“Sikato so Onapit ed Sikayo”

“[Say Dios] ag-arawi ed sinansakey ed sikatayo.”​—GAWA 17:27.

1, 2. (a) Sano ontangay itayo ed mabitewen a katawenan, anto so nayarin itepet tayo nipaakar ed Manamalsa? (b) Panon itayon papaseguroan na Biblia ya importante iray totoo ed imaton nen Jehova?

 ASALI yo la kasi so tinmangay ed mabitewen a katawenan diad malinak a labi tan mandinayew kayon maong? Say dakerakel a bitewen tan say inkaawang na liwang so makapadinayew a tuloy. Diad sayan maaw-awang ya uniberso et melmelanting so planetan dalin. Kabaliksan kasi na saya a say Manamalsa, a ‘Sankatageyan ed amin a dalin,’ so atagtagey a tuloy pian iyansakit to so totoo odino sikatoy arawrawi tan agnausisa na totoo?​—Salmo 83:18.

² Papaseguroan itayo na Biblia ya importante iray totoo ed imaton nen Jehova. Diad tua, papasesegen itayo na Salitay Dios a sikatoy anapen tayo, a kuanto: “[Sikato so] ag-arawi ed sinansakey ed sikatayo.” (Gawa 17:27; 1 Awaran 28:9) On, no manggawa itayo na saray kundang pian onapit ed Dios, sikato so onkiwas ed saray pansasagpot tayo. Diad anton dalan? Saray salita ed teksto ed taon 2003 so mangiiter na onian makapaligsay-puson ebat: “Sikato so onapit ed sikayo.” (Santiago 4:8, NW) Singbaten tayo so pigara ed alay abig iran bendisyon ya ipapalabo nen Jehova ed saramay maapit ed sikato.

Personal a Langkap nen Jehova

3. Anton langkap so iiter nen Jehova ed saramay onaapit ed sikato?

³ Unona, si Jehova so walaan na mablin langkap parad saray lingkor to. Satan a langkap so agniyopresi na amin a pakayari, kayamanan, tan edukasyon ya iyoopresi na sayan sistema na bengabengatla. Satan so personal a langkap ya iiter labat nen Jehova ed saramay maapit ed sikato. Anto itan? Oniay ebat na Salitay Dios: “No . . . itagey mo so boses mo nipaakar ed pakatalos; no sikato so anapen mo a singa pilak, tan sikato so usisaen mo a singa saray inyamot a kayamanan: Diad ontan natalosan mo so takot ed Jehova, tan naromog mo so pikakabat ed Dios. Ta si Jehova mangiter na kakabatan.” (Uliran 2:3-6) Isipen pa a nayarin naromog na saray ag-ayadyarin totoo so “pikakabat ed Dios”! Satan a langkap​—say pikakabat a naromog ed Salitay Dios​—so nikompara ed ‘niyamot iran kayamanan.’ Akin?

4, 5. Akin a say ‘mismon pikakabat ed Dios’ so niyaliling ed ‘niyamot iran kayamanan’? Iyilustra.

 ⁴ Sakey lan bengatla et mabmabli so pikakabat ed Dios. Sakey ed sankablian iran bendisyon na satan et say ilalo ya andi-anggaan a bilay. (Juan 17:3) Balet satan a pikakabat so mamapaabig la ed bilay tayo natan. Alimbawa, bilang resulta na maalwar a panagaral tayo ed Salitay Dios et naromog tayo iray ebat ed saray importantin tepet ya: Anto so ngaran na Dios? (Salmo 83:18) Anto so peteg a kipapasen na inatey? (Eclesiastes 9:5, 10) Anto so gagala na Dios ed dalin tan ed katooan? (Isaias 45:18) Naamtaan tayo met a say sankaabigan a dalan na panagbilay et say pangiyaplika ed makabat a simbawa na Biblia. (Isaias 30:20, 21; 48:17, 18) Kanian, walaan itayo na maabig a giya a makatulong ed sikatayon ontalona ed saray kapagaan ed bilay tan manggegemtan ed kurson mangiyaalibansay peteg a liket tan inkapnek. Sankaimportantian et ontulong ed sikatayo so panagaral na Salitay Dios pian naamtaan so alay abig iran kalidad nen Jehova tan onapit ed sikato. Wala ni kasi mas mabli nen say maapit a relasyon ed si Jehova a nibase ed ‘mismon pikakabat ed Dios’?

