Iteen so Kanonotan ed Espiritu tan Manbilay!

“Say panisip ed espiritu et mankabaliksan na bilay.”​—ROMA 8:6, NW.

1, 2. Panon ya impandumaan na Biblia so “laman” tan “espiritu”?

 MAIRAP a mantinien so malinis a talindeg ed moral ed imaton na Dios diad utel na sayan mauges a sosyedad a mangitatandoro ed panamenek ed saray pilalek na laman. Balet, impandumaan na Kasulatan so “laman” tan “espiritu,” a mangipapabitar ed malinew a pandumaan na makapasinagem iran pansumpalan na isuko na sakey ed makasalanan a laman tan abendito iran resulta na panpasakop ed impluensia na masanton espiritu na Dios.

² Alimbawa, inkuan nen Jesu-Kristo: “Say espiritu sikato, so mangiter na bilay; say laman anggapo so gungguna to. Saray salita a sinalitak ed sikayo sikara so espiritu, tan sikara so bilay.” (Juan 6:63) Oniay insulat nen apostol Pablo ed saray Kristiano ed Galacia: “Say agapen na laman sumpa ed espiritu, et say espiritu sumpa ed laman; ta saraya mansumpaan ira ed sakey tan sakey.” (Galacia 5:17) Inkuan met nen Pablo: “Say mantanem na nipaakar ed laman ton dili, dia ed laman manani na kabulok; balet say mantanem na nipaakar ed espiritu, dia ed espiritu manani na bilay ya andi-angga.”​—Galacia 6:8.

3. Anto so nakaukolan ta pian nibulos itayo ed makapuy iran pilalek tan tendensia?

³ Say masanton espiritu nen Jehova​—say aktibon puersa to​—so epektibon makapangekal ed agmalinis iran “kalawanan na laman” tan ed makadesyang a panangaripen na makasalanan a laman tayo. (1 Pedro 2:11) Pian nibulos itayo ed panetekmel na makapuy iran tendensia, makana so pakawalaan na tulong na espiritu na Dios, lapud ta oniay insulat nen Pablo: “Say panisip ed laman et mankabaliksan na patey, balet say panisip ed espiritu so mankabaliksan na bilay tan kareenan.” (Roma 8:6, NW) Anto so kabaliksan na panisip ed espiritu?

“Say Panisip ed Espiritu”

4. Anto so kabaliksan na “panisip ed espiritu”?

⁴ Sanen insulat nen Pablo so nipaakar ed “panisip ed espiritu,” inusar to so Griegon salita a mankabaliksan na “dalan na panag-isip, (akateenan na) kanonotan, . . . getma, ugagep, panggugunaetan.” Say misiglaotan a verb so mankabaliksan na “manisip, sinononot ed sakey a paraan.” Kanian, say kabaliksan na panisip ed espiritu et babanlongan, dadagdagen, tan papakiwasen na aktibon puersa nen Jehova. Kabaliksan na satan a mabulbulos tayon paimpluensiaan so kanonotan, saray inklinasyon, tan ugagep tayo ed masanton espiritu na Dios.

5. Diad anton laknab so nepeg tayon pampasakop ed impluensia na masanton espiritu?

⁵ Say laknab na pampasakop tayo ed impluensia na masanton espiritu so indanet nen Pablo sanen sinaglawi to so pagmaliw a ‘lingkor ed espiritu.’ (Roma 7:6) Makasengeg ed pananisia ra ed dondon bagat nen Jesus, nibubulos iray Kristiano manlapud panangaripen na kasalanan tan “inatey” la ra sirin ed datin kipapasen da bilang ariripen na satan. (Roma 6:2, 11) Saramay piguratibon inatey ed ontan a paraan so mabilay nin siansia ed pisikal tan bulos la natan ya ontumbok ed Kristo bilang ‘aripen na inkatunong.’​—Roma 6:18-20.

Makapasagyat a Panamasimbalo

6. Anton panamasimbalo so naeksperiensia na saramay nagmaliw ya ‘aripen na inkatunong’?

⁶ Makapasagyat a maong so kapasimbalo manlapud pagmaliw ya ‘aripen na kasalanan’ insan magmaliw lan managserbi ed Dios bilang ‘aripen na inkatunong.’ Nipaakar ed saramay akaeksperiensia ed ontan a pananguman, insulat nen Pablo: ‘Naurasan kayo la, apasantos kayo la, nibilang kayo la a matunong ed ngaran na Katawan a Jesu-Kristo tan dia ed espiritu na Dios tayo.’​—Roma 6:17, 18; 1 Corinto 6:11.

