Say Kanepegan Mo a Manisia

Maseguron papablien moy kanepegan mo a panisiaan so antokaman a labay mon sisiaen. Ontan da met iray amin lawari. Lapud pangaagamil ed sayan kanepegan, say anemiran bilyon a manaayam diad dalin so mamapawala na saray sisiaen a walaay pirmin panduruma. Singa saray nanduruman kolor, itsura, daramey, taway, angob, tan tanol a naromogan tayo ed pinalsa, mabetbet a say nanduruman sisisiaen so mangaarum na paninteresan, liket, tan gayaga ed bilay. On, say ontan a panduruma et pagmaliwen ton makapainteres tan makapaliket so bilay.​—Salmo 104:24.

BALET nakaukolan so panag-alwar. Arum iran sisiaen so aliwa labat a manduruma noagta mapeligro met. Alimbawa, diad kagapo na koma-20 a siglo, sinisia na pigaran totoo a saray Judio tan Freemason so walaan na saray plano a “buyaken so Kristianon sibilisasyon tan mangiletneg na sakey ya estado na mundo diad silong na nantekep ya uley da.” Say sakey a lapuan na sayan sisiaen et sakey a pulyeton atituloan na Protocols of the Learned Elders of Zion a satan so kontra ed Semitiko. Iyaakusa na pulyeto a saray plano so mangilalaktip ed pangirekomenda na alablabas a panagbuis, pangiyalibansa ed pamarakel na saray armas, pangipaseseg na mabiskeg iran monopoly pian ‘say kayamanan na Gentil so naderal a maminpinsan.’ Kabiangan met ed saray akusasyon so pangipakurang na sistema ed edukasyon pian ‘saray Gentil so magmaliw a singa ayayep ya andi-kalakal,’ tan panggawa ni ingen na saray riles ed dalem na dalin pian manabetan iray kabiseran syudad ta pian ‘napatalaw na saray Judion mamatatken iray siopaman ya onsumpa diad pamagit da ed sikara.’

Siempre, saraya et tilatila​—a ginawa pian papetangen so liknaan ya onkontra ed Semitiko. ‘Sayan kaambagelan a bungay-isip,’ kuan nen Mark Jones na British Museum, ‘so kinmayat ed arum a bansa manlapud Russia,’ a primeron nipaway diad sakey ya artikulo ed peryodiko nen 1903. Akasabi itan ed The Times na London nen Mayo 8, 1920. Kayari na masulok a sakey taon, inwalwal na The Times a peke so dokumento. Bangbalet, agawa lay impaneral. ‘Say oniaran tilatila,’ kuan nen Jones, ‘so mairap a napaer.’ Bektaman a sinisia na totoo iratan, pawalaen na saratan iray mauge-uges, makasamal, tan mapeligron sisisiaen​—a mabetbet a mansusumpal ed desyang, a singa impanengneng na awaran ed koma-20 a siglo.​—Uliran 6:16-19.

Sisiaen Kontra Katuaan

Siempre, agla kaukolan so inggagalan panagtila pian niwala so lingon sisisiaen. No maminsan et aliwa labat lay impakatalos tayo ed saray bengatla. Pigara ta la so totoon inaatey ya andi’d-panaon a gagawaen day bengatla a sinisia ran duga? Ontan met, mabetbet a sisiaen tayo so sakey a bengatla lapud labay tayo labat a panisiaan itan. Inkuan na sakey a propesor ya anggan saray sientista so “mabetbet a mamapablin maong ed saray dilin teorya tan konklusyon  da.” Kikiloten na sisisiaen da so panaghusga ra ed bengabengatla. Diad ontan et uusaren dan maapa so interon bilay da pian itandoro so lingon sisisiaen da.​—Jeremias 17:9.

Mipadpara iran bengatla so nagagawa ed relihyoson sisisiaen​—a wala so baleg iran pansusumlangan. (1 Timoteo 4:1; 2 Timoteo 4:3, 4) Say sakey a too so walaay mabiskeg a pananisia ed Dios. Ikuan na sananey a say too so “manisia [lambengat] manlapud andiay-kabaliksan.” Ipipilit na sakey a walaan ka na imortal a kamarerwa a manbilay kayari ipatey. Papanisiaan met na sananey a sano ompatey ka et sigpot la odino nagnap lan ontunda so kiwawalam. Mapatnag a say oniaran sisiaen a mansusumlangan so agnayari a tuan amin. Sirin, agta makabat a seguroen no peteg kasin tua so sisiaen mo tan aliwan basta labay mo labat a panisiaan itan? (Uliran 1:5) Panon mon nagawaan itan? Say ontumbok ya artikulo so mangusisa ed sayan tema.

[Litrato ed pahina 3]

Artikulo nen 1921 ya angiwalwal ed “Protocols of the Learned Elders of Zion”