Inkianak nen Jesus​—No Panon tan No Akin ya Agawa Itan

“IMPOSIBLE!” Ontan so ibaga na karaklan ya aliwan Kristiano sano narengel da so salaysay nipaakar ed inkianak nen Jesus. Isipen dan agmitunosan ed siensia so panisia a say birhen a marikit so nayarin manlukon tan mananak ya anggapoy seksual a relasyon ed sakey a laki. Antoy padesir mo?

Nen 1984, impalapag ed The Times na London so sakey a sulat ya angikatunongan ed sayan pamaakaran, oniay inkuan na satan: “Aliwan makatunongan so pangusar ed siensia bilang panuppiat ed saray milagro. Say panisia ya agnayarin nagawa iray milagro so mipara ed kiwas na pananisia ya awaten a saratan so nayarin nagawa.” Say sulat so pinirmaan na 14 a propesor ed siensia diad saray unibersidad ed Britanya. Inkuan da: “Mabulos min panisiaan bilang maawaran iran ebento so impananak na birhen, saray milagro ed Ebanghelyo, tan say inkioli nen Kristo.”

Balet, natalosan no akin a diad primero et pakakewkewan na sakey a too so estoryan inyanak na birhen si Jesus. Say mismon birhen ya ina nen Jesus so mankelaw met sanen inkuan na anghel na Dios ed sikato: “Nia, ilukon mo tan yanak mo so sakey ya anak a laki et tawagen mo so ngaran to a Jesus.” Tinepet nen Maria: “Panon to nia, ta anggapo so kabat ko a laki?” Kanian impaliwawa na anghel a manggawa na milagro so Dios panamegley na masanton espiritu To, ya inkuanto ni: “Anggapo so salita a manlapu ed Dios ya andian na pakayari.” (Lucas 1:31, 34-37) Seguradon nayarian met na Sakey ya amalsa ed makapakelkelaw a proseso na panag-anak na too a pailukon tan paiyanak si Jesus manlapud masimpit a birhen. No apalsa na Dios so uniberso tan saray pihon ganggan na satan, nayarian to met ya usaren so egg cell ed panag-anakan nen Maria a mamawala na ayadyarin Anak a too.

No Akin a Nakaukolan Itan

Say debosyonadon laki a si Jose so akisipanan la ed si Maria sanen nannginew. Diad panamegley na kugip et impaliwawa na anghel na Dios ed si Jose so alay abig a rason no akin a malukon so birhen ya inaro to. Oniay inkuan na anghel: “Agka ontakot a mangawat ed Maria ya asawam; ta say nilukon ed sikato manlapud pakayari na espiritu santo. Et sikato yanak to naani so sakey ya anak a laki; et tawagen mo naani so Jesus a ngaran to; ta sikato ilaban to naani so baley to ed saray kasalanan da.” (Mateo 1:20, 21) Say kabaliksan na Jesus a ngaran diad Hebreo et “Si Jehova so Kilalaban.” Ipapanonot na satan ed sikatayo a kaukolan tayoy kililiktar manlapud kasalanan tan patey tan kaukolan tayo  met so uksoyan nen Jehova a Dios parad satan a kililiktar panamegley nen Jesus.

Lapud nankasalanan so inmunan too, si Adan, amin ya ilalak to so nianak ya ag-ayadyari, a walaan na tendensian manumlang ed saray ganggan na Dios. (Roma 5:12) Panon a naagwat ed kasalanan so kapolian nen Adan tan magmaliw ya ayadyari? Kaukolan ya ibayar so sananey ya ayadyarin bilay na too, a kasimbangan na balor nen Adan, pian nabalanse so simbangan na hustisya. Satan so rason no akin a ginawa na Dios so mamilagron inkianak na ayadyarin too, si Jesus, tan satan so rason no akin ya inabuloyan nen Jesus so pamatey ed sikato na saray kakabusol to. (Juan 10:17, 18; 1 Timoteo 2:5, 6) Kayari na inkioli tan insegep nen Jesus ed mangatatawen a bilay, sikatoy matalek a makapangibaga: “Inatey ak, tan nia, ta mabilay ak ed ando lan ando, tan wala ed siak so saray tombok na patey tan say Hades [kaslakan a lubok na katooan].”​—Apocalipsis 1:18.

