Kasin Walaan Kayo na “Awawey a Makapan-alagar”?

‘Anton nengneng na inkatoo so nepeg yon pagmaliwan ed amin a masantos a panagbilay tan kasimpitan, dia ed panalagar tan pampilalek yo [“sinononot lawas,” NW] ed isabi agew na Dios!’​—2 PEDRO 3:11, 12.

1, 2. Panon tayon niyilustra so ‘awawey a pakapan-alagar’ ed agew nen Jehova?

 ILITRATO yo pa’d kanonotan yo so sakey a pamilyan mantatalaran ed saray bisita ra a mangdem ed sikara. Magano la so oras na isabi ra. Okupado so asawan bii a mangipaparaan ed pangdeman. Ontutulong met so asawan laki tan saray ananak da pian naseguro ya akaparaan lan amin so bengatla. Makakaliket so amin. On, say interon pamilya so magunaet a mantatalaran ed isabi na saray bisita ra tan pitamitam da so mananam a panangan tan maabig a panlilimog.

² Bilang Kristiano, aalagaren tayo so bengatlan mas importante ni. Anto itan? Amin tayo so manaalagar ed ‘agew nen Jehova’! Anggad isabi na satan, nakaukolan ya aligen tayo si propetan Miqueas, ya angikuan: “Si Jehova so itultuloy kon alagaren. Ipatnag ko so awawey a makapan-alagar ed Dios na kilalaban ko.” (Miqueas 7:7, NW) Labay to kasin ibaga ya agtayo la mankimey? Andi. Dakel so kimey a gawaen.

3. Unong ed 2 Pedro 3:11, 12, anto so nepeg ya awawey na saray Kristiano?

³ Ontulong ed sikatayo si apostol Pedro pian nawalaan na dugan awawey legan a manaalagar. Inkuanto: ‘Anton nengneng na inkatoo so nepeg yon pagmaliwan ed amin a masantos a panagbilay tan kasimpitan [“saray gawa a masanto tan agamil a maridios a debosyon,” NW], dia ed panalagar tan pampilalek yo [“sinononot lawas,” NW] ed isabi agew na Dios!’ (2 Pedro 3:11, 12) Imanoen a saya et sakey a mapuersan balikas. Si Pedro et agmantetepet dia. Diad duaran sulat to a pinuyanan na Dios, deneskribe to so nengneng na inkatoo a nepeg a pagmaliwan na saray Kristiano. Sinimbawa to met ira ya itultuloy dan agamilen ‘iray gawa a masanto tan agamil a maridios a debosyon.’ Anggaman linmabas lay ngalngali 30 a taon manlapu la’d inter nen Jesu-Kristo so tanda na “kasampotan na sistema na saray bengatla,” nepeg ya akabantay lawas iray Kristiano. (Mateo 24:3, NW) Sikara so nepeg a ‘manalagar tan sinononot lawas’ ed isabi na agew nen Jehova.

4. Anto so nalalanor ed pagmaliw a ‘sinononot lawas ed isabi na agew nen Jehova’?

⁴ Say Griegon salita a nipatalos dia a “sinononot lawas” so literal a mankabaliksay “papelesen.” Siempre, agtayo literal a ‘napapeles’ so isabi na agew nen Jehova. Nipaakar ed satan et ‘agtayo kabat so agew tan oras’ ya isabi nen Jesu-Kristo a mangipaakseb na panangukom ed saray kabusol nen Ama to. (Mateo 24:36; 25:13) Insalaysay na  sakey a reperensya a say verb a nanlapuan na balikas a “papelesen” et mankabaliksay “‘manapura’ tan maapit a misiglaotan ed ‘pagmaliw a maseseg, aktibo, sinononot ed sakey a bengatla.’” Kanian pinaseseg nen Pedro iray kapananisiaan a magunaet a manpilalek ed kiwawala na agew nen Jehova. Nagawaan da iya diad pagmaliw a sinononot lawas ed satan. (2 Pedro 3:12) Lapud asingsingger la so “baleg tan makapataktakot ya agew nen Jehova,” nepeg ya ontan met so awawey na kanonotan tayo.​—Joel 2:31.

