‘Mantultuloy Yo Ak a Tumboken’

“Ta saya so inkatawag yo: ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.”​—1 PEDRO 2:21.

1, 2. Akin a say naspot ya alimbawa nen Jesus bilang managbangat et agmairap ya aligen?

 SI Jesu-Kristo so sankamaongan a Managbangat a nambilay ed kapiganman. Niarum ni, sikato so ayadyari tan agbalot nankasalanan legan na impanbilay to bilang too. (1 Pedro 2:22) Balet, kasin kabaliksan na satan a say ehemplo nen Jesus bilang managbangat et mairap ya aligen na saray ag-ayadyarin totoo? Andin balot.

² Unong a naimano tayo ed inmunan artikulo, say pundasyon na panagbangat nen Jesus et aro. Tan say aro so nabayuboan tayon amin. Say Salitay Dios so mabetbet a mamapaseseg ed sikatayon ombulaslas tan onaligwas ed aro tayo ed arum. (Filipos 1:9; Colosas 3:14) Agbalot kakaukolanen nen Jehova ed saray pinalsa to so agda nayarian a gawaen. Diad tua, lapud say ‘Dios et aro’ tan ginawa to itayo ed mismon indengan to, nibaga a denesinyo to itayon mangipatnag na aro. (1 Juan 4:8; Genesis 1:27) Kanian sano basaen tayo iray salita nen apostol Pedro ed pinagkateman teksto tayo, onkiwas itayo tekep na kompiyansa. Nayarian tayon tumboken a maapit iray bakat nen Jesus. Diad tua, natumbok tayo so mismon ganggan nen Jesus: ‘Mantultuloy yoak a tumboken.’ (Lucas 9:23) Konsideraen tayo no panon tayon aligen so aron impatnag nen Kristo, ya unona et parad saray katuaan ya imbangat to, insan ed totoo ya imbangat to.

Pamayubo ed Aro Parad Katuaan ya Aaralen Tayo

3. Akin a nairapan so arum a manaral, balet anto so walan bilin ed Uliran 2:1-5?

³ Pian naaro tayo iray katuaan ya ibabangat tayo ed arum, nepeg tayon kaliktanen ya aralen iratan a katuaan. Diad mundo natan, mairap a bayuboan so ontan a nengneng na pankaliktan. Dakel so siansia nin agmankaliktan a manaral makasengeg ed agmagenap ya impakapanaral tan makapuy iran ugali ya abayuboan da legan na inkatobonbalo. Balet, importante a paibangat itayo ed si Jehova. Oniay ibabaga na Uliran 2:1-5: “Ana’ko no awaten mo so saray salitak, tan yatol mo so saray ganggan ko ed sika; a singa pangikiling mo na layag mo ed kakabatan, tan ipeket mo  so pusom ed pakatalos; on, no kelyawan mo so kaisipan, tan itagey mo so boses mo nipaakar ed pakatalos; no sikato so anapen mo a singa pilak, tan sikato so usisaen mo a singa saray inyamot a kayamanan: Diad ontan natalosan mo so takot ed Jehova, tan naromog mo so pikakabat ed Dios.”

4. Anto so kabaliksan na “ipeket” so puso, tan anton punto de bista so makatulong ed sikatayon manggawa ed satan?

⁴ Imanoen a diad bersikulo 1 anggad 4, aminpigapiga itayon apaseseg a mansagpot, aliwa lambengat a ‘mangawat’ tan ‘mangiyatol,’ noagta ‘mananap’ tan ‘manusisa’ met. Anto balet so mamakiwas ed sikatayon manggawa ed sayan amin? Bueno, imanoen iray salita ya “ipeket mo so pusom ed pakatalos.” Inkuan na sakey a reperensya a sayan bilin so “aliwa lambengat a masimoon a kerew pian manimano; satan so ganggan parad sakey ya awawey: sakey a magunaet a pangawat ed saray bangat.” Tan anto so mamakiwas ed sikatayon mangawat tan manggunaet a manaral ed ibabangat nen Jehova ed sikatayo? Say punto de bista tayo. Nakaukolan tayon moriaen so “pikakabat ed Dios” bilang “pilak” tan bilang ‘inyamot iran kayamanan.’

