Internasyonal Iran Kombension ed 2003

NEN Oktubre 6, 2001, Sabado, ginawa so tinaon a miting na saray membro na Watch Tower Bible and Tract Society of Pennsylvania diad Jersey City, New Jersey, U.S.A. Kayari na saman a miting, sakey ya espisyal a programa so nanggayagaan na saray membro tan saray bisita ra. Diad tinmumbok ya agew, ed kaaruman iran miting a ginawa ed apatiran syudad diad Canada tan ed Estados Unidos, saray membro na Mananguley ya Ulop na Tastasi nen Jehova so angiyanunsio ed onggendan kayari na pansaran paliwawa ra:

“Legan itayon onnenengneng ed arapen, importantin tuloy ya agpaulyanan na amin a totoo na Dios so pantitipon da. Imbilin nen apostol Pablo a nagkalalo lan gawaen iya, pati pampapasesegan, legan a manasingger so abalbaleg tan makapataktakot ya agew nen Jehova. (Hebreos 10:24, 25) Mitunosan ed sayan Makasulatan a ganggan, ilaloan tayo so pakawalaan na distrito iran kombension ed amin a parte na mundo ed ontumbok a taon [2002]. Insan diad taon 2003, no linawa nen Jehova, posibli so pakagawa na espisyal ya internasyonal iran kombension diad pigaran rehyon ed mundo. Natan la so panaon a mansiansian aliing tan mansiansian akabantay, a tebeken no panon a nagagawa iray ebento ed eksena na mundo.”

Anggaman ed ompapalalon agpakaseguro tan saray desdes legan a manasingger lay pangangga na sayan peles a sistema, nepeg ya onabanti so aktibidad na totoo na Dios. Say maong a balita na Panarian, pati say pasakbay a mensahe na Biblia, so nepeg ya iyabawag ed amin a nasyon, tribu, pansasalita, tan totoo, a mangipapaimano ed sikara ya ‘ontakot ed Dios tan iter ed sikato so gloria lapud say oras na panangukom to so manasingger.’ (Apocalipsis 14:6, 7, NW) Sirin, unong ed linawa tan panliketan na mangatatawen ya Ama tayo, saray internasyonal a kombension so niplaplano la ed nanduruman rehyon ed mundo parad taon 2003.

Bilang pangigapo, saratan a pantitipon so tentatibon akaeskedyul ed pigaran syudad ed North America tan insan diad Europa. Diad saginonor na 2003, gawaen iray uksoyan parad saray grupo na saray delegado a manbiahe diad pigaran syudad ed Asia; tan diad pansamposampot na taon, saray kaaruman a grupo so onla ed lugar diad Aprika, South America, tan Pasipiko. Nayarin nakerew ed pigaran sanga so pangibaki na limitadon bilang na saray delegado ed espisipiko iran pakagawaan na kombension, kanian aliwan amin et naimbitaan ya onatendi. Anggaman ontan, makapaseseg so pakawalaan na limitado iran delegado a mangirerepresenta ed nanduruman bansa ed kada pasen.

Saray kongregasyon na Tastasi nen Jehova so makaawat na impormasyon nipaakar ed sarayan pantitipon. Itarya na sanga so impormasyon nipaakar ed eksakton petsa tan espisipiko iran syudad diad saray naimbitaan a delegado a makaatendi. Kanian, nakerew ya agkayo ni mansusulat odino ontetepet nipaakar ed sayan pamaakaran ed sayan bekta.

Saramay pilien a delegado so para labat ed dedikado tan bautismadon Tastasi a walaan na maabig ya ehemplo tan mangipapanengneng na inaagin aro ed saray agagi. Diad ontan et saraya so nawalaan na maabig a pankanawnawan manginatnat na maaron panangabrasa tan puron panagparawes ed saray bisita. (Hebreos 13:1, 2) Saya so manresulta ed ‘pakapampapasesegan.’ (Roma 1:11, 12, NW) Saray kaaruman a detalye nipaakar ed sarayan uksoyan so iter na saray sanga a naimbitaan a mangibaki na saray delegado ed sakey a bansa odino saray bansa.

Singa dati et say taloy-agew a distrito iran kombension parad taon 2003 so iyuksoy ed maslak iran bansa. Diad pantitipon, amin so nawalaan na pankanawnawan ‘ondengel, manaral, tan napaseseg.’ (Deuteronomio 31:12; 1 Corinto 14:31, NW) Saya so mangiter na pankanawnawa ed amin a totoo na Dios pian ‘tawayan et nanengneng da a si Jehova maong.’ (Salmo 34:8) Diad amin ya internasyonal iran kombension, ontan met ed dakel iran distriton kombension, saray misionaryo so presente, arum ed sikara so iparungtal diad programa.

Legan na sayan taon 2002, panggayagaan tayo so “Maseseg Iran Manangiyabawag na Panarian” Iran Distriton Kombension, a managyat ed sikatayon mangiter na nagkalalon pantasi. Legan tayon gagawaen iya, say panilalo tayo so maseguron ombulaslas parad itatarya nen Jehova ed onsublay a taon. Saya so ontulong ed sikatayon ‘mansiansian akabantay, mansiansian aliing, tan paneknekan tayoy inkasikatayo ya akaparaan’ anggaman ed saray maatap tan importantin panaon.​—Mateo 24:42-44.