“Anto so Nagagawa ed Pransya?”

Saray salitan “Kawayangan, inadaron kawayangan,” so inaon ed “La Marseillaise,” say nasyonal a himno na Pransya. Talagan say kawayangan so bengatlan nepeg a pablien. Balet, makapaaburido iray agano nin inkagawa ed Pransya lapud saray manunan kawayangan so nibabaliwala. Satan so rason no akin a nen Biernes, Nobyembre 3, 2000, et sinamplon nilibo a Tastasi nen Jehova so angibunog ed dagup na 12 milyon a kopya na sakey ya espisyal a tract ya apauloan na “Anto so Nagagawa ed Pransya? Kasin Onandi so Kawayangan?”

DIAD loob la na pigaran taon, saray Tastasi nen Jehova ed Pransya so aatakien na nanduruman politiko tan saray grupon sumpa’d-sekta. Saya so mamapairap ed kipapasen na Tastasi bilang indibidual, kongregasyon, tan nasyonal. Anggaman ontan, nen Hunyo 23, 2000, say Conseil d’État (Council of State), sankatageyan ya administratibon korte ed Pransya, so angipaakseb na makatantandan desisyon a pabor ed walan adesisyonan la na 31 ya abebbeban korte diad masulok a 1,100 a kaso. Pinekderan na atagey a korte a say panagdayew ya aagamilen na Tastasi nen Jehova so sigpot a mitunosan ed ley na Pransya tan saray Kingdom Hall da so napisakop met ed ag-pambayar na buis a singa nipapagamor ed arum iran relihyon.

Balet, diad sigpot a panangibaliwala ed sayan desisyon, siansian agtutumboken na French Ministry of Finance so ley a mangipapagamor na tax exemption ed saray relihyoson organisasyon no nipaakar ed Tastasi nen Jehova. Say Ministry so angipaakseb na 60-porsienton buis ed saray kontribusyon ya iiter na saray Tastasi tan kakaaro a mititipon ed 1,500 a lokal iran kongregasyon diad Pransya. Sayan kaso so peles ya aaralen.

Say gagala na kampanyan asalambit ed gapo et pian iparungtal iyan panusumlang tan pian  ipabitar so kapeligroan ed ontan ya absoluton panagpabuis tan ed saray niproponin ganggan a mangibaliwala ed relihyoson kawayangan parad amin. *

Andukey a Sanagew

Diad alas-dos na kabuasan, inggapo la na saray Tastasi ed pigaran kongregasyon so impanbunog ed paway na saray istasyon na tren tan pabrika insan diad saray airport. Kasabi ala-sais et aligewgewan la ed Paris. Manga 6,000 a boluntaryo so pinmugta ed saray lugar a mainomay a naabet iray pasahero ya onlan mantrabaho. Sakey a kalangweran a bii so nankomento: “Maabig so gagawaen yo para ed kawayangan na relihyon. Aliwa labat a saray Tastasi nen Jehova so nalalanor.” Diad Marseilles, masulok a 350 a Tastasi so angiderew na tract diad saray istasyon na tren tan diad saray karsada. Kayari sakey oras, inyanunsio na radio ed interon bansa so pankakampanya a papakabatan na satan iray dumerengel ya agnabibigla no sikaray asinggeran na Tastasi nen Jehova. Diad Strasbourg, a kawalaay hedkuarter na European Court of Human Rights, et maanos ya akilinya iramay pasahero diad sentron istasyon pian makaawat ira na kopya ra. Sakey ya abogado so nankomenton anggaman agto mipakna ed saray kombiksion na Tastasi nen Jehova et susubaybayan to so kaso ra tekep na interes, lapud importante tan makatunongan so pilalaban da.

Kasabi alas-otso, anggaman biewbiew so uran, dinanay na 507 a Tastasi iray kalye ed syudad na Alpine ed Grenoble odino inkarga ra so tract ed saray kahon parad sulat. Lapud anengneng na saray drayber na kotsi tan tram so nagagawa, intunda ra so luluganan da pian onkerew na tract. Diad nisagur a syudad na Poitiers, saray onsasabin pasaheroy tren ed alas-nuebe so akaawat lay tract diad pasen a nansipotan da. Diad Mulhouse, ya asingger ed ketegan na Alemanya, et 40,000 lan kopya so nipalima.

Kasabi alas-dies, dakel a kongregasyon so akapangibunog lay masulok a kapaldua ed saray tract da. Diad kaagwan, pigpigara labat a totoo so ag-angawat, tan nanresulta ed dakel a makapainteres iran tongtongan. Diad Besançon, a masulok ya 80 kilometro labat manlapud ketegan na Swiss, walay kalangweran a lakin angipatnag na interes ed Biblia tan intepet to no akin ya aabuloyan na Dios so paniirap. Sikatoy inimbitaan na Tasi ya ituloy so tongtongan da diad asingger a Kingdom Hall, a diman et nigapon tampol so panangiyaral na Biblia ed say brosyur ya Anto so Kakaukolanen na Dios ed Sikatayo?

