Ontatalona so Tuan Inkakristiano!
Ontatalona so Tuan Inkakristiano!
“Dia ed ontan binmaleg so salita na Katawan tan tinmalona.”—GAWA 19:20.
1. Deskribien so imbulaslas na Inkakristiano legan na inmunan siglo.
LAPUD apakiwas ed pakayari na masanton espiritu, saray inmuunan Kristiano so angiyabawag ed salita na Dios tekep na ag-ontayer a seseg. Oniay insulat na sakey a manag-awaran: “Makatantanda so maples ya inkayat na Inkakristiano ed Romanon mundo. Kasabi na taon 100, nayarin balang probinsya a kinmeteg ed Mediteraneo so walaan na Kristianon komunidad ed simpok na satan.”
2. Panon a kinontra nen Satanas so maong a balita, tan panon la iyan nipasakbay?
2 Agnapugeran nen Satanas a Diablo iray inmuunan Kristiano. Noag ingen, kinontra to so epekto na maong a balita diad sananey a paraan—apostasya. Impasakbay nen Jesus iyan nagawa diad parabolo to nipaakar ed trigo tan saray sisañas. (Mateo 13:24-30, 36-43) Impasakbay met nen apostol Pedro ya onlesa iray palson managbangat ed loob na kongregasyon, a mangitarok na makaderal iran sekta. (2 Pedro 2:1-3) Mipadpara, espisipikon impasakbay nen apostol Pablo a nagawa so apostasya sakbay na agew nen Jehova.—2 Tesalonica 2:1-3.
3. Anto so agawa kayari na impatey na saray apostol?
3 Kayari impatey na saray apostol, say maong a balita so asakbongan na saray paganon bangat tan pilosopiya. Unong a nipasakbay, pikeweten tan laokan na saray palson managbangat so puron mensahe na katuaan. Kalkalna, say tuan Inkakristiano so dinaeg na sakey ya alig-alig a tinawag a Kakristianoan. Linmesa so kleron klase ya angikibot ed Biblia manlapud saray kabanyakan a totoo. Anggaman dinmakel so bilang na saramay mankuan a Kristianos, aliwan puro so panagdayew da. Kinmayat so Kakristianoan ed dakel a paspasen tan nagmaliw a mabiskeg ya institusyon tan manunan mangiimpluensia ed kultura na Sagur, balet ta anggapoy bendision odino espiritu na Dios ed satan.
4. Akin ya agtinmalona so getma nen Satanas a pugeran so gagala na Dios?
4 Anggaman ontan, say getma nen Satanas a pugeran so gagala nen Jehova so nigana lan onsaew. Kaleganan ni ingen na sankauddieman iran panaon na apostasya, siansia nin aktibo so tuan Inkakristiano. Nansagpotan na lalaki a kopyaen so Biblia diad suston paraan. Kanian, say Biblian mismo so nansiansia, anggaman say mensahe na satan so pinikewet na dakel a mankuan ya autorisadon mangibangat ed satan. Diad loob na dakel iran siglo et saray iskolar a singa di Jerome tan Tyndale, tan arum ni so makpel ya angipatalos tan angibunog ed Salitay Dios. Minilyon a totoo so nipaarap la ed Biblia tan ed sakey a nengneng na Inkakristiano, anggaman alig-alig itan.
5. Anto so impasakbay nen propeta Daniel nipaakar ed ‘tuan pikakabat’?
5 Diad saginonor, unong a nipasakbay ed libro na Daniel, ‘say tuan pikakabat so ondaak.’ Agawa iya ed “panaon na anggaan”—say panaon a pambibilayan tayo la natan. (Daniel 12:4, NW) Inwanwan na masanton espiritu iray manangaro na katuaan ed sankamundoan pian nagamoran da so suston pikakabat ed tuan Dios tan ed gagala to. Anggan kayari na saray siglo na apostatan bangat, tinmalona so salitay Dios! Natan, say maong a balita so niyaabawag ed inerman a pasen, a mangipapaarap ed totoo diad ilalo a nipaakar ed makapaliket a balon mundo. (Salmo 37:11) Usisaen tayo natan so modernon-agew ya imbulaslas na salitay Dios.
