Pankakasakeyen na Tuan Panagdayew so Totoo

ANGGAMAN say relihyon ed inkalapagan so ompapatnag a mangaapag-apag ed totoo, say panagdayew ed alenleneg a tuan Dios so walaay pakayarin mamakasakey ed totoo. Sanen say Israel so apilin nasyon na Dios, dakel a masimoon a Gentil so asagyat ed tuan panagdayew. Alimbawa, si Rut et tinaynan to so dirios na binalegan ton dalin a Moab tan inkuan to’d si Naomi: “Say baley mo sikato so baley ko tan say Dios mo, Dios ko.” (Rut 1:16) Kasabi inmunan siglo K.P., dakdakel so Gentil a nagmaliw a managdayew ed tuan Dios. (Gawa 13:48; 17:4) Diad saginonor sanen nambaroy iray apostol nen Jesus diad ararawin pasen a walaan na maong a balita, arum a masimoon a totoo so akikasakey ed panagdayew ed tuan Dios. Oniay insulat nen apostol Pablo: “Imbeneg yo [so] saray talintao ya inmarap kayo ed Dios a sibibilay tan matua.” (1 Tesalonica 1:9) Kasin say panagdayew ed tuan Dios so walaan na ontan a manamakasakey a pakayari natan?

Ipasoot na saray manduaruwa a lingon salambiten so “saray tuan managdayew” odino “say tuan Dios.” Nayarin ontay kaisipan da lapud agda kabat so dinanman a lapuan a pakaaralan na katuaan. Balet namomoria na saray manaanap ed katuaan, a walaay nanduruman abenegan, a say paraan na panagdayew tayo so nepeg ya aliwan lapud dilin-panlabayan. Say makanepegan lambengat na panagdayew tayo et say Manamalsa na amin a bengatla​—si Jehova a Dios. (Apocalipsis 4:11) Sikato so tuan Dios, tan sikatoy walaan na kanepegan a mandesidi no panon so pandayew ed sikato.

Pian natulongan itayon natebek iray kakaukolanen to, ipapasabi nen Jehova so pikakabat ed sikatayo panamegley na Salita to, say Biblia. Ngalngalin amin a totoo natan ed dalin so walaan na interon Biblia odino saray kabiangan na satan. Sakey ni, inkuan na Anak na Dios: “No mansiansia kayo ed salitak, . . . nakabatan yo so katuaan.” (Juan 8:31, 32) Say katuaan sirin et nayarin nakabatan. Tan minilyon a matuan-impanpuson totoo ed nanduruman relihyoson abenegan so makpel a manasayakup ed sayan katuaan tan nankakasakey ira ed tuan panagdayew.​—Mateo 28:19, 20; Apocalipsis 7:9, 10.

Sankamundoan a Pankakasakey ed Panaon Tayo!

Sasaglawien na sakey a makatantandan propesiya diad libro na Biblia a Sofonias so katitipon na totoo a walaan na nanduruman kipapasen ed bilay. Oniay isasalaysay to: “Samanla ipawil ko [nen Jehova a Dios] ed saray baley so malinis a pansasalita [“puron lenguahe”, NW], pian sikara ya amin tawagan da komon so ngaran nen Jehova, pian manlingkor ira ed sikato a benebenek.” (Sofonias 3:9) Alay abig so pakanengneng ed saray nampasimbalon totoo a lilingkoran da so Dios ed inkasaksakey!

Kapigan so kagawa na saya? Oniay inkuan na Sofonias 3:8: “Manalagar kayo a nipaakar ed siak, kuan nen Jehova, angga ed agew ya iyaalagey ko a mansamsam; ta say panangigeter ko sikato so panipon ed saray nasyon, pian ikalbok ed sikara so sanok ko, salanti say masebeg a sanok ko; ta say amin a dalin naakmon naani ed apoy na imon ko.” On, legan na panaon a pantitiponen nen Jehova iray nasyon balet sakbay ya ikalbo to ed sikara so masebeg a sanok to, ipawil to ed saray mauyamo ed dalin so puron lenguahe. Natan la itan a panaon, lapud nagagawa la so katitipon na amin a nasyon diad bakal na baleg ya agew na Makapanyarin-amin a Dios diad Armagedon.​—Apocalipsis 16:14, 16.

Pian pankasakeyen so totoo to, sikaray papagamoran nen Jehova na puron lenguahe. Lalaktipen na sayan balon lenguahe so suston pakatalos ed katuaan ed Biblia nipaakar ed Dios tan saray gagala to. Lalanoren na pansalitay puron lenguahe so panisia ed katuaan, pangibangat na satan ed arum, tan pambilay a mitunosan ed saray ganggan tan prinsipyo na Dios. Kakaukolanen na satan so isian ed saray mangapag-apag a politika  tan pangiwaklit ed puso na sinisiblet iran ugali, a singa say rasismo tan mangapag-apag a nasyonalismo a mapatnag ed sayan mundo. (Juan 17:14; Gawa 10:34, 35) Amin a matuan-impanpuson totoo a mangaaro ed katuaan so makaaral ed sayan lenguahe. Konsideraen no panon a say limaran totoo ya asaglawi ed inmunan artikulo​—a datin walaay pandurumaan ed relihyon​—so nankakasakey la natan diad panagdayew ed sakey tan alenleneg a tuan Dios, si Jehova.