Kasabi ogto et inusar na dakel a Tastasi so oras na panangugto ra pian manpulong ed loob na sakey odino duaran oras. Sanngarem a nantultuloy so panangibunog, a dakerakel a kongregasyon so asumpal ed manga alas-tres odino alas-kuatro ed satan a ngarem. Diad Reims, a sentro na alak, arum a totoo ya akiaral la odino akilimog la ed saray Tastasi nen Jehova nensaman so angibalikas ed pilalek dan mitipon lamet ed kongregasyon. Diad Bordeaux et nigapo so taloran panangiyaral na Biblia. Diad satan met a syudad, sakey a Tasi so linmoob ed sakey a lakoan pian manaliw na peryodiko, et anengneng to so asalansan a tract ed tapew na despatso. Say managlako, a datin Tasi, so akaawat na tract tan, lapud impakamoria to’d kaimportantian na satan, impa-xerox to so tract pian sikatoy mangipalima.

Diad Le Havre, Normandy et abigla so sakey a Protestantin bii lapud nadngel to’d radio a saray kontribusyon na Tastasi nen Jehova et pabuibuisan. Masimoon ton inawat so tract tan indayew to  iray Tastasi lapud inkakpel dan mansalita sumpad ontan ya ag-inkahustisya. Diad alas 7:20 na labi, oniay inkomento ed balita ed TV diad interon rehyon ed Lyons: “Nen kabuasan et mas mainomay so onlikir ed saray tedter na uran nen say ipaliis ed saray tract na Tastasi nen Jehova.” Duaran Tasi so ininterbio tan impaliwawa ra so sengegan na kampanya.

Saray Tastasi a mankaliktan a mibiang kayari sekular a trabaho ra so angibunog na saray tract ed saray pasempet lan pasahero tan inkarga daray arum ed saray kahon parad sulat. Diad saray baley a singa say Brest tan Limoges​—a bantog a gawaay porselana​—saray totoon ompapaway ed sinean diad alas 11:00 ed labi et sikara so sampot ya akaawat na kopya na tract ed saman ya agew. Saray akeraan a tract so kinolekta tan imbunog ed kaimbuasan.

Saray Resulta

Oniay insulat na sakey a Tasi: “Say amta na saray onsusumpa et napapakapuy da kami. Diad tua, say kabaliktaran so nagagawa.” Diad maslak a kongregasyon, masulok a 75 a porsiento na Tastasi so akibiang ed satan ya agew, a manga 10, 12, odino 14 ya oras so nausar ed sayan kimey. Diad Hem, ed amianen na Pransya, kayari trabaho to a panlabi, sakey a Tasi so angibunog ed tract manlapud ala-singko ed kabuasan anggad alas-tres ed ngarem. Diad asingger na Denain, a nen 1906 et wala la’d man so kongregasyon, 75 a Tastasi so angusar na 200 oras ya angibunog na tract ed Biernes. Anggaman arum so maedad la, makapuy la, tan say panaon et aliwan marakep, sikaray determinado met a mibiang. Alimbawa, diad Le Mans, taloran mankakaulop ya 80-años da la, so angusar na duaran oras ya angikarga na saray tract ed saray kahon parad sulat, tan sakey ya aka-wheelchair a Tasi so angipalima na tract diad arap na istasyon na tren. Tan agaylan makapaseseg so pakaimano’d dakerakel a datin inaktibon Tastasi ya akibiang ed sayan espisyal a kimey!

Andi-duaruwan sayan impanbunog so nanresulta ed sakey a baleg a pantasi. Saray totoo ed amin a kipapasen na panagbilay, a dakel ed sikara so matalag a nasabi ed kaabungan da, so akaawat na kopya na tract. Alikna na dakerakel ya indibidual a nagkalalo so agawaan na sayan impankimey nen say panangiyagel ed pankaabigan na saray Tastasi. Minoria itan na dakel bilang sakey a panangidepensa ed kawayangan na konsiensia tan panagdayew parad amin a taga-Pransya. Bilang ebidensya ed saya, saray totoo so kinmerew na kaaruman iran kopya na tract pian iter ed saray kaaro, katrabahoan, tan kanayon da.

On, saray Tastasi nen Jehova ed Pransya so matalek a mangipakabat ed ngaran nen Jehova tan mangidepensa ed intereses na Panarian. (1 Pedro 3:15) Sikaray masimoon a maniilalo a “napalabas [da] so sakey a bilay a mareen tan mapayapa ed amin a kasimpitan tan kabintaan” tan diad ontan nilibo ni so miulop ed sikara diad pandayew ed mangatatawen ya Ama ra, si Jehova.​—1 Timoteo 2:2.

[Paimano ed leksab]