Istorya ed Bilay

Inantabay Ak nen Jehova ed Amin ya Agew Ko

UNONG ED SALAYSAY NEN FORREST LEE

Kapkapankompiska na popolis ed saray ponograpo tan literaturay Biblia mi. Say Guerra Mundial II so angitarok na pangibaraanan na saray sumusumpa a sagyatey balon gobernador-heneral na Canada pian ideklara ton ilegal so kimey na Tastasi nen Jehova. Agawa iya nen Hulyo 4, 1940.

SAMAN ya agawa so ag-angebbiew, ta angala kami ni na dakel a literatura ed simpenan na satan tan intuloy mi so nampulong. Lawas kon nodnonoten iray salita nen Dad ed saman ya inkagawa: “Ag-itayo main-inomay a napatunda. Si Jehova so angiganggan ed sikatayon manpulong.” Diad saman a panaon et siak so makitkitsing a mantaon na samplora. Balet anggad natan et say determinasyon tan seseg nen Dad parad ministeryo so naynay a mangipapanonot ed no panon a say Dios tayo a Jehova et aantabayan toray matoor ed sikato.

Diad tinmumbok ya impamatunda ed sikami na popolis, agda lambengat sinamsam so literatura mi noagta impisok da met si Dad, ya ataynanan si Mom a walaay apatiran ugugaw. Agawa iman nen Setyembre 1940 diad Saskatchewan. Ag-abayag kayari na saman siak so pinataynan ed eskuelaan lapud pananumbok ko’d nipasal ed Biblian konsiensia tan lapud agko pansaludo ed bandira odino pangansion na national anthem. Lapud intuloy koy paneskuelak diad panamegley na korespondensia nitukoytukoy ko so eskedyul ko, tan lalon akapibiang ak ed panagpulong a kimey.

Nen 1948 et akerew ed saray payunir, sigpot-panaon a ministro na Tastasi nen Jehova, ya onalis ed bukig na Canada. Kanian siak so linma a nampayunir diad Halifax, Nova Scotia, tan diad Cape Wolfe, Prince Edward Island. Diad tinmumbok a taon, inawat ko so imbitasyon a mantrabaho na duay simba ed sangan opisina na Tastasi nen Jehova ed Toronto. Saman a duay simba  so nagmaliw a masulok ya anem taon na makatumang a serbisyo. Ag-abayag et akabat ko si Myrna, a singa siak et walaan met na mipadparan panangaro ed si Jehova, tan sikami so nankasal nen Disyembre 1955. Nanpirmi kami ed Milton, Ontario, tan ag-abayag et apormay balon kongregasyon diman. Tan nagmaliw a Kingdom Hall so silong na abung mi.

Pilalek a Palaknaben so Ministeryo Mi

Diad tinmumbok iran taon, nagmaliw kamin atateng na anemiran nantutumbokan ya ananak. Say panguloan ya anak mi et si Miriam. Insan tinumbokan di Charmaine, Mark, Annette, Grant, tan say sankayugtanan et si Glen. Mabetbet kon nasabian manlapud trabaho iray anak mi ya akalespak ed liber na fireplace (dangdangan), ya ibabasaan ira nen Myrna na Biblia, ipapaliwawa toray salaysay ed Biblia tan ipapaslep to ed kapusoan da so peteg a panangaro ed si Jehova. Lapud maaron pananuporta to et amin ya ananak mi so awalaan na magenap a pikakabat ed Biblia nen ugugaw nira.

Nipasepsep ed kanonotan tan pusok so inkaseseg nen tatay diad ministeryo. (Uliran 22:6) Kanian nen 1968, sanen naimbitaan iray pamilyan Tastasi nen Jehova ya onalis diad Sentral tan Abalaten ya Amerika pian mitulongan ed panagpulong diman, pinilalek met na pamilya mi so onla. Diad saman et saray anak mi so mantaon na 5 ya anggad 13, tan anggapo’d sikami so makaamta na lenguahen Español. Diad panumbok ed niiter a direksion, siak so linma ed pigaran bansa pian amtaey kabibilay diman. Kasempet ko, masimoon min kinonsidera bilang pamilya iray alternatibo tan denesidi mi so onalis ed Nicaragua.

