Nagunggonaan Ka ed Saray Maridios a Prinsipyo

SEGURADON kabat mo a saray ayep so onkukurang panamegley na nisipor lan walna ra. Dakel a makina so adesinyon manumbok ed saray instruksion. Balet saray totoo so talagan pinalsa pian iwanwan na saray prinsipyo. Panon mon naseguro itan? Bueno, oniay inyabawag nen Jehova, say Nanlapuan na amin a matunong a prinsipyo, sanen ginawa to so inmunan totoo: “Manggawa itayo na too a kaulibay na inalageyan tayo.” Say Manamalsa so sakey ya espiritu; sikato so andian na pisikal a laman a singa sikatayo, kanian sikatayo so “kaulibay” to diad pantalos a nipatnag tayo so personalidad to, a mangipanengneng ed saray maabig a kalidad to. Saray totoo so walaan na kapasidad ya iwanwan iray bilay da unong ed saray prinsipyo, salanti, unong ed papanisiaan dan kodigo na maptek a kiwas. Dakel ed sarayan prinsipyo so impairekord la nen Jehova diad Salita to.​—Genesis 1:26; Juan 4:24; 17:17.

‘Balet ta nilasus a prinsipyo so lugan na Biblia,’ so nayarin ikuan na sakey. ‘Imposiblin naamtaan kon amin iratan.’ Tua. Balet ta konsideraen pa iyan katuaan: Bangta amin a maridios a prinsipyo so makagunggona, say arum so mas ambelat nen  say arum. Naimanom itan diad Mateo 22:37-39, a ditan et impanengneng nen Jesus a diad saray ganggan tan misimbangan iran prinsipyo na Mosaikon Ganggan, walaray lalon importante nen say arum.

Dinan iray mas ambelat a prinsipyo? Saray manunan prinsipyo na Biblia et saramay direktan mangaapekta ed relasyon tayo ed si Jehova. Sano ipapuso tayo irayan prinsipyo, say Manamalsa so magmaliw a manunan mangimpluensya ed moral a kompas tayo. Niarum ni, walaray prinsipyon mangaapekta ed relasyon tayo ed arum a totoo. Say pangiyaplika ed saraya so ontulong ed sikatayon natalonaay awawey a siak-ni, anggaman nayarin nitalaga itan.

Igapo tayo pa ed sakey ed saray importantin tuloy a katuaan a walad Biblia. Anto itan a katuaan, tan panon a mangapekta itan ed sikatayo?

“Sankatageyan ed Interon Dalin”

Ipapalinew na Masanton Kasulatan a si Jehova so Engranden Manamalsa tayo, Makapanyarin-amin a Dios. Sikato so agbalot naparaan odino nasandian. Saya so manunan katuaan a nirekord diad Biblia.​—Genesis 17:1; Eclesiastes 12:1.

Oniay kuan na sakey ed saray managsulat na libro na Salmos nipaakar ed si Jehova: “Sika labat so Sankatageyan ed interon dalin.” Oniay insulat met nen Arin David nensaman: “Kien mo so nanarian, O Jehova, tan nipaatagey ka a singa ulo ed labas na amin.” Tan say kabkabat a propetan Jeremias so apakiwas a mangirekord: “Anggapo so anggan siopa a singa sika, O Jehova; sika so baleg, tan say ngaran mo baleg dia ed pakapanyari.”​—Salmo 83:18, NW; 1 Awaran 29:11; Jeremias 10:6.

Panon tayon iyaplika iratan a katuaan nipaakar ed Dios diad inagew-agew a kabibilay?

Malinew no siopan peteg so manunaan ed bilay tayo​—say Manamalsa tan Manangiter-Bilay tayo. Agta matukoy sirin a resistian so antokaman a tendensian ipaimano tayo so inkasikatayo​—tendensian mas mapatnag ed pigara nen say diad arum a totoo? Say makabat a manangiwanwan a prinsipyo et say ‘panggawa ed amin a bengatla parad kigloriaan na Dios.’ (1 Corinto 10:31, NW) Angipanengneng si propeta Daniel na maabig ya alimbawa ed saya.

