Angitanem na Bukel so Sakey ya Optiko

Antoy pisiglaotan na saray sagpot na sakey ya optiko diad Lviv, Ukraine, ed inka-pormay kongregasyon na saray Tastasi nen Jehova a mansasalitay Ruso diad Haifa, Israel, manga 2,000 a kilometro tan pigaran bansa ed kaarawi? Saya so salaysay a pakapatnagan na inkasusto na ibabagay Biblia diad Eclesiastes 11:6: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas, no saya kasi odino saman, no sikara kasi nampadpara a maong.”

ONGGAPO so salaysay nen 1990 sanen si Ella, sakey a malangwer a biin Judio, so manaayam ed Lviv. Si Ella tan say pamilya to so manpaparaan ya onalis ed Israel. Antis a tuloy na iyalis da, walay kompromiso nen Ella ed optiko a sakey ed saray Tastasi nen Jehova. Diad saman a panaon, insebel so kimey na saray Tastasi nen Jehova ed Ukraine. Anggaman kuan, innabang na saman ya optiko ed si Ella iray nibase’d Biblia a sisiaen to. Abigla si Ella sanen imbaga ton walay  personal a ngaran na Dios. Asagyat so interes nen Ella ed satan, tan nanresulta ed maabig ya impantongtong da nipaakar ed Biblia.

Nanggayagaan nen Ella so impantongtong da kanian kinerew ton ituloy da no onsublay a simba tan diad ontumbok lamet a simba. Ombubulaslas so interes to, balet ta walay problema. Magano lay iyalis na sankapamilyaan ed Israel. Dakel ni so kaukolan ya aralen nen Ella! Pian naanamot to so nakekeraan a panaon, sikatoy inagew-agew ya impaiyaralan na Biblia anggad iyalis to. Anggaman agnituloy nen Ella so panagaral to nen kasabisabi to ed Israel, linmamut la ed puso to so bukel na katuaan. Diad pansampot na taon, sikato so masimoon lamet a manaaral na Biblia.

Binmetag so guerra ed Gulpo na Persia, tan binomba na Iraq so Israel. Saya so mabetbet a pantotongtongan. Sakey ya agew diad supermarket, arengel nen Ella a mantotongtong so sakey a pamilyan mansasalitay Ruso, ya agano nin sinmabi diman. Anggaman sikato so man-aaral ni labat na Biblia, inasinggeran nen Ella so sankapamilyaan tan innabang to’d sikara so sipan na Biblia nipaakar ed mareen a mundo. Bilang resulta, say bai na pamilya, si Galina; say ina, si Natasha; say anak a laki, si Sasha (Ariel); tan say anak a bii, si Ilana, so akibiang ed panagaral nen Ella na Biblia.

Inmuna-una ya abautismoan si Sasha ed pamilya​—anggaman ed dakel iran subok. Anggaman sikatoy honor student, sikatoy pinatakyas ed eskuelaan lapud agnaako na konsiensia to so mibiang ed para-militar a panangipasal, a kabiangay curriculum na eskuelaan. (Isaias 2:2-4) Akasabi’d Israeli High Court diad Jerusalem so kaso nen Sasha, a pandinayewan ya angiganggan a papawilen si Sasha pian nasumpal to so pan-eeskuela to. Nibalita ed intiron bansa so kaso. Bilang resulta, naamtaan na dakel a taga-Israel iray sisiaen na saray Tastasi nen Jehova. *

Kapan-graduar to ed haiskul, linmoob si Sasha ed sigpot-panaon a ministeryo na saray Tastasi nen Jehova. Sikato natan so manlilingkor bilang espisyal payunir tan sakey a matatken ed kongregasyon. Akibiang met ed sigpot-panaon a ministeryo so yugtan ton bii a si Ilana. Say ina ra tan say bai ra so bautismado met lan Tastasi. Siansia nin manbubunga so bukel ya intanem na saman ya optiko!

