Altar Parad Sakey ya Ag-angaranan a Dios
Altar Parad Sakey ya Ag-angaranan a Dios
MANGA 50 K.P. et binmisita si apostol Pablo diad Atenas, Gresya. Anengneng to’d man so altar a nidedika ed sakey a dios ya ag-amta tan sinalambit to itan diad saginonor sanen mangiiter na maabig a pantasi nipaakar ed si Jehova.
Ginapoan nen Pablo so paliwawa to diad Mars’ Hill, odino say Areopago, a kuanto: “Lalakin taga Atenas, dia ed amin a bengatla, nanengneng ko a mapagalang kayon tuloy ed pidiosan. Ta diad inlabas ko tan innengneng ko ed saray pikakasian yo, aromog ko so sakey ya altar met a kawalaan na sayan sulat: Dia ed Sakey a Dios ya Ag-amta. Saman sirin so igalgalang yo ya agyo amta, sikato so ipakabat ko ed sikayo.”—Gawa 17:22-31.
Anggano aglan balot nalmo itan ya altar ed Atenas, walaray mipadparan altar diad arum iran lugar ed Gresya. Singa bilang, say Griegon heograpo nen komaduan siglo a si Pausanias so analambit ed saray altar na “dirios a Nginaranan na Ag-amta” diad Phaleron, ya asingger ed Atenas. (Description of Greece, Attica I, 4) Unong ed satan met a libro, diad Olympia et wala so “altar na dirios ya Ag-amta .”—Eleia I, XIV, 8.
Diad libro ton The Life of Apollonius of Tyana (VI, III), inkuan na Griegon managsulat a si Philostratus (c. 170-c. 245 K.P.) a diad Atenas et “inletneg iray altar pian pagalangan iray mismon dirios ya ag-amta.” Tan diad Lives of Philosophers (1.110) et insulat nen Diogenes Laertius (c. 200-250 K.P.) a “saray altar ya andiay ngaran” so naromog diad nanduruman lugar ed Atenas.
Angipaalagey met iray Romano na saray altar na ag-angaranan a dirios. Nipanengneng dia so sakey ya apetsaan manlapud unona odino komaduan siglo K.K.P. tan nipreserba diad Palatine Antiquarium ed Roma, Italya. Say Latin ya inskripsion na satan so pakapatnagan a sayan altar so nidedika ed “sakey a dios odino diosa”—balbalikas a “mabetbet a naromog ed saray dasal odino ed saray balikas ed dedikasyon diad inskripsion tan saray sulat ed libro.”
“Say Dios a nanggawa ed mundo tan saray amin a bengatla” so siansia nin agkabat na dakel. Balet unong ya imbaga nen Pablo ed saray taga-Atenas, sayan Dios, a Jehova, so “ag-arawi ed sinansakey ed sikatayo.”—Gawa 17:24, 27.
[Picture Credit Line ed pahina 32]
Altar: Soprintendenza Archeologica di Roma