‘Say Bendisyon nen Jehova​—So Makapayaman’

LABAY tayon amin so nabendisyonan. Inkuan na The American Heritage College Dictionary a saray bendisyon so mamapawalay “liket, pankaabigan, odino iyaaligwas.” Lapud si Jehova so Manangiter na “amin a maong a palangkap tan amin ya ayadyarin palangkap,” amin a peteg tan magnayon a bendisyon so manlalapud maaron Manamalsa tayo. (Santiago 1:17) Sikato so mamebendisyon ed amin a katooan, anggan dia ed saramay agmikabat ed sikato. Oniay kuan nen Jesus nipaakar ed Ama to: “Sikato pabutayen to so banwa to ed saray mauges tan maong, tan papelagen toy uran ed saray matunong tan aliwan matunong.” (Mateo 5:45) Balet, ipapanengneng nen Jehova so nikaduman panangiyansakit ed saramay mangaaro ed sikato.​—Deuteronomio 28:1-14; Job 1:1; 42:12.

Insulat na salmista: “Anggapo so maong a bengatla ya isiblet [nen Jehova] ed saraman so manakar a mapmaptek.” (Salmo 84:11) On, saramay manlilingkor ed si Jehova so walaan na mayaman tan makabaliksan a bilay. Amta ran “say bendisyon nen Jehova [so] makapayaman; tan agmangarum na ermen.” Onia met so sasaglawien na Biblia: “Saray totoo ya apapalar [nen Jehova] tawiren da so dalin.” (Uliran 10:22; Salmo 37:22, 29) Agaylan panamendisyon itan!

Panon tayon naawat so panamendisyon nen Jehova? Sakey a bengatla et kaukolan tayon bayuboan iray kalidad a makapaliket ed sikato. (Deuteronomio 30:16, 19, 20; Miqueas 6:8) Saya so naimano tayo ed alimbawa na talora ed saray lingkor nen Jehova nen saman a panaon.

Benendisyonan nen Jehova Iray Lingkor To

Si Noe so matalonggaring a lingkor na Dios. Diad Genesis 6:8 et nabasa tayo: “Si Noe so akagamor na grasya ed saray mata nen Jehova.” Akin? Lapud si Noe so matulok. Inkuan na salaysay: “Si Noe so akiulop-ulop ed [tuan] Dios.” Tinumbok nen Noe iray matunong a prinsipyo nen Jehova tan tinmulok ed saray ganggan to. Diad panaon sanen say mundo so nigalet ed karawalan tan kaugsan, si Noe so apakiwas a ‘gawaen so unong ya amin ed ingganggan na Dios ed sikato. Ontan so ginawa to.’ (Genesis 6:9, 22) Bilang resulta et sikatoy inwanwan nen Jehova a mangipaalagey na ‘sakey a biong a kilabanan na sankaabungan nen Noe.’ (Hebreos 11:7) Diad onian paraan, si Noe tan say pamilya to​—tan diad panamegley da et pati say rasa na totoo​—so niliktar ed kadederal na saman a kailalakan. Tan inatey si Noe a walaay ilalon napaoli diad magnayon a bilay ed paraison dalin. Agaylan mayaman iran bendisyon so agamoran to!

Si Abraham met so walaan na saray kalidad ya amaliket ed si Jehova. Manuna ed saraya et say pananisia. (Hebreos 11:8-10) Tinaynan nen Abraham so mainawan bilay diad Ur tan diad saginonor et diad Haran lapud panisiaan to so sipan nen Jehova a say bini to so ondakel tan magmaliw a bendisyon parad amin a nasyon. (Genesis 12:2, 3) Anggaman diad loob na dakel a taon na inkasubok to, atumangan so pananisia to sanen nianak so ilalak ton si Isaac. Diad panamegley na sayan anak, si Abraham so nagmaliw ya inmunan ateng na nasyon a pinili na Dios, say Israel, tan diad kaunoran et say Mesias. (Roma 4:19-21) Niarum ni, sikato so “ama na amin day manisia,” tan sikatoy atawag a “kaaro na Dios.” (Roma 4:11; Santiago 2:23; Galacia 3:7, 29) Agaylan makabkabaliksan so  impanbilay to, tan agaylan mayamyaman ya abendisyonan!