Diad panamegley na saray piguratibon tombok na patey tan Hades, nilukasan nen Jesus so dalan pian nipawil ed makasalanan a totoo so abalang nen Adan. Oniay impaliwawa nen Jesus: “Siak so kiolian, tan say bilay. Say manisia ed siak, anggan inatey la, nabilay ni; tan siopaman a manbilay tan manisia ed siak agbalot ompatey.” (Juan 11:25, 26) Agaylan makapalikliket a sipan! Balet, wala ni so mas importantin rason ed inkianak nen Jesus.

Say Sankaimportantian a Rason

Say inkinginew nen Jesus ed eges nen Maria et aliwan satan so gapoan na bilay to. “Linmasur ak a nanlapu ed tawen,” so malinew ya inkuan to. (Juan 6:38) Diad tua, nambilay la si Jesus diad ayaman na saray espiritu kaiba so mangatatawen ya Ama to manlapud gapo na palsa. Kanian, sikatoy deneskribe na Biblia bilang “sengeg na pinalsa na Dios.” (Apocalipsis 3:14) Diad tawen, naimatonan nen Jesus so impanrebeldi na marelmeng ya anghel ya angipabeneg ed inmunan too sumpad uley na Dios. Saya so angiter ed si Jesus na sankaimportantian a rason pian kaliktanen so kianak bilang ayadyarin toon Anak na Dios. Anto itan a rason?

Pian paneknekan a kanepegan na mangatatawen ya Ama to so panuley ed uniberso. Lapud impansiansia ton matoor manlapud inkianak anggad impatey to diad dalin, impatnag nen Jesus so inkamabulos ton pauleyan ed paraan na pananguley nen Jehova ed saray pinalsa To. Antis a pinatey na kakabusol na Dios, malinew ya imbalikas nen Jesus so rason ed inkamabulos ton ompatey. Inkuan to a pian nakabatan na mundo ya inaro to so Ama. (Juan 14:31) No abayuboan komon na inmunan duaran too, si Adan tan Eva, so ontan a panangaro, akapansiansia ra komon a matoor ed magmainomay a subok.​—Genesis 2:15-17.

Inwalwal met na katooran nen Jesus a matila so marelmeng ya anghel, si Satanas. Pinauges nen Satanas so Dios tan too diad impangibaga to ed arap na saray anghel ed tawen: “Amin  a say too wala ed sikato iter to nipaakar ed bilay to.” (Job 2:1, 4) Lingon inyakusa nen Satanas ya amin a totoo so onsunggay ed Dios no napepeligro so bilay da.

Saray asalambit ya isyu so anuppiat ed inkamakanepegan na pananguley na Dios. Pian solbaren iratan, mabulos si Jesus ya impaiyanak bilang too pian paneknekan a sikatoy matoor anggad patey.

Kanian, say manunan rason ed inkianak nen Jesus diad dalin, unong ed inkuan ton mismo et “pian tasian [to] so katuaan.” (Juan 18:37) Ginawa to itan diad panamegley na impangipatnag to ed salita tan gawa a say pananguley na Dios so sigpot a matunong tan say pampasakop ed satan so sengegan na magnayon a liket. Impaliwawa met nen Jesus a sikatoy linma ed dalin pian iter so bilay to bilang “dondon nipaakar ed amayamay,” ya angilukas ed dalan pian nagamoran na makasalanan a totoo so inkayadyari tan andi-anggaan a bilay. (Marcos 10:45) Pian natalosan na katooan irayan makanan bengatla, nakaukolan so nirekord ya inkianak nen Jesus. Niarum ni, saray agawgawa diad inkianak nen Jesus so walaan na importante iran leksion, a singa ipanengneng na onsublay ya artikulo.

[Saray litrato ed pahina 4]

Panon a naagwat ed kasalanan iray kapolian nen Adan?