Kasin Ipapapuso Yo so Katuaan?

“Manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.”​—ROMA 12:2.

1, 2. Akin a mairap so pagmaliw a tuan Kristiano natan?

 MAIRAP so pagmaliw a tuan Kristiano ed sarayan kaunoran ya agew​—sarayan “mapeligron panaon a mairap a pidenengan.” (2 Timoteo 3:1, NW) On, nepeg a daegen na sakey so mundo ta pian natumbok to so ehemplo nen Kristo. (1 Juan 5:4) Nodnonoten so imbaga nen Jesus nipaakar ed Makristianon dalan: “Onloob kayo ed mainget a pinto; ta maawang so pinto, tan malapar so dalan, a mamaarap ed kaderalan, et dakel so saray onloob diman. Ta mainget so pinto, tan makisir so dalan, a mamaarap ed bilay, et daiset so saray makaromog ed sikato.” Oniay inkuanto ni: “No siopaman a too, maliket ya ontumbok ed siak, iburi to so inkasikato, tan sakbaten to so krus to ya inagew-agew, tan tumboken toak.”​—Mateo 7:13, 14; Lucas 9:23.

² No aromog la na sakey a Kristiano so makisir a dalan ya ompugta’d bilay, say ontumbok ya angat ed sikato et say pansiansia ditan. Akin ya angat itan? Lapud dedikasyon tan inkabautismoan tayo, sikatayo so puntirya na saray masilib a gawa, odino maamot iran taktika nen Satanas. (Efeso 6:11, NW, paimano’d-leksab) Aamingawen toray kakapuyan tayo tan aanamoten ton usaren iratan ta pian buyaken so espiritualidad tayo. On, sinali to lan deralen so integridad nen Jesus, kanian akin ya ipuera to itayo?​—Mateo 4:1-11.

Saray Masilib a Taktika nen Satanas

3. Panon ya impaslep nen Satanas iray panduaruwa ed kanonotan nen Eva?

³ Sakey a taktika ya uusaren nen Satanas et say pangipaslep na panduaruwa ed kanonotan tayo. Iimanoen toray maletey a kabiangan na espiritual a kinlong tayo. Dia ni lambengat ed gapo et inusar to la itan a taktika ed si Eva, ya oniay intepet to: “Nia, say Dios inkuan to, Agkayo mangan ed anggan anto a kiew na tanamanan?” (Genesis 3:1) Diad arum a panangibaga, inkuan nen Satanas a, ‘Talaga kasin nipaakseb na Dios itan a panameget ed sikayo? Nikibot to kasi so maabig a bengatla ed sikayo? Agayla, amta na Dios a diad mismon agew na pangan yo ed bunga na satan a kiew et nalukasay kamataan yo tan magmaliw kayon singa Dios, ya amta yo so maong tan mauges!’ Say panduaruwa sirin et singa bini ya intanem nen Satanas ed kanonotan nen Eva, tan inalagar to itan a tinmubo.​—Genesis 3:5.

4. Antoran panduaruwa so nayarin mangapekta ed arum natan?

⁴ Panon so panguusar nen Satanas ed sayan taktika natan? No paulyanan tayoy panagbasa tayoy Biblia, say personal a panagaral, saray pikakasi tayo, tan say Kristianon ministeryo tan saray miting tayo, mainomay itayon naimpluensiaan ed saray panduaruwan palesaen na arum. Alimbawa: “Panon tayon naseguro a saya so katuaan ya imbangat nen Jesus?” “Kasin saraya so kaunoran lan agew? Balet, wala tayo la’d koma-21 a siglo.” “Kasin asingger tayo la ed Armagedon, odino mabayag ni itan?” No onlesa so ontan iran panduaruwa, anto so gawaen tayo pian niwaklit iratan?

5, 6. Anto so nepeg tayon gawaen sano onlesa iray panduaruwa?

