Anto so Walaan na Peteg a Kablian?

Say pangayarian na bengatlan walaan na peteg a kablian so makapalikliket. Balet anto kasi itan? Baleg a kantidad na kuarta? Ankabli odino marakerakep ya alahas? Kabantogan tan inkaprominente? Saraya so papablien a maong na dakel a totoo. Say pakawalaan na ontan iran bengatla so makalegpet, pagmaliwen ton lalon makabaliksan so bilay, odino mamenek ed liknaan lapud maong a pakabidbiran tan agawaan. Kasin pambabanikelan tayon gamoran iratan a bengatla, diad ilalon sumpalen na saratan iray kalat tan pitamitam tayo parad arapen?

KASLAKAN lan papablien na totoo so sakey a bengatla no satan so mamepenek ed saray pankaukolan da odino personal iran pilalek da. Papablien tayoray bengatlan mangitatarok na pankaabigan tan mangiyoopresi na ilalo parad maligen ya arapen. Kalkaliktan tayoray bengatlan mangitarok na tampolan ya inawa, ligliwa, odino maong a pakabidbiran. Ingen, say pangipasen a walay kablian so sakey a bengatla unong ed manguman-uman iran pilalek odino interes tayo so akinpaway labat tan kakulangay pakatebek. Diad tua et nadetermina so tuan kablian sano namoria tayon satan so kakkaukolan tayon maong.

Anto so kakkaukolan tayon maong? Anggapoy kablian na antokaman no andian na manunan kabiangan​—say bilay. No anggapoy bilay, anggapo itayo met. Oniay insulat nen Arin Solomon ed kadaanan ya Israel: “Saray inaatey agda amta so bengatla . . . Anggapo so gawa, no kanonotan, no pakaamta, no kakabatan, dia ed Sheol [kaslakan a lubok na katooan].” (Eclesiastes 9:5, 10) No ompatey itayo, napilitan itayon taynanan so amin a kayarian tayo. Sirin, say kakkaukolan tayon maong et say pakala na bengatlan mangipreserba ed bilay tayo. Anto so manggawa ed satan?

Anto so Mangipreserba ed Bilay Tayo?

“Say kuarta sakey a sakurong,” kuan nen Arin Solomon. (Eclesiastes 7:12) No walaan itayoy magenap a kuarta, makagamor itayo na tagano tan komportablen ayaman. Ontulong so kuarta ed sikatayo pian napanggayagaan so pambiahe ed ararawin lugar. Nitarya na satan iray nakakaukolan tayo sano agtayo la makapantrabaho lapud  inkatakken odino inkaletey. Dakel iray gunggona ed pakawalaan na kuarta. Ingen, agnayarian na kuarta ya ipreserba so bilay tayo. Sinimbawa nen apostol Pablo si Timoteo: “Dia ed saray mangayaman dia ed mundo, ibilin mo ed sikara ya ag-ira mantagey na linawa, tan agda met igaton so ilalo ra ed saray kayamanan a panduaruwaan, noag dia ed Dios.” (1 Timoteo 6:17) Amin a kuarta ed mundo so agmakapanaliw na bilay parad sikatayo.

Konsideraen pay eksperiensya na sakey a lakin manngaran na Hitoshi. Lapud pinabaleg ed dukan pamilya, pirmi so pampilalek nen Hitoshi ya onyaman. Bidbiren ton tuloy so pakayari na kuarta ya isipen ton anggan say too so nasaliw panamegley na satan. Asabin walay sakey a lakin lima’d abung nen Hitoshi tan sikatoy tinepetan to no kasin amta ton inatey si Jesu-Kristo nisesengeg ed sikato. Pinagmaliw a maupapet na sayan tepet si Hitoshi lapud liknaen ton anggapoy malabay ya ompatey parad sakey a toon singa sikato. Sikatoy inmatendi ed sakey a publikon paliwawa nipaakar ed Biblia tan abigla ed nadngel ton simbawan ‘pansiansiaen a simpli so mata.’ Impaliwawa na espiker a say mata a “simpli” et samay mata a lawas onnenengneng ed arapen tan nisentro ed saray espiritual a bengatla. (Lucas 11:34, NW) Imbes a say pansagpotan et say kuarta, inyuna la nen Hitoshi iray espiritual a kablian ed bilay to.