Ibabaga ed sikatayo na maawaran a rekord ya aminsan et si Arin Nabucodonosor na Babilonia so ginonigon na sakey a kugip tan pinilit ton naamtaan so kabaliksan na satan. Bangta amin so nawewetwet, susto ya imbaga nen Daniel ed ari so labay ton naamtaan. Kasin inala nen Daniel so galang lapud saya? Andi, inggloria to so “Dios ed tawen a mangipatnag ed saray maamot.” Intuloy nin inkuan nen Daniel: “Saya a maamot agnipuyan lapu ed kakabatan a wala ed siak a nagkalalo nen saray amin a mabilay.” Si Daniel so too a walaan na prinsipyo. Agpankelawan a diad libro na Daniel et sikato so amitlon adeskribe bilang “makaroyroyon tuloy” diad imaton na Dios.​—Daniel 2:28, 30; 9:23, NW; 10:11, 19.

Nagunggonaan ka no aligen mo si Daniel. Diad panumbok mo ed alimbawa nen Daniel, say mandetermina et say motibo. Siopay nepeg a napagalangan ed gagawaen mo? Antokaman so situasyon mo, walaan ka na abilidad ya onkiwas a mitunosan ed sayan importantin tuloy a prinsipyo na Biblia​—si Jehova so Soberanon Katawan. Diad panggawam ed satan et magmaliw kan “makaroyroyon tuloy” ed imaton to.

Konsideraen tayo pay duaran manunan prinsipyo a makapangigiya ed sikatayo nipaakar ed saray relasyon na too. Anggaman kasmak lan  nidadanet so dili, sayan aspekto na bilay so nagkalautlan makapaangat.

“Kaabebaan na Kalakal”

Saramay pinonot day inkasikara so mataltalag a napenek. Maslak so mankaliktan ni ingen na lalon magmaong a kabibilay, tan labay dan nagamoran la itan a tampol. Parad sikara et say inkamapaabeba et sakey a kakapuyan. Ipapasen dan say arum labat so nepeg a mangipanengneng na anos. No nipaakar ed panggugunaet dan ontalona et amin a bengatla so nayari. Isipen mo kasin walay napanpilian mo ni nilikud ed ikiwas mon singa sikara?

Saray lingkor na Dios so nipapaarap ed ontan ya awawey diad inagew-agew, balet ta nepeg ya agmangapekta itan ed sikara. Aaksobien na saray matakken la ed espiritual a Kristiano so prinsipyon “aliwa a say idayew to so inkasikato a dili so napaabig, noag say idayew na Katawan.”​—2 Corinto 10:18.

Ontulong so pangiyaplika ed prinsipyon walad Filipos 2:3, 4. Pasesegen ka na satan a teksto ya “anggapon balot komon so gawaen mo a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.” Diad ontan et “[agmo] nengnengen . . . so kayarian [mon] dili, noag . . . nengnengen [mo] met so saray bengatlan kayarian na saray arum.”

Say sakey a walaan na suston awawey ed inkasikaton dili tan dugan impanmoria ed kipapasen to et si Gideon, sakey ya ukom ed limog na saray Hebreo nensaman. Agto inugagep so pagmaliw a lider na Israel. Anggaman ontan, sanen sikato so aturo a mangawat ed satan a betang, impabitar nen Gideon so inkaandi-kakanaan  to. “Nia, say pamilyak sikato so karukaan dia ed Manases, tan siak so kaunoran ed abung nen amak,” insalaysay to.​—Uko-ukom 6:12-16.

Niarum ni, kayarin impanbiktorya nen Jehova si Gideon, sikatoy kinolkol na totoon taga-Efraim. Antoy reaksion nen Gideon? Kasin say dilin-importansia to so nipaatagey lapud impanbiktorya to? Andi. Apaliisan to so desyang diad mauyamon inyebat to. “Anto so nayarian ko a gawaen dia ed pangipadpara ed sikayo?” Si Gideon so mapaabeba.​—Uko-ukom 8:1-3.

On, saray agawgawan manasaglawi ed si Gideon so agawa la nensaman. Siansia, walaan na kaimportantian so pangonsidera ed salaysay. Naimanom ya agunggonaan si Gideon lapud walaan na awawey a miduman tuloy ed walan kasmak natan, tan sikato so nambilay unong ed satan.