⁵ Angiter si Santiago na praktikal a simbawa sanen insulat to: “No siopaman ed sikayo so makulang na kakabatan, pakerewen ed Dios; a mangiter na mabunlok ed amin a too, tan agto balawen; tan niiter ed sikato. Bangbalet pakerewen ed pananikey a manduaruwa a singa sakey a dalusia, ya andi panduaruwa: ta say sayon ed dayat a nagalawgalaw na dagem, tan nibantak ed biek tan biek. Kanian agpa isipen na satan a too a naawa’to so antokaman  ed Katawan; say too a nankadua so kanonotan to agmakapansiansia ed amin ya awey to.”​—Santiago 1:5-8.

⁶ Anto sirin so nepeg tayon gawaen? Nepeg a ‘mantultuloy tayon kerewen ed Dios’ diad pikakasi so pananisia tan pakatalos pian ombiskeg so sagpot tayo ed personal a panagaral nipaakar ed antokaman a tepetepet odino panduaruwa. Nayarian tayo met so onkerew na tulong ed saramay mabiskeg ed pananisia, ya agbalot panduaruwaan ya iter nen Jehova ed sikatayo so tulong a nakaukolan tayo. Inkuan met nen Santiago: “Ontulok kayo sirin ed Dios; balet onsumpa kayo ed Diablo, et sikato so onarawi ed sikayo. Singger kayo ed Dios, et sikato so onsingger naani ed sikayo.” On, naandi iray panduaruwa tayo sano onapit itayo ed Dios panamegley na panagaral tan pikakasi.​—Santiago 4:7, 8.

7, 8. Antoray manunan estandarte pian nadetermina so nengneng na panagdayew ya imbangat nen Jesus, tan siopa so akakapet ed sarayan estandarte?

⁷ Alaen pan alimbawa so tepet a: Panon tayon naseguro ya aagamilen tayo so nengneng na panagdayew ya imbangat nen Jesus? Pian naebatan itan, antoran estandarte so nepeg tayon konsideraen? Ipapabitar na Biblia a saray tuan Kristiano so nepeg a nawalaan na tuan aro ed inkasikaran dili. (Juan 13:34, 35) Nepeg dan pasantosen so ngaran na Dios, a Jehova. (Isaias 12:4, 5; Mateo 6:9) Tan nepeg dan ipakabat itan a ngaran.​—Exodo 3:15; Juan 17:26.

⁸ Say sakey nin pakabidbiray aspekto na tuan panagdayew et say panagrespeto ed Salitay Dios, say Biblia. Nikadkaduma itan a libro a mangipaparungtal ed personalidad na Dios tan ed saray gagala to. (Juan 17:17; 2 Timoteo 3:16, 17) Niarum ni, iyaabawag na saray tuan Kristiano so Panarian na Dios bilang say alenleneg ya ilalo na too parad andi-anggaan a bilay diad paraison dalin. (Marcos 13:10; Apocalipsis 21:1-4) Ibibiig day inkasikara manlapud abulok a politika na mundo tan saray marutak a dalan na kabibilay ya aagamilen na satan. (Juan 15:19; Santiago 1:27; 4:4) Siopa natan so peteg ya akakapet ed sarayan estandarte? Saray katuaan so mamekder a saksakey labat so ebat​—saray Tastasi nen Jehova.

Panon la no Onsebang Iray Panduaruwa?

9, 10. Anto so nagawaan tayo pian natalonaan iray sebangsebang a panduaruwa?

⁹ Panon to balet no tatalonaan itayo na saray panduaruwa? Anto so nepeg tayo sirin a gawaen? Oniay ebat nen makabat ya Arin Solomon: “Ana’ko no awaten mo so saray salitak, tan yatol mo so saray ganggan ko ed sika; a singa pangikiling mo na layag mo ed kakabatan, tan ipeket mo so pusom ed pakatalos; on, no kelyawan mo so kaisipan, tan itagey mo so bosis mo nipaakar ed pakatalos; No sikato so anapen mo a singa pilak, tan sikato so usisaen mo a singa saray inyamot a kayamanan: Diad ontan natalosan mo so takot ed Jehova, tan  naromog mo so [mismon] pikakabat ed Dios.”​—Uliran 2:1-5.