5, 6. (a) Anto so nayarin nagawa diad ilabas lay panaon, tan panon tayon napaliisan itan? (b) Akin a nepeg tayon itultuloy ya aruman iray kayamanan na pikakabat ya aromog tayo la ed Biblia?

⁵ Mainomay so pakawalaan na ontan a panmoria. Alimbawa, say “pikakabat ed Dios” a naaralan yo so nayarin mangilaktip ed katuaan a gagala nen Jehova a manbilay na andi-anggaan so katooan diad Paraiso ed dalin. (Salmo 37:28, 29) Sanen primeron naaralan yo itan a katuaan, maseguron minoria yo itan bilang tuan kayamanan, sakey a pikakabat ya amano ed nonot tan puso yo tekep na ilalo tan gayaga. Komusta met natan? Diad inlabas la na panaon, kasin kinmapuy lay apresasyon yo ed kayamanan yo? Salien sirin a gawaen so duaran bengatla. Unona, pasimbaloen yoy apresasyon yo, salanti, regular a tariwaen ed kanonotan yo no akin a papablien yo so kada katuaan ya imbangat nen Jehova ed sikayo, anggan saramay naaralan yo la nen imbebeneg a taon.

⁶ Komadua, mantultuloy ya aruman so kayamanan yo. No bilang ta akakotkot kayo na ankablin bato, kasin ibulsa yo labat itan tan mankontento kayo la? Odino mankotkot kayo ni pian nanengneng yo no wala ni? Say Salitay Dios so napno na ankabli iran aspekto na katuaan. Anggan panon lan karakel so aromog yo, dakel ni so naanap yo. (Roma 11:33) No makalmo kayo na balon aspekto na katuaan, itepet yo ed inkasikayon dili: ‘Akin a sakey itan a kayamanan? Kasin mangiiter itan na mas aralem a pakatalos nipaakar  ed personalidad nen Jehova odino ed saray gagala to? Kasin mangiyoopresi itan na pigaran praktikal a panangigiya a makatulong ed siak pian natumbok iray bakat nen Jesus?’ Makatulong so pandalepdep ed saratan a tepet pian napabiskeg so aro yo ed saray katuaan ya imbangat ed sikayo nen Jehova.

Ipanengneng so Aro ed Katuaan ya Ibabangat Tayo

7, 8. Anto so pigaran paraan a nipanengneng tayo ed arum ya aaroen tayo iray katuaan a nanaaralan tayo ed Biblia? Mangiter na alimbawa.

⁷ Legan tayon ibabangat so arum, panon tayon nipanengneng a papablien tayo so katuaan a naaralan tayo la ed Salitay Dios? Diad panumbok ed alimbawa nen Jesus, manmamatalek itayon maong ed Biblia diad panagpulong tan panagbangat tayo. Diad apalabas iran panaon, apaseseg so totoo na Dios ed interon mundo ya usaren dan maong so Biblia diad mapublikon ministeryo ra. No iyaaplika yo itan a suhestion, anapen iray paraan pian nipaamta yo ed onabung a papablien yon mismo so inanabang yo manlapud Biblia.​—Mateo 13:52.

⁸ Alimbawa, kayarin tuloy na impangataki na saray terorista ed New York City nen imbeneg a taon, innabang na sakey a Kristianon agin bii so Salmo 46:1, 11 ed saray totoon akatongtong to ed ministeryo to. Intepet ton unona ed totoo no panon dan tatalonaan so epekto na trahedya. Tinalineng ton maong so ebat da, binidbir to itan, insan oniay imbaga to: “Labay kon inabang ed sikayo so sakey a teksto a nanligliwa ed siak a maong legan na sayan mairap a panaon.” Dakel so tinmalineng tan nanresulta ed dakel ya alay abig a tongtongan. Diad impitongtong to ed saray kalangweran, oniay mabetbet ya inkuan na satan ya agin bii: “Manbabangat ak na Biblia ed loob lay 50 a taon, tan anggapo nin balot so probleman agni aresolbi na sayan libro.” Diad masimoon tan entusiastikon paraan, nipanengneng tayo ed totoo a papablien tan aaroen tayo so nanaaralan tayo manlapud Salitay Dios.​—Salmo 119:97, 105.

