Anton Talaga so Impierno?

ANTOKAMAN so ideyan isisipen mo ed salitan “impierno,” momoriaen na maslak a totoo a say impierno et sakey a pasen a pandusaan lapud kasalanan. Nipaakar ed kasalanan tan say epekto na satan, oniay ibabaga na Biblia: “Say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) Inkuan ni na Kasulatan: “Say bayar na kasalanan say patey.” (Roma 6:23) Lapud say dusa na kasalanan et patey, say manunan tepet pian nadetermina so tuan kabaliksan na impierno et: Anto so nagawa ed sikatayo sano ompatey itayo?

Kasin walay arum a klase na bilay, ed arum a nengneng, a mantultuloy kayari patey? Anto so impierno, tan anton klase na totoo so onla diman? Wala kasi so ilalo na saramay walad impierno? Say Biblia so mangiiter na matua tan makapnek iran ebat ed sarayan tepet.

Bilay Kayari Patey?

Kasin walay bengatlan walad dalem tayo, a singa say kamarerwa odino espiritu, a makaliktar ed ipatey na laman? Konsideraen no panon ya awalaan na bilay so inmunan too, si Adan. Oniay ibabaga na Biblia: “Si Jehova a Dios, say sapok na dalin so ginawa to a too, tan inlinawa to ed saray sangab na eleng to so linawa na bilay.” (Genesis 2:7) Anggaman say panaglinawa so anustuni ed bilay to, say impangiyan na “linawa na bilay” ed saray sangab na eleng to so angilanor ed mas ni nen say basta impangisibok na dagem ed saray bala to. Kabaliksan na satan ya impasen na Dios ed andiay-bilay a laman nen Adan so kidyam na bilay​—“say puersa na bilay,” a wala ed amin a mangaraldalin a pinalsa. (Genesis 6:17; 7:22, NW) Tutukoyen na Biblia iyan mamapabilay a puersa bilang “espiritu.” (Santiago 2:26) Satan ya espiritu so nikompara ed koryenti a mamapaandar ed sakey a makina odino kagawaan tan mamapakurang ed satan unong ed usar to. No panon a say koryenti so agbalot magmaliw a singa ed samay kagawaan a papaandaren na satan, say puersa na bilay so agmet magmaliw a singa ed saray pinalsa a papabilayen na satan. Andian itan na personalidad odino abilidad a mannonot.

Anto so nagawa ed espiritu sano ompatey so too? Oniay ibabaga na Salmo 146:4: “Say panlinlinawa to ompaway, ompawil ed dalin to; dia ed satan lanlamang ya agew saray nonot to natawtaw ira.” Sano ompatey so sakey a too, say aliwan personan espiritu to so agmansiansia ed sananey a pasen bilang espiritun pinalsa. Satan so “ompawil ed Dios ya angiter ed sikato.” (Eclesiastes 12:7) Kabaliksan na saya ya antokaman ya ilalo ed arapen a bilay parad satan a too so sigpot lan akadependi ed Dios.

Panisiaan na saray Griegon pilosopo a di Socrates tan Plato a say kamarerwan walad dalem na too so makaliktar ed ipapatey tan agbalot ompatey. Anto so ibabangat na Biblia nipaakar ed  kamarerwa? Si Adan so ‘nagmaliw a mabilay a kamarerwa,’ so kuan na Genesis 2:7. Sikato so ag-angawat na kamarerwa; sikato so kamarerwa​—ya interon persona. Sasaglawien na Kasulatan so nipaakar ed kamarerwa a mankikimey, manpipirawat ed tagano, kinidnap, tan agmakakaugip, tan arum nira. (Levitico 23:30; Deuteronomio 12:20; 24:7; Salmo 119:28) On, say toon mismo so kamarerwa. Sano ompatey so too, satan a kamarerwa so ompatey.​—Ezequiel 18:4.

Anto sirin so kipapasen na inatey? Oniay imbaga nen Jehova sanen senentensiaan to si Adan: “Sika et dabok ka, dia ed dabok ompawil ka.” (Genesis 3:19) Iner so kawalaan nen Adan sakbay a sikatoy ginawa na Dios manlapu ed dabok na dalin tan inikdan to na bilay? Peteg a sikatoy andi ed kiwawala! Sanen sikatoy inatey, si Adan so pinmawil ed satan a kipapasen na sigpot ya andiay bilay. Say kipapasen na inatey so nipalinew diad Eclesiastes 9:5, 10, a ditan et nabasa tayo: “Saray inatey et anggapoy amta ra . . . Anggapo la so kimey nisay kanonotan nisay pikakabat nisay kakabatan dia ed lubok a laen mo.” (New International Version) Unong ed Biblia, say ipapatey et sakey a kipapasen na agkiwawala. Anggapo lay amta, pakalikna, odino pakanonot na inatey.

Agmanganggan Kapairap Odino Kaslakan a Lubok?

