Report na Saray Manangiyabawag na Panarian

Panagsalog ed Saray Bukel na Katuaan diad Chile

DIAD desierto na mamaamianen na Chile, nayarin onlabas ni so pigaran taon antis ya onuran. Balet, sano inmuran la, say kinmelang, inmawet lan dalin so nasakbongan na nambabangil a kolor iran rosas. Sayan marakdakep a nenengnengen so manasagyat ed saray turista manlapud intiron bansa.

Balet, wala ni mas makapainteres a nagagawa ed limog na totoo ed Chile. Saray danum na katuaan na Biblia so onaagus ed amin a sukong na dalin, tan dakel a masimoon a totoo so “ombuna” a magmamaliw a babangatan nen Jesu-Kristo. Say sakey a paraan ya uusaren pian ikayat irayan danum na katuaan et say telepono. Saray onggendan ya eksperiensia so mangiyilustra ed maabig iran resulta a nagagawaan na sayan metodo ed panagpulong.

• Sakey a sigpot-panaon ya ebanghelisador a manngaran na Karina so kinerew a mangidemostra ed programa ed sirkiton asamblea ed no panon so pampulong panamegley na telepono. Balet, agnin balot akibiang si Karina ed ontan a nengneng na panagpulong. Ta pian sikatoy napaseseg a mibiang ed programa ed asamblea, sakey a matatken kaibay akulaw to so angirepaso ed si Karina na pigaran punto ed no panon so pampulong panamegley na telepono. Sikato met so pinaseseg da a manpikasi parad panangiwanwan nen Jehova nipaakar ed satan. Ontan so ginawa to tan diad kaunoran et desidido lan salien toy ontawag.

Pinili nen Karina so numero na telepono diad asisingger a baryo. Inmebat so sakey ya operator na telepono, tan impaliwawa nen Karina so gagala to. Paborabli so ebat na operator, tan niyareglo so pantongtong lamet kayari taloy agew. Say panagpawil diad panamegley na telepono so nanresulta ed panagaral na Biblia, diad impangusar na brosyur ya Anto so Kakaukolanen na Dios ed Sikatayo? Nanlapula’d saman, nanggayagaan da so makapainteres tan mabilabilay a panagaral, tan angipawit si Karina na literatura pian ebatan iray tepet na bii.

• Inanamot a pinulongan nen Bernarda so sakey a laki ya alingon akatawag ed numero na telepono to. Imbes ya onsyodot, inkabat nen Bernarda so inkasikato bilang sakey ed Tastasi nen Jehova tan angiyopresi na tulong. Nigapo so tongtongan, tan say laki so tinmalineng ed impangipaliwawa nen Bernarda a magano lan sigpot ya ekalen na Panarian na Dios so ag-inkahustisya. Inter na laki so numero na telepono to ed si Bernarda, tan sikatoy nanggawa na panagpawil diad panamegley na telepono. Aminsan ya impantongtong da, imbasa nen Bernarda so kabiangan na libron Pikakabat a Mangitonton ed Andi-Anggaan a Bilay. Intepet na laki no panoy pakawalaan to na sakey a kopya, et angipawit si Bernarda ed sikato na sakey a kopya a walay katekep ton Biblia. Inyareglo so pamisita ed sikato na sakey ya agin laki, a natan et tuloytuloy a “manasalog” ed sayan ontutubon “tanaman.”

On, diad naklangan ed espiritual a dalin na sayan mundo, saray niyamot a bukel so manaalagar ya ombasik sano nasabi na manangiter-bilay a danum na katuaan. Nilibo a napgaan so mantutultuloy ya “ombosilak” tan “ombuna” a magmaliw a matoor iran lingkor nen Jehova a Dios.​—Isaias 44:3, 4.