⁵ Wala ni so sananey a rason no akin a niyaliling so pikakabat ed Dios diad ‘niyamot iran kayamanan.’ Singa ed dakel a kayamanan, satan so mataltalag ed sayan mundo. Diad anemiran bilyon a manaayam ed dalin, manga anemiran milyon so mandadayew ed si Jehova, odino 1 ed 1,000, so akaromog la ed ‘mismon pikakabat na Dios.’ Pian niyilustra so mataltalag a pribilehyon naamtaan so katuaan na Salitay Dios, konsideraen so sakey labat a tepet ed Biblia: Anto so nagawa ed saray totoo diad ipapatey? Amta tayo unong ed Kasulatan ya ompatey so kamarerwa tan anggapoy pakaamta na inaatey. (Ezequiel 18:4) Ingen ta inawat na maslak ed saray relihyon ed mundo so palson bangat a walay bengatlan walad dalem na too a mantultuloy a manbilay kayari na ipatey. Satan so manunan kabiangan na saray relihyon ed Kakristianoan. Ontatalona met itan ed Budismo, Hinduismo, Islam, Jainismo, Judaismo, Shinto, Sikhismo, tan Taoismo. Nodnonoten pa labat​—binilyon a totoo so napapalikdo ed satan a palson doktrina!

6, 7. (a) Siopa labat so makaromog na ‘mismon pikakabat ed Dios’? (b) Anton alimbawa so mangipanengneng a papalaboan itayo nen Jehova na aralem a pakatalos ya anggapo ed dakel a “makabat tan makatalos”?

⁶ Akin a daiset a totoo so makakaromog ed ‘mismon pikakabat ed Dios’? Lapud anggapo so makatebek ed kabaliksan na Salitay Dios no anggapoy tulong To. Tandaan, sayan pikakabat so sakey a langkap. Iiter labat itan nen Jehova ed saramay mabulos a manusisa ed Salita to tekep na inkamatua tan kapaabebaan. Sikara so aliwan “makabat unong ed laman.” (1 Corinto 1:26) Dakel ed sikara so nayari ni ingen a nipasen ya “andi-aral tan kabanyakan” unong ed saray estandarte na mundo. (Gawa 4:13) Ingen ta aliwa itan ya importante. Tutumangan itayo nen Jehova na ‘mismon pikakabat ed Dios’ lapu ed saray kalidad a naiimano to ed kapusoan tayo.

⁷ Konsideraen pa so sakey ya alimbawa. Dakel ya iskolar ed Kakristianoan so amawala na malaknab iran komentaryo nipaakar ed Biblia. Saratan a reperensya so nayarin mangipaliwawa ed maawaran a basiyan, say kabaliksan na Hebreo tan Griegon salita, tan dakel ni. Diad amin a naaaralan da, talaga kasin aromog la na saray iskolar so ‘mismon pikakabat ed Dios’? Bueno, kasin natalosan dan malinew so tema na Biblia, salanti, say kiyalangon na inkasoberano nen Jehova panamegley na mangatatawen a Panarian to? Kasin amta ra a si Jehova a Dios et agkabiangan na Trinidad? Walaan itayo na suston pakatalos ed saratan a pamaakaran. Akin? Pinalaboan itayo nen Jehova na aralem a pakatalos ed espiritual iran katuaan ya ag-amta na dakel a “makabat tan makatalos.” (Mateo 11:25) Agaylay panutumang nen Jehova ed saramay maapit ed sikato!

