Tepetepet Manlapud Saray Managbasa

No makakarengel na saray boses so sakey a Kristiano, kasin kabaliksan la na satan a sikatoy aatakien na demonyo?

Andi. Anggaman nibabalita ya ontan so gagawaen na saray demonyo, asukayan na dakel ya indibidual a makakarengel na saray boses odino manasagmak na arum ya agnipaliwawa tan makagonigon iran liknaan, a sikaray walaan na problema ed bunigas kayari ran sinukimat itan.

Anggan diad inmunan siglo et binidbir a saray panangataki na demonyo tan saray pisikal a kondisyon so mamapawala no maminsan na pareho iran epekto. Diad Mateo 17:14-18 et nabasa tayo so nipaakar ed sakey ya ugaw a laki a pinaabig nen Jesus. Anggaman say ugaw a laki so walaan na graben sintomas na inkadumurulot, say sakit to so diad tua et gawa na demonyo. Balet, diad akadkaunan inkagawa sanen inawit iray grupo na mansasakit a totoo ed si Jesus pian napaabig, kabiangan ed saraya so pigaran “aselepan na saray demonyo, [tan] saray dumurulot.” (Mateo 4:24) Mapatnag, binidbir nensaman a walaray dumurulot ya ag-aselepan na demonyo. Say sakit et diad pisikal.

Nibabalita ya arum ed saramay manlilikna na schizophrenia, sakey a sakit a kaslakan lan natambal, so makakarengel na saray boses odino makakaeksperiensya na arum a sintomas ya ompatnag a singano misteryoso. * Say arum a pisikal a kondisyon so nayarin pansengegan met na pan-alingataw a nayarin lingon isipen na arum a gawagawa na saray demonyo. Kanian, anggaman ag-ibabaliwala na sakey ya indibidual a mankuan a makakarengel na saray boses odino walaan na duma a makapagonigon iran liknaan so panangataki na demonyo, sikatoy seguradon napakiwas a mansukimat no kasin say naeeksperiensya to et makasengeg ed pisikal a bunigas to.

[Paimano ed Leksab]