Impanlingkor ed Nicaragua

Kasabi Oktubre 1970 sikami lay walad balon ayaman mi, tan diad loob na taloy simba et siak so naasainan la na antikey a parti ed programa diad miting ed kongregasyon. Nanir-irapan koy partik panamegley na pigpigaran salitan Español tan sinampotan itan diad impangimbita ed intiron kongregasyon diad abung mi parad cerveza ed Sabado na 9:30 kabuasan. Say labay kon ibaga et servicio, salitan parad lawak a serbisyo, balet ta amin so inimbitaan kon manserbisa. Talagan sakey ya angat so panaral na lenguahe!

Diad inmuna, insulat ko’d limak so presentasyon ko tan impasal itan bangta mamapaarap ak la’d sakey a puerta. Oniay ibagak: “Katekep na sayan libro et nawalaan kayoy libren panagaral na Biblia.” Sakey a toon angawat na opresik so angibaga ed saginonor a kaukolan ton atendian iray miting mi pian amtaen so labay kon ibaga ed sikato. Sayan laki so nagmaliw a sakey ed saray Tastasi nen Jehova. Agaylan napatnagan a say Dios so mamapabaleg ed saray bini na katuaan ed kapusoan na saramay mapaabeba, a singa binidbir la nen apostol Pablo!​—1 Corinto 3:7.

 Kayari na ngalngali duay taon diad kabiseran syudad na Managua, akerew ed sikamin onalis ed bandad abalaten na Nicaragua. Akikimey kami diman ed kongregasyon diad Rivas tan ed kabangibang iran nisulinek a grupo na saray interesado. Si Pedro Peña, sakey a matoor a masiken lan Tasi, so akiulop ed siak sanen binisita mi irayan grupo. Say sakey so walad isla a bolkan diad Lake Nicaragua, a wala lambengat diman so saksakey a pamilya na Tastasi nen Jehova.

Anggaman mairap-bilay iyan pamilya, sikaray nanggunaet a tuloy pian nipanengneng day panamabli ra ed ibisita mi. Diad labin insabi mi et akatarya la so panpangdeman mi. Nansiansia kami diman ed loob na sakey simba, tan dakel ed saramay makaaron totoo diman a mamapabli ed Biblia so anginabang na tagano ra ed sikami. Aliketan kami ed inyatendi na 101 ed publikon paliwawa nipaakar ed Biblia ed saman a Simba.

Liknaen kon say mananustunin pakayari nen Jehova so nipatnag sanen, diad sakey nin inkagawa et kaukolan min bisitaen so sakey a grupo na interesadon totoo diad kapalandeyan ya asingger ed ketegan na Costa Rica. Diad samay agew ya ipikal mi la, siak so sinamar nen Pedro, balet siak so akarukol lapud malaria. “Ag’ak makakar, Pedro,” inkuanko. Inyan toy dakulap to ed moling ko, inyebat to: “Atagey so petang mo, balet kaukolan moy onla! Manaalagar iray agagi.” Insan sikato so angibalikas na sakey ed saray sankasimoonan a pikakasin nadngel ko ed kapiganman.

Kayari et inkuanko: “Mangala kay fresco (tabol na prutas) a nainum mo. Akaparaan ak la kayari na samploran minuto.” Duaran pamilya na Tasi so manaayam ed samay binisita min lugar, tan sikaray nanasikaso a maong ed sikami. Diad kaimbuasan sikami so akiulop ed sikara a nampulong diman, anggaman siak so makapkapuy ni lapud inagem. Agaylan makapabiskeg so pakanengneng ed masulok a sanlasus a totoon inmatendi ed samay miting ed Simba!

Inmalis Lamet

Nen 1975 say komapiton anak mi, si Vaughn, so nianak. Diad tinmumbok a taon, kaukolan mi ompawil ed Canada lapud pinansyal. Say iyalis manlapud Nicaragua so aliwan mainomay lapud talagan alikna mi so mananustunin pakayari nen Jehova legay impansiansia mi diman. Sanen sikami lay onalis et masulok a 500 a nanlapu ed teritoryay kongregasyon mi so onaatendi la ed saray miting.

Asasakbay, sanen aturo kami nen marikit kon Miriam bilang espisyal payunir diad Nicaragua, intepet nen Miriam ed siak: “Daddy, no kaukolan ya ompawil kayo ed Canada, abuloyan yoak ya ontilak ni dia?” Anggapoy intension kon taynan iman a lugar, kanian imbagak: “Siempre, on!” Kanian sanen inmalis kami, si Miriam so atilak pian nituloy toy sigpot-panaon a ministeryo to. Diad saginonor et sikatoy akiasawa ed si Andrew Reed. Nen 1984 et sikaray inmatendi ed koma-77 a klase na Gilead, say eskuelaan na saray misionaryo na Tastasi nen Jehova, a diad saman et naromog diad Brooklyn, New York. Natan et si Miriam tan say masiken to so manlilingkor ed Dominican Republic, a susumpalen to so pilalek a nipaslep ed sikato na saray matalonggaring a misionaryo diad Nicaragua.

