Kasin nasustuni na Biblia iray pankaukolan na sinansakey natan? Nengnengen tayo.

Susustunien na Biblia Iray Pankaukolan Tayo . . .

Diad Panalona ed Saray Kapagaan. Ibabaga na Biblia ed sikatayo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Kasin say pikakasi et peteg ya epektibo diad panalona ed kagogonigon na emosyon lapud irap na bilay, inkaabuso ed sekso tan salita, odino ed impatey na sakey ya inad-aro? Konsideraen pay onggendan ya eksperiensia.

Oniay inaksobi nen Jackie, sanen naamtaan ton seksual a naabuso so anak to: “Say pakakakonsiensia lapud agpakasalimbeng ed anak so agnadeskriben liknaan. Kaukolan kon talonaay liknaan na pakakaingongot, imbel na linawa, tan pakakasanok. Sarayan liknaan so manederal la ed bilay ko. Kakkaukolan ko so tulong nen Jehova pian bantayan to so pusok.” Kayari na aminpigapigan impanbasa ed Filipos 4:6, 7, nanggunaetan nen Jackie ya inyaplikay konseho na satan. “Inagew-agew ak a nampikasi, a naynay kon ikekerew ya agak komon naapektoan a maong ed negatibo iran liknaan ko, tan tinulongan ak nen Jehova a nabayuboan so kalmado tan maliket a puso. Talagan aliknak a walaan ak na kalmadon puso,” so insalaysay nen Jackie.

Nayarin naromog mon nipaarap ka ed sakey a situasyon a mairap mo lan nakontrol odino naresolbi a pakasigensigenan met na liknaan mo. Diad panumbok ed simbawa na Biblia a manpikasi, epektibon natalonaan mo iratan. Onia so ipapaseseg ed sikatayo na salmista: “Ipiam ed Jehova so dalan mo; manmatalek ka met ed sikato: et sikato igawa to.”​—Salmo 37:5.

Parad Pakapasesegan. Oniay imbalikas na salmista lapud apresasyon to: “Jehova, inarok so ayaman ed abung mo, tan say pasen a panayaman na gloriam. Say salik manalalagey ed sakey a mapatar a pasen; dia ed saray muyong igalang ko si Jehova.” (Salmo 26:8, 12) Papasesegen itayo na Biblia a regular a mantitipon pian mandayew ed si Jehova. Panon a napepenek na sayan panlilimog iray pankaukolan mo? Anto tay naeksperiensia na arum?

Isasalaysay nen Becky: “Agmanlilingkor iray ateng ko ed si Jehova, kanian sumpa ra ed antokaman a gawaen kon nisisiglaot ed panserbi’d Dios. Baleg a sagpot parad siak so iyatendi ed saray miting.” Liknaen nen Becky a dakel iray agamoran ton bendision lapud nambanikelan ton maparanay a naatendian iray Kristianon pantitipon. “Papabiskegen na saray miting so pananisiak, ta pian nasungdoan koray pakadesdesan ed inagew-agew bilang sakey ya estudyante, anak a bii, tan lingkor nen Jehova. Saray totoo ed loob na Kingdom Hall so nidumaduma ed saramay estudyante ed eskuelaan! Sikaray maasikaso tan matulong, tan lawas a makapabiskeg iray tongtongan mi. Sikaray peteg a kakaaro.”

On, diad panumbok ed panangiwanwan na Biblia a maparanay a mantitipon, si Jehova so mamenek ed pankaukolan tayo a napaseseg. Dia et naeksperiensia tayo so katuaan na saray salita na salmista: “Say Dios sikato so salimbengan tayo tan biskeg tayo, sikato so sakey a maparparaan a tuloy ed gonigon.”​—Salmo 46:1.

Parad Makapnek tan Makanan Kimey. “Mansiansia kayo a malet, agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan,” so ipapaseseg na Biblia. (1 Corinto 15:58) Kasin talagan makapenek so ‘kimey ed Katawan’? Kasin walay bengatlan makanan nagagawaan na Kristianon ministeryo?

 Imbalikas nen Amelia so nalilikna to: “Inyaralan ko so sakey a sanasawan dawitdawit lan mansian. Atulongan ko met so sakey ya inan say anak ton bii et maruksan pinatey. Pakagogonigonan na ina no anto kasi kipapasen na inaatey. Diad parehon kaso et say panangiyaplika na saray prinsipyo na Biblia so angitarok na deen tan ilalo ed bilay da. Aliknak so baleg a gayaga tan inkapenek lapud akatulong ak ed sikara.” Oniay kuan nen Scott: “No walay marakep ya eksperiensiam ed lawak na ministeryo, akapangigapo na balon panangiyaral na Biblia, odino nanggayagaan mo so matalonan impanpulong diad impormal a paraan, nitongtong mo itan ed saray taon nin onsabi. Napabilay mo lamet iratan a liknaan tan liket kada isalaysay mo iratan! Say ministeryo so pakagamoran na sankabalegan tan magnayon a gayaga.”

Malinew, say pangiyaplika ed panangiwanwan na Biblia ed pagmaliw ya aktibon miministro so amenek ed pankaukolan na sarayan indibidual parad makapenek tan makanan kimey. Sika met so naimbitaan a mibiang ed sayan kimey a pangibangat ed arum nipaakar ed saray dalan tan prinsipyo na Dios, diad ontan et nagunggunaan ka met.​—Isaias 48:17; Mateo 28:19, 20.

Pakagunggunaan ed Salita na Dios

Agnasuppiat a say Biblia so napanmatalkan a lapuan na makana iran panangiwanwan ed mundo natan. Pian nagunggunaan, kaukolan a tuloytuloy a manggunaet itayo. Nepeg a regular tayon basaen itan, aralen, tan dalepdepen itan. Insimbawa nen Pablo: “Seetan mo so sarayan bengatla, sikara labat so arapen mo; pian say ibubunam nipatnag komon ed saray ganagana.” (1 Timoteo 4:15; Deuteronomio 11:18-21) Ipapaseguro na Dios a no panggunaetan mon iyaplika so simbawa to a naromog ed Biblia, ontalona ka. Isisipan to: “Manmatale’ka ed Jehova . . . Dia ed saray amin a dalan mo sikato so bidbiren mo, et sikato itonton to so saray basbas mo.”​—Uliran 3:5, 6.

[Saray litrato ed pahina 31]

Say panumbok ed simbawa na Biblia et pagmaliwen ton makapenek tan makapaliket so bilay