Nakaukolan na Saray Kristiano so Balang Sakey ed Sikara

“Sikatayoy kabiangan na balang sakey.”​—EFESO 4:25, NW.

1. Anto so inkuan na sakey ya ensayklopedia nipaakar ed laman na too?

 SAY laman na too so makapakelaw a palsa! Oniay inkuan na The World Book Encyclopedia: “Say laman na too so tatawagen no maminsan na totoo bilang makina, a makinan sankaabigan lan ginawa. Siempre, say laman na too et aliwan makina. Balet naikompara itan ed makina diad dakel a paraan. Miulibay ed sakey a makina, say laman so tugyopen na dakel a parte. Kada parte na laman, a singa met ed kada parte na makina, so walaan na nikaduman usar. Balet amin a parte so mankakasakey a mankimey kanian mauksoy so ikurang na laman odino makina.”

2. Antoy pamparaan na laman na too tan say Kristianon kongregasyon?

² On, say laman na too so walaan na dakel a parte, odino kabiangan, tan kada parte so mangitatarya na bengatlan nakaukolan. Amin ya ulat, masel, odino arum nin kabiangan na laman so mausa-usar. Ontan met, kada membro na Kristianon kongregasyon so makapangiyarum na bengatla parad espiritual a bunigas tan karakpan na kongregasyon. (1 Corinto 12:14-26) Anggaman agnepeg ya isipen na sakey a membro na kongregasyon a sikatoy atagtagey nen say arum, agnepeg ya ipasen na sakey ya anggapoy kakanaan to.​—Roma 12:3.

3. Panon ya impabitar na Efeso 4:25 a nakaukolan na saray Kristiano so balang sakey ed sikara?

³ Singa saray kabiangan na laman na too ya akadependi ed balang sakey, nakaukolan na saray Kristiano so balang sakey ed sikara. Oniay inkuan nen apostol Pablo ed saray alanaan na espiritun kapananisiaan to: “Natan ta inwaklit yo la so katilaan, salitaen na balang sakey ed sikayo so katuaan ed kapara ton too, lapud sikatayoy kabiangan na balang sakey.” (Efeso 4:25, NW) Lapud ‘kabiangan ira na balang sakey,’ wala so matuan pitatalosan tan sigpot a pantutulongan na saray membro na espiritual ya Israel​—“say laman nen Kristo.” On, kada sakey ed sikara so kabiangan met na arum. (Efeso 4:11-13) Maliket ya akikasakey ed sikara iray matua tan mitutulongan a Kristianos a walaan na mangaraldalin ya ilalo.

4. Diad antoran paraan a natulongan iray balo ni?

⁴ Kada taon et nilibo so nababautismoan a maniilalon manbilay ed mangaraldalin a paraiso. Maliket ya ontutulong ed sikara so arum iran membro na kongregasyon ya ‘ontuloy ed inkayadyari.’ (Hebreos 6:1-3) Nayarin lanoren na sayan tulong so iyebat ed saray tepet ed Kasulatan odino mangiter na praktikal a tulong diad ministeryo. Natulongan tayo iray balo ni diad pangipanengneng na maabig ya ehemplo panamegley na regular a pibibiang ed saray pantitipon na Kristiano. Diad panaon na gonigon, nayarian tayo met iran pasesegen odino tambayoen ni ingen. (1 Tesalonica 5:14, 15) Nepeg ya anapen tayo iray paraan pian natulongan so arum a ‘manakar ed katuaan.’ (3 Juan 4) Balanglan kalangweran ni odino matakken la, agano ni odino dakel lan taon a nankurang ed katuaan, niyalibansa tayo so espiritual a pankaabigan na saray kapananisiaan​—tan nakaukolan da itayo.

Angiyopresi Ira na Nakaukolan a Tulong

5. Panon ya akatulong si Aquila tan Priscila ed si Pablo?

⁵ Saray Kristianon sanasawa so kaiba ed saramay naliliketan a makatulong ed saray kapananisiaan. Singa bilang, si Aquila tan say akulaw to, si Priscila (Prisca), so tinmulong ed si Pablo. Sikatoy pinarawes da ed ayaman da, kaiba ran nankimey bilang managgaway-tolda, tan tinmulong ed sikato a mamabiskeg ed balon kongregasyon diad Corinto. (Gawa 18:1-4) Diad agmaparungtal a paraan, inrisga da ni ingen so bilay da nisesengeg ed si Pablo. Manaayam ira ed Roma sanen oniay inkuan nen Pablo ed saray Kristiano diman: “Ibano yo ra di Prisca tan Aquila, a kakimeyan ko ra ed Kristo Jesus, ya inyan da so beklew dan dili a nisesengeg ed bilay ko; et aliwa a siak lambengat so misalamat ed sikara, noag ingen met ganagana ray iglesias na Gentil.” (Roma 16:3, 4) Singa si Aquila tan Priscila, walaray Kristiano natan a mamapabiskeg ed saray kongregasyon tan ontutulong ed saray kaparan managdayew diad nanduruman paraan, a no maminsan et irisga da ni ingen so bilay da pian agnipaarap so arum iran lingkor na Dios diad panagpairap odino diad pamatey na saray manamasegsegang.

