Tepetepet Manlapud Saray Managbasa

Inabuloyan nen Jehova so poligamya ed limog na saray Israelita a lingkor to nensaman, balet agto la aabuloyan itan natan. Manguuman ta so estandarte to?

Ag-anguman si Jehova ed panmoria to nipaakar ed poligamya. (Salmo 19:7; Malaquias 3:6) Satan so agkabiangan na uksoyan to ed totoo manlapu la’d gapo, tan agmet itan kabiangan na uksoyan to natan. Sanen pinalsa to si Eva bilang asawa nen Adan, imbalikas nen Jehova a say madibinon estandarte et nepeg a sakey labat so kapareha na sakey ya asawan laki. “Kanian say sakey a laki taynan to so ama to, et yamong to so asawa to: et saksakey ira a laman naani.”​—Genesis 2:24.

Sanen si Jesu-Kristo so wadiad dalin, inulit ton imbalikas itan ya estandarte bilang ebat ed saraman so nantepet ed sikato nipaakar ed diborsyo tan pangasawa-lamet. Inkuan to: “Agyo ta abasa, a say amalsa ed sikara nanlapu ed gapo ginawa to ra a laki tan bii? Tan inkuan to, lapud saya say laki taynan to naani so ama to tan ina to, tan ontipon naani ed asawa to, et sikaran dua saksakey ira naani a laman.” