Kaiba Kayo Kasi ed Saramay Aaroen na Dios?

“Say walaan na ganggan ko, et sumpalen to ra, sikato so mangaro ed siak. Et say mangaro ed siak sikato so inaro nen Amak.” ​—JUAN 14:21.

1, 2. (a) Panon ya impatnag nen Jehova so panangaro to ed sankatooan? (b) Anto so inletneg nen Jesus ed samay labi na Nisan 14, 33 K.P.?

 AAROEN nen Jehova so pinalsa ton totoo. Diad tua, inaro to so mundo na katooan “ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Diad panasingger lay panaon na panngilin ed Memoryal na impatey nen Kristo, saray tuan Kristiano so kaukolan a lalon sinononot a si Jehova so “angaro ed sikatayo, tan imbaki to so Anak to a makapamaandi [“bilang manamakepan bagat parad,” NW] kasalanan tayo.”​—1 Juan 4:10.

² Diad samay labi na Nisan 14, 33 K.P., si Jesus tan say 12 apostoles to so nandaragup ed tagey a silir diad Jerusalem pian selebraan da so Paskua bilang pannodnonot ed inkiliktar na saray Israelita manlapud Ehipto. (Mateo 26:17-20) Kayari na impanselebra ed sayan Judion piesta, si Judas Iscariote so pinapaway nen Jesus insan inletneg to so pakanodnonotan a pangdem a magmaliw a Memoryal na saray Kristiano ed impatey nen Kristo. * Diad impangusar ed andi-lebaduran tinapay tan ambalangan alak bilang emblema, odino simbolo, na pisikal a laman tan dala to, pinadungo nen Jesus so atilak a 11 ya apostoles ed sayan pangdem a pandurungoan. Saray detalye ed no panon so impangituloy to so inter na saray managsulat na Mantutunosan ya Ebanghelyo a si Mateo, Marcos, tan Lucas, tan si apostol Pablo, ya anawag ed satan a ‘pangdem na Katawan.’​—1 Corinto 11:20; Mateo 26:26-28; Marcos 14:22-25; Lucas 22:19, 20.

3. Diad antoran importantin paraan a miduma ed arum so salaysay nen apostol Juan nipaakar ed samay unor la iran oras nen Jesus a kaiba iray babangatan to?

³ Makapainteres, anggapoy sinalambit nen apostol Juan nipaakar ed panangipasa na tinapay tan alak, a nayarin makasengeg ed panaon na impangisulat to ed salaysay na Ebanghelyo to (ngalngali 98 K.P.), say paraan so niletneg lan maong ed limog na saray inmuunan Kristiano. (1 Corinto 11:23-26) Balet, diad silong na panangipuyan, si Juan lambengat so angiter ed sikatayo na makanan impormasyon nipaakar ed imbaga tan ginawa nen Jesus sakbay tan kayarin tuloy na impangiletneg To ed Memoryal na impatey To. Sarayan makapasagyat a detalye so naromog ed ag-onkulang a limaran kapitulo na Ebanghelyo nen Juan. Malinew iratan a mangipapatnag ed no antoran nengneng na indibidual so aaroen na Dios. Usisaen tayo so Juan kapitulo 13 anggad 17.

Makaaral ed Napanuliranan a Panangaro nen Jesus

4. (a) Panon ya indanet nen Juan so manunan tema na impituyaw nen Jesus ed saray babangatan sanen inletneg to so Memoryal? (b) Anton importantin rason no akin ya inaro nen Jehova si Jesus?

⁴ Say aro so mabitabitar a tema ed amin na sarayan kapitulo ya akasulatan na manamatanir a simbawa nen Jesus ed saray patumbok to. Diad tua, pinmatnag ed 31 a danay so nanduruman porma na salitan “aro.” Say aralem a panangaro nen Jesus ed Ama to, si Jehova, tan ed saray babangatan to so mabitabitar ed sarayan kapitulo. Say panangaro nen Jesus ed si Jehova so napatnagan  ed amin a salaysay na Ebanghelyo nipaakar ed bilay to, balet ta si Juan labat so angikurit ed malinew ya inkuan nen Jesus: “Inarok so Ama.” (Juan 14:31) Inkuan met nen Jesus a sikato so inaro nen Jehova tan impaliwawa to no akin. Inkuanto: “Singa impangaro na Ama ed siak, inaro ta kayo met, mansiansia kayo ed arok. No sumpalen yo so saray ganggan ko, mansiansia kayo ed arok, salanti singa impangunor ko ed saray ganggan nen Amak, tan mansiansia ak ed aro to.” (Juan 15:9, 10) On, aaroen nen Jehova so Anak to lapud sigpot a katutulok to. Agaylan abig ya alimbawa parad amin a patumbok nen Jesu-Kristo!