7. Akin ya importanti so pakawalaan na panmoria nen Jehova ed saray pamaakaran?

 ⁷ Ta pian naeksperiensia tayo so ontan a makatantandan kapasimbalo, nakaukolan tayo nin amtaen ya unona so panmoria nen Jehova ed saray pamaakaran. Pigara lan siglo so linmabas, oniay masimoon ya inkerew nen salmistan David ed Dios: “Iparungtal mo ed siak so saray dalan mo, O Jehova . . . Itonton moak ed katuaan mo, tan ibangat moak.” (Salmo 25:4, 5) Tinalineng nen Jehova si David, tan naebatan To so ontan a pikakasi parad saray lingkor to met natan. Lapud say dalan na Dios tan say katuaan to so malinis tan masanto, say pandalepdep ed saratan so makatulong sano natutukso itayon mamenek ed marutak iran pilalek na laman.

Say Makanan Betang na Salitay Dios

8. Akin a nakaukolan tayoy panagaral na Biblia?

⁸ Say Salitay Dios, say Biblia, so apawala panamegley na espiritu to. Kanian, say sakey a makanan paraan pian onkurang ed sikatayo so espiritu et diad pambasa tan panaral ed Biblia​—ya inagew-agew no posibli. (1 Corinto 2:10, 11; Efeso 5:18) No panoen tayo so kanonotan tan kapusoan tayo na saray katuaan tan prinsipyo ed Biblia, natulongan itayon makatalindeg ed saray panangataki ed espiritualidad tayo. On, sano onlesa iray imoral a pakatuksoan, ipanonot ed sikatayo na espiritu na Dios iray Makasulatan a panonot tan manangigiya iran prinsipyo a mamabiskeg ed determinasyon tayon onkiwas unong ed linawa na Dios. (Salmo 119:1, 2, 99; Juan 14:26) Kanian, ag-itayo napalikdo ed panggaway makapuy.​—2 Corinto 11:3.

9. Panon a napabiskeg na panagaral na Biblia so determinasyon tayon mamasiansia ed siglaotan tayo ed si Jehova?

⁹ Diad pantultuloy tayo ed masimoon tan maseet a panaral na Kasulatan diad tulong na saray nibase’d Biblian publikasyon, say espiritu na Dios so mangimpluensia ed nonot tan puso tayo, a paaralemen na satan so panagrespeto tayo ed saray estandarte nen Jehova. Say siglaotan tayo ed Dios so magmaliw a sankaimportantian a bengatla ed bilay tayo. Sano nidunget itayo ed pakatuksoan, niwaklit tayo so pannonot a makapaliket so pangagamil na makapuy a bengatla. Imbes, say pampagaan tayon tampol et say panmantini ed katooran tayo ed si Jehova. Say panamabli tayon maong ed siglaotan tayo’d sikato so managyat ed sikatayo a labanan so antokaman ya inklinasyon a nayarin mangapekta odino maneral ed satan.

“Agayla So Panangarok Ed Ganggan Mo!”

10. Akin a nakaukolan so pangunor ed ganggan nen Jehova ta pian niteen tayoy kanonotan tayo ed espiritu?

¹⁰ No sinononot itayo ed espiritu, aliwan magenap so pikakabat ed Salitay Dios. Agaylay abig na pakarandan nen Arin Solomon ed saray estandarte nen Jehova, balet ta sikato so agnambilay unong ed saratan kaleganan na unor laran kabiangan na bilay to. (1 Arari 4:29, 30; 11:1-6) No sinononot itayo ed espiritual, natebek tayo so pankaukolan, aliwa lambengat ed pikabat tayo ed ibabaga na Biblia noagta diad sigpot-puson pangunor ed ganggan na Dios. Kabaliksan na satan a maalwar tayon usisaen iray estandarte nen Jehova tan maseet a panggunaetan so pangunor ed saratan. Ontan so awawey na salmista. Inkanta to: “O agayla so panangarok ed ganggan mo! Sikato so dalepdep ko ed amin ya agew.” (Salmo 119:97) Sano importantin maong ed sikatayo so panumbok ed ganggan na Dios, nipatnag tayoray maridios a kualidad. (Efeso 5:1, 2) Imbes a maletletey itayon nasagyat ed gawan-mauges, ipatnag tayo so bunga na espiritu, tan say pilalek a napaliket si Jehova so mangipaliis ed sikatayo manlapud mauges a “kaalakan na laman.”​—Galacia 5:16, 19-23; Salmo 15:1, 2.

