Say Dalin​—Kasin Panagsubokan Labat?

AGAYLAN impakainawaan! Sikatoy akapasa. Say estudyante a dinmalan ed alay irap a duay simban eksamin so diad kaunoran et akaawat na makapaliket a balita. Nayarian to lay onggapo ed trabahon pirawrawat to.

Momoriaen na dakel a totoo so bilay ed dalin ed ontan met a paraan. Isipen da itan bilang sakey ya unona nin subok a nepeg a dalanan na amin. Saramay “makapasa” so ontuloy ed bengatlan magmaong ed sakey a nengneng na Bilay kayari ipatey. On, makapaermen, no say peles a bilay​—say basta kiwawala labat parad dakel​—so sankaabigan lan nailaloan labat na totoo. Anggaman mabunigas tan maaligwas ed bilay to, onia so ikuan na sakey ya asalambit ed Biblia a si Job: “Say too a nianak ed bii, daiset so saray agew to, tan napno ed gonigon.”​—Job 14:1.

Diad pangipapatnag ed kanonotan na dakel, inkuan na New Catholic Encyclopedia: “Say mangatatawen a gloria so pansumpalan a ginetma na Dios parad too. . . . Say liket na too so natebek a walad pankayarian to ed mangatatawen a nagnap a liket.” Sakey ya agano nin impansurbi ed Church of Christ diad Estados Unidos so mankuan ya 87 porsiento na saray inmebat so manisian sikaray maseguron onla ed tawen kayari ipatey da.

Dakel ya aliwan Kristiano so maniilalo met ed itaynan ed dalin parad magmaong a pasen kayari ipatey. Alimbawa, saray Muslim so maniilalo ya onla’d paraiso ed tawen. Saray patumbok na Pure Land iran sekta na Buddhismo ed Tsina tan Hapon so manisia a diad agmanundan pamitla day “Amitabha,” say ngaran na Buddha na Aglimitadon Liwawa, et sikaray nianak lamet ed Pure Land, odino Mamasagur a Paraiso, a panayaman da tekep na pirmin liket.

Makapainteres, say Biblia, say sankalaknaban a nipatalos tan nibunog a masanton libro ed mundo, so agmangibabagan say dalin et pasen a taynanan, a singa sakey a balitang. Singa bilang, ibabaga na Biblia: “Say matunong tawiren to so dalin tan manayam diman lawas.” (Salmo 37:29) Diad Biblia met so pakaromogan na bantog a balikas nen Jesus: “Mapalar iray maulimek: ta tawiren da so dalin.”​—Mateo 5:5, King James Version.

Say kaslakan a panmorian temporaryoy panaayam tayo ed dalin so mangisusuheri a say patey et puertan dalanan a mamaarap ed nagnap a liket diad biek a bilay. No ontan, say patey sirin et talagan bendision. Balet kasin ontan so panmoria na totoo ed inkalapagan ed patey, odino kasin panggugunaetan dan parukeyen iyan bilay? Ipapanengneng na eksperiensia a sano panggagayagaan na totoo so maabig a bunigas tan kaligenan, et agda labay so ompatey.

Anggaman ontan, lapud say bilay ed dalin et napno na kaugsan tan kairapan, say tawen so siansian momoriaen na dakel bilang say alenleneg a pasen a pakaromogan na tuan kareenan tan liket. Kasin say tawen so pasen labat na nagnap a kareenan, sigpot ya andian na kaugsan tan agpantutunosan? Tan kasin say Bilay kayari ipatey et dia labat ed mangatatawen ya ayaman? Nayarin nikelawan ka ed saray ebat na Biblia. Ipangasin ituloy a basaen.