Atumangan so Abayag lan Impan-anap

“JEHOVA? Siopa si Jehova?” Anengneng nen Silvia itan a ngaran, sanen sikatoy mantaon na walora, ed sakey a Biblian Armenia, sakey a walay kablian a kayarian na pamilya ya impanengneng ed sikato na kapara ton ugaw a bii. Sikatoy nantetepet ed arum, balet ta anggapo ed Yerevan, Armenia, a panaayaman to so makapangibaga no siopa si Jehova​—anggan saray ateng to, saray maestra to, pati ni ingen ed saray ministro ed simbaan ed lugar da.

Si Silvia so binmaleg, alaos lan naneskuela, tan akapantrabaho, balet ta siansia nin agto kabat no siopa si Jehova. Bilang sakey a kalangweran, kaukolan a taynanan to so Armenia, tan kayari pigaran panaon et akasabi la ed Polandya, a nanayam ed melag a kuarton kaibay arum niran refugee. Sakey ed saray kakuarto to so maparanay a nabibisita. “Sioparay bisitam?” intepet nen Silvia. “Tastasi nen Jehova ira, wadia’ra pian bangatan da ak nipaakar ed Biblia,” so ebat ed sikato.

Akalkaliket si Silvia sanen nadngel to so ngaran a Jehova. Kaunoran et naaralan to no siopa si Jehova tan say inkamaaro to bilang Dios. Balet, ag-abayag et kaukolan ton taynan so Polandya. Nanggunaetan toy nansalimbeng diad Denmark, diad basil na Baltic Sea. Pigpigara lambengat so awit ton kayarian to, balet ta kabiangan ed saratan so literaturay Biblia ya impalapag na Tastasi nen Jehova. Diad beneg a pahina na sakey a palapagan, aromog nen Silvia iray address na saray sangan opisina na Watch Tower Society. Sakey itan ed sankaimportantian a kaykayarian to​—say kilabanay-bilay to a manlapud si Jehova!

Diad Denmark, inawit si Silvia ed kampo na saray refugee, tan inanap ton tampol iray Tastasi nen Jehova. Manlapud listaan na saray address, amta ton say kawalaan na sangan opisina na Watch Tower Society et diad Denmark diad baley na Holbæk. Balet iner itan? Si Silvia so inlugan ed tren pian niyalis ed sananey a kampo, tan diad pamapaarap to diman et dinalanan na tren so Holbæk! Sikatoy manlikliket lamet.

Walay aminsan a maag-agew kayarin tuloy na satan, nan-tren si Silvia a papawil ed Holbæk tan nanakar manlapud istasyon ya anggad sangan opisina. Nanonotan to ni: “Diad inloob ko ed hardin, yinmurong ak ed bangko tan inkuanko ed inkasiak, ‘Saya so Paraiso!’” Sikatoy ampetapetang ya inabrasa na sanga tan awalaan a siansia na panangiyaral na Biblia.

Balet tinmumbok iray pigaran inyalis-alis. Diad nanduruman panaayaman na saray refugee, kaukolan ya anapen nen Silvia iray Tastasi nen Jehova diad ontan et paulit-ulit a nigapo lamet so panangiyaral na Biblia. Siansia, kayari na duay taon, magenap la so naaralan to pian idedika toy bilay to ed si Jehova. Sikatoy abautismoan tan ag-abayag et linmoob ed sigpot panaon a ministeryo. Nen 1998 et sikatoy pinanayam la na gobiernoy Denmark diman.

Si Silvia so 26 taon la natan tan manlilingkor ed samay lugar ya angipanonot ed sikato nipaakar ed paraiso, say sangan opisina na Tastasi nen Jehova ed Denmark. “Anto ni so nibagak?” so nikuanto natan. “Aanapen ko si Jehova nanlapula’d inkaugaw ko. Natan et aromog ko la. Pinirawat kon usarey bilay ko ed panaglingkor ed sikato, tan nia wadia ak la ed Bethel. Say pikakasik et saya so magmaliw ya ayaman ko ed onsabi niran taon!”