5. Panon ya impatnag nen Jesus so aro to ed saray babangatan to?

⁵ Nidanet so aralem a panangaro nen Jesus ed saray patumbok to diad kagapon tuloy na salaysay nen Juan nipaakar ed unor ya impilimog nen Jesus ed saray apostol. Insalaysay nen Juan: “Natan nen arapen na piesta na pasko, si Jesus bangta sikakabat a say oras to asabi la a nepeg to so ontaynan ed sayan mundo ya onla ed Ama, bangta inaro to so saray totoo to a wala ed mundo, inaro to ra angga ed kasampotan.” (Juan 13:1) Diad saman a makatantandan labi, inter to ed sikara so agnalingwanan a leksion nipaakar ed maaron panagserbi ed arum. Inurasan toy kasalian da. Saya so bengatlan mabulos komon a gawaen na kada sakey ed sikara parad si Jesus tan parad agagi ra, balet agda ginawa. Ginawa nen Jesus iyan mapaabeban kimey insan inkuanto ed saray babangatan to: “No siak sirin so Katawan tan Managbangat, et inurasan ko so saray sali yo, sikayo met nepeg yo so manuurasan na sali sakey tan sakey. Ta inikdan takayo na sakey a pangaligan, pian sikayo gawaen yo met so singa ginawak ed sikayo.” (Juan 13:14, 15) Saray tuan Kristiano so nepeg a mabulos tan maliket a manlingkor ed saray agagi ra.​—Mateo 20:26, 27, paimano ed leksab, NW; Juan 13:17.

Tumboken so Balon Ganggan

6, 7. (a) Anton importantin detalye so intarya nen Juan nipaakar ed impangiletneg ed Memoryal? (b) Anton balon ganggan so inter nen Jesus ed saray babangatan to, tan anto so balo nipaakar ed satan?

⁶ Say salaysay nen Juan nipaakar ed agawa ed tagey a silir diad samay labi na Nisan 14 so saksakey a salaysay ya espesipikon analambit ed impaway nen Judas Iscariote. (Juan 13:21-30) No pantutunosanen iray salaysay na Ebanghelyo, ompatnag ya inletneg nen Jesus so Memoryal na impatey To kayarin pinmaway iyan angitapat. Insan abayag ya akitongtongan to iray matoor ya apostol to, ya imbalikas to ed sikara so manamatanir a simbawa tan bilibilin. Diad pampaparaan tayon onatendi ed Memoryal, nepeg ya interesado tayon tuloy ed imbaga nen Jesus legan na satan ya okasyon, nagkalalo la ta maseguron kaliktan tayo so napibilang ed saramay aaroen na Dios.

⁷ Say primeron imbilin nen Jesus ed saray babangatan to kayari na impangiletneg to ed Memoryal na impatey to et sakey a bengatlan balo. Inyabawag to: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) Anto so balo ed sayan ganggan? Saginonor ed saman a labi, impalinew nen Jesus iray pamaakaran, a kuanto: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo. Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:12, 13) Niganggan ed Mosaikon Ganggan a saray Israelita so ‘mangaro ed kapara ran too a singa sikaran dili.’ (Levitico 19:18) Balet nagkalalo ni so sasaglawien na ganggan nen Jesus. Kaukolan ya aroen na saray Kristiano so balang sakey ed sikara a  singa impangaro nen Kristo ed sikara, a mabulos a mangisakripisyo ed mismon bilay da parad agagi ra.

8. (a) Anto so lalanoren na aron atekepan na dilin-panagsakripisyo? (b) Panon ya ipapatnag natan na saray Tastasi nen Jehova so aron atekepan na dilin-panagsakripisyo?