9, 10. Akin ya importantin usaren so Biblia sano onebat ed saray tepet nipaakar ed sisiaen tayo?

⁹ Sano ontepet so totoo ed sikatayo nipaakar ed saray sisiaen tayo, walaan itayo na maabig a pankanawnawa pian nipanengneng ya aaroen tayo so Salitay Dios. Diad panumbok ed alimbawa nen  Jesus, agtayo lambengat ibabase iray ebat tayo ed saray mismon ideya tayo. (Uliran 3:5, 6) Imbes, uusaren tayo so Biblia sano onebat itayo. Kasin natatakot kayo ompano walay mantepet na agyo naebatan? Konsideraen so duaran positibon kundang a nagawaan yo.

¹⁰ Gawaen yoy anggaay nayarian yo pian makapanparaan. Oniay insulat nen apostol Pedro: “Pasantosen yoy Kristo bilang Katawan ed kapusoan yo, a lawas akaparaan a mandepensa ed arap na balang sakey a mankaukolan ed sikayo na katunongan nisesengeg ed ilalon walad sikayo, balet gawaen itan tekep na maulimek a liknaan tan aralem a respeto.” (1 Pedro 3:15, NW) Akaparaan kayo la kasin mangidepensa ed saray sisiaen yo? Alimbawa, no walay mangitepet no akin ya agkayo mibibiang ed arum ya agmakasulatan a kustombre odino agamil, aglabat mankontento a mangibagay, “Sebel itan ed relihyon ko.” Nayarin ipapatnag na satan ya ebat ya aabuloyan yoy arum a mandesisyon parad sikayo tan membro kayo sirin na sakey a kulto. Mas maabig so pangikuan na, “Isesebel itan na Salitay Dios, say Biblia” odino, “Mamaermen itan ed Dios ko.” Insan iter so makatunongan a salaysay no akin.​—Roma 12:1.

11. Anton reperensya so nayarin ontulong ed sikatayo pian akaparaan ya onebat ed saray tepet nipaakar ed katuaan na Salitay Dios?

¹¹ No nalikas yo ya agkayo akaparaan, akin ta ipanaon so panaral ed libron Reasoning From the Scriptures? * Mamili na pigaran tema a nayarin onlesa, tan ipatlep so pigaran Makasulatan a punto. Awit yon lanang so libron Reasoning tan say Biblia. Agkayo masuyat a mangusar ed saratan, ya ibaga ed mantetepet a walaan kayo na reperensya a labay yon usaren pian naromog so ebat na Biblia ed saray tepet.

12. Anto so nayarin ibaga tayo no agtayo amta so ebat ed sakey a tepet nipaakar ed Biblia?

¹² Agkayo kapapaga. Anggapo so ag-ayadyarin too a makaebat ed amin a tepet. Kanian sano walay tepet nipaakar ed Biblia ya agyo naebatan, nayarian yoy onebat a naynay ed onian paraan: “Salamat ed impamalesam ed satan a makapainteres a tepet. Diad tua, agko ni amta so ebat, balet maseguro ak a naebatan itan na Biblia. Labalabay koy mansukimat ed Biblia, kanian surien ko so tepet mo tan ompawil ak ed sika.” Say ontan a masimoon tan mapaabeban paraan so nayarin mangilukas ni na kaaruman a pantotongtong.​—Uliran 11:2.