Konsideraen pa met so matoor a too, si Moises. Matalonggaring ed saray kalidad to et say panamabli to ed espiritual iran bengatla. Intalirak nen Moises so amin a kayamanan na Ehipto tan “nansiansia a singa to nengnengnengen so agnanengneng.” (Hebreos 11:27) Kayari na 40 taon diad Midian, sikatoy pinmawil ed Ehipto sanen masiken la tan inmarap ed sankabiskegan a pakayari ed saman a panaon, say Faraon, pian kerewen so kawayangan na agagi to. (Exodo 7:1-7) Atasian to so samploran bakbak, say inkabelsay na Ambalangan Dayat, tan say inkaderal na saray armada nen Faraon. Sikatoy inusar nen Jehova a mangiter na say Ganggan ed Israel tan pian mamegley ed sipanan To ed say balon nasyon. Diad loob na 40 taon, si Moises so angiwanwan ed nasyon na Israel diad kalawakan. Say bilay to so peteg a walaan na gagala, tan nanggayagaan to so makapakelaw tan mayaman iran bendisyon na serbisyo.

Kaplesan Iran Bendisyon

Ipapanengneng na sarayan salaysay a say bilay na saramay manlilingkor ed Dios so talagan makabaliksan. Legan a babayuboan na saray totoo nen Jehova iray kalidad a singa say katutulok, pananisia, tan panamabli ed saray espiritual a bengatla, sikaray mayamyaman a nabebendisyonan.

Panon itayon nabebendisyonan? Bueno, bangta saray minilyon ed loob na Kakristianoan so manasagmak na espiritual ya eras, sikatayo so nayarin ‘onagus ed kaabigan nen Jehova.’ (Jeremias  31:12) Diad panamegley nen Jesu-Kristo tan “say matoor tan makabat ya aripen,” si Jehova so mangitatarya na daakan a suplay na espiritual a tagano ya ontutulong ed sikatayon mansiansia ed “dalan a mamaarap ed bilay.” (Mateo 7:13, 14; 24:45; Juan 17:3) Say pililimog ed Kristianon impanaagi so sananey nin mayaman a bendisyon. Diad saray miting tan ed arum niran okasyon, say pakapilimog ed saray kaparan managdayew a mangipapatnag na aro tan masimoon a manbabanikel a mangisulong ed “balon personalidad” so lapuan na baleg a liket. (Colosas 3:8-10, NW; Salmo 133:1) Bangbalet, say sankabalegan a bendisyon ed sikatayo et say mablin pribilehyo a nawalaan na personal a relasyon ed si Jehova a Dios tan ed panumbok ed saray bakat na Anak to, si Kristo Jesus.​—Roma 5:1, 8; Filipos 3:8.

Diad panmolimoli ed saratan a bendisyon, namoria tayon peteg ya agaylan mabmabli so serbisyo tayo ed Dios. Nayarin isipen tayo so parabolo nen Jesus nipaakar ed managbiahen managtagilako a manaanap na marakep iran perlas. Oniay kuan nen Jesus nipaakar ed sayan laki: “Sanen akalmoy sakey a perlas a baleg so bili to, linma tan inlako ton amin a walad sikato, tan sinaliw to’man.” (Mateo 13:46) Maseguron ontan so liknaan tayo ed relasyon tayo ed Dios, say pribilehyo tayon manlingkor ed sikato, say Kristianon panlilimog tayo, say Kristianon ilalo tayo, tan arum niran bendisyon a nisisiglaot ed pananisia tayo. Anggapo la so mas mabli ed bilay tayo.

Balesen si Jehova

Lapud bibidbiren tayo si Jehova bilang say Manangiter na amin a maong a palangkap, nasagyat so kapusoan tayo a mangibalikas na apresasyon lapud saray bendisyon a naaawat tayo. Panon tayon nagawaan itan? Say sakey a dalan et diad  panulong ed arum ta pian napanggayagaan da met irayan bendisyon. (Mateo 28:19) Diad masulok a 230 a daldalin, okupado iray Tastasi nen Jehova ya ombibisita ed saray kaabay da pian gawaen labat itan. Legan dan gagawaen itan, uusaren day limitadon kaykayarian da​—panaon, biskeg, tan materyal a kaykayarian​—pian tulongay arum ya ‘ondago ed pakapikabat ed katuaan.’​—1 Timoteo 2:4.

