‘Mabulos a Manpeperdonaan ed Balang Sakey’

KASIN panisiaan mo a pinerdona la na Dios iray kasalanan mo? Diad Estados Unidos, mapatnag ya ontan so panisiaan na maslak ed saray wala la’d edad. Si Dr. Loren Tuossaint, manunan autor ed panagaral ya ikokondukta ed University of Michigan Institute for Social Research, so angireport a diad 1,423 iran Amerikano a sinurbi, ngalngalin 80 porsiento ed saray wala la’d edad a mantaon na masulok a 45 so angikuan a pinerdona la ira na Dios ed saray kasalanan da.

Balet, makapainteres ta 57 porsiento lambengat ed saramay sinurbi so angikuan a pinerdona da met lay arum. Satan ya estatistika so mangipapanonot ed sikatayo ed saray salita nen Jesus diad Sermon ed Palandey: “No perdonaen yo ray totoo ed kaugsan da, say Ama yon mangatatawen perdonaen to kayo met. Balet no agyo perdonaen so saray totoo ed saray kaugsan da, agto kayo met perdonaen nen Ama yo ed saray kaugsan yo.” (Mateo 6:14, 15) On, say pamerdona na Dios ed saray kasalanan tayo so walaan met na kondisyon, diad inkamabulos tayo a mamerdona ed arum.

Pinanonotan nen apostol Pablo iray Kristiano diad Colosas nipaakar ed sayan prinsipyo. Sikaray pinaseseg to: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo.” (Colosas 3:13) Tua, aliwan lawas mainomay so panggawa ed saya. Alimbawa, no sikay bengatbengat odino makapasakit ya apansalitaan, nayarin mairap a palampasen iratan.

Anggaman ontan, dakel iray gunggona ed pamerdona. Oniay inkuan nen Dr. David R. Williams, sakey a sosyologo, nipaakar ed impansukimat to: “Nalmoan mi so pirmin pansiglaotan na panamerdona ed arum tan mental a bunigas diad limog na saray walad kapegleyan ya edad tan matatatken laran Amerikano.” Satan so mitunosan ed saray salita na makabat ya Arin Solomon, ya angisulat ed saya, manga 3,000 taon lay apalabas: “Say mareen a puso sikato so bilay na laman.” (Uliran 14:30) Lapud say maperdonan awawey so mangitarok na maabig iran relasyon ed Dios tan ed kapara tayon too, walaan itayo na maabig a rason pian magmaliw itayon mabulos a manpeperdonaan ed sakey tan sakey manlapud puso.​—Mateo 18:35.