6. Anton tulong so naawat nen Apolos?

⁶ Atulongan met nen Aquila tan Priscila so maong a managpaliwawan Kristiano a si Apolos, ya angibangat ed saray manaayam ed Efeso nipaakar ed si Jesu-Kristo. Diad saman a panaon, say amta labat nen Apolos et nipaakar ed bautismon ginawa nen Juan bilang simbolo na pagbabawi ed saray impankasalanan sumpad Ganggan a sipanan. Lapud atebek da a mankaukolan na tulong si Apolos, “impaliwawa [nen Aquila tan Priscila] ed sikato ed lalo ya ayadyari so dalan na Dios.” Nayarin impaliwawa ra a say bautismo na Kristiano so mangilaktip ed pangipalseb ed danum tan pangawat ed kikalbo na masanton espiritu. Inyaplika nen Apolos so naaralan to. Kanian diad Acaia et “dakel so intulong to ed saray anisia, lapu ed panamegley na grasya. Ta tinalo to so saray Judios ed sankabalegan a pakayari ed arap na karaklan, ya impaliwawa to ed panamegley na saray sulat a si Jesus sikato so Kristo.” (Gawa 18:24-28) Saray komento na saray kaparan managdayew so naynay a makatulong pian onlaknab so pakatalos tayo ed Salitay Dios. Diad sayan pamaakaran met, nakaukolan tayo so balang sakey.

Pangitarya na Materyal a Tulong

7. Panon so inkiwas na saray taga-Filipos sanen mankaukolan iray kaparan Kristiano na materyal a tulong?

⁷ Si Pablo so pinablin maong na saray membro na Kristianon kongregasyon diad Filipos tan sikatoy impatuloran da na saray materyal a pankaukolan  legan na impansiansia to ed Tesalonica. (Filipos 4:15, 16) Sanen mankaukolan na materyal a tulong iray agagi ed Jerusalem, impatnag na saray taga-Filipos so inkamabunlok dan mangiter anggaman ed labas ni na pakasarag da. Kanian inapresyan maong nen Pablo so maabig ya awawey na agagi to diad Filipos a sinalambit to ra bilang ehemplo ed arum iran mananisia.​—2 Corinto 8:1-6.

8. Anton awawey so impatnag nen Epafrodito?

⁸ Sanen nipangaw si Pablo, aliwa lambengat iran materyal a regalo so impatulor ed sikato na saray taga-Filipos noagta imbaki ra met so personal ya ibabaki ra a si Epafrodito. Inkuan nen Pablo: “Lapu ed gawa nen Kristo [si Epafrodito so] dawitdawit ya akasabi ed ipapatey, ya inkaatapan to so bilay to a pamano ed kakulangan yo nensaman ed panaglingkor ed siak.” (Filipos 2:25-30; 4:18) Agnibaga ed sikatayo no kasin si Epafrodito so sakey a matatken odino ministeryal a lingkor. Anggaman kuan, sikato so sakey a Kristianon walaay dilin-panagsakripisyo tan matulong, tan sikatoy talagan nakaukolan nen Pablo. Wala kasi so singa Epafrodito diad kongregasyon yo?

Sikara so ‘Makapabiskeg a Tulong’

9. Anto so naalig tayon alimbawa nen Aristarco?

⁹ Saray maaron agagi, a singa si Aquila, Priscila, tan Epafrodito, so pirmin naapresya ed dinanman a kongregasyon. Arum ed saray kapara tayon managdayew so nayarin mipadpara ed inmunan-siglon Kristiano a si Aristarco. Sikato tan arum ni so ‘makapabiskeg a tulong,’ a nayarin lapuan na pananambayo odino tulong ed manunaan tan praktikal iran pamaakaran. (Colosas 4:10, 11, NW) Diad impanulong to ed si Pablo, pinaneknekan nen Aristarco a sikatoy tuan kaaro ed panaon na pankaukolan. Sikato so nengneng na too ya asalambit ed Uliran 17:17: “Say kaaro mangaro ed saray amin a panaon, et say agi nianak nipaakar ed kasumlangan.” Agta amin tayo so nepeg a manggunaet a magmaliw a ‘makapabiskeg a tulong’ ed saray kaparan Kristiano? Nepeg a nagkalalon tulongan tayo iramay maniirap.