Manalagar Tekep na “Saray Gawa a Masanto”

5. Panon tayon nipatnag a magunaet itayon manpipilalek a makanengneng ed ‘agew nen Jehova’?

⁵ No sikatayo so magunaet a manpipilalek ed pakaliktar ed agew nen Jehova, ipatnag tayo itan diad panamegley na “saray gawa a masanto tan agamil a maridios a debosyon” tayo. Say balikas a “saray gawa a masanto” so mangipanonot ed sikatayo ed simbawa nen Pedro: “Unong na anak na katooran dia ed agyo pinonong ed saray ugagep yo wari nen wala kayo ni ed katikeyan na kanonotan: Noag ingen, unong a say anawag ed sikayo et masantos, masantos kayo met komon ed ganaganay panagbilay, ta nisulat a; Masantos kayo komon ta masantos ak.”​—1 Pedro 1:14-16.

6. Pian mansiansian masanto, anto so nepeg tayon gawaen?

⁶ Pian magmaliw a masanto, nepeg tayon pansiansiaen so kalinisan ed pisikal, mental, moral, tan espiritual. Kasin manpaparaan itayo ed ‘agew nen Jehova’ diad pansiansia tayon masanto bilang saray indibidual a mangaakbibit ed ngaran nen Jehova? Aliwan mainomay natan so panmantini ed ontan a kalinisan lapud tuloytuloy ya onaabeba iray estandarte ed moral. (1 Corinto 7:31; 2 Timoteo 3:13) Kasin naiimano tayo ni so pidumaan na saray moral ya estandarte tayo tan ed saramay walad mundo? No andi, nepeg tayon pampagaan itan. Anggaman atagtagey iray personal ya estandarte tayo nen saramay walad mundo, kasin onaabeba la iratan? No ontan, kaukolan a positibon onkiwas itayo a mangipetek ed saray pamaakaran pian napaliket so Dios.

7, 8. (a) Panon tayon nayarin nalingwanan so kaimportantian na pangagamil ed “saray gawa a masanto”? (b) Antoray nakaukolan a gawaen pian nipetek itan?

⁷ Diad inggapo na pornograpiya ed Internet tan lapud pribadon pakalukas ed satan, saray arum a datin agmakakanengneng ed saratan ya imoral a materyal so makakaromog la natan na “tuloytuloy lan pakawalaan na saray pankanawnawa nipaakar ed sekso,” so kuan na sakey a doktor. No lukasan tayo iratan a marutak a site na Internet, maseguron ibabaliwala tayo la so ganggan na Biblia ya ‘agdiwiten so anggan anto ya agmalinis.’ (Isaias 52:11) Talaga kasin ‘sinononot tayo ed isabi na agew nen Jehova’? Odino nayari kasin diad kanonotan tayo et iguguntang tayo itan ya agew, ya ikakatunongan tayo ya anggano say kanonotan tayo et dudutakan tayo na marutak a materyal, wala nin siansia so panaon pian nalinisan tayo so inkasikatayo? No walay problema tayo ed satan a bengatla, pankaganatan la ya onkerew tayo na tulong ed si Jehova ya ‘iyarawi to so mata tayo ed pannengneng ed andi-kakanaan tan pansiansiaen to itayon mabilay ed dili ton paraan’!​—Salmo 119:37, NW.

⁸ Karaklan ed saray Tasi nen Jehova, kalangweran man odino maedad la, so mansiasiansia ed atagey iran estandarte na Dios nipaakar ed moral tan papaliisan da so imoral iran pakasagyatan ed sayan mundo. Lapud sikakabat ira ed inkaganatan na panaon tayo tan ed pasakbay nen Pedro a “say agew na Katawan onsabi a singa matakew,” intultuloy dan ginawa iray “gawa a masanto.” (2 Pedro 3:10) Papaneknekan na saray kiwas da a sikara so  ‘manaalagar tan manpipilalek ed isabi na agew nen Jehova.’ *

Manalagar Tekep na ‘Saray Agamil a Maridios a Debosyon’

9. Say maridios a debosyon so nepeg a mamakiwas ed sikatayon manggawa na anto?

⁹ ‘Saray agamil a maridios a debosyon’ so makanakana met ta pian mansiansia itayon sinononot ed agew nen Jehova. Say “maridios a debosyon” so mangilalanor ed panangigalang ed Dios a mamapakiwas ed sikatayon manggaway makapaliket ed imaton to. Say matoor a pisisiglaotan ed si Jehova et manamakiwas a puersa ya epekto na ontan iran agamil a maridios a debosyon. Linawa to ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:4) Say Dios et “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Sirin, agta say maridios a debosyon tayo so nepeg a managyat ed sikatayon mamasya ya ontulong ed totoo a makaaral nipaakar ed si Jehova tan mangalig ed sikato?​—Efeso 5:1.