‘Babantayan nen Jehova so Amin a Mangaaro ed Sikato’

8, 9. (a) Panon so impaneskribe nen David ed sananey nin bendisyon parad saramay maapit ed si Jehova? (b) Akin a nakaukolan na saray tuan Kristiano so proteksion na Dios?

⁸ Panggagayagaan na saramay maapit ed si Jehova so sananey nin bendisyon​—say proteksion to. Oniay insulat nen salmistan David, a nidunget ed dakel a kairapan tan problema: “Si Jehova asingger ed amin ya ontawag ed sikato, ed amin day ontawag ed sikato ed katuaan. Gawaen  to so pilalek na saray ontakot ed sikato; sikato dengelen to met so akis da, tan ilaban tora. Si Jehova yapiger [“bantayan,” NW] to so amin a mangaro ed sikato; bangbalet amin na babagel gaygayen to ra.” (Salmo 145:18-20) On, asingger si Jehova ed saramay mangaaro ed sikato kanian sikatoy maples ya onebat ed ikekerew day tulong.

⁹ Akin a nakaukolan tayo so proteksion na Dios? Nilikud ed pakakaeksperiensya ed saray epekto na panagbilay ed sarayan “maatap a panaon a mairap a pidenengan,” saray tuan Kristiano so manunan puntirya na manunan Kabusol nen Jehova, si Satanas a Diablo. (2 Timoteo 3:1, NW) Satan a masilib a kabusol so determinadon ‘mamuag’ ed sikatayo. (1 Pedro 5:8) Si Satanas so mamapasegsegang, manedesdes, tan manutukso ed sikatayo. Iimanoen to met iray awawey na kanonotan tan puso a naanamot to. Sikato so walaan na sakey a gagala: pian pakapuyen so pananisia tayo tan deralen so espiritualidad tayo. (Apocalipsis 12:12, 17) Lapud walaan itayo na mabiskeg a kabusol a pilalabanan, agta makapaseguro a si Jehova so ‘manbabantay ed amin na saramay mangaaro ed sikato’?

10. (a) Panon a babantayan nen Jehova so totoo to? (b) Anto so sankaimportantian a nengneng na proteksion, tan akin?

¹⁰ Panon balet so pambabantay nen Jehova ed saray totoo to? Say sipan ton salimbengan to itayo so agmangigarantiya ed sakey a bilay a bulos ed problema diad sayan sistema; nisay mankabaliksan itan a sikatoy obligadon manggawa na saray milagro parad sikatayo. Anggaman kuan, mangitatarya si Jehova na pisikal a proteksion parad totoo to bilang sakey a grupo. Diad tua, agto abuloyan a palaniten na Diablo iray tuan managdayew diad dalin! (2 Pedro 2:9) Manuna ed amin, sikatayo so sasalimbengan nen Jehova ed espiritual a paraan. Kikinlongan to itayo ed walan nakaukolan tayo pian nasungdoan tayo iray subok tan nasalimbengan so relasyon tayo ed sikato. Diad kaunoran, say espiritual a salimbeng so sankaimportantian a nengneng na proteksion. Akin? Daput no mansiansia itayo ed siglaotan tayo ed si Jehova, anggapo​—anggan say ipapatey​—so permanentin makaderal ed sikatayo.​—Mateo 10:28.