Kaleganan, nantultuloy so ibubulaslas nen Ella ed espiritual tan ag-abayag et manpupulong met la ed kabkaabungan. Diad pilpilimeron puerta, akatongtong nen Ella si Faina, ya agano nin sinmabi manlapud Ukraine. Si Faina so nadedepres. Naamtaan nen Ella ya antis a sikatoy tinmoktok ed abung nen Faina, say nagogonigon a bii so nampikasi ed Dios: “Agko amta no siopa ka, balet no narerengel mo ak, tulongan mo ak.” Sikaran dua nen Ella so walaan na maligligsan impantongtong. Dakel iray intepet nen Faina tan ninonot ton maong iray ebat nen Ella. Asabi panaon et sikatoy akombinse ya ibabangat na saray Tastasi nen Jehova so katuaan a manlalapud Biblia. Inuman toy eskedyul to ed panaaral to ed unibersidad ta pian nausar toy mas malaglaem a panaon ed kongregasyon tan diad panagpulong. Si Faina so abautismoan nen Mayo 1994. Sikato met so nampayunir, a susuportaan toy inkasikato panamegley  na part-time a trabaho a walay koneksion ed computer.

Nen Nobyembre 1994, leleg a manpupulong, biglan kinmapuy si Ella. Sikatoy nampa-ospital tan nalmoan unong ed impan-eksamin so ondadalan ulcer. Diad saman a labi et inmabeba anggad 7.2 so hemoglobin nen Ella. Sakey a matatken ed kongregasyon di Ella, a tsirman na say Hospital Liaison Committee (HLC) ed saman a lugar, so angiter ed saray doktor na impormasyon nipaakar ed dakel iran medikal a paraan ya agla nakaukolan ya usaran na dala. * Matalona so operasyon ya anggapoy panangisaksak na dala, tan inmabig a maong si Ella.​—Gawa 15:28, 29.

Say gynecologist nen Ella, si Karl, sakey a Judion nianak ed Alemanya, so mandinayew a maong. Insan anonotan to a saray ateng to ya akaliktar ed Holocaust, so akapikabat ed saray Tastasi nen Jehova diad panangipangawan iran kampo. Dakerakel iray intepet nen Karl. Anggaman masyadon okupado ed medikal a propesyon to, angipanaon si Karl pian makapanaral na Biblia a regular. Diad tinmumbok a taon, sikato so onaatendi la ed sinimban Kristiano iran miting.

Antoy nansumpalan na bukel ya intanem na samay optiko? Naamtaan tayo lay agawa ed si Sasha tan say pamilya to. Nipaakar ed si Ella, sikato so sakey lan espisyal payunir a ministro. Say anak ton bii, si Eina, a kapan-graduar ed haiskul, so onggagapo ed karera to bilang payunir. Manseserbi met bilang espisyal payunir si Faina. Si Karl balet, say gynecologist nen Ella, so bautismado la natan a Tasi tan sakey a ministeryal a lingkor, a manginanabang ed makatambal a pakayari na katuaan na Biblia ed saray pasienti to tan ed arum.

Say melag a grupo na saray inmalis a mansasalita na Ruso, a ginmapo bilang kabiangan na Haifa Hebrew a Kongregasyon so nagmaliw a maseseg a Russian a kongregasyon a walaan na masulok a 120 a manangipalapag na Panarian. Kabiangan ed sayan indaak et lapud inanamot na samay optiko ed Lviv so pankanawnawan mangitanem na bukel!

[Saray paimano ed leksab]

[Mapa ed pahina 29]

(Parad aktual a format, nengnengen so publikasyon)

UKRAINE

ISRAEL

[Credit Line]

Mountain High Maps® Copyright © 1997 Digital Wisdom, Inc.

[Saray litrato ed pahina 30]

Si Ella tan say anak to, si Eina

[Litrato ed pahina 31]

Say maliket a grupo na saray Tastasin mansasalita na Ruso diad Haifa. Manlapud kawigi a manpakawanan: Sasha, Ilana, Natasha, Galina, Faina, Ella, Eina, tan Karl