10. Akin a manalwar itayo sumpad “panamalingo na saray kayamanan”?

¹⁰ Say bilay tayo so napano na saray agamil a maridios a debosyon no iyuna tayo so Panarian na Dios. (Mateo 6:33) Lalanoren na saya so pakawalaan tayo na asimbang a panmoria ed saray materyal a bengatla. Oniay impasakbay nen Jesus: “Nengnengen yo, et manlikas kayo ed amin a kaagapan; ta say bilay na too andi ed karakel na saray bengatla a bebembenan to.” (Lucas 12:15) Anggaman mairap ya ilitrato ed inkasikatayo so pagmaliw a bulag lapud aro ed kuarta, nepeg tayon imanoen a “say kapagaan ed mundo, tan say panamalingo na saray kayamanan” so ‘manlener ed salita’ na Dios. (Mateo 13:22) Nayarin mairap so pananap na pambilay. Diad arum a parte na mundo, ikakatunongan na dakel a magmaong so pambilay da no onla ira ed sakey a maasenson bansa, a taynan da so pamilya ra ed loob na pigaran taon. Ontan met so impankatunongan na pigara ed saray totoo na Dios. Diad iyakar da ed arum a bansa, nayarian dan sustentoan so pamilya ra na moderno iran kagawaan. Balet, anto so nagawa ed espiritualidad na saray inadaro ra? Lapud anggapo so suston panangidaulo ed ayaman, kasin walaan ira na espiritualidad a nakaukolan pian makaliktar ed agew nen Jehova?

11. Panon ya impatnag na sakey a nantrabaho ed arum a bansa a saray agamil a maridios a debosyon so mas importante ni nen saray kayamanan?

¹¹ Sakey a taga-Pilipinas a nantrabaho ed Hapon so akaaral ed katuaan na Biblia manlapud saray Tasi nen Jehova diman. Sanen naaralan to so Makasulatan iran responsabilidad nipaakar ed inkaulo, amoria to a kaukolan ton tulongan so pamilya to pian magmaliw iran managdayew ed si Jehova. (1 Corinto 11:3) Sikato so pirmin sinumpa na akulaw ton walad Pilipinas lapud balon pananisia to tan labay nen akulaw to a sikatoy manpawit na kuarta imbes ya onsempet a mangibangat ed pamilya to nipaakar ed saray sisiaen ton nibase ed Biblia. Balet sikato so sinmempet lapud ta apakiwas ed inkaganatan na panaon tan panagpaga ed saray inadaro to. Atumangan so inkaanos to ed maaron impideneng to ed saray kapamilyaan to. Sinmabi panaon, say pamilya to so nankasakey ed tuan panagdayew, tan say akulaw to so linmoob ed sigpot-panaon a ministeryo.

12. Akin a nepeg tayon iyuna ed bilay so espiritual iran bengatla?

 ¹² Say kipapasen tayo so niyaliling ed saray indibidual a walad loob na napopoolan lan bilding. Makabat ni kasi so apuraan a pangisalba ed saray materyal a bengatla manlapud mandarlang a bilding a ngalngali la nakusbo? Imbes, agta mas importante ni so pangisalba ed saray bilay​—say mismon bilay tayo tan say pamilya tayo tan saray arum nin manaayam ed bilding? Bueno, sayan marelmeng a sistema na bengabengatla so maples a mamapaarap la’d pakakusbo to, tan napepeligro iray bilay. Diad pakamoria ed saya, maseguron iyuna tayo so espiritual a bengatla tan maseseg ya iyapasakey so imano tayo ed manangiliktar-bilay a kimey a panangipulong ed Panarian.​—1 Timoteo 4:16.

Nakaukolan ya ‘Andian Itayo na Matik’

13. Anto so kaliktanen tayon talindeg sano onsabi la so agew nen Jehova?

¹³ Oniay inkuan nen Pedro diad impangidanet to ed kaimportantian na awawey a makapan-alagar: “Inararok ira, bangta kaliktan yo so saraya a bengatla, pampelengan yo tan pian naromog kayo’d kareenan, ya andi-matik tan karumsisan ed imaton [na Dios].” (2 Pedro 3:14) Niarum ni ed simbawa ton agamilen iray gawa a masanto tan saray agamil a maridios a debosyon, indanet nen Pedro so kaimportantian na panmoria nen Jehova ed saray indibidual ya alinisan la ed mablin dala nen Jesus. (Apocalipsis 7:9, 14) Kakaukolanen na saya ya agamilen na sakey a too so pananisia ed bagat nen Jesus tan magmaliw a dedikado tan bautismadon lingkor nen Jehova.