11. Antoray probisyon nen Jehova pian nasalimbengan so totoo to ed espiritual a paraan?

¹¹ Si Jehova so nanggawa na daakan iran probisyon pian nasalimbengan ed espiritual iramay maapit ed sikato. Panamegley na Salita to, say Biblia, iikdan to itayo na kakabatan pian natalonaay nanduruma iran subok. (Santiago 1:2-5) Makasalimbeng a mismo so pangiyaplika ed praktikal a simbawa a naromog ed Kasulatan. Niarum ni, si Jehova so mangiiter na ‘masanton espiritu ed saramay onkerew ed sikato.’ (Lucas 11:13) Satan ya espiritu so sankabiskegan a puersa ed uniberso, kanian satan so maseguron manginlong ed sikatayo pian natalonaan so antokaman a subok odino tukso ya onsabi ed sikatayo. Panamegley nen Kristo, itatarya nen Jehova iray ‘langkap a totoo.’ (Efeso 4:8) Sarayan maespiritual a lalaki so manggugunaet a mangipatnag ed masimoon a panangabagey diad panutulong ed kaparan managdayew.​—Santiago 5:14, 15.

12, 13. (a) Anton paraan so pangitatarya nen Jehova ed sikatayo na espiritual a tagano diad manepeg a panaon? (b) Antoy nalilikna yo nipaakar ed saray probisyon nen Jehova parad espiritual a pankaabigan tayo?

¹² Wala ni so itatarya nen Jehova pian nasalimbengan itayo: say espiritual a tagano ed manepeg a panaon. (Mateo 24:45) Panamegley na inimprinta iran publikasyon, pati saray dyurnal a Say  Panag-Bantayan tan Awake!, ontan met ed saray miting, asamblea, tan kombension, itatarya nen Jehova ed sikatayo so nakaukolan tayo sano kaukolan tayo itan. Wala kasi nanonotan yon inkagawa diad Makristianon miting, asamblea, odino kombension a walay nadngel yon anenyeg ed kapusoan yo tan amabiskeg odino akaligliwa ed sikayo? Wala kasi so abasa yon artikulo diad sakey ed saray dyurnal ya asalambit ed tagey tan naisip yon parad sikayo iman?

¹³ Sakey ed saray sankaepektiboan ya ayura nen Satanas et say pakadismaya, tan apektado tayo ed saray epekto na satan. Amta to a say ombabayag lan kaaandian na ilalo so mamakapuy ed sikatayo, a mamaletey ni ingen ed sikatayo. (Uliran 24:10) Lapud aanamoten nen Satanas so negatibo iran liknaan, nakaukolan tayo so tulong. Say Panag-Bantayan tan Awake! iran magasin so panapanaon a mangipapalapag na saray artikulon makatulong ed sikatayo pian nalabanan so pakakadismaya. Nipaakar ed sakey ya artikulo, oniay insulat na Kristianon agin bii: “Agew-agew lawarin babasaen ko so artikulo, tan siansia nin matalareter iray luak. Iyaabay ko itan diad dukolan ko ta pian mainomay kon naala kapagno nadidismaya ak. Panamegley na ontan iran artikulo, naliliknak so makasalimbeng iran taklay nen Jehova ya akalakap ed siak.” * Agta misalsalamat itayo ed si Jehova lapud pangitatarya to ed sikatayo na nipanpanaon ya espiritual a tagano? Tandaan a saray probisyon to parad espiritual a pankaabigan tayo so mangipapatnag a sikatoy maapit ed sikatayo tan wala itayo’d makasalimbeng a pangiyaansakit to.

Pakaasingger ed “Dumerengel na Pikakasi”

14, 15. (a) Anto so personal a bendisyon ya ipapalabo nen Jehova ed saramay maapit ed sikato? (b) Akin a makatantandan pribilehyo so bulos a pakaasingger ed si Jehova diad pikakasi?

¹⁴ Kasin naiimano yo a diad pakakawalaan na totoo na pakayari tan autoridad et lalon mairap iran asinggeran na saramay uuleyan da? Komusta balet si Jehova a Dios? Kasin sikatoy arawin tuloy pian magmaliw ya interesado ed saray ibabalikas ed sikato na saray totoo lambengat? Misunian a tuloy! Say langkap a pikakasi so sananey nin bendisyon ya ipapalabo nen Jehova ed saramay maapit ed sikato. Say bulos a pakaasingger ed “Dumerengel na pikakasi” so makatantandan tuloy a pribilehyo. (Salmo 65:2) Akin?

