Ligliwa Parad Saramay Onkekerew na Tulong

SAY Biblia so aliwan libro a parad mental a bunigas. Balet, liligliwaen tan tutulongan itayo na satan a pablien so bilay anggaman ed kaguloan a kipapaarapan tayo. Makatunongan ya ibabaga na Kasulatan: “Say too a nianak ed bii, daiset so saray agew to, tan napno ed gonigon.” (Job 14:1) Say ag-inkayadyari tayon mismo so pansesengegan na arum a subsubok ed sikatayo. Balet siopa so manunan responsable ed paniirap na too?

Ipapabidbir itan na Biblia bilang sakey a marelmeng ya espiritu a tatawagen a Diablo tan Satanas. Sikatoy ‘mamapalikdo ed lapag na sankamundoan’ tan pansesengegan na dakel a kaguloan a manasalot ed katooan. Ingen, ibabaga met ed sikatayo na Biblia ya antiktikey lay panaon to. (Apocalipsis 12:9, 12) Agmanbayag et paandien la na Dios so amin a gonigon ya itatarok nen Satanas ed saray manaayam diad dalin. Unong ed Biblia et panganggaen la na insipan na Dios a balon mundo na inkatunong so kaandiay-ilalo.​—2 Pedro 3:13.

Agaylan makaligliwan naamtaan a temporaryo labat so paniirap na too! Diad silong na uley na mangatatawen a Panarian na Dios panamegley nen Jesu-Kristo, manampot la so ag-inkahustisya tan paniirap. Nipaakar ed tinuro na Dios ya Ari, oniay ibabaga na Kasulatan: “Sikato iliktar to so naukolan no oney-ey, say makabos met, ya anggapo so mananulong ed sikato. Sikato ilagak [“kasian,” NW] to so makabos tan naukolan, tan ilaban to so kamarerwa na naukolan. Sikato dondonen to so kamarerwa ra ya iyarawi ed panamalingo tan panamasoot; et mabli naani dala ra ed mata to.”​—Salmo 72:12-14.

Asingsingger la so panaon na pakasumpal na sarayan mapropetikon salita. Napanggayagaan tayo so andi-anggaan a bilay diad paraison dalin diad alay dakep a kipapasen. (Lucas 23:43; Juan 17:3) Say pakapikabat ed sarayan makaligliwan sipan a nibase ed Biblia so mangiter na ilalo tan ligliwa ed saramay onkekerew na tulong.

[Picture Credit Line ed pahina 32]

Depressed girl: Photo ILO/J. Maillard