Imbulaslas na Salita Natan
6. Antoran katuaan so atalosan na saray Estudyante na Biblia kasabi taon 1914?
6 Diad pansamposampot na koma-19 a siglo, pinabiskeg na katuaan na Biblia so melag a grupo na saray Estudyante na Biblia, a kabkabat natan bilang Tastasi nen Jehova. Kasabi 1914, say Biblia so nagmaliw a mabilay ed sikara. Atalosan da so makapakelaw iran katuaan nipaakar ed gagala na Dios. Sikara so apakiwas a maong ed panangaro nen Jehova diad impangibaki to ed Anak to diad dalin, ya angilukas na dalan ya ompugta’d andi-anggaan a bilay. Akabatan tan naapresia ra met so ngaran tan personalidad na Dios. Niarum ni, amoria da a “saray panaon na Gentiles” so anampot la, a mangipapatnag ya asingger la so panaon a pangitarok na gobiernon Panarian na Dios ed saray bendision ed katooan. (Lucas 21:24, King James Version) Agaylan maglorian maong a balita! Sarayan mapuersan katuaan so kaukolan ya inabang ed amin, inerman a pasen. Napepeligro iray bilay!
7. Panon a tinmalona so katuaan na Biblia ed modernon panaon?
7 Benendisionan nen Jehova so daiset a Kristianos ya alanaan na espiritu. Natan, say bilang na saramay anayakup ed tuan Inkakristiano so linmampas la ed anemiran milyon. Say salita na Dios so kinmayat met la ed nanduruman pasen, lapud naromog iray Tastasi nen Jehova ed 235 a daldalin. Niarum ni, say katuaan na Biblia so mangisesekar na pakayari, a tatalonaan to so amin a babeng, relihyoso man odino andi. Sayan panagpulong a kimey ed intiron mundo so mangaarum na agnasuppiat a paneknek a sinmabi la si Jesus ed pakayari na Panarian.—Mateo 24:3, 14.
8. Anto so inkuan na arum nipaakar ed imbulaslas na saray Tastasi nen Jehova?
8 No panon ya impaimano na saray manag-awaran so makapasagyat ya imbulaslas na Inkakristiano nen inmunan siglo, dakel ya iskolar so nankomento nipaakar ed ibubulaslas na totoo nen Jehova ed modernon panaon. Diad Estados Unidos, oniay parehon insulat na duaran iskolar: “Legan na apalabas a 75 a taon, saray Tastasi nen Jehova so akadampot na ekstraordinaryon peles ed ibubulaslas . . . tan agawaan da la itan diad intiron globo.” Sakey a dyurnal ed Bukig ya Aprika so anukoy ed saray Tastasi bilang “sakey ed saray sankapelesan ya ondakel tan rerespetoen a maong a relihyon a kabkabat ed intiron mundo lapud sigpot ya itutumbok da ed saray bangat na Biblia.” Tan sakey a konserbatibon dyurnal na Katoliko, ya impalapag ed Europa, so anaglawi ed “makapakelkelaw ya imbulaslas na saray Tastasi nen Jehova.” Anto so makasengeg ed sayan ibubulaslas?
Aktibo so Masanton Espiritu Natan
9. (a) Anto so manunan rason no akin ya ontatalona so salitay Dios natan? (b) Panon a papaasinggeren nen Jehova so totoo?
9 Say manunan rason no akin ya ontatalona natan so salitay Dios et lapud mabiskeg ya onkukurang so espiritu nen Jehova, a singa met nen inmunan siglo. Inkuan nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to.” (Juan 6:44) Isusuheri na sarayan salita a matamoy a papaasinggeren na Dios iramay suston nikiling ed inkatunong, a sasagyaten to so kapusoan da. Diad panamegley na panagpulong a kimey na saray Tastasi to, tatangguyoren nen Jehova a mandayew ed sikato ‘iray makaparoyroyon bengatla na amin a nasyones’—saray mauyamo, kinmarneron totoo ed dalin.—Aggeo 2:6, 7.