¹⁰ Agta makapasagyat itan ya ideya? No mabulos tayon motekteken so kakabatan na Dios, ‘naromog tayo so mismon pikakabat ed Dios.’ On, say pikakabat ed Soberanon Katawan na uniberso so nagamoran tayo no mabulos tayon awaten tan pablien iray salita to. Say kabaliksan na satan et ontupleg itayo ed si Jehova diad pikakasi tan panamegley na personal a panagaral. Saray niyamot a kaykayamanan ed Salita to so mangekal ed antokaman iran panduaruwa tayo tan sigpot a naandi iratan panamegley na liwawa na katuaan.

11. Panon ya inapektaan na panduaruwa so katambayan nen Eliseo?

¹¹ Say malinew ya alimbawa ed no panon ya akatulong so pikakasi ed sakey a matakot tan manduaruwan lingkor na Dios et naromog ed 2 Arari 6:11-18. Say katambayan nen Eliseo so kulang na espiritual a pakatebek. Agto natebek a wadman iray mangatatawen ya armada ya ontulong ed propeta na Dios, a niliktob lay armada na Sirya. Lapud takot et oniay inkelyaw na katambayan: “Abagey, katawan ko! Panon so gawaen tayo?” Antoy inyebat nen Eliseo? “Agka antakot; ta saray wala ed sikatayo sikara so dakdakel nen saray wala ed sikara.” Balet panon a nakombinse so katambayan? Agto nanengneng iray mangatatawen ya armada.

12. (a) Panon a naandi so panduaruwa na katambayan? (b) Panon tayon niwaklit so antokaman iran panduaruwa a nayarin onsebang ed kanonotan tayo?

¹² “Si Eliseo akikasi, tan inkuanto, Jehova, pikasik ed sika, lukasan mo so saray mata to, pian makanengneng. Et si Jehova nilukasan to saray mata na tobonbalo a laki; et anengneng to: et, nia, say palandey napno ed saray kabayo tan saray luganan ya apoy ed liberliber nen Eliseo.” Diad satan a kipapasen et impanengneng nen Jehova ed katambayan iray mangatatawen ya armada a manasalimbeng ed si Eliseo. Balet, agtayo nepeg ya ilaloan ya ontan met so paraan na itulong na Dios natan. Nodnonoten, satan a katambayan na propeta so andian na kompleton Biblia ya aralen pian napabiskeg so pananisia to. Sikatayo et walaan na Biblia. No usaren tayo itan a maong, napabiskeg met so pananisia tayo. Alimbawa, nayarin morekdeken tayo so pigaran salaysay a manideskribe ed si Jehova diad mangatatawen ya ayaman to. Makasengeg ed saraya, agpanduaruwaan a si Jehova so walaan na mangatatawen ya organisasyon a manusuporta ed saray lingkor to ed sankamundoan a kimey da ed panagbangat natan.​—Isaias 6:1-4; Ezequiel 1:4-28; Daniel 7:9, 10; Apocalipsis 4:1-11; 14:6, 7.

Manalwar ed Saray Taktika nen Satanas!

13. Diad antoran paraan a panggugunaetan nen Satanas a paleteyen so pamebemben tayo’d katuaan?

¹³ Anto so arum nin paraan nen Satanas ya uusaren  to pian onletey so espiritualidad tayo tan pamebemben tayod katuaan? Sakey ed saratan et say imoralidad, a laktipen na amin a nanduruman nengneng na satan. Diad sayan mundon mapaglet ed sekso, say tatawagen a relasyon (anlemew a termino na ag-inkamatoor ed asawa) odino sanlabin relasyon (pilalawanan ya agla ingalngalep so inkaseryoso na satan) so agew-agew a nagagawa ed mapaglet ed liket a kailalakan a determinadon nawalaay panliketan antokaman so nagawa. Saray pelikula, TV, tan video so mangiyaalibansa na sayan estiloy-kabibilay. Nikakayat lay pornograpiya ed media, nagkalalo la ed Internet. Manatalaran so tukso ed saramay maupapet.​—1 Tesalonica 4:3-5; Santiago 1:13-15.