Konsideraen pa iray payunir a manaayam ed Glendale, California, E.U.A. Kada kabuasan na Sabado et sikaray manbiabiahe na manga 100 kilometro a pawil-patubo pian ombisita ed sakey a federal detention center. Anggaman pigpigaran oras labat so nausar da ed kada idalaw da ed saray priso, ag-ira nadidismaya. Oniay kuan na sakey ed sikara: “Ontanlan makatumang so panlingkor ed sayan nikaduman teritorya. Panlikliketan min gawaen itan. Dakerakel so interesado ya agmi la nasabaan. Diad kaplesan, limaran totoo so iyaaralan mi, tan apatira ni so papaiyaralan na Biblia.”

Maliket iray maseseg a Kristianon ministro a libren mangiyoopresi ed saray serbisyo ra ed sayan manangisalbay-bilay a kimey. Ipapatnag da so awawey nen Jesus, a nankuan: “Andi-bayar ya inawat yo andi-bayar met ya iter yo.” (Mateo 10:8) Minilyon ed interon mundo so mibibiang ed mipadparan andi-siblet a serbisyo, tan bilang resulta et dakerakel a matuan-impanpuso so onkikiwas tan magmamaliw a babangatan. Diad apalabas a limaran taon labat, ngalngali 1.7 milyon so angidedika na bilay da ed si Jehova. Kakaukolanen ed panangasikaso ed saray pankaukolan na sayan peles a panamalaknab so panamawala na saray Biblia tan nibase’d Biblia iran publikasyon ontan met ed panangipaalagey na saray balon Kingdom Hall tan arum niran pantitiponan. Iner so panlalapuay kuarta a manasalipotpot ed sarayan pankaukolan? Amin so manlalapud boluntaryo iran donasyon.

Lapud mairap iran kipapasen ed ekonomya diad pigaran parti na mundo, dakel so mipupuligesgesan ed panlegpet ed saray manunan kakaukolanen ed bilay parad saray pamilya ra. Unong ed magasin a New Scientist, sakey bilyon a totoo so manguusar na ag-onkulang a 70 porsiento na nalmoan na pamilya ra parad tagano. Dakel ed Kristianon agagi tayo so walad ontan a kipapasen. No anggapoy tulong na saray kapananisiaan, agda nayarian a legpeten iray gagastosen a singa saray Kristianon palapagan odino matukoy iran Kingdom Hall.

Siempre, agto kabaliksan a kontento la iran palegpet ed arum. Balet ta nakakaukolan da so tulong. Oniay inkuan nen Moises sanen papasesegen toray Israelita a mankontribusyon na materyal bilang paraan na pisasalamat da ed si Jehova lapud saray bendisyon ya agamoran da: “Mangiter naani unong na nayarian to a nikanepegan ed impangasi nen Jehova a Dios ya inter to ed sika.” (Deuteronomio 16:17) Kanian, sanen anengneng nen Jesus so sakey a biin balo ya angipelag ed templo na “duaran maravilis” a melmelag so kantidad to, sikatoy inrayew to ed saray babangatan to. Ginawa to so anggaay nayarian to. (Lucas 21:2, 3) Ontan met so gagawaen na saray Kristianon mairap so panagbilay da. Tan no wala so pankulangan, nasalipotpotan itan na saray kontribusyon manlapud kapara ran Kristiano ya agtanton mairap so panagbilay da.​—2 Corinto 8:13-15.

Sano balesen tayo so Dios ed ontan iran paraan, importante a walaan itayo na suston motibo. (2 Corinto 8:12) Inkuan nen Pablo: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Corinto 9:7) Diad mabunlok a panangiter, nasuportaan tayo so teokratikon panamalaknab a nagagawa natan tan lalo itayon manliket.​—Gawa 20:35.

Say pibiang ed panagpulong a kimey tan say boluntaryon panagkontribusyon so duaran paraan a nabales tayo si Jehova nisengeg ed saray panamendisyon to ed sikatayo. Tan agaylan makapaseseg so pakaamtan kaliktan nen Jehova ya iter so panamendisyon to ed dakel a masimoon a totoo, a diad kaplesan et sikato ni so agda kabat! (2 Pedro 3:9) Mantultuloy tayo sirin ya usaren iray kayarian tayo diad serbisyo ed Dios ta pian naromog niray matuan-impanpuso tan natulongan ira a mamayubo ed saray kalidad a singa say katutulok, pananisia, tan apresasyon. Diad ontan et makapanggayaga itayo ed pakatulong ed sikara a ‘natawayan tan nanengneng a si Jehova et maong.’​—Salmo 34:8.

[Kahon ed pahina 28, 29]

Saray Paraan a Pinili na Arum Pian Mangiter na

KONTRIBUSYON PARAD SANKAMUNDOAN A KIMEY

Dakel so mangigagana, odino mangigegetar, na kantidad ya ipelag da ed saray “contibution box” ya atatakan na “Contributions for the Worldwide Work​—Matthew 24:14.”