Say kasmak ya awawey a mangiyaapasakey ed dili so nayarin mamikewet ed panmoria tayo nipaakar ed kakanaan tayo. Say ontan ya inkapikewet so ipetek na saray prinsipyo ed Biblia, a kibangatan tayo ed tuan kablian tayo diad pisiglaotan ed Manamalsa tan ed arum.

Diad panumbok ed saray prinsipyo na Biblia, natalonaan tayo iyan kasmak ya awawey a siak-ni. Agtayo la kontrolen na saray liknaan odino personalidad. Diad lalon pakaaral tayo nipaakar ed saray matunong a prinsipyo, lalon nakabkabat tayo so Nanlapuan na saratan. On, say nikaduman pangimano ed saray maridios a prinsipyo sano babasaen so Biblia so makagunggonan tuloy.​—Nengnengen so kahon.

Ginawa nen Jehova iray totoon atagtagey nen saray ayayep, a manunan pakikiwasen na nisipor lan walna ra. Lalanoren na panumbok ed linawa na Dios so pangiyaplika na saray prinsipyo to. Diad ontan et lawas tayon nausar so moral a kompas tayo ed dugan paraan, sakey a kompas a mangiwanwan ed sikatayo diad balon sisteman gawaen na Dios. Iiter na Biblia ed sikatayo so rason a panilalo tayo ed asingger lan balon sistema ed sankadalinan a “panayaman na katunongan.”​—2 Pedro 3:13.

[Kahon/Litrato ed pahina 6]

Pigaran Makatulong a Prinsipyo ed Biblia

Diad loob na pamilya:

“Anggapo komon so siopan too a mananap na kaabigan ton dili, noag say kaabigan na kapara ton too.”​—1 Corinto 10:24.

“Say aro . . . agto anapen so kien to.”​—1 Corinto 13:4, 5.

“Balang sakey aroen to so dilin asawa to a bii a singa dilin laman to.”​—Efeso 5:33.

“Asawan bibii, wala kayo ed pakauley na saray kaasawaan yo.”​—Colosas 3:18.

“Pakadenglen mo so amam a nanilalak ed sika, tan agmo mudmoraen so inam sano akulaw.”​—Uliran 23:22.

Diad eskuelaan, ed pantratrabahoan, odino diad pamaakaray negosyo:

“Say sakey a mauges a simbangan sikato so kagula . . . Say marelmeng makapinabang ed saray masaol a tubo.”​—Uliran 11:1, 18.

“Saman so nantatakew nensaman agkomon la mantakew: noag mansagpot.”​—Efeso 4:28.

“Say agmankimey, agmet komon mangan.”​—2 Tesalonica 3:10.

“Dinanman a gawaen yo, gawaen yon mabulos, a singa nipaakar ed Katawan.”​—Colosas 3:23.

“Pampirawatan mi so manbilay a sigagalang dia ed saray amin a bengatla.”​—Hebreos 13:18.

Awawey nipaakar ed kayamanan:

“Say maganat ya onyaman aliwa naani ya agnadusa.”​—Uliran 28:20.

“Say mangaro ed pilak agnapesel ed pilak.”​—Eclesiastes 5:10.

Panangipasen ed dilin kakanaan na sakey:

“Say panaanap na totoo ed dilin galang da, galang kasi itan?”​—Uliran 25:27, NW.

“Sananey a too so mangidayew komon ed sika, tan aliwa a say dili a sangim.”​—Uliran 27:2.

“Kuan ko sirin ed balang sakey a too ed sikayo, ya agto nonoten so inkasikaton dili ya atagtagey nen say kanepegan a nonoten.”​—Roma 12:3.

“No say sakey a too manisisip a wala so daiset a kakanaan to, anta andi gapon mogmo, say inkasikaton dili tilaan to.”​—Galacia 6:3.

[Litrato ed pahina 5]

Inter nen Daniel so manepeg a galang ed Dios

[Litrato ed pahina 7]

Say pideneng ed arum unong ed saray maridios a prinsipyo so mamawala na marakep iran relasyon tan liket

[Picture Credit Line ed pahina 7]

U.S. Fish & Wildlife Service, Washington, D.C./Robert Bridges