10. Anton alimbawa so intarya nen Pedro parad saray Kristianon mamatatken?

¹⁰ Saray Kristianon mamatatken so nagkalautlan nepeg a makapabiskeg a tulong ed saray agagi ra ed espiritual. Oniay inkuan nen Kristo ed si apostol Pedro: “Pabiskegen mo so saray agagim.” (Lucas 22:32) Agawaan itan nen Pedro lapud impatnag to so mabiskeg tan singa-baton kalidades, nagkalalo la sanen kayari na inkioli nen Jesus. Sikayoran mamatatken, seguroen a panggunaetan yo met a gawaen itan diad mabulos tan matamoy a paraan, lapud nakaukolan kayo na saray kapananisiaan yo.​—Gawa 20:28-30; 1 Pedro 5:2, 3.

11. Panon itayon nagunggonaan ed pangonsidera ed awawey nen Timoteo?

¹¹ Say managbiahen kaiba nen Pablo a si Timoteo so sakey a matatken a pirmin angiyansakit ed arum niran Kristiano. Anggaman sikato so walaan na problema ed bunigas, impatnag nen Timoteo so agnagiing a pananisia tan ‘nampaaripen a kaiba nen Pablo diad kilaknab na maong a balita.’ Kanian nibaga na apostol ed saray taga-Filipos ya: “Anggapo lay arum ni a walaan na awawey a singa sikato a peteg a mangiyaansakit ed saray bengatlan nipaakar ed sikayo.” (Filipos 2:20, 22, NW; 1 Timoteo 5:23; 2 Timoteo 1:5) Magmaliw itayon bendisyon ed saray kaparan managdayew ed si Jehova diad pangipatnag na awawey a singa si Timoteo. Tua, nepeg tayon sungdoan iray mismon kaleteyan tayo tan nanduruman subok, balet nayarian tan nepeg tayo met ya ipatnag so mabiskeg a pananisia tan maaron panangiyansakit ed saray kaagian tayo. Nepeg a lawas tayon tandaan a nakaukolan da itayo.

Bibii ya Angiyansakit ed Arum

12. Anto so naaralan tayo ed alimbawa nen Dorcas?

¹² Kaiba ed maridios a bibii ya angiyansakit ed arum et si Dorcas. Sanen sikatoy inatey, si Pedro so impatawag na saray babangatan tan sikatoy inawit da ed silir ed tagey. Diman et “amin a bibii a babalo a mannangis, et impanengneng da ed sikato so saray aysing tan saray kawes a ginawa nen Dorcas nen wala ni ed sikara.” Si Dorcas so apaoli tan maseguron nantultuloy bilang “napno na saray maong a gawa tan payabol.” Diad Kristianon kongregasyon natan, walaray bibii a singa si Dorcas a mandarait na saray kawes odino manggagawa na arum nin panangaro ed saramay mankaukolan. Siempre, manunan misiglaotan iray maong a gawa ra ed panangiyalibansa na saray intereses na Panarian tan pibibiang ed panaggaway-babangatan  a kimey.​—Gawa 9:36-42; Mateo 6:33; 28:19, 20.

13. Panon ya impatnag nen Lidia so panagpaga ed saray kaparan Kristiano?

¹³ Sakey a matakot ed Dios a bii a manngaray Lidia so angiyansakit ed arum. Bilang taga-Tiatira, sikatoy manaayam ed Filipos sanen nampulong diman si Pablo nen ngalngali 50 K.P. Si Lidia so nayarin sakey a Judion proselita, balet pigpigara labat so Judio tan anggapo so sinagoga ed Filipos. Sikato tan arum niran debosyonadon bibii so nandaragup parad panagdayew diad gilig na sakey ya ilog sanen inyabawag na apostol so maong a balita ed sikara. Oniay kuan na salaysay: “Nilukasan na Katawan so puso [nen Lidia], pian imatonan to so saray sasalitaen nen Pablo. Et sanen abinyagan a pati saray kaamong to, akikasi ed sikami a nankuan: No inisip yo a mananisia ak ed Katawan, loob kayo ed abung ko, tan ondawes kayod’man. Et pinilitan to kami.” (Gawa 16:12-15) Lapud labay nen Lidia so manggawa na maong parad arum, apilit to si Pablo tan saray kaiba to ya ompundo ed ayaman to. Apresyaen tayon maong itan ya inkamaparawes sano ipatnag met itan na mapangasi tan maaro iran Kristiano natan!​—Roma 12:13; 1 Pedro 4:9.

