Report na Saray Manangiyabawag na Panarian

Tulong Diad Pamasiansia ed Inkasagrado na Dala

DIAD interon dalin, nipapatnag na saray lingkor nen Jehova so katooran ed Dios nipaakar ed inkasagrado na dala. (Gawa 15:28, 29) Intarya na matoor tan makabat ya aripen a klase so tulong ed Kristianon impanaagi. (Mateo 24:45-47) Nengnengen tayo pa no antoray resulta diad Pilipinas.

Oniay inreport na sanga ed Pilipinas: “Nen 1990 et impakabat ed sikami a saray manangilaman manlapud Brooklyn Bethel so mangiyuksoy na seminar dia ed Pilipinas. Inimbitaan iray agagi ed pigaran sanga diad Asia, a kaiba so Korea, Taiwan, tan Hong Kong. Say gagala et pian ontulong a mangiletneg na Hospital Information Services diad saray sanga ra tan mangiyuksoy met na saray Hospital Liaison Committee. Diad Pilipinas et ginmapon niletneg iray komite ed apatiran manunan syudad.” Panggunaetan na sarayan komite ya anapen iray doktor a mabulos a mikoopera ed sikatayo nipaakar ed talindeg na Kristiano ed dala. Tulongan da met iray agagi sano onlesa iray problema nipaakar ed dala.

Si Remegio so apilin manlingkor ed Hospital Liaison Committee diad Baguio. Diad ilalabas na panaon, bibidbiren la na saray doktor iyan serbisyo. Nanonotan ni nen Remegio so sakey ya inkagawa sanen labay ya amtaen na pigaran doktor ya akimiting ed Hospital Liaison Committee no panon a tambalen iray Tasin pasyente ya agmanpapasaksak na dala. Inkuan nen Remegio: “Ginmapon nantetepet iray doktor, balet agak makaebat lapud masyadon teknikal iray tepet.” Sikatoy kinmerew na tulong diad impanpikasi ed si Jehova nipaakar ed sayan angat. Intuloy nen Remegio: “Kayari na kada tepet, intagey na arum a doktor so kalimaan da pian isalaysay no panon dan atalonaan so parehon situasyon.” Maliket si Remegio ed tulong a naawat to, nagkalalo la ta say sesyon na tepet-tan-ebet so agawa ed loob na duaran oras.

Wala la natan so 21 a komite ed interon bansa, a walaan na 77 a dagup na agagin lalaki a manlilingkor ed saratan. Oniay inkuan nen Danilo, a sakey a Tasi a doktor: “Namomoria na saray doktor a saray Tasi a pasyente ra et susuportaan na sakey ya organisasyon a maaron mangiyaansakit ed sikara.” Sakey a doktor so diad unona et masuyat a man-opera ed sakey ya agin laki ya agpasaksakan na dala. Balet mapekder so agi ed talindeg to. Sikatoy inoperaan tan saman so matalona. Oniay inreport na Hospital Information Services: “Pankelawan na doktor so inyabig na agi. Inkuan to: ‘Base ed sayan agawa, no siopaman ed saray membro yo so mankaukolan na onian klase na operasyon ya agsaksakan na dala, maliket ak a manggawa ed satan.’”