Ligliwa Parad Saramay Maniirap

DIAD loob na saray siglo, say tepet a no akin ya aabuloyan na Dios so paniirap so pakawewetwetan na dakel a pilosopo tan teologo. Ipipilit na arum a lapud say Dios et makapanyari ed amin, maseguron sikatoy sigpot a responsable ed paniirap. Say managsulat na The Clementine Homilies, sakey ya apokripal a sulat nen komaduan siglo, so mangibabagan uuleyan na duaran lima na Dios so mundo. Diad “kawigin lima” to et say Diablo, a mamapairap tan mangogonigon, tan diad “kawanan a lima” to et si Jesus, a mangililiktar tan mamebendisyon.

Saray arum, lapud agda naawat ya aabuloyan na Dios so paniirap, anggaman aliwan sikatoy sengegan na satan, so mangibabagan anggapo so paniirap. “Say kaugsan et sakey labat ya ilusyon, tan andian itan na peteg a basiyan,” so insulat nen Mary Baker Eddy. “Sano natebek a say kasalanan, sakit, tan ipapatey et bengatlan anggapo, saratan so naandi.”​—Science and Health With Key to the Scriptures.

Lapu ed saray trahedyan agawgawa diad awaran, nagkalalo la manlapud inmunan guerra mundial angga ed panaon tayo, dakel lay mankuan ya agnayarian na Dios ya amperen so paniirap. “Say Holocaust, diad padesir ko, so angekal ed antokaman a kana na kalidad ya inkamakapanyari ed amin a matukoy a para ed Dios,” so insulat na Judion iskolar a si David Wolf Silverman. “No wala man bilang so pakatebek na Dios,” so inyarum to, “diad ontan et say kamaongan To so mipakna komon ed kiwawala na kaugsan, tan nagawa labat itan no Sikatoy aliwan makapanyari ed amin.”

Balet, aliwan magenap iray sisisiaen a say Dios so nayarin minononong ed paniirap, ya agto nayarian a patundaen itan, odino say paniirap et imahinasyon tayo labat, pian naligliwa iramay maniirap. Tan nagkalalon importante, saratan a sisisiaen so sigpot a misumlangan ed maptek, mabiskeg, tan manangiyansakit a Dios ya imparungtal na Biblia. (Job 34:10, 12; Jeremias 32:17; 1 Juan 4:8) Anto sirin so ibabaga na Biblia a rason no akin a niyaabuloy so paniirap?

Panon a Ginmapo so Paniirap?

Agpinalsa na Dios so totoo pian manirap. Misunian ed satan, pinagamoran to so inmunan sanasawan too, si Adan tan Eva, na ayadyarin kanonotan tan laman, intarya to so marakdakep a hardin pian panayaman da, tan inikdan to ira na makabaliksan tan makapenek a trabaho. (Genesis 1:27, 28, 31; 2:8) Balet, mandependi so tuloytuloy a panliket da diad pamidbir da ed pananguley tan kanepegan na Dios a mandesisyon ed no anto so maong tan mauges. Satan a kakaukolanen na Dios so inrepresenta na kiew a tinawag a ‘say kiew a pakaamtaan na maong tan mauges.’ (Genesis 2:17) Nipatnag nen Adan tan Eva so panagpasakop da ed Dios no tuloken da so ganggan to ya agpangan manlapud satan a kiew. *

Makapaermen, agtinulok di Adan tan Eva so Dios. Si Eva so kinombinse na sakey a rebelyoson espiritun pinalsa, ya akabkabat ed kaunoran bilang Satanas a Diablo, ya agto pankaabigan so itulok ed Dios. Diad tua, ikikibot kuno na Dios ed sikato so sakey a bengatlan  marakdakep: say kawayangan, say kanepegan a manpili parad inkasikato no anto so maong tan mauges. Imbaga nen Satanas a no sikatoy mangan ed bunga na kiew, ‘nalukasan iray mata to tan sikatoy magmaliw a singa Dios, a makaamta na maong tan mauges.’ (Genesis 3:1-6; Apocalipsis 12:9) Lapud apalikdo si Eva ed ilalon nawalaan na kawayangan, sikatoy angan ed isesebel a bunga, insan angan met si Adan.

