Nayarian Mon Talonaay Pakadismaya!

AMINSAN et insulat na sakey a makabat a laki: “No onkapuy ka ed agew na kasegsegang, say kasil mo sikato so melag.” (Uliran 24:10) No asalim lay adismaya, maseguron miabobon ka ed imbaga to.

Anggapoy nipuera ed saray epekto na pakadismaya. Say isebang na pakadismaya so nayarin manbayag na sakey anggad duaran agew insan onkepa. Balet no nalalanor laray impakasakitan odino imbel na linawa, nayarin manbayag ni so problema. Walaray Kristianon matoor la ed loob na dakel a taon a pirmi lay inkadismaya ra, a nansengegay agda la iyaatendi ed saray miting ed kongregasyon tan agda la pibiang ed lawak a ministeryo.

No sika so nadidismaya, manpakpel ka! Atalonaan na saray matoor a lingkor nensaman so pakakadismaya ra, lapud tulong na Dios, kanian sarag mo met.

Sano Apasakitan na Arum so Liknaan Mo

Agmo nailaloan a nasalimbengan ka ed amin a palpalaran a salita odino bengatbengat a kiwas. Balet, sarag mon ag-abuloyan iray ag-inkayadyari na arum a mangapekta ed serbisyom ed si Jehova. No pinasakitan na sakey a too so liknaan mo, natulongan ka ed pangonsidera’d no panon ya atalonaan nen Ana, ya ina nen Samuel, so makapadismayan situasyon.

Desperadon nawalaay ananak si Ana, balet ta sikatoy lepes. Say mikaduan asawa na masiken to, si Penina, et angiyanak la na lalaki tan bibii. Imbes a nasibegan nen Penina so kipapasen nen Ana, sikatoy impasen ton kalaslasan tan impalikas to itan ya awawey, kanian si Ana et “nannangis tan ag-angan.”​—1 Samuel 1:2, 4-7.

Sakey ya agew et linma si Ana ed tabernakulo pian manpikasi. Naimano nen Eli, ya atagey a saserdote na Israel, a sikatoy mitimiti. Lapud agto amta a manpipikasi si Ana, inisip nen Eli a sikato so abuek. Intepet to: “Angga ed kapigan so inkabuek mo? Iwaklit mo so alak mo a manlapu ed sika.” (1 Samuel 1:12-14) Kasin naisip mo no antoy liknaan nen Ana? Sikatoy linma ed tabernakulo pian napaseseg. Seguradon agto inilaloan a sikatoy palsaan na maimpluensian maong a too ed Israel!

Sayan situasyon so sengeg la komon na inkadismayaan a maong nen Ana. Tampol la komon a tinmaynan ed tabernakulo, a kuanton agto lan balot ompawil ditan sanlegan a si Eli so manlilingkor bilang atagey a saserdote. Balet, mabitabitar a pinablin tuloy nen Ana so relasyon to ed si Jehova. Amta ton agto napaliket si Jehova no ontan so gawaen to. Ta say tabernakulo so sentro na tuan panagdayew. Impasen nen Jehova so ngaran to ditan. Tan anggaman ag-ayadyari si Eli, sikato so pinilin manangilaman nen Jehova.

Say mapagalang a reaksion nen Ana ed inap nen Eli so maabig ya alimbawa parad sikatayo natan. Agto inabuloyan so lingon impangakusa ed sikato, noagta sikatoy marespeton inmebat. “Andi, katawan ko”! inyebat to. “Sakey ak a bii a napno na ermen ed espiritu: agak inminum na alak, odino mabayani ya inumen, noag ingen inyibung ko so kamarerwak ed arap nen Jehova. Agmo ibilang so aripen mo a bii ed sakey a mauges a bii, ta dia ed daakan a sinagem ko tan inkasagyat ko nansalita ak dia.”​—1 Samuel 1:15, 16.

Kasin nipabitar nen Ana so punto to? On. Ingen, sikatoy mataktikan angibaga ed si Eli, ya agto minudmora lapud palson inap to. Lapud satan et sikato met so mapangasin inmebat: “Onla ka ed kareenan; et say Dios na Israel iyabobon to komon so kerew mo a kinerew mo ed sikato.” Bektan naareglo lay pamaakaran,  si Ana so “linma ed dalan to, tan angan; et say lupa to aliwa lan maermen.”​—1 Samuel 1:17, 18.

Anto so naaralan tayo ed sayan salaysay? Si Ana so kinmiwas a tampol pian ipetek so abaloan, balet ta ginawa to itan tekep na aralem a respeto. Bilang resulta, apansiansia to so maabig a relasyon ed si Jehova tan ed si Eli. Talagan say maong a pitatalosan tan taktika so lawas a mangamper ed iloor na angkekelag a problema!