Kada bulan et ipapawit na saray kongregasyon irayan kantidad balanglan diad sankamundoan a hedkuarter na saray Tastasi nen Jehova ed Brooklyn, New York, odino diad lokal a sangan opisina. Saray boluntaryon donasyon a kuarta so nayarin direktamentin ipawit ed Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, odino diad sangan opisina a manlilingkor ed bansa yo. Saray alahas odino arum niran ankablin bengatla so nayari met ya idonasyon. Sakey ya antikey a sulat a mangibabagan satan a direktan langkap so nepeg a nitekep ed sarayan kontribusyon.

UKSOYAN NA KONDISYONAL A DONASYON

Nayarin nidonasyon ed silong na espisyal a reglamento a ditan, no bilang ta say angidonar et walaay personal a pankaukolan to, say donasyon so ipawil ed sikato. Parad nagkalalon impormasyon, ipangasin mitalosan ed say Treasurer’s Office diad address a nipaimano ed tagey.

NIPLANON PANANULONG

Bilang kaaruman ed direkta iran langkap a kuarta tan kondisyonal iran donasyon na kuarta, wala niray arum a paraan na panangiter pian benepisyoan so serbisyo nipaakar ed Panarian ed sankamundoan. Laktipen na saraya so:

Seguro: Say Watch Tower Society so nayarin ingaran bilang benepisyari na sakey a life insurance policy odino ed retirement/pension plan.

Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek parad odino ibayar ed oras na ipatey ed Watch Tower Society, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.

Lote tan Abung: Say nayarin ilakon lote tan abung so nayarin idonasyon ed Watch Tower Society diad panamegley na direktan langkap odino diad pangireserba ed satan bilang panayaman na angidonar, a makapantultuloy a manayam ditan legay bilay to. Mitalosan ed sangan opisina diad bansam sakbay ya iyalis ed ngaran so antokaman a lote tan abung.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Watch Tower Society so ingaran bilang benepisyari na sakey a paknaan na pangimatalek. Say sakey a nimatalek a pakabenepisyoan na sakey a relihyoson organisasyon so nayarin mangitarya na pigaran bentaha ed panag-buis.

A singa isusuheri na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian tulongan iray indibidual a manpipilalek a benepisyoan na sankamundoan a kimey na saray Tastasi nen Jehova ed panamegley na pigaran nengneng na niplanon pananulong, say Sosyedad so angiparaan na brosyur diad Ingles tan Español ya atituloan na Charitable Planning to Benefit Kingdom Service Worldwide. Say brosyur so nisulat bilang ebat ed dakel a tepet a naawat nipaakar ed saray langkap, testamento, tan imatalek. Lugan to met iray kaaruman a nausar ya impormasyon nipaakar ed pangiplano ed lote, pinansyal, tan ed buis. Tan denisinyo itan pian ontulong ed saray indibidual ed Estados Unidos a manplaplanon manggawa na espisyal a regalo natan odino mangiter na kanepegan diad ipatey pian pilien so sankaabigan tan sanka-epektiboan a paraan diad panangikonsidera ed pamilya ra tan personal iran sirkumstansya ra. Nayarin makala ed sayan brosyur diad pangerew na sakey a kopya a direkta manlapud Sangan Opisina na Tastasi nen Jehova.

Kayari impamasa ed brosyur tan impangonsulta ed Sangan Opisina na Tastasi nen Jehova, dakel la so akatulong ed saray Tastasi nen Jehova ed sankamundoan tan ontan met, naromog so sankatagyan a balor ed saray benepisyo’d buis ed panggawa’d satan. Say Sangan Opisina na Tastasi nen Jehova so kaukolan a pasantabian tan nawalaan na kopya na antokaman a mitukoyan a dokumento nipaakar ed dinanman ed sarayan uksoyan. No interesado ka ed dinanman ed sarayan niplanon pananulong iran uksoyan, kaukolan a mitalosan ka ed Sangan Opisina na Tastasi nen Jehova, balanglan diad pansulat odino diad pantelepono, diad address a nilista ed leksab odino diad opisina na Sosyedad a manlilingkor ed bansa yo.

SANGAN OPISINA NA TASTASI NA JEHOVA

Watch Tower Society

186 Roosevelt Avenue

San Francisco del Monte

1105 Quezon City

Telephone: 411-6090