14. Anto so lalanoren na pagmaliw ya “andi-matik”?

¹⁴ Pinaseseg itayo nen Pedro a gawaen so anggaay nayarian tayo pian naromog ya “andi-matik.” Kasin pansiasiansiaen tayon andiay matik iray kondukta tan personalidad tayo bilang Kristiano, ya ag-amantsaan na mundo? No walay naimano tayon mantsa ed kawes tayo, tampol tayon ekalen itan. No say amatikan et samay paborito tayon kawes, sikatayo so nagkalalo lan maalwar a manlinis ed satan. Ontan met kasi so liknaan tayo no namantsaan iray piguratibon kawes tayo bilang Kristiano, lapud walay pakabalawan ed personalidad odino kondukta tayo?

15. (a) Akin a kinaukolan a manggawa iray Israelitas na laga ed saloy na saray kawes da? (b) Akin a sankaimano so pidumaan na saray kaplesan a lingkor nen Jehova?

¹⁵ Saray Israelita so kinaukolan a manggawa na “laga ya ipeket da ed saloy na kawekawes da” tan “itapew da . . . ed laga na balang sakey a saloy so lubir ya asul.” Akin? Ta pian nanonotan da iray ganggan nen Jehova, unoren da, tan magmaliw ira a “masantos” ed Dios da. (Numeros 15:38-40) Bilang lingkor nen Jehova natan, sankaimano so pidumaan tayo ed mundo lapud uunoren tayo iray ganggan tan prinsipyo na Dios. Singa bilang, pansiasiansiaen tayo so moral a kalinisan, rerespetoen tayo so inkasagrado na dala, tan papaliisan tayo so amin a nengneng na idolatriya. (Gawa 15:28, 29) Dakel so manrerespeto ed sikatayo lapud mapekder a determinasyon tayo a mansiansian andi-tilol.​—Santiago 1:27.

Nakaukolan a Magmaliw Itayon ‘Andi-dumsis’

16. Anto so lalanoren na pansiansia tayon ‘andi-dumsis’?

¹⁶ Imbaga met nen Pedro a nepeg itayon naromog ya ‘andi-dumsis.’ Panon itan a posibli? Say mantsa so kaslakan a nalinis odino naekal balet aliwan ontan ed dumsis. Say dumsis so mangipapabitar a walay depekto ed dalem, walay kalilingoan. Sinimbawa nen apostol Pablo iray kaparan Kristiano diad Filipos: “Gawa yo ya amin so bengatla ya anggapoy talabutob tan suppiatan;  pian magmaliw kayo komon ya andi-kabalawan tan agmakaduksa, anak na Dios ya anggapo so kabalawan yo ed pegley na sakey a pikewet tan maramsak a kailalakan, a diad pegley da anengneng kayon singa silesilew dia ed mundo.” (Filipos 2:14, 15) No tuloken tayo itan a simbawa, napaliisan tayo so panmeremere tan pisasangsangan tan manlingkor itayo ed Dios a walaan na malinis a motibo. Sikatayo so napakiwas na aro ed si Jehova tan ed kapara tayon totoo legan tayon ipupulong so “ebanghelyo na panarian.” (Mateo 22:35-40; 24:14) Niarum ni, mantultuloy tayon iyabawag so maong a balita anggaman maslak a totoo so nayarin agmakatalos no akin ya itatalaga tayo so panaon tayo diad pansasagpot ya ontulong ed arum a makaaral nipaakar ed Dios tan ed Salita to, say Biblia.

17. Anto so nepeg a motibo tayo sano manadampot itayo na saray pribilehyo ed Kristianon kongregasyon?

¹⁷ Lapud pilalek a sikatayoy moriaen ya ‘andi-dumsis,’ nepeg tayon usisaen iray motibo tayo ed amin a gagawaen tayo. Inwaklit tayo la so sinisiblet a paraan na mundo ed panggagawa na saray bengatla, a singa say panggugunaet a makagamor na kaykayamanan odino impluensya. No dadampoten tayo iray pribilehyo ed Kristianon kongregasyon, komon ta saray motibo tayo et mansiansian malinis tan lawas itayo komon a napapakiwas na panangaro ed si Jehova tan ed arum. Alay abig a naimatonan iray maespiritual a lalaki a “manadampot ed betang na manangasikaso” tekep na gayaga tan mapaabeban pilalek a magmaliw ya aripen nen Jehova tan ed saray kapananisiaan da. (1 Timoteo 3:1, NW; 2 Corinto 1:24) On, saramay kualipikadon manlingkor bilang mamatatken so ‘mabulos a mamastol ed saray pulok na Dios; aliwa a lapud mabanday a pananubo noag lapu ed ataryan kalakal; nisay pakatawan ira ed saramay inmatalek na Dios ed sikara, noag ingen gawaen day inkasikaran panagkauliran a tumboken na saray pulok.’​—1 Pedro 5:1-4.

