No Anto so Ninodnonot nen Josue

“SI Moises ya aripen ko inatey la,” kuan nen Jehova, “natan sirin onalagey ka, ombaliw ka ed sayan Jordan, sika, tan amin so sayan baley, angga ed dalin ya iter ko ed sikara.” (Josue 1:2) Agaylan mairap a kimey so nipabtang ed si Josue! Sikato so datin katambayan nen Moises ed ngalngalin 40 a taon. Natan et sikatoy niganggan ya onsalat ed katawan to pian idaulo iray bangar ya anak na Israel diad iloob ed Insipan a Dalin.

Legan a momolimolien nen Josue so nagawa ed arapen, nayarin mantutumbokan ya anonotan to iray subok a naarap tan atalonaan to la. Say ninodnonot nen Josue so andi-duaruwan akatulong a maong ed sikato diad saman a panaon, tan makatulong met itan ed saray Kristiano natan.

Aripen a Nagmaliw a Komander

Kabiangan ed saray pakanodnonotan nen Josue so andukey a taon ya inkaaripen. (Exodo 1:13, 14; 2:23) Saray eksperiensya nen Josue leleg na saman a panaon labat so napadesiran tayo, lapud ag-indetalyin amin iratan na Biblia. Nayarin naaralan nen Josue so pagmaliw a maong a manag-organisa legan na impanserbi to ed Ehipto, tan nayarin akatulong ed impangiyuksoy ed pakatakas na saray Hebreo tan ‘dakdakel a bilang na nagsisananey a totoo’ manlapud satan a dalin.​—Exodo 12:38.

Kabiangan si Josue ed pamilya na tribu na Efraim. Si Elisama a laki to so pangulo na tribu tan mapatnag ya angidaulo ed 108,100 ya armadon lalaki ed sakey ed taloran-tribun pangkat na Israel. (Numeros 1:4, 10, 16; 2:18-24; 1 Awaran 7:20, 26, 27) Ingen, sanen inataki na Amalekitas so Israel kayarin tuloy na intaynan da ed Ehipto, si Josue so tinawag nen Moises a mangorganisa na depensa. (Exodo 17:8, 9a) Akin et si Josue, ya aliwan say laki to odino ama to? Say sakey a nayarin rason et: “Bilang uloen na manunan tribu na Efraim, tan kabkabat la  lapud dunong to ed panag-organisa, tan panmamatalekan a maong na totoo, insalat nen Moises [si Josue] bilang lider a kualipikadon mamili tan manguksoy ed saray sundalo.”

Antokaman so rason, sanen apili si Josue, ginawa to so unong ed ingganggan nen Moises. Anggaman anggapon balot so eksperiensya na Israel ed pibabakal, kombinsido si Josue a tulongan na Dios. Akombinse lan tampol sanen imbaga nen Moises ed sikato a, “nabuas et onalagey ak diman ed toktok na pukdol a sankaegnaan ko so tayukor na Dios.” Maseguron ninodnonot nen Josue so agano labat nin impangigalpong nen Jehova ed sankamakapanyarian a militar ed saman a panaon. Diad kaimbuasan, sanen intagey nen Moises iray lima to tan agto inyabeba iratan anggad inselek na agew, anggapoy kabusol a makalaban ed Israel, tan atalo iray Amalekita. Kayari to et ingganggan nen Jehova si Moises ya isulat to ed sakey a libro tan ‘iparengel ed si Josue’ so madibinon dekreto: “Punasen ko naani a sigpot so pakanodnonotan ed Amalek manlapu ed leksab na tawen.” (Exodo 17:9b-14, NW) On, si Jehova so peteg a mangidapo ed satan a dusa.

Bilang Katambayan nen Moises

Maseguron say agawa ed Amalek so nagkalalon amaapit ed siglaotan nen Josue tan si Moises. Walaan na kagalangan si Josue bilang personal a katambayan, odino “ministro,” nen Moises, “manlapud inkabalolaki to” ya angga ed impatey nen Moises, a saknapen toy manga 40 a taon.​—Numeros 11:28, NW.