Aro ed Totoo a Babangatan Tayo

13. Akin a nepeg tayon mantinien so positibon panmoria nipaakar ed saramay pupulongan tayo?

¹³ Impanengneng nen Jesus so aro ed totoo ya imbangat to. Panon tayon aligen si Jesus ed sayan pamaakaran? Agtayon balot komon babayuboan so agmililiknan awawey parad totoo a walad kaliberliber tayo. Tua, say “bakal na baleg ya agew na Dios, a Makapanyarin-amin” so manasingger lan maong, tan dakel so naderal ed limog na binilyon a katooan. (Apocalipsis 16:14; Jeremias 25:33) Ingen, agtayo amta no siopa so nabilay tan ompatey. Satan a panangukom so nagawa ed arapen tan gawaen labat itan na samay tinuro nen Jehova, si Jesu-Kristo. Angga ed kagawa na panangukom, moriaen tayo so kada indibidual bilang posiblin magmaliw a lingkor nen Jehova.​—Mateo 19:24-26; 25:31-33; Gawa 17:31.

14. (a) Panon tayon nausisa so inkasikatayo no kasin mililikna itayo ed totoo? (b) Diad antoran praktikal a paraan a nayarin nipanengneng tayo so empatya tan personal ya interes ed arum?

 ¹⁴ Singa si Jesus sirin, panggunaetan tayo so pakawalaan na empatya ed totoo. Nayarin tepetan tayo so inkasikatayo: ‘Kasin mililikna ak ed saray totoon napapalikdo ed masilib iran katilaan tan panamalingo na saray relihyoso, mapolitika, tan komersyon kabiangan na sayan mundo? No ompatnag ya agda dengelen so mensahe ya ipapasabi tayo ed sikara, kasin panggugunaetan kon talosan no akin ya ontan so nalilikna ra? Kasin bibidbiren ko a siak, odino arum a manlilingkor lan matoor ed si Jehova, ya ontan met so aliknak nensaman? Kasin iyaadaptak so paraan na panagpulong ko? Odino ipapasen ko a sarayan totoo et andian lay ilalo?’ (Apocalipsis 12:9) Sano natebek na totoo so petepeteg ya empatya tayo, nayarin onkiwas ira ed mensahe tayo. (1 Pedro 3:8) Say empatya so nayarin mamakiwas met ed sikatayo a mangipanengneng na nagkalalon interes ed totoo a nakakatongtong tayo ed ministeryo. Nayarin isulat tayo iray tepet tan pampapagaan da. Sano ompawil itayo, nayarin ipatnag tayo ed sikara a ninonot tayo iray imbaga ra ed inmunan indalaw tayo ed sikara. Ta sano walaan iray maganat a pankaukolan, nayarian tayoy mangiyopresi na pigaran praktikal a tulong.

15. Akin a nepeg tayon nengnengen so maong a kalidades na totoo, tan panon tayon nagawaan itan?

¹⁵ Singa si Jesus, nenengnengen tayo so maong a kalidades na totoo. Nayarin makapadinayew so pamapabaleg na mansusulon ateng ed ananak to. Say sakey a laki so manbabanikel a manlegpet ed pamilya to. Sakey a maedad la so mangipapanengneng na interes ed espiritual iran bengatla. Kasin iimanoen tayo so ontan iran kalidad na totoo a nakakatongtong tayo tan kokomendaan tayo ira? Diad panggawa ed ontan, ipapabitar tayo so napampaknaan tayo tan nayarin mangilukas itan na dalan pian nipulong tayo so Panarian.​—Gawa 26:2, 3.