Nakaukolan a Wala Itayo ‘ed Kareenan’

18. Antoran kalidad a kabkabat iray Tasi nen Jehova?

¹⁸ Diad kaunoran, imbaga nen Pedro ed sikatayo a nakaukolan a wala itayo ‘ed kareenan.’ Ta pian nakapet tayo iyan kakaukolanen, nakaukolan a walay pikakareenan tayo ed si Jehova tan ed saray kapara tayon too. Indanet nen Pedro so kaimportantian na pakawalaan na ‘agnaumas ya aro ed sakey tan sakey’ tan ed pantultuloy a pikakareenan ed saray kaparan Kristiano. (1 Pedro 2:17; 3:10, 11; 4:8; 2 Pedro 1:5-7) Pian napansiansia tayo so kareenan, nepeg a walaan itayo na aro ed limog tayo. (Juan 13:34, 35; Efeso 4:1, 2) Say aro tan deen tayo so nagkalautlan apatnagan sanen agawa iray internasyonal a kombension tayo. Diad sakey a kombension ed Costa Rica nen 1999, walay managlako ed airport a naingongotan ed saray Tasi diman a mangaabrasa ed saray delegado ya agginagalan makakasara ed lakoan to. Balet, diad komaduan agew et naimano to so aro tan kareenan a nipatnag ed maligsan panangabrasa ed saray delegado, anggaman agni ra sankakabat a mismo. Diad unor ya agew et akibiang  la so managlako ed panangabrasa tan sikatoy impaiyaralan na Biblia.

19. Akin ya importante so pikareenan ed saray kapananisiaan?

¹⁹ Say inkasimoon tayo diad pikakareenan ed saray agagi tayo ed espiritual so walaan na epekto ed no panon itayon masimoon a manaalagar ed agew nen Jehova tan ed insipan a balon mundo to. (Salmo 37:11; 2 Pedro 3:13) Ipasen pa a mairap so mikareenan ed sakey a kapananisiaan. Sarag tayo kasin ilitrato ed kanonotan tayo so mareen a piiba tayo ed sikato diad Paraiso? No walay agi ya ombabarong ed sikatayo, nepeg a “mipulangan” itayon tampol ed sikato. (Mateo 5:23, 24) Importante so panggawa ed satan pian makapikareenan itayo ed si Jehova.​—Salmo 35:27; 1 Juan 4:20.

20. Say “awawey a makapan-alagar” so nepeg a napatnagan ed antoran dalan?

²⁰ Kasin ‘aalagaren tan sinononot itayo lawas ed isabi na agew nen Jehova’? Say masimoon a pilalek tayo a nanengneng so anggaan na karelmengan so nipatnag ed pansiansia tayon masanto ed sayan imoral a mundo. Niarum ni, say masimoon a pampirawat tayo ed onsabin agew nen Jehova tan ed bilay diad silong na uley na Panarian so nipatnag panamegley na saray agamil tayo a maridios a debosyon. Tan say paniilalo tayo ed pambilay diad mareen a balon mundo so nipatnag ed panggegemtan tayo ed pikakareenan ed saray kapananisiaan tayo natan. Panamegley na satan, nipanengneng tayo a walaan itayo na “awawey a makapan-alagar” tan ‘sinononot itayo lawas ed isabi na agew nen Jehova.’

[Paimano ed Leksab]

Kasin Natandaan Yo?

• Anto so kabaliksan na ‘sinononot lawas ed isabi na agew nen Jehova’?

• Panon a nipatnag so “awawey a makapan-alagar” diad kondukta tayo?

• Akin ya importante ‘iray agamil a maridios a debosyon’?

• Anto so nepeg tayon gawaen pian moriaen itayo nen Jehova ya ‘andi-matik tan andi-dumsis tan ed kareenan’?

[Tepetepet Parad Panagaral]

[Litrato ed pahina 11]

Say “awawey a makapan-alagar” so nipatnag ed saray gawa a masanto

[Saray litrato ed pahina 12]

Manangiliktar-bilay so kimey a panangipulong ed Panarian

[Litrato ed pahina 14]

Legan tayon tatalaranan so agew nen Jehova, komon ta gegemtanen tayo so pikakareenan ed arum