¹⁵ Bilang ilustrasyon: Say manunaan ya executive ed sakey a baleg a korporasyon so walaan na dakel iran responsabilidad. Dedesidien to no dinan iran pamaakaran so asikasoen ton mismo tan ipabtang to ed arum. Mipadpara, say Soberanon Manuley na uniberso so walaan na kanepegan a mandetermina no dinan iran pamaakaran so gawaen to tan no dinan so ipabtang to. Konsideraen pa so amin a bengatlan inmatalek nen Jehova ed pinabli ton Anak, si Jesus. Say Anak so naikdan na “pakauley a mangukom.” (Juan 5:27) Saray anghel so ‘walad silong na pakauley to.’ (1 Pedro 3:22) Say makapanyarin masanton espiritu nen Jehova so impausar to ed si Jesus pian natulongan a mangiwanwan ed saray babangatan to diad dalin. (Juan 15:26; 16:7) Nayarian  sirin nen Jesus ya ibaga: “Amin a pakauley niiter ed siak ed tawen tan dia ed dalin.” (Mateo 28:18) Balet no nipaakar ed saray pikakasi tayo, denesidi nen Jehova a sikatoy personal a mangasikaso ed satan. Satan so rason no akin ya ingganggan itayo na Biblia ya ipaarap tayo labat ed si Jehova iray pikakasi tayo, a gawaen itan diad ngaran nen Jesus.​—Salmo 69:13; Juan 14:6, 13.

16. Akin a makapanmatalek itayo a talagan tatalinengen nen Jehova iray pikakasi tayo?

¹⁶ Kasin tatalinengen nen Jehova iray pikakasi tayo? No sikatoy agmangiyaansakit odino agmanginenen, agto itayon balot pasesegen a ‘manpeleng ed pikakasi’ odino ipaawit ed sikato iray pakakabelatan tan kapagaan tayo. (Roma 12:12; Salmo 55:22; 1 Pedro 5:7) Say matoor iran lingkor diad panaon na Biblia so sigpot a nanmatalek a tatalinengen nen Jehova so pikakasi. (1 Juan 5:14) Kanian, oniay kuan na salmistan David: “Denglen [nen Jehova] so boses ko.” (Salmo 55:17) Walaan itayo met na rason a manmatalek a si Jehova et asingger tan akaparaan ya ondengel ed amin a walad kanonotan tan pampapagaan tayo.

Tutumangan nen Jehova Iray Lingkor To

17, 18. (a) Anto so nalilikna nen Jehova ed matoor a panaglingkor na saray matudion pinalsa to? (b) Ipaliwawa pa no panon ya ipapabitar na Uliran 19:17 ya iimanoen nen Jehova iray gawa na inkamapangasi tayo.

¹⁷ Say posisyon nen Jehova bilang Sankatalbaan a Soberano so agnaapektoan ed nayarin gawaen odino aglabay a gawaen na totoo. Anggaman kuan, si Jehova so maapresyan Dios. Papablien to so matoor a panaglingkor na saray matudion pinalsa to. (Salmo 147:11) Saya sirin so sananey a gunggona a panggagayagaan na saramay maapit ed si Jehova. Tutumangan to iray lingkor to.​—Hebreos 11:6.