11. Panon yon ipaliwawa a pakasalimbengan tayo so ganggan nen Jehova a mangisesebel ed pilalawanan?

¹¹ Panon tayon nabayuboan so aralem a respeto  tan aro ed ganggan nen Jehova? Say sakey a paraan et diad maalwar a panusisa ed kaimportantian na satan. Nodnonoten pa so ganggan na Dios ya agamilen labat so seksual a relasyon ed loob na panamaley tan isesebel na satan so pilalawanan tan pikakalugoran. (Hebreos 13:4) Kasin walay maabig a bengatlan nikikibot ed sikatayo no uunoren tayo iyan ganggan? Kasin say maaron mangatatawen ya Ama so manggawa na ganggan ya agtayo pakagunggunaan? Siempre andi! Imanoen pa so nagagawa ed kabibilay na dakel ya agmitutunosan ed saray moral ya estandarte nen Jehova. Saray agkaliktan a panlukon so mabetbet a mansumpal ed panagpaekal odino nayarin iloob la ed masakbay tan agmaliket a panamaley. Dakel so kaukolan a mamabaleg ed anak da ya andian na ama odino ina. Niarum ni, saramay mangaagamil na pilalawanan so nipapaarap ed saray makaalis a sakit lapud sekso. (1 Corinto 6:18) Tan no makagawa na pilalawanan so sakey a lingkor nen Jehova, makapadesyang iray epekto na satan ed emosyon. Say pamaer ed pakakakonsiensia so pansengegan na agpakaugip tan pakagonigon na isip. (Salmo 32:3, 4; 51:3) Agta mabitar sirin a say ganggan nen Jehova a mangisesebel ed pilalawanan so denesinyon manprotekta ed sikatayo? On, wala so baleg a nagungguna diad panmantini ed moral a kalinisan!

Manpikasi Parad Tulong nen Jehova

12, 13. Akin a matukoy so pampikasi sano nadadaeg ed makasalanan iran pilalek?

¹² Say panisip ed espiritu so peteg a mankaukolan na masimoon a pikakasi. Matukoy so ikerew na tulong na espirituy Dios, lapud inkuan nen Jesus: “No sikayo . . . amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Lucas 11:13) Diad pikakasi, nibalikas tayo so pandependi tayo ed tulong na espiritu nipaakar ed saray kakapuyan tayo. (Roma 8:26, 27) No namoria tayon apektado tayo la ed saray makasalanan a pilalek odino awawey, odino no saya so impaimano ed sikatayo na sakey a maaron kapananisiaan, makabat so pangiyespisipiko ed problema diad saray pikakasi tayo tan onkerew itayo na tulong na Dios pian natalonaan irayan tendensia.

¹³ Natulongan itayo nen Jehova pian niyapasakey tayoy kanonotan tayo ed matunong, masimpit, maabig, tan makapadinayew iran bengatla. Tan agaylan matukoy so masimoon a pampikasi ed sikato ta pian say “deen na Dios” so manbantay ed kapusoan tan panag-isip tayo! (Filipos 4:6-8) Onkerew tayo sirin na tulong nen Jehova pian ‘natumbok tayo so kaptekan, kasantosan, pananisia, aro, anos, kauyamoan.’ (1 Timoteo 6:11-14) Diad tulong na mangatatawen ya Ama tayo, ag-onggetget iray kapagaan tan tukso ed labas lay agtayo pakakontrol. Imbes, say kabibilay tayo so pakapatnagan na inter na Dios a kareenan.

Agpapaermenen so Espiritu

14. Akin a say espiritu na Dios et puersa parad kalinisan?

¹⁴ Iyaaplikan mismo na saray matakken ed espiritual a lingkor nen Jehova so simbawa nen Pablo ya: “Agyo erepen so espiritu.” (1 Tesalonica 5:19) Lapud say espiritu na Dios et “espiritu na kasantosan,” satan so malinis, puro, tan sagrado. (Roma 1:4) Sano onkukurang itan ed sikatayo, satan ya espiritu so puersa parad kasantosan, odino kalinisan. Ontulong itan pian napansiansia tayo so malinis a dalan na kabibilay a pakapatnagay katutulok ed Dios. (1 Pedro 1:2) Antokaman a marutak ya agamil so pakabidbiran na panangipulisay ed satan ya espiritu, tan walaan itan na makapadesyang iran pansumpalan. Panon ya ontan?

