Kasin Nanonotan Yo?

Naapresia yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

• Diad Roma 5:3-5, akin ya inyunor nen apostol Pablo so impangipresenta to’d ilalo diad saray nantutumbokan a kalidad?

Imparungtal nen Pablo iray nantutumbokan a bengatlan naeksperiensia na saray Kristiano​—kairapan, anos, naabobonan a kipapasen, tan ilalo. Sayan “ilalo” so aliwan samay pilimeron ilalo a nagamoran na sakey manlapud Biblia, noagta satan et say apabiskeg, apaaralem, apalaknab ya ilalo a nayarin gamoran na sakey a Kristiano diad ilalabas na panaon.​—12/15, pahina 22-3.

• Akin a nayarin paninteresan na sakey a Kristiano natan iray pagalaw nensaman diad Gresya?

Diad pangamta ed klase tan saray niyugali ed saratan a galaw et nayarin nalinewan iray dakel a bersikulo ed Biblia. Arum ed saratan so manutukoy ed ‘pipupuligesgesan unong ed saray totontonen,’ ‘pangikaindan ed amin a pakabelatan tan inengneng ed alimbawa nen Jesus,’ ‘ombatik angga ed sampot,’ tan gamoran so balanget, odino premyo. (2 Timoteo 2:5, NW; 4:7, 8; Hebreos 12:1, 2; 1 Corinto 9:24, 25; 1 Pedro 5:4)​—1/1, pahina 28-30.

• Anton balon paraan na pangiyabawag na maong a balita so niparungtal nen Enero 1914?

Nipaway ed saman so “Photo-Drama of Creation.” Tugyopen na satan so apatiran kabiangan a presentasyon a laktipen daray motion picture tan nilasus a de-kolor ya slide, a maslak ed saya so babansagan odino uulopen na nirekord iran paliwawa ed ponograpo. Duamplon set na sayan Drama so niparaan tan malaknab ya inusar ta pian nibangat ed totoo so mensahe na Biblia.​—1/15, pahina 8-9.

• Panon a miduma so Mananguley ya Ulop ed legal a korporasyon?

Bangta saray direktor na legal a korporasyon so ibotos na saray membro to, say Mananguley ya Ulop so agtinuro na siopaman a too noagta tinuro nen Jesu-Kristo. Agla nakaukolan a saray direktor na nanduruman korporasyon ya uusaren na saray Tastasi nen Jehova et membro na Mananguley ya Ulop. Diad agano nin tinaon a miting na Watch Tower Bible and Tract Society na Pennsylvania, saray membro na Mananguley ya Ulop a manlilingkor bilang direktor tan opisyal na satan so boluntaryon inmekal manlapud saray posisyon da. Saratan ya abakantian a posisyon so niiter ed matatken ya agagin lalaki na “arum a karnero.” (Juan 10:16) Diad ontan et say Mananguley ya Ulop so makapangideboto na mas malaem a panaon ed pangitarya na espiritual a tagano tan ed pangasikaso na saray espiritual a pankaukolan na sankamundoan ya impanaagi.​—1/15, pahina 29, 31.

• Anton duaran alimbawa ed Biblia so nayarin usisaen tayo ta pian natalonaay pakadismaya?

Say sakey et si Ana, ya ina nen Samuel. Nayarin inabuloyan to so inkasikato a nadismaya komon sanen sikatoy lingon inakusa nen Eli, say atagey a saserdote na Israel. Imbes, prangkan impabitar nen Ana tekep na galang ed sikato iray punto. Niarum ni, agnanem-em si Ana sumpad si Eli. Say komadua et si Marcos, a maseguron adismaya sanen sikatoy agla labay ya ipila nen apostol Pablo ed pambaroy bilang misionaryo. Imbes a naermenan lapud inkaandi na sayan pribilihyo to, sikatoy aktibon nantultuloy ed serbisyo to, ya akila’d panagbaroy nen Barnabas.​—2/1, pahina 20-2.

• Akin a kaukolan a manalwar iray Kristiano nipaakar ed panangiter, odino panangawat ed arum, na saray kopya na saray software program parad computer?

Maslak iran programa parad computer (pati saray galaw) so lisensiado, a say akankayarian/manguusar so mangiloob labat (install) ed programa diad sakey a computer. Kaslakan lan isusumlang ed copyright law so panggawa na saray kopya parad arum, anggano iiter tayo iratan a libre. Labay a tuloken na saray Kristiano so ley a, “bayaran ed Cesar so bengabengatlan kien nen Cesar.” (Marcos 12:17)​—2/15, pahina 28-9.

• Siopara di Cyril tan Methodius, tan antoy nitulong da ed panagaral na Biblia?

Sikaray sanagin nianak ed Tesalonica, Gresya, nen koma-siam a siglo. Ginawa ra so insulat a letra parad saray lenguahen Slavic tan angipatalos ed dakel a parti na Biblia diad Slavonic.​—3/1, pahina 28-9.

• Anto so kabaliksan na balikas a “panisip ed espiritu”?​—Roma 8:6, NW.

Kabaliksan na satan a sikatayoy babanlongan, dadagdagen, tan papakiwasen na aktibon puersa nen Jehova. Paimpluensiaan itayo ed espiritu na Dios diad pambasa tan panaral na Biblia, diad impapuson itulok ed ganggan na Dios, tan diad pampikasi parad espiritu na Dios.​—3/15, pahina 15.

• Anto so nayarin gawaen tayo sano liknaen tayon sikatayo so ag-atalosan?

Importantin panggunaetan ya ipalinew so pamaakaran unong ed aro. No ompatnag ya agmatalona itan, agnadidismaya. Onkerew na pakatalos tan tulong ed si Jehova, say ‘manisimbang ed saray puso.’ (Uliran 21:2; 1 Samuel 16:7)​—4/1, pahina 21-3.