Diad saman a mismon agew, ginmapon alikna di Adan tan Eva iray resulta na impanrebeldi ra. Lapud impulisay da so pananguley na Dios, naandi so salimbeng tan saray bendisyon a nagagamoran da diad pampapasakop da ed Dios. Pinataynan ira na Dios ed Paraiso tan inkuan to ed si Adan: “Nisamba so dalin lapu ed sika; dia ed kairapan mangan ka na nabodbor ed sikato ed leleg na amin na agew a pambilay mo. Dia ed linget na lupam so panganan mo na tagano ya angga ed ipawil mo ed dalin.” (Genesis 3:17, 19) Ginmapon asagmak di Adan tan Eva so sakit, ot-ot, itatakken, tan patey. Nagmaliw a kabiangan na bilay na too so panirap.​—Genesis 5:29.

Pangareglo ed Isyu

Nayarin itepet na sakey, ‘Agkasi nayarin imbaliwala la komon na Dios so kasalanan di Adan tan Eva?’ Andi, lapud nagkalalon pakapuyen na satan so panagrespeto ed autoridad to, nayarin bayuboan ni na satan so panrebeldi ed arapen tan manresulta ed mas nagkalalon panirap. (Eclesiastes 8:11) Niarum ni, nayarin nibagan akinonong so Dios ed satan ya isusunggay no ibaliwala to itan. Ipapanonot ed sikatayo na managsulat ed Biblia a si Moises: “Say Dampay, ayadyari so gawa to; ta kaptekan so saray amin a dalan to: Sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:4) Pian magmaliw a matua ed inkasikaton dili, kaukolan ya abuloyan na Dios a sagmaken di Adan tan Eva iray resulta na intunganga ra.

Akin ya agtampol tinigway na Dios so inmunan sanasawa tan si Satanas, say agnanengneng ya angigaulo ed impanrebeldi ra? Walay pakayari ton manggawa ed satan. Agla komon akapan-ilalak si Adan tan Eva ya anawir ed irap tan ipapatey. Bangbalet, no usaren na Dios so pakapanyari to, agnapaneknekan na satan so inkamakanepegan na autoridad na Dios ed saray intelihentin pinalsa to. Niarum ni, no inatey si Adan tan Eva ya anggapoy ilalak da, nayarin ipatnag na satan a sinmaew so Dios ed gagala ton panoen na ayadyarin kapolian da so dalin. (Genesis 1:28) Tan “say Dios et aliwan singa totoo . . . Antokaman so insipan to, sumpalen to; sinalita to, tan tooren to itan.”​—Numeros 23:19, Today’s English Version.

Tekep na naspot a kakabatan to, nandesisyon si Jehova a Dios ya abuloyan a mantultuloy ed limitadon panaon so rebelyon. Saray rebelde so nawalaan na magenap a pankanawnawa a sagmaken iray epekto na insian da ed Dios. Andi-duaruwan ipatnag na awaran a kaukolan na katooan so panangiwanwan tan inkasuperyor na uley na Dios nen say uley na too odino nen Satanas. Ontan met, kinmiwas so Dios pian seguroen a say orihinal a gagala to ed dalin so nasumpal. Insipan to ya onsabi so bini, odino “ilalak,” a ‘manugat ed ulo nen Satanas,’ a sigpot a mangekal ed impanrebeldi to tan say makaderal iran epekto na satan.​—Genesis 3:15.

Si Jesu-Kristo itan ya insipan a Bini. Nabasa tayo diad 1 Juan 3:8 a “pinmanengneng so Anak na Dios a maneral na saray gawa na Diablo.” Ginawa to iya diad impangibagat ed ayadyarin bilay to bilang too tan impangibayar ed kakaukolanen a bili pian nadondon iray anak nen Adan manlapud atawir a kasalanan tan patey. (Juan 1:29; 1 Timoteo 2:5, 6) Isisipan ed saramay peteg a walaan na pananisia ed bagat nen Jesus a permanentin naandi iray paniirap  da. (Juan 3:16; Apocalipsis 7:17) Kapigan iya nagawa?