Makana so Kaulimekan ed Panangipanengneng na Aro

16. Akin ya importante so pansiansian maulimek tan marespeto ed saramay pupulongan tayo?

¹⁶ Say aro ed totoon ibabangat tayo so mamakiwas ed sikatayo ya ontalineng ed makabat a pasakbay na Biblia: “Say kakabatan patageyen to so linawa, balet say panangaro so mamaabig.” (1 Corinto 8:1) Si Jesus so walaan na malaklaknab a pikakabat, ingen ta agton balot nampaatagey. Kanian sano inanabang yo so sisiaen yo, paliisan so masuppiat a paraan na panagsalita odino pagmaliw a mapaatagey. Say kalat tayo et say panabi ed kapusoan tan sagyaten so totoo ed katuaan a papablien tayon maong. (Colosas 4:6) Tandaan, sanen sinimbawa nen Pedro iray Kristiano a magmaliw ya akaparaan a mandepensa, inlaktip to so panonot a nepeg tayon gawaen itan “tekep na maulimek a liknaan tan aralem a respeto.” (1 Pedro 3:15) No maulimek tan marespeto itayo, mas niyasingger tayo so totoo ed Dios a panlilingkoran tayo.

17, 18. (a) Panon so ikiwas tayo ed makritiko iran awawey nipaakar ed saray kualipikasyon tayo bilang ministros? (b) Akin ya agnakaukolan ed saray estudyante na Biblia so pikakabat ed kadaanan iran lenguahe na Biblia?

¹⁷ Agnakaukolan ya ipasirayew ed totoo so pikakabat odino aral tayo. No diad teritorya yo et walaray ag-ondengel ed siopaman ya ag-akasumpal ed kolehyo, agkayo papadismaya ed awawey da. Imbaliwala nen Jesus so panusuppiat a sikatoy ag-akapanaral ed dederlengen iran rabinikon eskuelaan ed panaon to; nisay impaimpluensyaan ed kasmak iran panangidumaduma diad impanggunaet ton pandinayewen so totoo ed malaknab a pakaamta to.​—Juan 7:15.

¹⁸ Say inkaulimek tan aro so mas importante ed saray Kristianon ministro nen say antokaman a laknab na sekular ya edukasyon. Say Matalonggaring a Managbangat, si Jehova, so angikualipika ed sikatayo diad ministeryo. (2 Corinto 3:5, 6) Antokaman so ibaga na arum ed saray klero na Kakristianoan, agtayo la nakaukolan so manaral na kadaanan iran lenguahe na Biblia ta pian magmaliw itayon manangibangat na Salitay Dios. Pinuyanan nen Jehova so Biblia pian nisulat ed malinew tan espesipiko iran balikas, tan natalosan na amin so ankabli iran katuaan na satan. Agmanguman iratan a katuaan anggano nipatalos ed nilasus iran lenguahe. Kanian say pikakabat ed kadaanan iran lenguahe, anggaman mausar no maminsan, et agla nakaukolan. Niarum ni,  say kinon ed pakawalaan na abilidad ed nanduruman lenguahe so nayarin pakabalangan na sakey ed kalidad a makanakana ed saray tuan Kristiano, salanti, say pagmaliw a mainomay ya ibangat.​—1 Timoteo 6:4.

19. Diad anton pantalos a say ministeryo tayo bilang Kristiano et sakey a serbisyo?

¹⁹ Agpanduaruwaan a say Kristianon ministeryo tayo et sakey a kimey a mankaukolan na mapaabeban awawey. Naynay itayon nidunget ed isusumpa, agpananginenen, tan panamasegsegang ni ingen. (Juan 15:20) Balet, diad matoor a panusumpal tayo ed ministeryo tayo, manggagawa itayo na makanan serbisyo. No mantultuloy itayo ed mapaabeban panaglingkor ed arum panamegley na sayan kimey, aaligen tayo so aro ya impanengneng nen Jesu-Kristo ed totoo. Isipen pa: No kinaukolan tayo so pampulong ed sanlibon agmananginenen odino onsusumpan totoo ta pian nasabi tayo so sakey a kinmarneron too, agta makanakana itan a sagpot? Maseguron ontan! Kanian diad pantultuloy ed kimey tan agbalot ontunda, matoor itayon manseserbi ed kinmarneron totoo a nakaukolan tayo nin sabien. Anggapoy duaruwa a seguroen nen Jehova tan si Jesus a naromog tan natulongan so dakel niran papablien a totoo sakbay ya onsabi so anggaan.​—Aggeo 2:7.

