Report na Saray Manangiyabawag na Panarian

Pangamta ed Maaron Dios

DIAD edad a 16, sakey a taga-Brazil a manngaran na Antônio so dismayado la ed bilay. Lapud liknaan ton anggapo lay kabaliksan na bilay, sikatoy nigalet ed druga tan alkoholismo. Mabetbet ton nonotey manbikkel la. Diad saraman a bekta et anonotan toy imbaga nen ina to ed sikato: ‘Say Dios et aro.’ (1 Juan 4:8) Balet iner so kawalaan na sayan maaron Dios?

Diad panasalin napapawil so bunigas to lapud impangabuso to’d saray makaadik, kinmerew na tulong si Antônio ed sakey a pari diad lugar da. Anggaman aktibon maong si Antônio ed Iglesia Katolika, dakel niray tepet to. Alimbawa, sikatoy nawewetwet ed saray salita nen Jesus a, “Nakabatan yo so katuaan, et say katuaan sikayo so gawaen to a bulos.” (Juan 8:32) Anton klase na kibulos so insipan nen Jesus? Agniiter na relihyon so antokaman a makapenek iran ebat ed saray tepet to. Diad kaunoran, nisuawi lamet si Antônio tan amawil ed dati ton bisyo. Diad tua, linmoor so inkaadik to.

Diad saman a bekta, say asawa nen Antônio, si Maria, so iyaaralan na Biblia na saray Tastasi nen Jehova. Anggaman agsusumpaen nen Antônio so panaaral nen asawa to, impasen toray Tastasi bilang “sakey a relihyon na saray Amerikano a manlilingkor parad interes na imperyalismoy Amerika.”

Ag-adismaya si Maria tan sikatoy angitilak ed loob na abung da na saray kopya na Panag-Bantayan tan Awake! iran magasin a walaan na saray artikulon isipen ton makapainteres ed si Antônio. Lapud labalabay nen Antônio so manbasa, tunggal paminsan ton bubukayen iray magasin no anggapo’d man si akulaw to. Diad sankaunaan a pankanawnawa ed bilay to, aromog toray ebat ed saray tepet to nipaakar ed Biblia. “Naimanok met so panangaro tan kaabigan ya ipapanengneng ed siak nen asawak tan saray Tastasi,” so anonotan to.

Diad kapegleyan na 1992, denesidi nen Antônio a paiyaralan na Biblia ed saray Tastasi nen Jehova. Balet, intuloy toy panagdruga tan panagbuanges to. Aminsan a lablabi la sanen sikato tan sakey a kaaro so pasempet la manlapud komunidad a panaayamay pobri iran totoo, sikaray pinatunda na saray polis. Sanen aromogan na saray polis a walay cocaine nen Antônio, sikatoy pinekpek da. Sikatoy impasobsob na sakey a polis diad pitek tan sikatoy pinatuyongan to ed lupa na de-sabog. “Laosan mo la!” so inkelyaw na arum a polis.

Legan a walad pitek si Antônio, amolimoli toy kipapasey bilay to. Say mogmon maabig iran bengatla a nanonotan to et say pamilya to tan si Jehova. Sikatoy nampikasin agano, ya onkekerew na tulong ed si Jehova. Anggapoy mapatnag a rason et sikatoy tinaynan la na saray polis. Sikatoy anempet, a kombinsidon sikatoy sinalimbengan nen Jehova.

Ginapoan nen Antônio ya inaral so Biblia tekep na apasimbalon biskeg. Kalkalna, sikatoy anguman pian napaliket to si Jehova. (Efeso 4:22-24) Lapud abayuboan toy dangka et atalonaan toray problema to nipaakar ed druga. Anggano ni, kaukolan toy manpatambal. Duay bulan to ed rehabilitation clinic tan sikatoy awalaan na pankanawnawan manbasa na pigaran palapagan na Biblia, pati say libron Pikakabat a Mangitonton ed Andi-Anggan a Bilay. Insan innabang nen Antônio so naaralan to manlapud sarayan libro ed arum a pasienti.

Sanen akapaway la si Antônio ed klinika, intultuloy toy impaiyaralan na Biblia ed saray Tastasi. Natan, si Antônio, Maria, say duaran ananak dan bibii, tan say ina nen Antônio so manlilingkor la ed si Jehova a sanuulop bilang maliket tan nankakasakey a pamilya. Onia so imbaga nen Antônio: “Natan et atalosan ko la so tuan kabaliksan na saray salitan ‘Say Dios et aro.’”

[Litrato ed pahina 8]

Pampupulong diad Rio de Janeiro