15, 16. (a) Panon tayon nayarin napaermen so espiritu na Dios? (b) Panon tayon napaliisan so pamaermen ed espiritu nen Jehova?

¹⁵ Bueno, insulat nen Pablo: “Agyo paeermenen  so espiritu santo na Dios, a sikato so akatatakan yo a niparaan ed agew na karondon.” (Efeso 4:30) Ipapabidbir na Kasulatan so espiritu nen Jehova bilang tatak, odino sakey a ‘pakatandaan ed no anto so onsabi,’ parad matoor ya alanaan iran Kristiano. Tan satan et imortal a mangatatawen a bilay. (2 Corinto 1:22, NW; 1 Corinto 15:50-57; Apocalipsis 2:10) Say espiritu na Dios so makapangiwanwan ed saray alanaan tan saray kaiba ran walaay mangaraldalin ya ilalo ed bilay ya atekepan na katooran tan makatulong itan ed sikara ya ompaliis ed saray makasalanan a gawa.

¹⁶ Amasakbay so apostol sumpa ed saray tendensia nipaakar ed katilaan, panagtakew, makapabaing a kondukta, tan arum nira. No abuloyan tayoy inkasikatayo a natangguyor ed ontan iran bengatla, misumlangan tayo la ed apuyanan na espiritu a simbawa na Salitay Dios. (Efeso 4:17-29; 5:1-5) Walay laknab a napaermen tayo so espiritu na Dios, tan maseguron agtayo labay a nagawa itan. Lapud satan a bengatla, no walad sikatayo so onggapo lan mangibaliwala ed simbawa na Salita nen Jehova, nayarin onggapo lan onlesa iray awawey odino walna a manresulta ed ginagalan kasalanan tan ed sigpot lan kabalang na panangabobon na Dios. (Hebreos 6:4-6) Anggaman nayarin agtayo mangaagamil na kasalanan a tampol, nayarin mamapaarap tayo la ed satan. No sumlangen tayo so panangiwanwan na espiritu, napaermen tayo itan. Lalabanan tan papaermenen tayo met la’d satan si Jehova, say lapuan na masanton espiritu. Bilang mangaaro ed Dios, agtayon balot labay a gawaen itan. Imbes, maabig ya onkerew tayoy tulong nen Jehova diad pikakasi ta pian agtayo napaermen so espiritu to noagta nigalgalang tayo so masanton ngaran to diad pantultuloy a sinononot ed espiritu.

Mantultuloy ya Iteen so Kanonotan ed Espiritu

17. Anto so pigaran espiritual a kalat a nayarin iletneg tayo, tan akin a makabat iyan gawaen?

¹⁷ Say makatantandan paraan pian nitultuloy tayon niteen so kanonotan tayo ed espiritu et say pangiletneg na saray espiritual a kalat tan pankimeyan a dampoten iratan. Mandependi ed saray pankaukolan tan sirkumstansia tayo, saray kalat tayo so nayarin mangilaktip ed pamaaligwas ed ugali tayo ed panagaral, pamadaak ed pibibiang tayo ed panagpulong, odino pandampot ed sakey  ya espisipikon pribilihyo na serbisyo, singa say sigpot-panaon a panagpayunir, serbisyo ed Bethel, odino panag-misionaryo. Napano so kanonotan tayo na espiritual iran interes tan nalabanan tayoray kakapuyan tayo bilang too odino say kipalir ed materyalistiko iran kalat tan agmakasulatan iran pilalek a kaslakan ed sayan sistema na bengabengatla. Saya so makabat a kurang, lapud impaseseg nen Jesus: “Agkayo mantipon a nipaakar ed sikayo na kaykayamanan ed tapew na dalin, a sikaray deralen na saray bokbok tan lati, tan sikaray kotkoten tan takewen dia na saray matakew. Noag say mantipon kayo a nipaakar ed sikayo na kaykayamanan ed tawen, a diman agderalen na saray bokbok tan lati, tan diman agkotkoten tan agtakewen na saray matakew. Ta no iner so kawalaay kayamanan mo, diman met so kawalaay pusom.”​—Mateo 6:19-21.