⁸ Say panaon na Memoryal so matukoy a panaon pian usisaen so inkasikatayon dili, bilang indibidual tan bilang kongregasyon, pian natebek tayo no kasin peteg a wala ed sikatayo iyan pakapangibiigan a tanda na tuan Inkakristiano​—say singa-Kriston aro. Satan ya aro ya atekepan na dilin-panagsakripisyo so mankabaliksan, tan no maminsan et nankabaliksan, a say sakey a Kristiano so mangirisga ed bilay to imbes ya itapat so agagi to. Kaslakan balet a sasaglawien na satan so pagmaliw tayon mabulos a mangisakripisyo ed personal iran pankaabigan tayo pian natulongan tan nalingkoran iray agagi tayo tan arum ni. Si apostol Pablo so maabig ya ehemplo ed sayan pamaakaran. (2 Corinto 12:15; Filipos 2:17) Kabkabat iray Tastasi nen Jehova ed interon mundo lapud dilin-panagsakripisyon espiritu ra, a tutulongan da iray agagi ra tan kakaabay da tan isesekar day inkasikara pian nipaamta so katuaan na Biblia ed kapara ran totoo. * ​—Galacia 6:10.

Saray Relasyon a Nepeg a Pabpablien

9. Pian namantini tayo so mablin siglaotan tayo ed Dios tan ed Anak to, anto so maliket tayon gawaen?

⁹ Anggapo lay mas mabli ed sikatayo nen say panangaro ed sikatayo nen Jehova tan say Anak to, si Kristo Jesus. Balet, pian nawalaan tan nalikna tayo iyan aro, walay bengatlan nepeg tayon gawaen. Diad samay sampot a labin kaiba toray babangatan to, inkuan nen Jesus: “Say walaan na ganggan ko, et sumpalen to ra, sikato so mangaro ed siak. Et say mangaro ed siak sikato so inaro nen Amak, tan sikato so aroen ko, et ipatnag ko naani so inkasiak ed sikato.” (Juan 14:21) Lapud papablien tayo so siglaotan tayo ed Dios tan ed Anak to, maliket itayon ontulok ed saray ganggan da. Laktipen na saya so balon ganggan a nepeg ya ipatnag so aron atekepan na dilin-panagsakripisyo tan ontan met ed ganggan ya inter nen Kristo kayari na inkioli to, salanti, ‘pulongan so totoo, tan sigpot a mantasi,’ a panggunaetan so ‘manggawa na saray babangatan’ ed saramay mangawat ed maong a balita.​—Gawa 10:42; Mateo 28:19, 20.

10. Antoran mablin siglaotan so lukas ed saray alanaan tan ed ‘arum a karnero’?

¹⁰ Saginonor ed saman a labi, oniay inkuan nen Jesus bilang ebat ed intepet ed sikato nen matoor ya apostol a si Judas (Tadeo): “No say sakey a too aroen to ak, unoren toy salitak, et sikato so aroen nen Amak, tan onla kami ed sikato, tan gawaen mi panayaman mi pati sikato.” (Juan 14:22, 23) Anggan nen wadia nira’d dalin, saray alanaan a Kristiano, a naimbitaan a miuley ed si Kristo diad tawen, so walaan na nikaduma tan maapit a siglaotan ed si Jehova tan ed Anak to. (Juan 15:15; 16:27; 17:22; Hebreos 3:1; 1 Juan 3:2, 24) Balet saray kakaiba ran ‘arum a karnero,’ a say ilalo ra et manbilay na ando lan ando diad dalin, so walaan met na mablin relasyon ed “saksakey a pastol” da, si Jesu-Kristo, tan ed Dios da, si Jehova, daput no paneknekan dan matulok ira.​—Juan 10:16; Salmo 15:1-5; 25:14.

‘Aliwa Kayon Taga-Mundo’

11. Antoy seryoson impasakbay nen Jesus ed saray babangatan to?

¹¹ Legan na unor ya impilimog to ed matoor iran babangatan to sakbay na impatey to, angiter si Jesus na seryoson pasakbay: No say sakey a too et aaroen na Dios, sikato so busolen na mundo. Oniay inyabawag to: “No say mundo busolen to kayo, amta yo a binusol to ak ya akauna nen sikayo. No taga-mundo kayo say mundo aroen to so saray kayarian to. Balet lapud aliwa kayo a taga-mundo, noag say pinili takayo ed mundo, kanian say mundo busolen to kayo. Pakanonoten yo so salita ya inkuan ko ed sikayo, Say aripen aliwan babaleg nen say katawan to. No pinasegsegang da ak, pasegsegangen da kayo met; no inunor da so salitak, unoren da met naani salita yo.”​—Juan 15:18-20.