Nepeg a bidbiren a say pangareglo ed saray agpantatalosan et mankaukolay inkamapaabeba tan pitukoytukoy na parehon dapag. No ag-onkiwas so sakey a kapananisiaan unong ed saray sagpot mon naresolbi so agpantatalosan, ipalimam la so pamaakaran ed si Jehova, a manmatalek kan asikasoen to itan ed dilin panaon tan dalan to.

Naandi Ta ed Sika so Pribilihyo ed Serbisyo?

Arum so naermenan a maong lapud kaukolan ya ikbanan da so pinabpabli ran maong a pribilihyo ed serbisyo ed Dios. Nanggayagaan dan nanlingkoran iray agagi ra, balet sanen naandi la so pribilihyo ra, liknaen dan sikara lay agmausar ed si Jehova odino ed organisasyon to. No ontan so naliliknam, makaaral ka manlapud alimbawa na managsulat na Biblia a si Marcos, a tinawag met a Juan Marcos.​—Gawa 12:12.

Akiulop si Marcos ed di Pablo tan Bernabe nen inmunan impanbaroy da bilang misionaryo, balet legay biahe ra et tinaynan tora tan pinmawil ed Jerusalem. (Gawa 13:13) Diad saginonor, labay nen Bernabe ya itagar si Marcos ed sakey nin biahe. Balet, inkuan na Biblia: “Si Pablo agto pinaabig ya itarok so akisian ed sikan nanlapu ed Pamfilia, tan agtinmumbok ed sikara ed saman a gawa.” Ag-akiabobon si Bernabe. “Et agawa ed sikara,” intuloy na salaysay, “so baleg a sangsangan, a nansian [si Pablo tan Bernabe], et si Bernabe inala to si Marcos, et nansakay a linma ed Chipre. Balet si Pablo, nen pinili to si Silas, sinmipot.”​—Gawa 15:36-40.

Maseguron asakitan si Marcos sanen naamtaan ton agla labay nen respetadon apostol Pablo so mikimey ed sikato tan nansian si Pablo tan Bernabe lapud nansangsangan da iray kualipikasyon to. Balet agni angangga ditan so istorya.

Kaukolan di Pablo tan Silas so kaiba nin manbaroy. Diad insabi ra ed Listra, walay aromog dan onsalat ed si Marcos, sakey a balolakin manngaran na Timoteo. Diad saman et nayarin duara odino taloran taon labat ya abautismoan si Timoteo sanen sikatoy pinili ra. Diad biek a dapag, mililimog la si Marcos nanlapula’d inkiletneg na Kristianon kongregasyon​—diad tua et abaybayag ni nen si Pablo a mismo. Ingen, si Timoteo so apabtangan na pribilihyo.​—Gawa 16:1-3.

Antoy reaksion nen Marcos sanen akabatan ton say insalat ed sikato et ugaw ni, agni tanton atalitalin laki? Anggapoy ibabaga na Biblia. Anggaman kuan, talagan nipanengneng a si Marcos et nansiansian aktibo ed panaglingkor ed si Jehova. Inanamot toray pribilihyo a nipabtang ed sikato. Anggaman ag-akapanserbi a kaiba di Pablo tan Silas, sikatoy kaiba nen Barnabas a nambaroy diad Chipre, a binalegan nen Barnabas. Nanlingkor met si Marcos a kaiba nen Pedro diad Babilonia. Ag-abayag, sikatoy naikday panknawnawa a mikimey ed si Pablo​—tan Timoteo​—diad Roma. (Colosas 1:1; 4:10; 1 Pedro 5:13) Diad saginonor et apuyanan ni ingen si Marcos a mansulat na sakey ed saray apatiran Ebanghelyo!

Walay makanakanan naaralan ed sayan amin. Ag-apagaan si Marcos a naandian na pribilihyo ya agto la naapresia iray walan pribilihyo to. Nansiansian okupado si Marcos ed panaglingkor ed si Jehova, kanian sikatoy benendisionan nen Jehova.

Kanian no naandian ka na pribilihyo, agka nadidismaya. No pansiansiaen moy positibon awawey tan mansiansian okupado, walaray pribilihyon niiter ed sika. Dakel so nagawaan ed kimey na Katawan.​—1 Corinto 15:58.

Adismaya so Sakey a Matoor a Lingkor

Aliwan mainomay so pipuligesgesan parad pananisia. No maminsan et nadismaya ka.  Diad ontan et liknaen mo ni ingen a sikay mankakasalanan lapud pakakadismaya, a nibagam ya aliwan nepeg itan a liknaen na matoor a lingkor na Dios. Isipen pa si Elias, sakey ed saray matalonggaring a propeta na Israel.