10. Antoran nengneng na totoo so onkikiwas ed salita na Dios?
10 Aglambengat papabiskegen na masanton espiritu so totoo na Dios a mangitarok na salitay Dios anggad kasampotan na dalin; tinenyeg met na satan so amin a klase na totoo ya onkiwas unong ed maong a balita. Tua, saramay anayakup ed salitay Dios so nanlapu ed “balang kailalakan [o tribu], tan salita tan baley tan nasyon.” (Apocalipsis 5:9; 7:9, 10) Sikara so naromog ed limog na mayaman tan mairap-bilay, de-aral tan andi. Arum so angawat ed salita diad silong na saray kipapasen na bakal tan maramsak a panamasegsegang, bangta ginawa itan na arum legan na panaon na kareenan tan inkaaligwas. Diad silong na nanduruman klase na gobierno, diad amin a kultura, manlapud panamairapan a kampo anggad saray palasyo, saray lalaki tan bibii so paborablin onkikiwas ed maong a balita.
11. Panon ya onkukurang so masanton espiritu diad kabibilay na totoo na Dios, tan anto so mapatnag a nibiig?
11 Anggaman ed makapakelkelaw a pandurumaan na totoo na Dios, nankakasakey iran manlilimog. (Salmo 133:1-3) Saya so mangarum ed ebidensia ya onkukurang so masanton espiritu ed kabibilay na saramay manlilingkor ed Dios. Say espiritu to so mabiskeg a puersa na pankamaongan ya ontutulong ed saray lingkor to a mangipatnag na aro, gayaga, deen, panangasi, tan arum niran makapasagyat a kalidad. (Galacia 5:22, 23) Natan, malinew tayon natebek no anto so impasakbay la nen propeta Malaquias nensaman: “Mangibiig kayo naani na matunong tan marelmeng, say manlingkor ed Dios tan say agmanlingkor ed sikato.”—Malaquias 3:18.
Matalona so Salitay Dios ed Saray Maseseg a Komikimey
12. Anto so nalilikna na saray Tastasi nen Jehova nipaakar ed panag-ebanghelyon kimey, tan anton reaksion ed pampupulong da so ilaloan da?
12 Saray Tastasi nen Jehova natan et aliwan singa saray ukoy-ukoy a mimimisa. Aktibo iran mibibiang ed panag-ebanghelyon kimey. Singa saray inmuunan Kristiano, mabulos dan ipresenta so inkasikara a manggawa na linawa na Dios, a tutulongan da so arum a makaaral nipaakar ed saray sipan na Panarian nen Jehova. Mitunosan ed masanton espiritu to, sikara met so kakimeyan na Dios a manitipon ed arum parad serbisyo ed si Jehova. Diad panggagawa ra ed satan, ipapatnag da so panangasi tan aro nen Jehova ed agmananisian sankatooan. Tan gagawaen da itan anggaman makakaabet ira na agpananginenen, panagbalaw, tan panamasegsegang. Imparaan nen Jesus iray patumbok to ed nanduruman reaksion na totoo ed maong a balita. Inkuanto: “Say aripen aliwan babaleg nen say katawan to. No pinasegsegang da ak, pasegsegangen da kayo met; no inunor da so salitak, unoren da met naani salita yo.”—Juan 15:20.
13. Antoran aspekto so anggapo ed Kakristianoan balet daakan ed limog na saray Tastasi nen Jehova?
13 Seguradon nasagyat itayo ed pipadpara na saray Tastasi nen Jehova natan tan saramay anayakup ed tuan Inkakristiano nen inmunan siglo. Mabitabitar met so pidumaan na saray Tastasi nen Jehova ed Kakristianoan natan. Kayari ton insulat so nipaakar ed inkaseseg na inmuuna iran Kristiano diad panag-ebanghelyo, oniay inyey-ey na sakey ya iskolar: “Noag pasimbaloen so kaplesan a totontonen ed simbaan pian naimano lamet so panag-ebanghelyo ya obligasyon na balang bautismadon Kristiano, tan suportaan itan na kalidad na panagbilay a magmaong nen say ipapatnag na saramay andiay pananisia, nayari lagin ag-itayo la onaligwas.” Saray mismon aspekto ya anggapo ed Kakristianoan so daakan ed limog na saray Tastasi nen Jehova! Mabilay so pananisia ra, sakey a puron pananisia, tan sakey a pananisian nibase’d katuaan na Biblia kanian napapakiwas iran manginabang ed amin ya ontalineng.—1 Timoteo 2:3, 4.