¹⁸ Malinew ya ipapabitar na Biblia a papablien nen Jehova so gagawaen na saray mandadayew ed sikato. Alimbawa, oniay nabasa tayo: “Say walaan na panangasi ed duka paotangen to si Jehova, et say maong a gawa to ipawil to ed sikato a bayaran.” (Uliran 19:17) Say mapangasin panangikonsidera nen Jehova ed saray duka so nipabitar ed Mosaikon Ganggan. (Levitico 14:21;  19:15) Anto so nalilikna nen Jehova sano aaligen tayo so panangasi to diad pidedeneng tayo ed saray duka? Sano mangiter itayo ed saray duka, ya anggapoy iilaloan tayon bales, moriaen itan nen Jehova bilang paotang ed Sikato. Insipan nen Jehova a bayaran to itan ya otang panamegley na pabor tan saray bendisyon. (Uliran 10:22; Mateo 6:3, 4; Lucas 14:12-14) On, sano ipatnag tayo so panangabagey ed kapara tayon managdayew a mankaukolan, tenyegen na satan so puso nen Jehova. Agaylay pisalamat tayo lapud amta tayo ya iimanoen na mangatatawen ya Ama tayo iray gawa na inkamapangasi tayo!​—Mateo 5:7.

19. (a) Akin a makapanseguro itayo a papablien nen Jehova so gagawaen tayo diad panagpulong tan panaggaway-babangatan a kimey? (b) Panon so panutumang nen Jehova ed saray gawa na serbisyo bilang suporta ed Panarian to?

¹⁹ Nagkalalon papablien nen Jehova so gagawaen tayo nisesengeg ed Panarian to. Sano onapit itayo ed si Jehova, natural lambengat ya usaren tayo so panaon, biskeg, tan kaykayarian tayo pian sigpot a makapibiang no posibli diad panangipulong ed Panarian tan panaggaway-babangatan a kimey. (Mateo 28:19, 20) No maminsan et nayarin liknaen tayo a dagdaiset so nagagawaan tayo. Nayari ni ingen a manduaruwa so ag-ayadyarin puso tayo no kasin napapaliket si Jehova ed saray sagpot tayo. (1 Juan 3:19, 20) Balet papablien nen Jehova so amin a langkap​—anggan panon kamelag itan​—a manlalapud puso a pinakiwas na aro. (Marcos 12:41-44) Papaseguroan itayo na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) On, tatandaan tan tutumangan nen Jehova so anggan say sankamelagan a gawa na serbisyo bilang suporta ed Panarian to. Niarum ni ed mayaman iran espiritual a bendisyon natan, nailaloan tayo iray napanggayagaan ed bilay diad onsabin balon mundo, a ditan et mabunlok ya iter tan peneken nen Jehova iray matunong a pilalek na amin a maapit ed sikato!​—Salmo 145:16; 2 Pedro 3:13.

20. Diad interon taon 2003, panon tayon napansiansia ed kanonotan tayo iray salita ed teksto-ed-taon, tan anto so resulta?

²⁰ Diad interon taon 2003, usisaen tayoy inkasikatayo no kasin tuloytuloy so pansasagpot tayon onapit ed mangatatawen ya Ama tayo. No ontan, makapanseguro itayo a sikatoy onkiwas unong ed insipan to. On, “say Dios . . . agmakapantila.” (Tito 1:2) No onapit tayo ed sikato, sikatoy onapit ed sikayo. (Santiago 4:8) Anto so resulta? Mayaman iran bendisyon natan tan ilalo ed mas iyapit ed si Jehova diad ando lan ando!

[Paimano ed Leksab]

Kasin Natandaan Yo?

• Anton langkap so iiter nen Jehova ed saramay onaapit ed sikato?

• Antoray probisyon nen Jehova a pakasalimbengan na totoo to diad espiritual?

• Akin a makatantandan pribilehyo so bulos a pakaasingger ed si Jehova diad pikakasi?

• Panon ya ipapabitar na Biblia a papablien nen Jehova so matoor a panaglingkor na saray matudion pinalsa to?

[Tepetepet Parad Panagaral]

[Litrato ed pahina 15]

Papalaboan itayo nen Jehova na aralem a pakatalos nipaakar ed saray espiritual a katuaan

[Saray litrato ed pahina 16, 17]

Itatarya nen Jehova so espiritual a salimbeng

[Litrato ed pahina 18]

Si Jehova et asingger tan akaparaan ya ondengel ed amin a pikakasi tayo