Say materyal a kaykayarian so makapangitarok met ed sikatayo na sakey a sukat na inkaligen tan seguridad. No daakan tayo et nabawasan so kapagaan tayo ed inagew-agew iran pankaukolan tayo. Say balibalin abung ed alay dakep a kaliberliber so mamawala ed sikatayo na liknaan a walay agawaan. Sikatayo so pandinayewan na arum lapud uson kawekawes tan marakep a luluganan tayo.

Sakey a bendisyon so ‘panliket a maong ed amin a kimey tayo.’ (Eclesiastes 3:13) Tan lapud daakan tayo et saray inad-aro tayo so ‘mainawa, mangan, oninum, tan manliket.’ Balet, maganggano so kablian na materyal a bengabengatla. Diad pamapasakbay sumpad inkaagum, oniay inkuan nen Jesu-Kristo: “Say bilay na too andi ed karakel na saray bengatla a bebembenan to.” (Lucas 12:15-21) Saray kayarian, antokaman so kantidad odino balor na saratan et agmangigarantiya na bilay ed sikatayo.

Alimbawa, si Liz, so akiasawa’d sakey a lakin maasenso’d pinansyal. Oniay isasalaysay to: “Walaan kami na marakep ya abung tan duaran kotsi, tan lapud kipapasen mi ed pinansyal et sarag min panggayagaan so antokaman ya iyoopresi na mundo no nipaakar ed materyal . . . Balet, makapakelkelaw ta siansian panaaburidoan koy kuarta.” Isasalaysay to: “Dakel so kakawananen mi. Mapatnag a no dakel mo et, lalon agmaligen so liknaan mo.”

Say kabantogan tan inka-prominente so pabpablien met a tuloy na dakel lapud saratan so mamawalay dayew tan galang. Diad kaplesan a mundo, say matalonan karera so sakey ya agawaan a panibegan. No naaralan tayo iray nikaduman talento odino abilidad et pakaalaan itayo iratan na marakep a ngaran. Nayarin sikatayo so pandinayewan na arum, panisiaan daray opinyon tayo, tan magunaet ed abobon tayo. Amin na saya so makapaligsa tan makapenek. Balet, diad kaunoran et satan so onkupas. Si Solomon so walaan na amin a gloria tan pakayari a nakayarian na sakey ya ari, balet ta oniay intagleey to: “Ed makabat a too, singa met lanlamang ed maatiw, anggapo so pakanonot . . . amin abayag la ya alingwanan.” (Eclesiastes 2:16) Say kabantogan tan inka-prominente so agmangiter na bilay ed sakey.

Walay eskultor a manngaran na Celo ya asabin naapresya ton tuloy so sakey a bengatlan mas mabalor nen say kabantogan. Lapud walaay nikaduman talento, sikatoy kinmualipikan maneskuela ya amaaligwas ed saray dunong to. Ag-abayag et say kimey to so indaydayew na say media tan saray kritiko ed art. Dakel ed saray eskultora to so niparayag ed saray manunan syudad ed Europa. Kuan nen Celo: “Talagan aksobien ko a walay panaon ed bilay kon sankaimportantian a bengatla so art. Balet, amoriak a parad siak, say pantultuloy a panggegemtan ed karerak so aliling toy panggugunaet a panlingkoran so duaran katawan. (Mateo 6:24) Kombinsido ak a say sankaimportantian a bengatlan nagawaan ko et say pangipulong na maong a balita na Panarian na Dios. Kanian denesidik a mismo so pangitunda’d trabahok bilang sakey ya eskultor.”

 Anto so Sankablian?

Lapud anggapo so bengatlan walaay kabaliksan odino kablian no andiay bilay, anto so nayarin gamoran tayo a mangigarantiya a mantultuloy itayon manbilay? Amin a bilay so manlalapud si Jehova a Dios. (Salmo 36:9) On, “manbilay itayo ed sikato, tan onggalaw itayo, tan wala ed sikato so inkatoo tayo.” (Gawa 17:28) Ipapagamor to so andi-anggaan a bilay bilang regalo ed saramay aaroen to. (Roma 6:23) Anto so nepeg tayon gawaen ta pian onkualipika’d onian regalo?