14. Panon so impangipasen nen Jesus ed ministeryo to, tan anton awawey so ipapatnag na saray babangatan to natan?
14 Seryoson sinumpal nen Jesus so ministeryo to, a ginawa to itan a sankaimportantian ed sikato. Oniay inkuanto ed si Pilato: “Nisengeg ed saya linma ak dia ed mundo, pian tasian ko so katuaan. Balang sakey a kayarian na katuaan dengelen to so bosis ko.” (Juan 18:37) Mipara ed si Jesus so liknaan na totoo na Dios. Lapud impapuso ra so katuaan na Biblia, panggugunaetan da so nanduruman paraan pian inabang itan ed dakerakel anggad posibli. Arum ed sarayan paraan so pakapatnagan na makatantandan inkadunong.
15. Panon ya impatnag na arum so inkadunong ed panangipulong ed maong a balita?
15 Diad sakey a bansa ed Abalaten ya Amerika, binaroy na saray Tastasi so kulos na Amazon River pian ipasabi so katuaan ed totoo. Anggaman ontan, sanen tinmerak so sibil a panlalaban nen 1995, asebelan iray sibilyan ya ondalan ed ilog. Lapud determinado iran manginabang na saray publikasyon na Biblia ed saray interesado, denesidi na Tastasi ya ipaagus lay mensahe ra diad ilog. Nansulat ira tan tinekepan da na saray kopya na magasin a The Watchtower tan Awake! insan inkarga ra ed loob na plastik iran botilya. Insan impaagus daray botilya diad ilog. Nantultuloy itan ed loob na apatira tan kapalduan taon anggad sanen naabuloyan lan ondalan iray sibilyan ed sayan ilog. Diad amin na saramay totoon walad gilig na ilog, akisalamat ira ed saray Tastasi lapud literatura. Sikara so nilalakap na sakey a biin manaaral na Biblia, a manag-agus so lua ton angikuan: “Abaloan ko et agta kayo la napinengnengan. Balet, sanen makakaawat ak lay literaturan walad saray botilya, amtak ya agyo ak nilingwanan!” Inkuan na arum a manaayam ed gilig na ilog ya aminpiga da lan binasa iray magasin. Dakel a purok so walaan na “post office”—sakey a keneng a temporaryon pakaingkegan na saray manletletaw a bengatla. Ditan so mabetbet a pangalaan na saray interesado ed antokaman a “sulat” ya impaagus.
16. Panon a say pagmaliw tayon akaparaan so mangilukas no maminsan na dalan ed panaggaway babangatan?
16 Say panangipulong ed maong a balita so iwawanwan tan susuportaan nen Jehova a Dios tan saray makapanyarin anghel to. (Apocalipsis 14:6) Daput no akaparaan itayo, onlesa no maminsan iray pankanawnawan makapanggawa itayo na babangatan. Diad Nairobi, Kenya, asumpal na duaran Kristianon bibii a walad lawak na serbisyo so nipabtang ed sikaran pankabkaabungan da. Biglan inmasingger ed sikara so sakey a kalangweran a bii tan malikeliket ton inkuan: “Abayag ko lan ipipikasi a makapitongtong ak ed sikayo.” Pinaonla ton tampol iray Tastasi ed abung to parad sakey a diskusyon, tan nigapo ed saman ya agew so panangiyaral ed sikato na Biblia. Akin ya ontanlan magangganat ya inasinggeran na bii so duaran Kristiano? Manga duay simba ed akadkauna, inatey so anak ton melag. Kanian sanen anengneng to so ugaw ya akabemben na tract a “What Hope for Dead Loved Ones?” pirawrawat to itan kanian kinerew to itan ed ugaw a laki. Agto labay imay ugaw, balet inturo toray Tastasi ya angiter ed sikato na tract. Agnambayag et maabig so inyaligwas na bii ed espiritual tan mas natalonaan to la so makapaot-ot ya impatey na anak to.
Nepeg ya Ontalona so Aro na Dios!
17-19. Anton panangaro so impatnag nen Jehova ed sankatooan panamegley na dondon?
17 Say ibubulaslas na salitay Dios ed intiron dalin so maapit a nisiglaot ed dondon bagat nen Kristo Jesus. Singa say dondon, say panagpulong a kimey so balikas na panangaro nen Jehova ed totoo a walad nanduruman pasen. Apuyanan si apostol Juan a mangisulat: “Ontan lay impangaro na Dios ed mundo [ed katooan], ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”—Juan 3:16.