20. Anto so pigaran paraan a makapanbangat itayo panamegley na alimbawa?

²⁰ Say pambangat panamegley na alimbawa so sananey nin paraan pian nipanengneng tayo so inkamabulos tayon manserbi ed arum. Singa bilang, labay tayon ibangat ed totoo a say panaglingkor ed si Jehova, “say maliket a Dios,” so sankaabigan tan sankapnekan a dalan na panagbilay a posibli. (1 Timoteo 1:11, NW) Diad pakakaimano ra ed kondukta tan pidedeneng tayo ed saray kakaabay, kaeskuelaan, tan katrabaho tayo, naiimano da kasi a maliket tan napnek itayo? Mipadpara, ibangat tayo ed saray iyaaralan na Biblia a say Kristianon kongregasyon et sakey a maligen a pasen na aro diad sayan agmananginenen tan maramsak a mundo. Kasin mainomay a naimano na saray iyaaralan tayo ya aaroen tayo so amin ed kongregasyon tan maseet tayon pansiasiansiaen so deen ed balang sakey?​—1 Pedro 4:8.

21, 22. (a) Say panusisa ed dili nipaakar ed ministeryo tayo so mangitonton ed sikatayo a manganamot ed antoran pankanawnawa? (b) Anto so singbaten ed saray artikulo ed ontumbok a paway na Say Panag-Bantayan?

²¹ Say mabulos ya awawey ed ministeryo tayo so nayarin mamakiwas ed sikatayo, no maminsan, ya usisaen lamet so inkasikatayon dili. Diad matuan panggawa ed satan, naiimano na dakel a wala ira’d kipapasen a mamalaknab ed serbisyo ra diad iloob ed sigpot-panaon a ministeryo odino diad iyalis ed lugar a babaleg so pankaukolan pian makapanserbi ira diman. Denesidi na arum so manaral na duman lenguahe pian makapanlingkor ira ed komunidad na ondarakel iran sankaili diad mismon teritorya ra. No lukas iratan ed sikayo, imanoen iratan a maong tan sipipikasin nodnonoten. Say bilay ed panaglingkor so mangitarok na baleg a liket, inkapnek, tan kareenan na nonot.​—Eclesiastes 5:12.

²² Diad amin a paraan, itultuloy tayon aligen si Jesu-Kristo diad pamabiskeg ed aro tayo ed saray katuaan ya ibabangat tayo tan ed totoo a babangatan tayo. Say pamayubo tan pangipatnag na aro ed sarayan duaran aspekto so ontulong ed sikatayon mangiletneg na maabig a pundasyon ed pagmaliw a singa-Kriston managbangat. Panon tayon napaelet itan a pundasyon? Diad ontumbok a paway na Say Panag-Bantayan, sakey a serye na saray artikulo so maningbat ed arum ed saray espesipikon paraan na panagbangat nen Jesus.

[Paimano ed Leksab]

Panon Yon Ebatan?

• Anto so walan panamaseguro ed sikatayo a say alimbawa nen Jesus bilang managbangat so aliwan mairap ya aligen?

• Panon tayon nipatnag ya inaro tayo iray katuaan a nanaaralan tayo ed Biblia?

• Akin ya importante so pansiansian mapaabeba legan ya ondaraak so pikakabat tayo?

• Anto so pigaran paraan a nipanengneng tayo so aro ed totoo a panggugunaetan tayon ibangat?

[Tepetepet Parad Panagaral]

[Saray litrato ed pahina 16]

Gawaen yo so anggaay nayarian yon makapanparaan

[Saray litrato ed pahina 16, 17]

No papablien yo so “pikakabat ed Dios,” nausar yo so Biblia diad epektibon paraan

[Litrato ed pahina 18]

Nipanengneng tayo so aro ed totoo diad panginabang tayo ed sikara na maong a balita