Satan a posisyon so atekepan na saray pribilehyo tan responsabilidad. Alimbawa, sanen tinmatdang ed Palandey Sinai ira di Moises, Aaron, ilalak a lalaki nen Aaron, tan 70 ed mamasiken na Israel tan anengneng da so pasingawey na gloria nen Jehova, nayarin kaiba ra si Josue. Bilang katambayan, inibaan toy Moises ed toktok na palandey tan nayarin pinmarisi ed sakey a pasen legan a linmoob si Moises ed lurem a mangisisimbolo ed kiwawala nen Jehova. Makatantanda, ompatnag a nansiansia si Josue diad palandey ed loob na 40 ya agew tan 40 a labi. Sikatoy matoor a nanalagar ed impawil na katawan to, lapud sanen linmasor si Moises a sankaawit iray tapyas na Panamintuan, wadman si Josue ya inmabet ed sikato.​—Exodo 24:1, 2, 9-18; 32:15-17.

Kayari na impantalintao na Israel ed balitok a kilaw a baka, si Josue so nantultuloy a kaiba nen Moises diad tolda na duypo ed paway na kampamento. Diman et akitongtong si Jehova a lupalupaan ed si Moises. Balet sanen pinmawil si Moises ed kampamento, si Josue so ‘agpinmaway diman ed pegley na tolda.’ Nayarin kinaukolan toy mansiansia diman pian agmakaloob ed tolda iray marumsis ya Israelita.  Agaylan masimoon si Josue ya angako ed satan a responsabilidad!​—Exodo 33:7, 11.

Say impilimog ed si Moises, a panguloan na 35 a taon ed si Josue unong ed manag-awaran a si Josephus, so maseguron amabiskeg a maong ed pananisia nen Josue. Say relasyon da so tinawag a “say siglaotan na matakken tan kalangweran, na maestro tan babangatan,” a nanresulta ed impagmaliw nen Josue a “lakin mapekder tan napanmatalkan.” Anggapo ed limog tayo natan iray propeta a singa si Moises, balet kabiangan ed saray kongregasyon na totoo nen Jehova iray mamatatken a sikaray tuan lapuan na biskeg tan panamaseseg lapud eksperiensya tan espiritualidad da. Kasin papablien yo ira? Tan kasin nagugunggonaan kayo’d pitutuyaw yo ed sikara?

Sakey ya Espiya ed Canaan

Agawa so sankaimportantian ya eksperiensya ed bilay nen Josue kayarin tuloy a naawat na Israel so Ganggan. Sikatoy apilin mangirepresenta na tribu to diad pan-espiya ed Insipan a Dalin. Kabkabat la itan a salaysay. Bidbiren na amin a 12 espiya a say dalin so talagan ‘panagusan na gatas tan dilo,’ unong ya insipan nen Jehova. Anggaman ontan, andiay-pananisian tinmakot so samplora ya agnayarian na Israel ya ablogen iray manaayam ed saman a dalin. Si Josue tan Caleb lambengat so amaseseg ed totoo ya agmanrebeldi lapud takot, ta seguradon walad sikara si Jehova. Diad satan et sinmuppiat so amin a duypo tan nankokomplotan da iran dua a tupak-tupaken na bato. Nayarin agawaan da itan no agsinmalet si Jehova diad impangipatnag toy gloria to. Lapud andian ira na pananisia, impaakseb na Dios ya anggapo ed saramay nirehistro ed Israel a mantaon na 20 a patagey so makaloob ed Canaan a mabilay. Si Josue, Caleb, tan saray Levita lambengat so aliktar ed sikara.​—Numeros 13:1-16, 25-29; 14:6-10, 26-30.