18. Akin ya importantin maong so pangiteen tayoy kanonotan tayo ed espiritu diad sarayan kaunoran ya agew?

¹⁸ Say pangiteen tayo’d kanonotan tayo ed espiritu tan pamaer ed minumundon pilpilalek so maseguron kurang na kakabatan ed sarayan ‘kaunoran iran agew.’ (2 Timoteo 3:1-5) Sakey ni, “say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:15-17) Alimbawa, no gegemtanen na sakey a kalangweran a Kristiano so kalat a sigpot-panaon a serbisyo, onkana iya bilang giya legan na makapaangat a taotaon ed pagmaliw lan katayatdang odino wala la’d edad. Sano nadesdes a mikompromiso, satan a too so walaay malinew ya iilaloan ed no anto so labay ton nagawaan ed serbisyo ed si Jehova. Ipasen na satan a maespiritual a too ya agmakabat, kakulangkulangan ni ingen, so agpakadampot ed saray espiritual a kalat nisesengeg lambengat ed materyal iran gegemtan odino antokaman a liket ya iyoopresi na kasalanan. Nodnonoten a say maespiritual a Moises et “pinili to a nilabi so mantepel ed irap na saman a baley na Dios, nen say minabang ed saray onlabas a liket na kasalanan.” (Hebreos 11:24, 25) Balanglan kalangweran odino matakken la, parepareho so desisyon tayo sano iteen tayoy kanonotan tayo ed espiritu imbes ed makabos a laman.

19. Antoran gungguna so panggayagaan tayo sano sinononot itayo ed espiritu?

¹⁹ “Say panisip ed laman et mankabaliksan na patey, balet say panisip ed espiritu so mankabaliksan na bilay tan kareenan.” (Roma 8:6, 7) No sinononot itayo ed espiritu, naeksperiensia tayo so mabmablin kareenan. Say kapusoan tan panag-isip tayo so lalon naprotektaan manlapud impluensia na makasalanan a kipapasen tayo. Magmaong so pakaresisti tayo ed saray tukson mangagamil na gawan-mauges. Tan walaan itayo na tulong na Dios ya ontalona ed peles a pambabarangkaan na laman tan espiritu.

20. Akin a makapanseguro itayo a posibli so italona ed barangkaan na laman tan espiritu?

²⁰ Napansiansia tayo so makanan siglaotan tayo ed si Jehova, say lapuan na bilay tan masanton espiritu, no mantultuloy tayon iteen so kanonotan tayo ed espiritu. (Salmo 36:9; 51:11) Gagawaen nen Satanas a Diablo tan saray alipores to so amin a bengatlan nayarian da pian deralen da so siglaotan tayo ed si Jehova a Dios. Sasalien dan banlongan so kanonotan tayo, a kabat dan no onsuko itayo et mansumpal itan ed pigulaan ed Dios tan ed ipapatey. Balet ta ontalona itayo ed sayan barangkaan na laman tan espiritu. Ontan so eksperiensia nen Pablo, lapud ta nen insulat to so mismon impibarangkaan to, intepet to nin unona: “Siopa so mangilaban ed siak ed laman na sayan patey?” Insan to impabitar a posibli so kiliktar sanen inkelyaw to: “Misalamat ak ed Dios lapud Jesu-Kristo a Katawan tayo.” (Roma 7:21-25) Makapisalamat tayo met ed Dios panamegley nen Kristo diad impangitarya to na paraan a manalona ed kakapuyan tayo bilang too tan makapantultuloy tayon niteen so kanonotan tayo ed espiritu tekep na alay abig ya ilalon andi-anggaan a bilay.​—Roma 6:23.

Kasin Nanonotan Yo?

• Anto so kabaliksan na pangiteen ed kanonotan diad espiritu?

• Panon tayon naabuloyan ya onkurang so espiritu nen Jehova ed sikatayo?

• Ipaliwawa no akin a diad pibabarangkaan tayo’d kasalanan, importanti so panagaral na Biblia, pangunor ed ganggan nen Jehova, tan pampikasi ed sikato.

• Panon itayon natulongan na saray espiritual a kalat pian mansiansia itayo ed kurang na bilay?

[Tepetepet Parad Panagaral]

[Litrato ed pahina 16]

Ontulong ed sikatayo so panagaral na Biblia pian natalindegan iray panangataki ed espiritualidad tayo

[Litrato ed pahina 17]

Matukoy ya ipikasi so nipaakar ed tulong nen Jehova pian natalonaan tayoray makasalanan a pilalek

[Saray litrato ed pahina 18]

Ontulong ed sikatayo iray espiritual a kalat pian niteen tayoy kanonotan tayo ed espiritu