Kaleganan, saray salita nen Dad ya, “ag-itayo main-inomay a napatunda” so siansian wala ni’d pusok. Kanian kasabi 1981 sanen akatipon kami la na magenap a kuarta, sikami so pinmawil ed Sentral Amerika, balet natan et diad Costa Rica. Legan kamin manseserbi diman, sikami so naimbitaan ya ontulong ed kipaalagey na balo iran pasilidad na sanga ra. Balet, nen 1985 say anak min si Grant so kaukolan a manpatambal, kanian pinmawil kami ed Canada. Si Glen so nansiansia ed Costa Rica pian mantrabaho ed konstruksion a proyekto na sanga, bangta si Annette tan Charmaine so nanlingkor bilang espisyal payunir. Parad sikami iran inmalis manlapud Costa Rica et agmin balot inisip ya agkami la ompawil.

 Say Impangarap ed Problema

Malinlinak so imbutay na kabuasan ed saman na Setyembre 17, 1993. Sikami nen Mark, a panguloan ya anak min laki so manpepeket na tisa ed atep. San-abay kamin mantratrabaho tan pantotongtongan mi so nipaakar ed saray espiritual a bengatla, a singa niyugali mi lan gagawaen. Kabekta et atolin ak a sengegay inkaplag ko manlapud atep. Sanen naimasmasan ak, say nanenengneng ko et masnag iran silew tan totoon aka-amputi. Wala ak ed emergency room na ospital.

Lapud ibabaga na Biblia, say inmunan reaksion ko et: “Anggapoy dala, anggapoy dala!” (Gawa 15:28, 29) Agaylan makapaseguro so pakadngel ed si Charmaine a mangibabagay: “Agkayo mapaga Dad. Wadia kamin amin.” Akabatan ko ed saginonor ya anengneng na saray doktor so medical document ko, tan agbalot problema so panangusar na dala. Aputer so tenger ko tan siak so sigpot a paralisado, ya agko anggan makaengas a bukor.

Lapud agak makagalaw, nagkalalon kaukolan koy pananulong nen Jehova. Siak so binotbotan ed beklew (tracheotomy), pian niiyan so respirator tube, kanian asaraan so dalanan na dagem diad kulongkulong ko. Agak la makapansalita. Kaukolan a nengnengen na totoo so imitimitik pian natalosan day labay kon ibaga.

Binmaleg so gastos a tampol. Lapud say akulaw ko tan maslak ed ananak ko so walad sigpot-panaon a ministeryo, inumameng ko no kasin kaukolan da lan taynan iyan serbisyo lapud sarayan responsabilidad ed pinansyal. Balet, si Mark so akalmo na trabaho a diad loob lambengat na taloy bulan et akatulong pian nasapotan so gastos. Bilang resulta, amin so akapansiansia ed sigpot-panaon a ministeryo nilikud ed sikamin sanasawa.

Nilasus a kard tan sulat a nanlalapud anemiran nanduruman bansa so impepeket ed saray dingding na kuartok ed ospital. Si Jehova so talagan mangaantabay ed siak. Tinulongan met na kongregasyon so pamilyak diad impangitarya na saray nakan, legan na limara tan kapalduan bulan a wala ak ed intensive care unit. Nginarem-ngarem, walay Kristianon matatken ya ombisita ed siak pian ibasa to ed siak so Biblia tan saray palapagan na Biblia, ontan met ed pangisalaysay na saray makapaseseg ya eksperiensia. Duaran kapamilyaan ko so kaibak a manpaparaan parad kada miting mi ed kongregasyon, kanian anggapon balot so asaew kon makanan espiritual a tagano.

Legan a wala ak ni ed ospital, walay probisyon ed siak pian atendian so espisyal ya agew na asamblea. Saray walad ospital so angiyuksoy pian walay rehistradon nars tan respiratory technician a sanagew a mangasisti ed siak. Agaylan liket lamet so pakapilimog ed saray Kristianon agagik! Agkon  balot nalingwanan so impakanengneng ed nilasus ya akapila pian mangumosta ed siak.