Sanen akabatan nen Reyna na Israel a Jezabel, sakey a panatikon manangiyalibansay panagdayew ed Baal, a pinatey nen Elias iray propeta nen Baal, insamba ton sikatoy ipapatey. Nipaarap la si Elias ed kakabusol a mas mabiskeg ni nen si Jezabel, ingen sikatoy bigbiglan adismayan maong kanian labay to lay ompatey. (1 Arari 19:1-4) Panon ya ontan so agawa? Walay alingwanan ton bengatla.

Alingwanan nen Elias so ompanon ed si Jehova bilang Lapuan na biskeg to. Siopa tay angiter ed si Elias na pakayarin mamaoli tan onarap ed saray propeta nen Baal? Si Jehova. Seguradon sikatoy inikdan nen Jehova na biskeg ya onarap ed sanok nen Reyna Jezabel.​—1 Arari 17:17-24; 18:21-40; 2 Corinto 4:7.

Anggan siopa et nayarin temporaryon onletey ed panmatalek to ed si Jehova. Singa si Elias, no maminsan et imbes ya usaren so “kakabatan a wala a manlapu ed tagey” pian resolbien iray problema, say panmoriam et panmoria na too. (Santiago 3:17) Balet, ag-inkaindan nen Jehova si Elias lapud sayan temporaryon inkapuy.

Binmatik si Elias ed Beer-seba ya amaarap ed kalawakan, ya isipen ton anggapo lay makaromog ed sikato diman. Balet sikatoy aromog nen Jehova. Sikatoy angibaki na anghel a manligliwa ed Elias. Sineguro na anghel a si Elias et walaan na kapanluton tinapay a nakan tan makarepreskon danum ya inumen. Kayarin nampainawa si Elias, sikatoy inwanwan na anghel a manbiahe na ngalngali 300 a kilometro a mamaarap ed Palandey Horeb, a ditan nagkalalo nin pabiskegen nen Jehova.​—1 Arari 19:5-8.

Diad Palandey Horeb, naimatonan nen Elias so makapabiskeg-pananisian inkipatnag na pakayari nen Jehova. Insan, diad mapalna tan makalnan bosis et sikatoy pinaseguroan nen Jehova ya agto bukbukor. Sikatoy kaiba nen Jehova, tan 7,000 ed agagi to so kaiba to met, anggaman ag-ira kabat nen Elias. Diad kaunoran et sikatoy pinabtangan nen Jehova na kimey a gawaen. Ag-inekal nen Jehova si Elias bilang propeta to!​—1 Arari 19:11-18.

Wala so Tulong

No sagpaminsan kan makasagmak na pakadismaya, ondakep so liknaan mo no sika so manpainawa odino mangan na masustansian tagano. Naimano nen Nathan H. Knorr, a nanlingkor bilang membro na Mananguley ya Ulop na Tastasi nen Jehova anggad impatey to nen 1977, a mabetbet ya ompatnag ya agtanton problema iray angkabaleg a problema no magenap so ugip ed labi. Balet, no tuloytuloy ni so problema, agmagenap itan a remedyo​—kaukolan moy tulong ta pian natalonaay pakadismaya.

Angibaki si Jehova na anghel pian pabiskegen si Elias. Natan et mangiiter so Dios na panamaseseg diad panamegley na mamatatken tan arum niran matakken ed espiritual a Kristiano. Talagan napaneknekan na saray matatken so ‘pagmaliw dan singa sakey ya amotan manlapud dagem.” (Isaias 32:1, 2) Balet pian napaseseg da ka, kaukolan moy onasingger ed sikara. Anggaman adismaya si Elias, sikatoy nambiahen amaarap ed Palandey Horeb pian paibangat ed si Jehova. Naaawat tayo so makapabiskeg a bangat diad panamegley na Kristianon kongregasyon.

Sano makaawat itayo na tulong tan makpel ya arapen iray subok, singa say impakasakitan na linawa odino inkaandi na saray pribilihyo, itandoro tayo so dapag nen Jehova nipaakar ed importantin isyu. Anton isyu? Tutukoyen nen Satanas a saray totoo et manlilingkor lambengat ira ed si Jehova lapud pankaabigan dan dili. Ag-ibuburi nen Satanas a manlingkor itayo ed Dios sano marakep so bilay tayo, balet ikakatunongan to ya ontunda itayon manlingkor ed Dios sano walaray problema tayo. (Job, kapitulo 1 tan 2) Diad agnagiing a pantultuloy ed serbisyo ed si Jehova anggaman walay pakadismaya, makapangiter itayo na ebat ed tilan panamakasalanan nen Satanas.​—Uliran 27:11.

 Si Ana, Marcos, tan Elias so awalaan na problema ya aganon angekal na gayaga ra. Balet atalonaan daray problema ra tan awalaan ira na marakep ya impanbilay. Diad tulong nen Jehova, natalonaan mo met so pakadismaya!