12. (a) Akin ya impasakbay nen Jesus ed saray babangatan to a sikara so busolen na mundo? (b) Anto so makagunggonan nodnonoten na amin diad panasingger lay Memoryal?

¹² Impasakbay iya nen Jesus ta pian say 11 ya apostol to tan amin a magmaliw a tuan Kristiano so agnadismaya tan ag-onsuko lapud pambusol na mundo. Inyarum to: “Sarayan bengatla sinalitak ed sikayo, pian agkayo nagapol. Papawayen da kayo naani ed saray sinagogas. On, say oras ondateng a siopaman a mamatey ed sikayo isipen to a mangisaklang na panlingkor ed Dios. Et sarayan bengatla gawaen da, lapu ed agda akabatan so Ama, anggan say siak.” (Juan 16:1-3) Impaliwawa na sakey a diksionaryo na Biblia a say sakey a porma na verb ya impatalos dia a “nagapol” so mankabaliksan na “pansengegan lay pakadismaya na sakey a too tan italirak to imay nepeg ton panmatalekan tan unoren; pansengegan lay ikasipa.” Diad panasingger lay panaon na panngilin ed Memoryal, amin so nepeg a manmolimoli ed kurang na bilay na saray matoor nensaman tan natan insan aligen da so ehemplo ra ya inkamapekder diad silong na subok. Agyo aabuloyan so isusumpa odino panamasegsegang a pansengegan lay pangitalirak yo ed si Jehova tan si Jesus, balet magmaliw a determinadon manmatalek tan mangunor ed sikara.

13. Anto so inkerew nen Jesus nisesengeg ed saray patumbok to diad pikakasi to ed Ama to?

¹³ Diad pansaran pikakasi to sakbay dan taynanan so walad tagey a silir diad Jerusalem, inkuan nen Jesus ed Ama to: “Inter ko ed sikara so salitam; et say mundo ginula to ra, lapud ag-ira taga mundo, salanti unong ya agak taga mundo. Agko pikasi ya ekalen mo ra ed mundo, noag ingen ilaban mo ra ed mauges. Ag-ira taga mundo, salanti unong ya ag ak taga mundo.” (Juan 17:14-16) Makapanseguro itayo a babantayan nen Jehova iramay aaroen to, pian pabiskegen to ra diad pansiasiansia ran biig ed mundo.​—Isaias 40:29-31.

Mansiansia ed Aro na Ama tan ed Aro na Anak

14, 15. (a) Anto so angiyalilingan nen Jesus ed inkasikato, a midumaan ed ‘nabubulok a kiew na ubas’? (b) Sioparay “sangasanga” na “tuan sengeg na ubas”?

¹⁴ Legan na maapit ya impitongtong to ed saray matoor a babangatan to diad samay labi na Nisan 14, inyaliling nen Jesus so inkasikato bilang “tua a sengeg na ubas,” a midumaan ed ‘nabubulok a sengeg na ubas’ na agmatoor ya Israel. Inkuanto: “Siak so tua a sengeg na ubas, et say Amak sikato so managtanaman.” (Juan 15:1) Pigaran siglo ed akadkauna, inkurit nen propeta Jeremias irayan salita nen Jehova ed rebeldin totoo to: “Anggan  ontan intaneman ta ka na mabli ya ubas . . . Panon sirin so impagmaliw mo a mauges a sangasanga na ubas a sankaili ed siak?” (Jeremias 2:21) Tan insulat nen propeta Oseas: “Say Israel et sakey a nabubulok lan kiew na ubas. Tuloytuloy so pamapawala to na bunga parad inkasikaton dili. . . . Say puso ra so nagmaliw a mansimpisimpitan.”​—Oseas 10:1, 2, NW.

¹⁵ Imbes a mamawala na bunga na tuan panagdayew, naplag so Israel ed apostasya tan amawala na bunga parad inkasikaton dili. Taloran agew sakbay na unor ya impitongtong to ed saray matoor a babangatan to, oniay inkuan nen Jesus ed mansimpisimpitan iran Judion lider: “Kuan ko ed sikayo, Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” (Mateo 21:43) Satan a balon nasyon et say “Israel na Dios,” a tugyopen na 144,000 na alanaan a Kristianos, a niyaliling ed “sangasanga” na “tuan sengeg na ubas,” si Kristo Jesus.​—Galacia 6:16; Juan 15:5; Apocalipsis 14:1, 3.