Agta anengneng na amin a totoo so makapanyari iran gawa nen Jehova ed Ehipto? Balet anto so tinmulong ed si Josue pian manmatalek ed tulong na Dios anggaman nanduaruwa so karaklan? Maseguron malinew a ninodnonot nen Josue so amin ya insipan tan ginawa la nen Jehova, tan dinalepdep to iratan. Apalabas so pigaran taon et nibaga to ya ‘anggapo so sakey a salita a linmiwat ed amin a maong a bengatlan sinalita nen Jehova ed Israel. Agawa iratan ya amin.’ (Josue 23:14) Nanmatalek sirin si Josue a segurado met a nagawa so amin ya insipan nen Jehova nipaakar ed arapen. (Hebreos 11:6) Saya so mamakiwas ed sakey a too a mangitepet: ‘Komusta ak kasi? Kasin say pansasagpot ko ed panaaral tan panmomorekdek ed saray sipan nen Jehova so mangokombinse ed siak a napanmatalkan iratan? Kasin panisiaan kon say Dios et nasalimbengan to ak a kaiba iray totoo to diad onsabin baleg a kairapan?’

Aglambengat angagamil na pananisia si Josue noagta makpel met a nanggawa na maptek. Sikato tan si Caleb lambengat so tinmalindeg, kanian nankokomplotan na amin a duypo a sikaray tupaken. No sika, anto so naliknam? Nataktakot? Ag-tinmakot si Josue. Sikato tan si Caleb so mapekder ya angibaga ed sisiaen da. Kakaukolanen na katooran ed si Jehova a gawaen tayo met so ontan no nasabi panaon.

Say salaysay nipaakar ed saray espiya so mangipaamta met ed sikatayo a sinalatan so ngaran nen Josue. Say datin ngaran to ya Oseas, a kabaliksan toy “Kilalaban,” so inaruman nen Moises na silabiko a mankabaliksay madibinon ngaran tan tinawag ton Jehosua, odino Josue​—“Si Jehova so Kilalaban.” Impatalos na Septuagint so ngaran to bilang “Jesus.” (Numeros 13:8, 16) Matukotukoy itan a ngaran nen Josue lapud makmakpel ton inyabawag a si Jehova so kilalaban. Say ngaran nen Josue so agbasta labat la sinalatan. Napatnagan ed satan so respeto nen Moises ed inkatoo nen Josue tan mitunosan itan ed pribilehyon sumpalen nen Josue bilang mangidaulo ed balon kailalakan diad iloob ed Insipan a Dalin.

Leleg na impanteyeng-teyeng na Israelitas diad kalawakan ed loob na makapakesaw a 40 taon et nansasaginonoran ya inatey so atateng da. Anggapoy amta tayo nipaakar ed si Josue legan na satan a panaon. Anggaman ontan, maseguron dakel so naaralan to manlapud satan. Nayarin naimatonan to so panangukom na Dios ed impanrebeldi di Core, Datan, tan Abiram tan saray patumbok da ontan met ed saramay  akibiang ed mabanday a panagdayew ed Baal na Peor. Seguradon nanermen a maong si Josue sanen naamtaan to ya agmakaloob met si Moises ed dalin ya insipan nisesengeg ed ag-impamasanto nen Moises ed si Jehova nipaakar ed saray danum na Meriba.​—Numeros 16:1-50; 20:9-13; 25:1-9.

Tinuro Bilang Kasalat nen Moises

Sanen magano lan ompatey si Moises, kinerew to ed Dios a manuro na onsalat ed sikato pian say Israel so agmagmaliw a “singa saray karkarnero ya anggapo so pastol da.” Anto so ebat nen Jehova? Si Josue, “sakey a laki a wala ed sikato so espiritu,” so kaukolan a turoen ed arap na interon duypo. Nepeg da so ontalineng ed sikato. Agaylan rekomendasyon! Naimano nen Jehova so pananisia tan abilidad nen Josue. Anggapo lay mas kualipikado a pangimatalkan na panangidaulo ed Israel. (Numeros 27:15-20) Balet, amta nen Moises ya aarapen nen Josue so abalbaleg iran angat. Kanian pinaseseg to so kasalat to a ‘manpabiskeg tan manpabayani,’ lapud si Jehova so miulop lawas ed sikato.​—Deuteronomio 31:7, 8, NW.