Nakaukolan Mi Kayo Met Iran Tobonbalo

14. Panon so impantrato nen Jesus ed saray kalangweran?

¹⁴ Say Kristianon kongregasyon so inletneg na mapangasi tan maaron Anak na Dios, si Jesu-Kristo. Maasingger ed sikato so totoo lapud sikatoy maaro tan maabagey. Diad sakey ya inkagawa, sanen inyasingger na arum so malangwer ya ananak da diad si Jesus, sikara so sinalin paarawien na babangatan to. Balet oniay inkuan nen Jesus: “Paulyan yo so saray ankekelag ya ugugaw ya ondago ed siak; agyo ra sebelan: ta sikara so makankien na panariay Dios. Tua kuan ko ed sikayo, Siopaman ya agmangawat na panariay Dios a singa sakey a melag ya ugaw, agmakaloob a balot diman.” (Marcos 10:13-15) Pian nagamoran iray bendisyon na Panarian, nepeg a magmaliw itayon mapaabeba tan mainomay ya ibangat a singa malangwer ya ananak. Impatnag nen Jesus so panangaro to ed saray ugugaw diad impangampopo tan impamendisyon to ed sikara. (Marcos 10:16) Komusta kayo met a kalangweran natan? Napaseguroan kayo a papablien tan nakaukolan kayo ed kongregasyon.

15. Antoran katuaan nipaakar ed bilay nen Jesus so nikurit ed Lucas 2:40-52, tan anton ehemplo so impanengneng to parad saray kalangweran?

¹⁵ Sanen wala ni’d kalangweran si Jesus, impatnag to so panangaro ed Dios tan ed Kasulatan. Sanen sikatoy man-12 años, sikato tan say atateng to, si Jose tan Maria, so nambaroy manlapud nianakan  dan baley na Nazaret a mamaarap ed Jerusalem pian selebraan so Paskua. Sanen pasempet la ra, naamtaan na atateng nen Jesus a sikatoy agkaiba ed grupon manbabaroy. Sikatoy nalmo dan siansia ed sakey ed saray pasilyo na templo, ya onderengel ed saray Judion managbangat tan ontetepet ed sikara. Lapud asurprisa si Jesus ed no iner so pangalmoan di Jose tan Maria ed sikato, oniay intepet to: “Agyo amta a nakaukolan ko so wala ed abung nen Amak?” Sikatoy sinmempet a kaibay atateng to, a nampasakop ed sikara, tan nantultuloy ya inmaligwas ed kakabatan tan pisikal ya ibabaleg. (Lucas 2:40-52) Agaylan abig ya ehemplo so impanengneng nen Jesus parad saray kalangweran tayo! Maseguro a nepeg dan unoren so atateng da tan lawas iran interesadon manaral ed saray espiritual a bengatla.​—Deuteronomio 5:16; Efeso 6:1-3.

16. (a) Anto so inkelyaw na pigaran ugugaw a lalaki sanen nampulong si Jesus diad templo? (b) Anto so pribilehyo natan na saray kalangweran a Kristiano?

¹⁶ Bilang kalangweran, nayarin makapantatasi kayo nipaakar ed si Jehova diad eskuelaan tan ed kabkaabungan kaiba so atateng yo. (Isaias 43:10-12; Gawa 20:20, 21) Sanen nampulong tan amaabig si Jesus ed saray totoo diad templo antis na impatey to, oniay inkelyaw na pigaran ugugaw a lalaki: “Hosanna [“Ipikasi mi, pikasi mi,” NW] ed anak nen David.” Lapud asanokan ira, oniay insuppiat na saray manunan saserdote na eskribas: “Narengel mo no antoy ibabaga na saraya?” “On,” so ebat nen Jesus. “Agyo ta’n balot abasa, Dia ed sangi na saray ugugaw tan saray mansuso niyadyarim so panangigalang?” (Mateo 21:15-17) Singa saraman ya ugugaw, sikayoran kalangweran ed kongregasyon so walaan na alay abig a pribilehyo a mangidayew ed Dios tan ed Anak to. Kaliktan tan nakaukolan mi kayo a mikimey ed sikami bilang manangiyabawag na Panarian.

Sano Onsabi so Kairapan

17, 18. (a) Akin ya inorganisa nen Pablo so impangolekta parad saray Kristiano diad Judea? (b) Anto so epekto na saray boluntaryon donasyon parad saray mananisian taga-Judea diad saray Judio tan Gentil a Kristiano?