Nankakasakey Ira ed Tuan Panagdayew

Sanen si Fidelia, say debosyonadan Romanon Katoliko, so analiw na Biblia lapud asainmin na anak to ed eskuelaan, kinerew ton ipaliwawa ed sikato na pari manlapud Biblia no anto la so agawa ed limaran anak to ya inaatey. “Agaylan makapadismaya!” so inkuan to. Kanian sanen sikatoy dinalaw na saray Tastasi nen Jehova, intepet to so parehon tepet. Diad impakabasa ed mismon Biblia to na katuaan nipaakar ed kipapasen na inaatey, amoria to ya agaylan impamalikdo ed sikato na iglesia. Naamtaan to ya anggapo lay amta na saray inaatey tan ag-ira sirin maniirap ed Limbo odino ed inerman a pasen. (Salmo 146:4; Eclesiastes 9:5) Imbantak nen Fidelia so amin a relihyoson imahen to, tinaynan toy datin relihyon to, tan nanaral na Biblia. (1 Juan 5:21) Diad loob la na samploy taon, panggagayagaan to so pangibabangat na Makasulatan a katuaan ed arum.

Si Tara a taga-Kathmandu so inmalis ed sakey a bansa a daiset iray templo na Hindu. Diad ontan et sikatoy binmisita ed simbaan na Metodista diad paniilalon napenek so espiritual iran pankaukolan to. Balet agto aromog so ebat ed tepet to nipaakar ed paniirap na too. Kabekta sikatoy akatongtong na saray Tastasi nen Jehova tan inyopresi ran sikatoy iyaralan da na Biblia. Onia so kuan nen Tara: “Amoriak ya aliwan say Dios na aro so responsable ed amin a paniirap diad mundo . . . Aliketan ak ed ilalon sakey a balon mundo na kareenan tan pantutunosan.” (Apocalipsis 21:3, 4) Inwaklit la nen Tara iray Hindu ya imahen to, tinundaan to laray relihyoson kustombre ed binalegan ton dalin, tan aromog to so peteg a liket diad panutulong to a napenek iray espiritual a pankaukolan na arum bilang sakey a Tasi nen Jehova.

Si Panya, a Budista, et sakey a managparles sanen primeron dinmalaw iray Tastasi nen Jehova ed sikato diad Bangkok, kanian sikatoy asagyat ed saray propesiya ed Biblia. Oniay insalaysay nen Panya: “Sanen naamtaan ko no akin a duma iray peles a kipapasen ed datin ginagala na Manamalsa tan no panon a sikatoy nanggawa na paraan pian patundaen so panederal na saramay mangipupulisay ed sikato tan say inkasoberano to, satan so singa sakey a pereng a nakal ed saray matak. Amin a bengatlan nipaakar ed mensahe na Biblia so mantutunosan a maong. Naarok si Jehova bilang sakey a persona; saya so akapakiwas ed siak ya agamilen so amtak a duga. Magunaet ak ya ontulong ed arum pian nibiig da so kakabatan na too tan maridios a kakabatan. Peteg ya apasimbalo na tuan kakabatan so bilay ko.”

Asabi panaon, si Virgil so awalaan na pirmi iran panduaruwa ed relihyoson sisisiaen to. Imbes ya ipikasi ed Dios so paraan pian natulongan so andeket a totoo tan say ipapasen ton manangibiig ed rasan organisasyon a mapatnag a mamawalay pambusol ed saray amputi, say katuaan so impikasi to, antokaman itan, inerman itan. Oniay nanonotan ni nen Virgil: “Kabangon ko ed kaimbuasan kayari na masimoon ya impanpikasik ed Dios, akaromog ak na magasin a Watchtower diad abung. . . . Maseguron insuksok itan ed silong na kapot.” Agnambayag et sikatoy maseet ya impaiyaralan na Biblia ed saray Tastasi nen Jehova. Intuloy to: “Diad inmunan pankanawnawa ed bilay ko, siak so apenek. . . . Atebek ko so sakey a sinag na ilalo.” Ag-abayag et si Virgil so akikasakey la ed saramay manginanabang ed totoo na alenleneg a tuan ilalo a nidatak ed Salita na Dios, say Biblia.

 Si Charo a taga-Latin Amerika so nandinayew sanen sikatoy naimano na sakey a Tasi a manngaran na Gladys a nanairapan ed limaran ankelag nin anak to et sikatoy tinulongan ton inyakar diad tindaan. Asabi panaon, inawat nen Charo so inyopresi nen Gladys​—say libren panagaral na Biblia. Sanen naaralan nen Charo ed mismon Biblia to ya aliwan amin a maong a totoo et onla ed tawen noagta si Jehova et bendisyonan to met iray totoo diad dalin tekep na bilay ya andi-anggaan, sikatoy nikelawan. (Salmo 37:11, 29) Inanabang met la natan nen Charo iyan ilalo ed arum diad loob la na 15 taon.

Isipen pa a say interon mundo so panaayaman la na masimoon a totoon nankakasakey ed tuan panagdayew ed si Jehova, say alenleneg a tuan Dios! Aliwa iyan imahinasyon labat. Saya so insipan nen Jehova. Onia so inyabawag na Dios, panamegley na propeta ton si Sofonias: “Balet paulyan ko naani ed pegley mo so sakey a pinairap tan duka a baley et sikara onapireng ira naani ed ngaran nen Jehova. . . . Ag-ira naani manggawa na inkauges, ag-ira met naani mansalita na saray tila; say matila a dila agmet naani naromog ed sangi ra; . . . tan anggapo naani antakot [“manaktakot,” NW] ed sikara.” (Sofonias 3:12, 13) No sayan sipan et makapasagyat ed sikayo, ipapuso iyan simbawa na Biblia: “Anapen yo si Jehova, sikayo ya amin a mauyamo ed dalin, ya angunor na saray panguksoyan to: anapen yo so inkatunong, anapen yo so kauyamoan; nayari a sikato naani niyamot dia ed agew na sanok nen Jehova.”​—Sofonias 2:3.