Ontan met so impaseseg na Dios a mismo ed si Josue tan inkuan to ni: “[Imatonan] mo a gawaen so unong na amin a ganggan, a si Moises ya aripen ko ingganggan to ed sika: agka onsipa ed sikato dia ed kawigi, pian maong so kasumpalan mo ed anggan iner a laen mo. Sayan libro na ganggan ag-onarawi ed sangim, noag ingen sikato so umamengen mo ed agew tan labi, pian naimatonan mo a gawaen so unong na amin a nisulat ed sikato: ta dia ed ontan nagawam so dalan mo a maaligwas, tan dia ed ontan maong so kasumpalan mo. Agko ta ingganggan ed sika? Manpabiskeg ka tan manpabayani ka a maong; agka antakot, tan agka napunaw: ta si Jehova a Dios mo wala ed sika ed anggan iner a laen mo.”​—Josue 1:7-9.

Diad impakadngel ed saray salita nen Jehova tekep na eksperiensyan agamoran to la, panon nin manduaruwa si Josue? Segurado so pakasakop ed dalin. Siempre, nayarin onlesa iray kairapan, a wadtan lay sankaunaan a subok, salanti, say ibaliw ed araldalem ya Ilog na Jordan. Ingen, oniay ingganggan a mismo nen Jehova: “Onalagey ka, ombaliw ka ed sayan Jordan.” Kanian, anto ni sirin so problema?​—Josue 1:2.

Saray nantutumbokan ya ebento ed bilay nen Josue, salanti, say impakaliktob ed Jerico, say aminpiga-pigan impakatalo ed kakabusol da, tan say impangapag-apag ed dalin, so mangipatnag ya agbalot nilingwanan nen Josue iray sipan na Dios. Nen magano lan manampot iray agew to, sanen impagamor nen Jehova so deen ed Israel manlapud kakabusol da, tinipon nen Josue so totoo pian ibinsabinsa iray impedeneng na Dios ed sikara tan pian pasesegen iran manlingkor ed Sikato ed interon-puso. Bilang resulta et masimoon ya akisipanan lamet so Israel ed si Jehova, tan andi-duaruwa a lapud apaseseg ed alimbawa na lider da, “say Israel nanlingkor ed si Jehova ed saray amin ya agew nen Josue.”​—Josue 24:16, 31.

Si Josue so angitarya na ekselentin alimbawa parad sikatayo. Nidudunget met iray Kristiano natan ed dakerakel a pakasubokan na pananisia. Importantin natalonaan iratan pian namantini tayo so panangabobon nen Jehova tan diad kaunoran et minawir itayo ed saray sipan to. Tinmalona si Josue lapud mabiskeg a pananisia to. Tua, agtayo nanenengneng iray makapanyarin gawa na Dios a singa anengneng nen Josue, balet no wala man so manduaruwa, itatarya na libro na Biblia a ningaran ed si Josue so testimonya na akatasi nipaakar ed inkanapanmatalkan na imbaga nen Jehova. Singa si Josue, nailaloan tayo so kakabatan tan itatalona no basaen tayon inagew-agew so Salita na Dios tan seguroen ya iyaplika itan ed kabibilay tayo.

Kasin nasasakitan kayo no maminsan ed kondukta na saray kaparan Kristiano? Nonoten pa so inkamasungdo nen Josue leleg na 40 a taon, a bilang maptek a too et sikatoy naobligan manteyengteyeng diad kalawakan a kaibay totoon andian na pananisia. Kasin nairapan kan mangidepensa na sisiaen mo? Nodnonoten so ginawa nen Josue tan Caleb. Lapud pananisia tan katutulok da, agamoran da so alay abig a tumang. On, peteg a matalek si Josue a sumpalen nen Jehova so amin a sipan to. Ontan tayo met komon.​—Josue 23:14.

[Litrato ed pahina 10]

Say impilimog ed si Moises so amabiskeg ed pananisia nen Josue

[Litrato ed pahina 10]

Nanmatalek si Josue tan Caleb ed pakapanyari nen Jehova

[Litrato ed pahina 10]

Say panangidaulo nen Josue so akapasesegan na totoo pian mansiansia ed si Jehova