Say pakaawat na regalon andi-anggaan a bilay so mandedependi ed pakawalaan tayo na maapit a relasyon ed si Jehova. Kanian, babaleg so kablian na abobon to nen say antokaman nin posiblin nakayarian tayo. Sano walaan itayo na ontan, makapanilalo tayo na tudtua tan magnayon a liket. Balet no andian itayo na abobon na Dios, nipaarap itayo ed maandon kaandi. Kanian, mabitabitar ya antokaman a bengatlan pakadampotan tayo na maong a relasyon ed si Jehova so mablin tuloy.

No Anto so Nepeg Tayon Gawaen

Mandedependi so itatalona tayo ed pakagamor tayo na pikakabat. Say lapuan na suston pikakabat et say Salita nen Jehova, say Biblia. Satan lambengat so mangibabaga ed sikatayo no antoy nepeg tayon gawaen ta pian napaliket so Dios. Kanian kaukolan tayon magunaet ya aralen so Kasulatan. Say maseet a pansagpot tayo pian aralen so amin a nayarian tayo nipaakar ed si Jehova a Dios tan si Jesu-Kristo so mansumpal ed ‘pikakabat a mankabaliksay andi-anggaan a bilay.’ (Juan 17:3, NW) Say ontan a pikakabat so sakey a kayamanan a kaukolan a pablien!​—Uliran 2:1-5.

Say pikakabat a nagagamoran tayo manlapud Salita na Dios so mangikinlong ed sikatayo pian gawaen so ontumbok a kundang​—say pangagamil na pananisia ed si Jesu-Kristo. Ingganggan la nen Jehova ya amin ya onsingger ed sikato so nepeg a manggawa ed satan diad panamegley nen Jesus. (Juan 14:6) Diad tua et “anggapo so arum a kilabanan.” (Gawa 4:12) Say kililiktar tayo ed kaunoran so agmandedependi ed ‘pilak odino balitok . . . , noag diad mablin dala nen Kristo.’ (1 Pedro 1:18, 19) Nepeg tayon idemostra so pananisia tayo diad panisia ed saray bangat nen Jesus tan diad panumbok ed alimbawa to. (Hebreos 12:1-3; 1 Pedro 2:21) Tan agaylan makanakana so bagat to! Say kiyaplikaan na saray gunggona na satan so manetermina ed andi-anggaan ya arapen na amin a katooan. Sano sigpot a niyaplika ed biang tayo, niiter ed sikatayo so petepeteg a mabalor a regalon andi-anggaan a bilay.​—Juan 3:16.

Inkuan nen Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:37) Say pangaro ed si Jehova et kabaliksan toy ‘panumpal tayo ed saray ganggan to.’ (1 Juan 5:3) Kakaukolanen na saray ganggan to a mantultuloy tayon biig ed mundo, mantinien so maptek a kondukta, tan sitotoor a manuporta ed Panarian to. Diad ontan a paraan tayo ‘pipilien so bilay’ imbes a say patey. (Deuteronomio 30:19) No ‘onsingger itayo ed Dios et sikato so onsingger naani ed sikatayo.’​—Santiago 4:8.

Say pakaseguro ed abobon na Dios so lalon makanakana nen say amin a kaykayamanan ed mundo. Saramay walaan na ontan so sankayamanan a totoo ed tapew na dalin! Sirin, komon ta panbanikelan tayon gamoran so kayamanan a walaay tudtuan kablian​—say panangabobon nen Jehova. Seguradon ipapuso tayo so simbawa nen apostol Pablo: “Ontumbo’ka ed kaptekan, kasantosan, pananisia, aro, anos, kauyamoan. Mibakal ka ed maabig a pibabakal na pananisia, bembenan mo so bilay ya andi-angga.”​—1 Timoteo 6:11, 12.

[Saray litrato ed pahina 21]

Anto so papablien mon maong? Kuarta, materyal a kaykayarian, kabantogan, odino arum nin bengatla?

[Litrato ed pahina 23]

Kaukolan tayon aralen a maong so Kasulatan