Pangangga na Paniirap

Say impangipulisay ed autoridad na Dios so sengegan na pirmin irap. Kanian, manepeg labat ya usaren na Dios so autoridad to ed nikaduman paraan pian panganggaen so paniirap na too tan sumpalen so orihinal a gagala to para ed dalin. Sinalambit nen Jesus iyan uksoyan na Dios sanen imbangat to iray patumbok to a manpikasi: “Ama min wala ka ed tawen, . . . onsabi komon so panarian mo. Nagawa komon so linawam, unong ed tawen, ontan met ed dalin.”​—Mateo 6:9, 10.

Magano lan panganggaen na Dios so inyabuloy ton panaon pian salien na totoo ya uleyan so inkasikaran dili. Bilang kasumpalan na propesiya ed Biblia, say Panarian to so niletneg ed katawenan nen 1914 tan si Jesu-Kristo so Ari ed satan. * Agla mabayag, deralen tan panganggaen na satan so amin a gobierno na too.​—Daniel 2:44.

Legan na antikey a ministeryo nen Jesus diad dalin, sikatoy angitarya na pagpauna iran bendisyon a nipagamor ed katooan no nipawil so uley na Dios. Mangitatarya iray Ebanghelyo na paneknek ya inabagey nen Jesus iray mairap-bilay tan nalalames iran membro na sosyedad na totoo. Tinambal to iray mansasakit, pinakan to iray narasan, tan pinaoli to iray inaatey. Anggan saray puersa na palsa so tinmulok ed sikato. (Mateo 11:5; Marcos 4:37-39; Lucas 9:11-16) Isipen pa so nagawaan nen Jesus sano usaren to so makalinis ya epekto na dondon bagat to pian minabang so amin a matulok a katooan! Isisipan na Biblia a diad panamegley na uley nen Kristo, “punasen [na Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot.”​—Apocalipsis 21:4.

Ligliwa Parad Saramay Maniirap

Agaylan makapaliket a naamtaan a say maaro tan makapanyari ed amin a Dios tayo, si Jehova, so mangiyaansakit ed sikatayo tan magano to lan ipagamor so inawa ed katooan! Kaslakan a say pasyente so mabulos a manpatambal anggano ansakit itan a maong. Mipadpara met, no amta tayo a say paraan na pangaasikaso na Dios ed bengatla et mangitarok na magnayon iran bendisyon, satan a pikakabat so manustuni ed sikatayo, antokaman so sagmaken tayo a temporaryon kairapan.

Si Ricardo, ya asalambit ed inmunan artikulo, so sakey ed saray akapikabat a sikatoy naligliwa manlapud saray sipan ed Biblia. “Kayari impatey na akulaw ko, kaliktan kon iyarawi so inkasiak,” so inkuan to, “balet amoriak lanlamang ya agto iya nipawil so asawak tan palooren to labat so emosyonal a situasyon ko.” Imbes, intultuloy nen Ricardo so regular ya iyatendi ed saray miting na saray Kristiano tan pananginabang ed mensahe na Biblia ed arum. “Diad pakaliliknak ed maaron suporta nen Jehova tan pakaiimanok ed no panon ton eebatan iray pikakasik diad saray singa angkelag a bengatla, lalo ak ya apaapit ed sikato,” so inkuan nen Ricardo. “Sayan impakamoria ed panangaro na Dios so tinmulong ed siak a nasungdoan  so sankagrabian a subok ya asagmak ko.” Binidbir to: “Siansia nin makakailiw ak a maong ed akulaw ko, balet mapekder ko lan sisiaen natan ya anggapoy aabuloyan nen Jehova a nagawa ed sikatayo a pansengegan na magnayon ya ot-ot.”