Panamasiansia na Espiritualidad

Ngalngali sakey taon kayari na aksidenti, sarag ko la so onsempet ed pamilyak, anggaman kaukolan ko ni so 24-oras ed kada agew a panangasikaso na nars. Sakey a nikaduman luluganan so akatulong ed siak pian makapiaral ak, diad ontan et mataltalag ko lan nasaew. Balet, nepeg kon aksobien a talagan kaukolay determinasyon pian makaatendi. Nanlapula’d insempet ko, naatendian ko lan amin iray distriton kombension.

Diad saginonor, nen Pebrero 1997, pinmawil so pakasarag kon mansalita anggaman limitado lambengat. Arum ed saray nars ko so maapresian ontatalineng ed inanabang ko’d sikaran nibase’d Biblia ya ilalok. Sakey a nars so angibasa ed siak na intiron libro a Jehovah’s Witnesses​—Proclaimers of God’s Kingdom pati met ed arum niran palapagan na Watch Tower. Misusulatan ak ed totoo diad pangusar na bislak ed computer. Anggaman makapakesaw so pangitelpek panamegley na bislak, makapatumang so pantultuloy a pakapibiang ed ministeryo.

Manot-ot a maong so laman ko. Balet ompatnag a sano siak so manginanabang ed arum na saray katuaan ed Biblia odino narerengel a nibabasa ed siak, naiinawaan ak. Tunggal paminsan et siak so manpupulong diad lansangan a kaibay masuportan akulaw ko, a mangipatalos parad siak sano nakaukolan koy tulong. Aminpiga ak ya akapan-auxiliary payunir. Say panlilingkor ko bilang sakey a Kristianon matatken so panggagayagaan ko, nagkalalo la sano asinggeran ak na saray agagi ed saray miting odino siak so bisitaen da ed abung pian natulongan tan napaseseg ko met ira.

Talagan aksobien ko a main-inomay so paka-depres. Kanian sano siak so nadidismaya, tampol a manpikasi ak ta pian nawalaan ak na gayaga. Labi-agew ya ipipikasik ed si Jehova ya antabayan to ak. Lawas ak a masayaksak no walay sulat odino ombisita ed siak. Say pambasa na Say Panag-Bantayan odino Awake! a magasin so mamapano met ed kanonotan ko na makapabiskeg iran punto. Nanduruman nars so mangibabasa ed siak na sarayan magasin. Nanlapula’d inka-aksidentik, aminpiton danay ko lan nadngel so intiron Biblian nirekord ed cassette tape. Saraya so kabiangan ed nanduruman paraan a pangaantabay nen Jehova ed siak.​—Salmo 41:3.

Say impanguman na saray sirkumstansiak so angiter ed siak na malaglaem a panaon pian dalepdepen no panon itayon ibabangat na Baleg ya Instruktor tayo, si Jehova, parad bilay. Iikdan to itayo na suston pikakabat nipaakar ed linawa tan gagala to, makabaliksan a ministeryo, simbawa nipaakar ed sekreto na liket ed pamilya, tan pakatebek no antoy gawaen ed panaoy kairapan. Benendisionan ak nen Jehova na matoor tan maong ya asawa. Saray ananak ko so matoor a tinmulong ed siak, tan alay liket ko ta amin da so walad sigpot-panaon a ministeryo. Diad tua et sanen Marso 11, 2000, say anak min si Mark tan say akulaw ton si Allyson, so nangraduar ed koma-108 a klase na Gilead School tan niasain ira ed Nicaragua. Sikamin sanasawa so akaatendi ed impangraduar da. Sarag kon ibaga ya inuman na kairapan so bilay ko balet ta agto nauman so walad pusok.​—Salmo 127:3, 4.

Pisalamatan ko si Jehova ed kakabatan ya inter to ed siak ya akatulong pian nipatawir ko met ed pamilyak so espiritual a tawir ya inawat ko. Apabiskeg tan apaseseg ak ed pakanengneng ed ananak ko a manlilingkor ed Manamalsa ra tekep na awawey a mipadpara ed si tatay ko, a kuanto: “Agtayo main-inomay a napatunda. Si Jehova so angiganggan ed sikatayon manpulong.” On, si Jehova so angantabay ed siak tan ed pamilyak ed amin ya agew mi.

[Litrato ed pahina 24]

Kaibay Dad, tan saray kuyak tan si atsik, asingger ed house car mi, ya inusar legan na panagpayunir mi. Wala ak ed bandad kawanan

[Litrato ed pahina 26]

Kaibak so akulaw ko, si Myrna

[Litrato ed pahina 26]

Agano nin litrato na pamilya mi

[Litrato ed pahina 27]

Siansia nin manpupulong ak panamegley na saray sulat