14. Akin a naplag so arum a Kristiano ed saray taktika nen Satanas?

¹⁴ Arum a Kristiano so nagmaliw a maupapet tan dinumsisan day kanonotan tan kapusoan da diad panagbantay na soft-core odino hard-core ni ingen iran pornograpikon nenengnengen. Inabuloyan day inkasikaran napelag ed makapasagyat a patit nen Satanas. Say panggawa’d satan so mabetbet a mansumpal ed ilereg na espiritualidad. Saratan so agnansiansian ‘nanugaw-ugawan ed kaugsan.’ Ag-ira nagmaliw a ‘matatken ed isip.’ (1 Corinto 14:20) Kada taon et nilibo so manasagmak ed saray resulta na agda intulok ed saray prinsipyo tan estandarte na Salitay Dios. Agda insulong tan agda impansiansia so “sankabukel a kinlong [da a nanlapud] Dios.”​—Efeso 6:10-13; Colosas 3:5-10; 1 Timoteo 1:18, 19.

Pablien so Walad Sikatayo

15. Akin a nayarin agnaapresia na arum so espiritual a tawir da?

¹⁵ Oniay inkuan nen Jesus: “Nakabatan yo so katuaan, et say katuaan sikayo so gawaen to a bulos.” (Juan 8:32) Maslak ed saray Tastasi so kinaukolan a mangipulisay ed datin estilo na kabibilay da tan saray pililimogan dan relihyon. Kanian, nayarin mas mainomay dan apresiaen so kawayangan a tarok na katuaan. Diad biek a dapag, arum a kalangweran a pinabaleg na kaatengan dan walad katuaan so agmangaapresia ed espiritual a tawir da. Ag-iran balot nagmaliw a kabiangan na palson relihyon odino ed sayan mundo a mangitatandoro ed panag-anap na liket, inkaadik ed druga, tan imoralidad. Bilang resulta, agda la nibiig so pandumaan a maong na espiritual a paraison kawalaan tayo tan say abulok a mundo nen Satanas. Arum ni ingen so inmabuloy ed tukso ta pian natawayan da so samal na mundo ya agda naeksperiensia!​—1 Juan 2:15-17; Apocalipsis 18:1-5.

16. (a) Antoran tepet so nayarin itepet tayo’d inkasikatayo? (b) Anto so nibabangat tan nipapaseseg a gawaen tayo?

¹⁶ Nakaukolan tayo ni kasin siniten iray gamet tayo ta pian nalikna tayo so ot-ot tan irap? Agtayo la kasi napanmadmaran iray makapuy lan naeksperiensia na arum? Nakaukolan tayo ni kasi so ‘ontiblak’ ed sayan mundo ta pian nasali tayo so agtayo naeksperiensia nensaman? (2 Pedro 2:20-22) Pinanonotan nen Pedro iray Kristiano nen inmunan siglo a datin kabiangan na mundo nen Satanas: “Dia ed apalabas a panaon ginawa yo so linawa na saray Gentiles, tan nanakar kayo ed liket na laman, lawan, panag-inum na alak, kasibaan, deneng tan saray makapabaing ya an-anito.” Maseguron agtayo la nakaukolan a naeksperiensia so “basaan na kaugsan” pian nasali so inkabanday na bilay. (1 Pedro 4:3, 4, NW) Diad pidumaan, nibabangat ed sikatayo iray atagey ya estandarte nen  Jehova ed moral diad saray Kingdom Hall tayo, a pinagkasentro na edukasyon ed Biblia. Tan napapaseseg itayo a mangusar ed pakayari na panagkatunongan tayo pian napaneknekan tayo a walad sikatayo so katuaan tan diad ontan et nipapuso tayo itan.​—Josue 1:8; Roma 12:1, 2; 2 Timoteo 3:14-17.

Say Ngaran Tayo Aliwa Lambengat a Tawag

17. Panon itayon magmaliw ya epektibon Tastasi nen Jehova?

¹⁷ No nipapuso tayo la so katuaan, panggunaetan tayo itan ya inabang ed arum diad amin a matukoy a pankanawnawa. Ag-itan balet mankabaliksan ya ipilit tayo itan ed saramay ag-interesado. (Mateo 7:6) Imbes, agtayo ibaing so pangipakabat tayo’d inkasikatayo bilang Tastasi nen Jehova. No walay toon mangipanengneng na interes diad masimoon a pantepet to odino diad pangawat toy sakey a publikasyon na Biblia, magmaliw itayon akaparaan a manginabang ed ilalo tayo. Siempre, saya so mangipaseseg a naynay itayon mangawit na nankakapigan literatura inerman so kawalaan tayo​—diad ayaman, diad trabaho, diad eskuelaan, diad tindaan, odino diad saray pasen na panligliwaan.​—1 Pedro 3:15.