16. Anto so impaseseg nen Jesus a gawaen na 11 a matoor ya apostol, tan anto so nibaga ed matoor a nakdaan ed sayan panaon na anggaan?

¹⁶ Inkuan nen Jesus ed 11 ya apostol a kaiba to ed tagey a silir: “Balang sanga ed siak ya agmanbunga, sikato so ekalen to, et balang sanga a manbunga, sikato so palinan to, pian makabunga na dakdakel a bunga. Mansiansia kayo ed siak, tan siak ed sikayo. Unong a say sanga agmakapambunga ed inkasikato, likud no sikato so mansiansia ed ubas, ontan met agyo nayarian, likud no mansiansia kayo ed siak.” (Juan 15:2, 4) Say modernon awaran na totoo nen Jehova so mangipapatnag a say matoor a nakdaan na alanaan a Kristianos so nansiansian akikasakey ed Ulo ra, si Kristo Jesus. (Efeso 5:23) Inawat da so panaglinis tan panagpaltong. (Malaquias 3:2, 3) Nanlapu la’d 1919, amawala ra na bunga na Panarian diad daakan a paraan, ya unona et say arum ya alanaan a Kristianos tan, nanlapu la’d 1935 et say lawas ondaraak a “baleg ya ulop” a kakaiba ra.​—Apocalipsis 7:9; Isaias 60:4, 8-11.

17, 18. (a) Antoran salita nen Jesus so akatulong ed saray alanaan tan say arum a karnero pian mansiansia ira ed panangaro nen Jehova? (b) Panon a makatulong ed sikatayo so iyatendi ed Memoryal?

¹⁷ Diad amin ya alanaan a Kristianos tan ed saray kakaiba ra, onaplika so kaaruman iran salita nen Jesus: “Dia ed saya so kigloriaan nen Amak, say pambunga yo na dakel tan dia ed ontan sikato so babangatan ko. Salanti singa impangaro na Ama ed siak, inaro ta kayo met, mansiansia kayo ed arok. No sumpalen yo so saray ganggan ko, mansiansia kayo ed arok, salanti singa impangunor ko ed saray ganggan nen Amak, tan mansiansia ak ed aro to.”​—Juan 15:8-10.

¹⁸ Labay tayon amin so mansiansia ed aro na Dios, tan saya so mamakiwas ed sikatayon magmaliw a mabungan Kristianos. Gawaen tayo iya diad panganamot ed amin a pankanawnawa pian ipulong so “ebanghelyo na panarian.” (Mateo 24:14) Gawaen tayo met so anggaay nayarian tayo pian ipatnag so “bunga na espiritu” ed personal a kabibilay tayo. (Galacia 5:22, 23) Say iyatendi ed Memoryal na impatey nen Kristo so mamabiskeg ed sikatayo diad determinasyon tayon manggawa ed saya, lapud napanonotan itayo ed panangaro na Dios tan say pirmin panangaro nen Kristo ed sikatayo.​—2 Corinto 5:14, 15.

19. Anton kaaruman a tulong so nasingbat ed ontumbok ya artikulo?

¹⁹ Kayari na impangiletneg to ed Memoryal, insipan nen Jesus a say Ama to so mangibaki na “managligliwa [“mananulong,” NW], salanti say espiritu santo” ed saray matoor a patumbok to. (Juan 14:26) Singbaten ed ontumbok ya artikulo no panon a makatulong so espiritu ed saray alanaan tan arum niran karnero pian mansiansia ira ed aro nen Jehova.

[Saray paimano ed leksab]

Repason Tepetepet

• Anton praktikal a leksion nipaakar ed maaron panagserbi so inter nen Jesus ed saray babangatan to?

• Nipaakar ed anto a matukoy so panaon na Memoryal parad dilin-panangusisa?

• Akin ya agtayo nepeg a nagapol ed pasakbay nen Jesus nipaakar ed pambusol tan panamasegsegang na mundo?

• Siopa so “tuan sengeg na ubas”? Sioparay “sangasanga,” tan anto so iilaloan ed sikara?

[Tepetepet Parad Panagaral]

[Litrato ed pahina 15]

Impanengneng nen Jesus ed saray apostol to so agnalingwanan a leksion nipaakar ed maaron panagserbi ed arum

 [Saray litrato ed pahina 16, 17]

Tutuloken na saray babangatan nen Kristo so ganggan to ya ipatnag so aron atekepan na dilin-panagsakripisyo