Tepetepet Manlapud Saray Managbasa

Nipaakar ed inkamabulos nen Jehova a mamerdona ed saray kasalanan diad merito na dondon bagat, akin a nakaukolan ni parad saray Kristiano so pangipatua ed mamatatken ed kongregasyon?

A singa natalosan tayo ed kaso nen David tan Bat-seba, pinerdona nen Jehova so kasalanan nen David, anggaman grabe itan, lapud puron panagbabawi nen David. Sanen sikatoy inasinggeran nen propeta Natan, mabulbulos ya impatua nen David: “Nankasalanan ak sumpa ed Jehova.”​—2 Samuel 12:13.

Anggaman ontan, si Jehova so aglabat mangaawat ed masimoon a panangipatua na nankasalanan tan manginanatnat na panamerdona noagta mangitatarya met na maaro iran probisyon pian onaligwas so nankasalanan ed espiritual ya iyabig. Diad kaso nen David, niiter so tulong panamegley nen propeta Natan. Diad Kristianon kongregasyon natan, wala so mamasiken a matakken ed espiritual, odino mamatatken. Isasalaysay nen babangatan a Santiago: “Maniinagem [ed espiritual] so sakey ed sikayo? Patawag to so saray mamasiken na Iglesia, tan sikato so ipikasi ra komon, a puyokan da na larak ed ngaran na Katawan [a Jehova]. Et say pikakasi pananisia ilaban to so agmakayari, tan say Katawan bangonen to; tan no mankasalanan napaandi’ra ed sikato.”​—Santiago 5:14, 15.

Baleg so nagawaan na saray eksperiensiadon mamatatken pian pakepaen so akindalem ya ot-ot a nalilikna na magbabawin nankasalanan. Panggugunaetan dan aligen si Jehova diad pidedeneng da  ed sikato. Agdan balot labay so magmaliw a maramsak, anggaman matukoy so ambelat a pananisiplina. Imbes, sikaray mapangasin mangikokonsidera ed maganat a pankaukolan na indibidual. Siaanos dan panggugunaetan a peteken so kanonotan na nankasalanan diad pangusar na Salitay Dios. (Galacia 6:1) Anggaman agmabulos ya ipatua na sakey a too so kasalanan to, nayarin sikatoy napakiwas a siansia a magbabawi sano asinggeran na mamatatken, a singa ed si David sanen inasinggeran nen Natan. Kanian say suportan iiter na mamatatken so makatulong ed sakey a nankasalanan a paliisan so kapeligroay pangulit ed kasalanan tan saray seryoson pansumpalan na pagmaliw ya inmawet a managkasalanan.​—Hebreos 10:26-31.

Talagan mairap ya ipatua ed arum iray agawaan a pakababaingan na sakey tan kerewen so kaperdona. Mankaukolan itan na determinasyon. Ingen, molimolien pan magano so walan kaabigan. Inkuan na sakey a laki a sinmaew a mangipatua ed kasalanan to ed mamatatken diad kongregasyon: “Aliknak so ot-ot ed pusok ya ag-onkepa. Amasya ak ed panagpulong a kimey, balet wadtan nin siansia so magbabawin liknaan ko.” Abaloan to a say pangipatua ed Dios diad pikakasi so magenap la, balet mabitar ya agmagenap, lapud alikna to so singa alikna nen Arin David. (Salmo 51:8, 11) Agaylan magmaong a tuloy ya awaten so maaron pananulong ya itatarya nen Jehova panamegley na mamatatken!