¹⁷ Antokaman iray kipapasen tayo, say aro so mamakiwas ed sikatayo ya ontulong ed saray kaparan Kristiano a mankaukolan. (Juan 13:34, 35; Santiago 2:14-17) Say aro ed agagi to diad Judea so amakiwas ed si Pablo a mangorganisa ed panagkolekta diad limog na saray kongregasyon ed Acaia, Galacia, Macedonia, tan say distrito na Asia. Say panamasegsegang, gulo ed lugar da, tan eras a sinagmak na saray babangatan diad Jerusalem so nayarin nanresulta ed tinawag nen Pablo ya “irirap,” “kairapan,” tan say “impanamsam ed saray kayarian [da].” (Hebreos 10:32-34, NW; Gawa 11:27–12:1) Kanian inasikaso to so pundo a parad saray mairap a Kristiano diad Judea.​—1 Corinto 16:1-3; 2 Corinto 8:1-4, 13-15; 9:1, 2, 7.

¹⁸ Saray boluntaryon donasyon parad saray masanto diad Judea so amaneknek a niwala so elet na impanaagi diad baetan na saray Judio tan Gentil a managdayew ed si Jehova. Say impangipawit ed saray kontribusyon so akatulong met ed saray Gentil a Kristiano a misalamat ed saray kapara ran managdayew a taga-Judea lapud espiritual a kayamanan a naawat da manlapud sikara. Sirin, wala so impanginabang diad materyal tan espiritual a paraan. (Roma 15:26, 27) Saray kontribusyon parad mankaukolan iran kapananisiaan natan so boluntaryo met tan makasengeg ed aro. (Marcos 12:28-31) Nakaukolan tayo met so balang sakey nipaakar ed saya ta pian wala so pampapara “tan say akatipon na daiset anggapo so kulang to.”​—2 Corinto 8:15.

19, 20. Mangiter na alimbawa a mangipanengneng ya ontutulong so totoo nen Jehova sano nagawa iray kalamidad.

¹⁹ Lapud amta tayon nakaukolan na saray Kristiano so balang sakey, alisto itayon ontulong ed  saray agagi tayo ed pananisia. Singa bilang, konsideraen so agawa sanen dinmalan so makadesyang a yegyeg tan inggeray na dalin diad El Salvador kasakbayan na 2001. Oniay kuan na sakey a report: “Saray impanulong so ginawa na agagi diad nanduruman parte na El Salvador. Tinmulong iray grupo na agagi manlapud Guatemala, Estados Unidos, tan Canada. . . . Masulok a 500 a kaabungan tan taloran mararakep a Kingdom Hall so maples ya impaalagey. Baleg a pantasi so nipasabi lapud inkakuli tan pantutulongan na sarayan masakripisyon agagi.”

²⁰ Oniay kuan na report a nanlapud Abalaten ya Aprika: “Saray pirmin delap ya amerdi ed baleg a kabiangan na Mozambique so angapekta met ed dakel a Kristianon agagi tayo. Inyuksoy na sanga ed Mozambique so panangasikaso ed maslak ed saray pankaukolan da. Balet inkerew da a mangipawit ira na marakep iran segundamanon kawes ed saray mankaukolan ya agagi. Akatipon kami na dakel a kawes kanian walay 12 metros a kargaan a napnoy kawes ya impawit ed saray agagi ed Mozambique.” On, diad sarayan paraan met et nakaukolan tayo so balang sakey.

21. Anto so konsideraen ed ontumbok ya artikulo?

²¹ Unong a nipaimano la, importante so amin a parte na laman na too. Maseguron tua met itan ed Kristianon kongregasyon. Nakaukolan na amin a membro so balang sakey. Nakaukolan met a manlingkor ira a nankakasakey. Konsideraen ed ontumbok ya artikulo so pigaran sengegan a manggawan posibli ed satan.

Panon Yon Ebatan?

• Anto so panulibayan na laman na too tan say Kristianon kongregasyon?

• Panon so inkiwas na inmuunan Kristiano sanen mankaukolan iray kapananisiaan na materyal a tulong?

• Anto so pigaran Makasulatan ya alimbawa a pakapatnagan a nakaukolan tan tutulongan na Kristiano so balang sakey?

[Tepetepet Parad Panagaral]

 [Litrato ed pahina 10]

Inyansakit nen Aquila tan Priscila so arum

[Saray litrato ed pahina 12]

Mantutulongan so totoo nen Jehova ed balang sakey sano onsabi so kairapan