Kasin pantintindekan yo, singa si Ricardo tan saray minilyon nin arum, so panaon sano saray kaplesan a kairapan na katooan so ‘agla nanonotan, agla onla ed nonot’? (Isaias 65:17) Makaseguro kayo a nagamoran yo iray bendisyon na Panarian na Dios no tumboken yo so bilin na Biblia: “Anapen yo si Jehova natan ta naromog yo ni; ontawag kayo ed sikato natan ta asingger ni.”​—Isaias 55:6.

Pian nagawaan yo iya, gawa yon prayuridad ed bilay yo so panagbasa tan maseseg a panagaral ed Salita na Dios. Kabaten so Dios tan samay imbaki to, si Jesu-Kristo. Panggunaetan so pambilay a mitunosan ed saray estandarte na Dios a pakapatnagan a kaliktan yoy manpasakop ed inkasoberano to. Satan a kundang so mangitarok na nagkalalon liket natan anggaman walaray subok a nasasagmak yo. Tan diad arapen, manresulta itan ed panggayaga yo ed bilay diad mundon anggapo lay irap.​—Juan 17:3.

[Saray paimano ed leksab]

[Kahon ed pahina 6, 7]

PANON TAYONNATALINDEGAN SO PANIIRAP?

“Imatalek yo ya amin ed [Dios] so kapagaan yo.” (1 Pedro 5:7) Natural labat a nalikna so pakawetwet, sanok, tan pambukbukor sano maniirap itayo odino nanenengneng tayo a maniirap so inad-aro tayo. Anggaman ontan, napaseguroan a natatalosan nen Jehova so nalilikna tayo. (Exodo 3:7; Isaias 63:9) Singa saray matoor a lalaki nensaman, nayarian tayon ipaamta ed sikato iray liknaan tayo tan ibesngaw iray kakulangan na kompiyansa tan kapagaan tayo. (Exodo 5:22; Job 10:1-3; Jeremias 14:19; Habacuc 1:13) Nayarin agto milagron ekalen iray pakasusubokan tayo, balet bilang ebat ed saray impapuson pikakasi tayo, nayarian ton ipagamor ed sikatayo so kakabatan tan biskeg pian napidenengan iratan.​—Santiago 1:5, 6.

“Agyo pankelawan so ansakisakit a subok a sasagmaken yo, a singano nidumaduman bengatla so nagagawa ed sikayo.” (1 Pedro 4:12, New International Version) Sasalambiten nen Pedro dia so panamasegsegang, balet matukoy ya onaplika met iray salita to ed antokaman a paniirap a sagmaken na sakey a mananisia. Maniirap so totoo lapud kakulangan ed saray manunan pankaukolan, sakit, tan impatey na inad-aro. Ibabaga na Biblia a sagmaken na balang sinansakey so “panaon tan ag-iilaloan a nagawa.” (Eclesiastes 9:11, NW) Saratan so kabiangan ed kaplesan a kipapasen na too. Makatulong so pakamoria ed saya pian naarap so irap tan makapuy a pansumpalan sano nagawa itan. (1 Pedro 5:9) Nagkalalo ed amin, say pannodnonot ed panamaseguro a “saray mata nen Jehova wala ra ed matunong a too, tan saray layag to akalukas ira ed saray akis da,” so nagkalalon lapuan na ligliwa.​—Salmo 34:15; Uliran 15:3; 1 Pedro 3:12.

“Manliket ed ilalo.” (Roma 12:12) Imbes a pinonot so maliket ya apalabas, makapandalepdep itayo ed sipan na Dios a panganggaen to so amin paniirap. (Eclesiastes 7:10) Sayan ilalo a walaan na malet a basiyan so manalimbeng ed sikatayo a singa sakey a helmet a manasalimbeng ed ulo. Say ilalo so mamakepa ed ot-ot ya epekto na saray trahedya ed bilay tan mangipaseguro a saratan so aliwan permanentin mamairap ed mental, emosyonal, tan espiritual a bunigas tayo.​—1 Tesalonica 5:8.

[Litrato ed pahina 5]

Impulisay di Adan tan Eva so pananguley na Dios

[Litrato ed pahina 7]

Insipan na Dios so mundon anggapo lay irap