18 Isipen pa so impatnag nen Jehova ya aro diad impangitarya to na dondon. Diad binilyon a taon, nanggayagaan na Dios so maapit a pisisiglaotan ed pinabpabli, bogbogtong ya Anak to, “say gapoan na impamalsa na Dios.” (Apocalipsis 3:14, NW) Inadaron maong nen Jesus so Ama to, tan inaro met nen Jehova so Anak to “nanlapu nen agni inletneg so mundo.” (Juan 14:31; 17:24) Inabuloyan nen Jehova a sagmaken na bogbogtong ya Anak to so ipapatey ta pian makaawat so totoo na andi-anggaan a bilay. Agaylan makapasagyat a balikas na panangaro ed katooan!
19 Inkuan na Juan 3:17: “Say Dios agto imbaki so Anak ed mundo a mangukom ed mundo; noag ingen pian say mundo nilaban ed panamegley to.” Kanian imbaki nen Jehova so Anak to nipaakar ed maaron asainmin na panangilaban, aliwan panangukom odino panangondena. Saya so mitunosan ed saray salita nen Pedro: ‘Aglabay [nen Jehova a] wala so siopaman a natawtaw noag ingen amin komon nagegemtan da so panagsibkel.’—2 Pedro 3:9.
20. Diad anton dalan a misiglaotan so kilalaban ed panangipulong na maong a balita?
20 Diad impangitarya to ed legal a basiyan na kilalaban anggaman ed pirmin panangisakripisyo to, kaliktan nen Jehova a dakdakel no posibli so manganamot ed satan. Insulat nen apostol Pablo: “Siopaman ya ontawag ed ngaran na Katawan [“Jehova,” NW], nilaban. Panon sirin so panawag da ed saman so agda sinisia? tan panon so panisia ra ed agda nadngelan? tan panon so pakadngel da no anggapo so mangipulong?”—Roma 10:13, 14.
21. Antoy liknaan yo nipaakar ed pankanawnawan pakapibiang ed panagpulong a kimey?
21 Agaylan abig a pribilihyo so mibiang ed sayan englobon panangipulong tan panagbangat a kimey! Aliwa itan a mainomay a kimey, ingen ta panliketan nen Jehova so pakaimaton ed totoo to a matoor a manbibilay unong ed katuaan tan manginanabang na maong a balita ed arum! Kanian antokaman so sirkumstansia yo, abuloyan so espiritu na Dios tan say aro ed puso yo a mamakiwas ed sikayon mibiang ed sayan kimey. Tan nodnonoten a say naiimatonan tayo a nagagawaan la ed sankamundoan so mangiter na makakombinsin ebidensia a magano lan sumpalen nen Jehova a Dios so sipan to ya ipaarap to itayo ed maglorian ‘balon katawenan tan sakey a balon dalin’ a ‘panaayaman na inkatunong.’—2 Pedro 3:13.
Kasin Nanonotan Yo?
• Akin ya agnaamper na apostasya iray mangipupulong ed maong a balita?
• Panon a tinmalona so salita na Dios ed panaon tayo?
• Diad antoran paraan ya onkikiwas so espiritu na Dios natan?
• Panon a misiglaotan so dondon ed panangipulong na maong a balita?
[Tepetepet Parad Panagaral]
[Graph/Litrato ed pahina 16]
(Parad aktual a format, nengnengen so publikasyon)
Say indakel na saray manangiyabawag na Panarian ed koma-20 siglo
Promedyo ed Saray Manangipalapag (diad minilyon)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Saray litrato ed pahina 15]
JEROME
TYNDALE
GUTENBERG
HUS
[Credit Line]
Si Gutenberg tan si Hus: Manlapud libron The Story of Liberty, 1878
[Litrato ed pahina 15]
Iyaabawag na saray Estudyante na Biblia so maong a balita nen dekada 1920
[Saray litrato ed pahina 16, 17]
Diad intiron mundo et onkikiwas so totoo unong ed maong a balita
[Litrato ed pahina 18]
Singa say dondon bagat nen Jesu-Kristo, itatandoro na panagpulong a kimey so aro na Dios