“Dago Kayo’d Siak, . . . et Itdan Ta Kayoy Pampainawa”

Mangitatarok na Pakainawaan so ‘Panangipulong ed Salita’

SIKATOY naspot a too parad sakey ya importantin misyon. Epektibon tuloy iray paraan na panamilin to kanian “dakel a katooan so nankelkelaw ed panagbanga’to.” (Mateo 7:28) Sikato met so andi-kesaw a managpulong. Say panaon, biskeg, tan amin a walad sikato so manunan nigana ed panagpulong nipaakar ed Panarian na Dios. On, niliber nen Jesus so interon binalegan ton dalin bilang agnaparaan a managpulong tan managbangat.​—Mateo 9:35.

Say maganat a misyon nen Jesus et say pangipulong ed “ebanghelyo na panarian” ed saray kapanaonan to tan pangipasal ed saray babangatan to parad miparan kimey diad sankagloboan. (Mateo 4:23; 24:14; 28:19, 20) Kasin say ambelat a responsabilidad da ed kimey a panagpulong tan say inkaganatan na satan ontan met ed inkalaknab na satan a kimey so pakabelatan a maong na saray ag-ayadyarin babangatan to a walaan na saray limitasyon?

Andin balot! Kayari ton binilin iray babangatan to ya ipikasi ra ed “Katawan na aaniyen,” a si Jehova a Dios, so dakel nin komikimey, si Jesus so angibaki ed sikara pian mangibangat ed totoo. (Mateo 9:38; 10:1) Insan pinaseguroan to ra a say responsabilidad ed pagmaliw a babangatan to​—laktip so kimey a panagpulong​—et mangitarok na tuan pakainawaan tan pakaligliwaan. Oniay inkuan nen Jesus: “Dago kayo’d siak, . . . et itdan ta kayoy pampainawa.”​—Mateo 11:28.

Sakey a Lapuan na Gayaga

Agaylan maabagey, maaro, tan mapangasi itan ya imbitasyon! Ipapatnag na satan so masimoon a panangiyansakit nen Jesus ed saray patumbok to. Talagan naiinawaan iray babangatan to diad panusumpal day responsabilidad da ya ipulong so “ebanghelyo” na Panarian na Dios. Saya so peteg a mamapagayaga tan mamepenek ed sikara.​—Juan 4:36.

Abayag ni sakbay na inkiwala nen Jesus diad dalin, indanet na Kasulatan a say liket so nepeg a napatnagan diad sagradon panaglingkor ed Dios. Saya so nipabitar sanen say salmista so angikanta: “Manggawa kayo na maligan tanol ed Jehova, sikayon amin a daldalin, manlingkor kayo ed Jehova a tinekepan na liket, dago kayo ed arapan to a mangankanta kayo.” (Salmo 100:1, 2) Saray totoo ed amin a nasyones natan et manggayaga ed si Jehova, tan saray balikas na panangidayew da et singa ra maligan tanol na mananalon armada. Saramay peteg a debosyonado ed Dios et ondago ra ed arapan to a “mangankanta.” Tan peteg a matukoy itan lapud si Jehova so “maliket a Dios,” a kaliktan ton magayaga iray lingkor to diad panumpal da’d dedikasyon da ed sikato.​—1 Timoteo 1:11, NW.

Nainawaan a Ministros

Panon a posibli a say mairap a kimey ed lawak na ministeryo so talagan agmakapakesaw ed sikatayo noagta makaparepresko? Bueno, say panggawa ed linawa nen Jehova et singa manamakasil a tagano parad si Jesus. Oniay inkuanto: “Say kanen ko sikato so panggawak na linawa na saman so angibaki ed siak, tan manumpal na kimey to.”​—Juan 4:34.

Mipadpara, saray maseseg a Kristianon managpulong natan so magayaga legan dan ‘ipupulong so salita.’ (2 Timoteo 4:2) Si Connie, sakey a Kristianon biin walad kapegleyan ya edad a manguusar na masulok a 70 oras kada bulan ed panagpulong a kimey, so nankuan: “Kayarik a manpulong, naliknak so inkapenek tan maligligsa ak, anggano naksawan ak kayari sanagew.”

Panon to no say mensahe na Panarian so ag-inawat a paborabli? Intuloy nen Connie: “Antokaman so ikikiwas [na totoo], agkon balot nagbabawian so pibibiang ed ministeryo. Nilikud ed pakaamtan gagawaen ko so makapaliket ed si Jehova, panliketan  ko so pangitongtong na nipaakar ed katuaan lapud legan a gagawaen ko so ontan, say makapakelkelaw ya ilalo a manlalapud Biblia so lalon mamapabiskeg ed liknaan ko.”

Napapaneknekan na arum a say itutulong ed totoo pian makagamor na suston pikakabat ed Dios so mangiiter na kabaliksan ed mismon bilay da. Onia so inkuan nen Meloney, sakey a kalangweran a biin regular a manguusar na masulok a 50 oras kada bulan diad panagpulong: “Say ministeryo so makaparepresko lapud mangiiter itan na direksion tan gagala ed bilay ko. Agko nanonotan iray personal a problema tan agew-agew a pakadedetdetan sano siak so manpupulong.”

Onia met so inkomento nen Millicent, sakey nin maseseg a ministro na Tastasi nen Jehova: “Pagmamaliwen na ministeryo a mabli so kada agew a pitotongtong ko ed arum nipaakar ed gagala na Dios parad katooan tan ipapaliwawak no panon a nipawil so Paraiso diad dalin. Magmamaliw a tudtua si Jehova ed siak kada agew tan niwawala ed siak so deen tan pirmin akindalem a liket ya agnagamoran ed anggan dinan ya arum a paraan.”

Saray Makakagamor na Pakainawaan

Seguradon saray manangipulong ed Panarian so naiinawaan lapud Kristianon ministeryo, tan saramay mangaawat ed manangiter-bilay a mensahe so naliligliwa lapud satan. Anggaman binangatan na saray madre tan papari diad Portugal so sakey a maestra, alikna ton ag-apenek na relihyon to so espiritual iran pankaukolan to. Saray tepet to ed Biblia so nansiansian agnaebatan. Say regular ya impangiyaral ed sikato ed Biblia na sakey ed saray Tastasi nen Jehova so amaaligwas ed pakatalos to ed Kasulatan. Say maestra so malikeliket. “Pitalaran ko so panagaral ko kada Mierkoles,” so inkuanto, “unong a sakey-sakey a naeebatan iray tepet ko tekep na makakombinsin paneknek ed Biblia.” Natan, sayan bii so dedikado lan lingkor nen Jehova, tan tutulongan to met so arum a nainawaan panamegley na katuaan ed Biblia.

Malinew sirin a saray Tastasi nen Jehova so agnadadaeg na inkaseryoso na kimey da a panagpulong odino na inkalaknab na inglobon teritorya ra. Say agpananginenen tan isusumpa so agmanidismaya ed sikara. Isesekar da so inkasikara pian sumpalen so panangipulong ed Panarian a kimey da. Inanabang da so maong a balita ed totoo inerman so pakaromogan da​—diad paradaan na trak ed Estados Unidos (1), diad airport ed Korea (2), diad Andes (3), odino diad tindaan ed London (4). Saray patumbok nen Jesus natan so magayagan manusumpal ed makatumang a kimey da diad sankamundoan. Tan unong ya insipan to, ipapagamor to ed sikara so pakainawaan tan uusaren to ira pian nainawaan so dakel ni.​—Apocalipsis 22:17.