18. Panon a makagunggunan maong ed bilay tayo so mabitar a pangipaamta tayo’d inkasikatayo bilang Kristianos?

¹⁸ Sano mabitar tayon ipaamta so talindeg tayo bilang Kristianos, napabiskeg tayo so depensa tayo sumpad maamot iran panangataki nen Satanas. No bilang ta walay panliliket lapud birthday odino Krismas odino sakey a loterya ed opisina, oniay mabetbet ya ikuan na saray katrabahoan, “Agyo la pibabalian itan a too. Tasi nen Jehova itan.” Makasengeg met ed satan, nayarin agmangistorya so totoo na mabanday iran lurey ed arapan tayo. Kanian, say pangipaamta tayo ed Kristianon talindeg tayo so makagunggunan maong ed bilay tayo, unong ya impabitar la nen apostol Pedro: “Siopa a too so makaderal ed sikayo no tumboken yo so maong? Bangmas no wala so bengatlan liknaen yo nisengeg ed katunongan, mapalar kayo.”​—1 Pedro 3:13, 14.

19. Panon tayon naseguro a wala tayo la’d kasamsampotan na kaunoran iran agew?

¹⁹ Say sakey nin gungguna ed pangipapuso ed katuaan et magmaliw itayon kombinsido a saraya so petepeteg a kaunoran lan agew na sayan sistema na bengabengatla. Naamtaan tayo a dakel ed saray propesiya na Biblia so mamantopantok la ed panaon tayo. * Say pasakbay nen Pablo a diad “saray kaunoran ya agew onsabi so saray panaon a maatap [“a mairap a pidenengan,” NW]” et pekderan na makapataktakot iran ebento nen imbeneg a siglo. (2 Timoteo 3:1-5; Marcos 13:3-37) Sakey ya artikulo na apalabas a peryodiko nipaakar ed koma-20 a siglo so apauloan na “Nanodnonotan Itan Bilang Panaon na Barbarismo.” Inkuan ni na artikulo: “Pinmatnag a say 1999 so taon a sankarakelan so pateyan diad kapaldua na siglo a sankarakelan so pateyan.”

20. Natan so panaon parad anton kiwas?

²⁰ Aliwa lan panaon natan pian nipalirpalir. Say panamendision nen Jehova so mapatpatnag ed sankalaknaban a kimey na panagbangat na Biblia a nagagawa ed intiron mundo bilang pantasi ed saray nasyon. (Mateo 24:14) Ipapuso so katuaan, tan inabang itan ed arum. Akadependi so andi-anggaan ya arapen yo ed gagawaen yo natan. Say panngiras et agmakanepegan na panamendision nen Jehova. (Lucas 9:62) Imbes, panaon natan pian ‘mansiansian malet, agnagiing, a lawas padaaken so kimey ed Katawan, bangta amta yo a say kimey yo aliwa ya anggapo so kabaliksan to ed Katawan.’​—1 Corinto 15:58.

[Paimano ed leksab]

Kasin Nanonotan Yo?

• Panon tayon niwaklit iray panduaruwa?

• Anto so naaralan tayo ed alimbawa na katambayan nen Eliseo?

• Sumpad antoran pakatuksoan ed moral so nepeg tayon bantayan a naynay?

• Akin a nepeg tayon mabitar ya ipakabat so inkasikatayo bilang Tastasi nen Jehova?

[Tepetepet Parad Panagaral]

[Saray litrato ed pahina 10]

Ontulong ed sikatayo so regular a panagaral na Biblia tan pikakasi pian niwaklit iray panduaruwa

[Litrato ed pahina 11]

Naandi iray panduaruwa na katambayan nen Eliseo panamegley na sakey a pasingawey

[Litrato ed pahina 12]

Nibabangat itayo ed saray atagey ya estandarte nen Jehova ed moral diad saray Kingdom Hall a singa saya diad Benin