Lapud anggapo la so pakalikna na inatey, say impierno so agnayarin sakey a mangapuy-apoy a pasen a pamairapan ed saray marelmeng kayari ipapatey. Anto sirin so impierno? Say pangusisa ed agawa’d si Jesus kayari impatey to so ontulong pian naebatan itan a tepet. Oniay isasalaysay na managsulat na Biblia a si Lucas: “Agnapaulyan [si Jesus] ed Hades [impierno, King James Version), nisay laman to met agto nanengneng so kabulok.” * (Gawa 2:31) Iner so impierno a nilan mismo nen Jesus? Oniay insulat nen apostol Pablo: “Imbangat ko ed sikayo a . . . si Kristo inatey lapu ed saray kasalanan tayo unong [ed] saray sulat; tan inkotkot, tan inmolin binmilay nen komatlon agew unong na saray sulat.” (1 Corinto 15:3, 4) Kanian si Jesus so walad impierno, say lubok, balet sikatoy agpinaulyanan diman, lapud sikatoy pinabilay odino pinaoli.

Imanoen met so kipapasen na matunong a toon si Job, a pirmin nanirap. Lapud pirawat toy makalegyas ed paniirap to, oniay impikasi to: “O komon ta iyamot moak ed Sheol [“impierno,” Douay Version], pian niyagel moak a maamo-amot, angga ed say sanok mo onlabas.” * (Job 14:13) Agaylan agmakatunongan ya isipen a pinilalek nen Job so onla ed manliob a pasen pian niyagel! Parad si Job, say “impierno” et sakey a lubok lambengat, a ditan manampot so paniirap to. Sirin, say impierno ya asalambit ed Biblia so kaslakan a lubok na katooan a ditan so laen na namparan maong tan mauges a totoo.

Impiernon-apoy​—Makaulam?

Nayari kasin say apoy na impierno so mangisimbolo ed makaulam, odino nagnap, a kadederal?  Pian napanbiigan so apoy tan Hades, odino impierno, oniay ibabaga na Kasulatan: “Say patey tan say Hades nibantak ira ed dayat ya apoy.” Say “dayat” ya asalambit dia et simboliko, lapud agliteral a napoolan so patey tan impierno (Hades) a nibantak ditan. “Saya [a dayat ya apoy] sikato so ipapatey a komadua”​—ipapatey ya anggapo lay ilalon napaoli ed bilay.​—Apocalipsis 20:14.

Say dayat ya apoy so walaan na mipadparan kabaliksan ed samay “mangapuy-apoy a Gehenna [impiernon apoy, King James Version]” a sinaglawi nen Jesus. (Mateo 5:22, NW; Marcos 9:47, 48) Say Gehenna so 12 a danay a nabasa diad Kristianon Griegon Kasulatan, tan ontutukoy itan ed lawak na Hinnom, diad paway na bakor na Jerusalem. Sanen wadia ni’d dalin si Jesus, sayan lawak so inusar a basuraan, “a pangibabantakan ed bangkay na saray kriminal, tan inaatey ya ayayep, tan amin nin klase na dutak.” (Smith’s Dictionary of the Bible) Mantultuloy a mandarlang iray apoy diad pangaarum na asupre pian nasimot so basura. Inusar nen Jesus itan a lawak bilang matukoy a simbolo na andi-anggaan a kadederal.

Singa isisimbolo na Gehenna, say dayat ya apoy so mangisisimbolo ed magnayon a kadederal. “Nibantak” ditan so patey tan say Hades a kabaliksan ton naandi la iratan sano bulos lay katooan manlapud kasalanan tan panangondenay patey. Saramay sigagagala, agmagbabawin managkasalanan so walaan met na “apag” ed satan a dayat. (Apocalipsis 21:8) Sikara met so naandi la ed ando lan ando. Diad biek a dapag, saramay wala ed pakanodnonotan na Dios a walad impierno​—say kaslakan a lubok na katooan​—so walaan na makapakelkelaw ya arapen.

Naandi la so Kargay Impierno!

Oniay ibabaga na Apocalipsis 20:13: “Say dayat initer to so inaatey a wala ed sikato; tan say patey tan say Hades initer da so inaatey a wala ed sikara.” On, naandi la so karga na impierno ya asalambit ed Biblia. Unong ya insipan nen Jesus, “onsabi oras, ya amin so saray wala ed saray [pakanodnonotan a] lubok narengel da so boses [nen Jesus], et ompaway ira.” (Juan 5:28, 29) Anggaman anggapo lay kiwawala ra natan ed antokaman a nengneng, saray minilyon ya inaatey a walad pakanodnonotan nen Jehova a Dios so napaoli odino nabilay lamet, diad nipawil a mangaraldalin a paraiso.​—Lucas 23:43; Gawa 24:15.

Diad balon mundo na Dios, saray apaolin totoo a manguunor ed matunong iran ganggan to so aglan balot ompatey lamet. (Isaias 25:8) “Punasen [nen Jehova] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot.” Diad tua et “saray una a bengatla sikara so [onlabas] la.” (Apocalipsis 21:4) Agaylan bendisyon so akatarya parad saraman so walad impierno​—“saray [pakanodnonotan a] lubok”! Peteg a sayan bendisyon so magenap lan rason pian onggamor itayo na dakel nin pikakabat ed si Jehova a Dios tan ed Anak to, si Jesu-Kristo.​—Juan 17:3.

[Saray paimano ed leksab]

[Litrato ed pahina 5]

Impikasi nen Job a sikatoy niyagel ed impierno

[Litrato ed pahina 6]

Mangapuy-apoy a Gehenna​—simbolo na magnayon a kadederal

[Litrato ed pahina 7]

‘Ompaway iraman so walad saray pakanodnonotan a lubok’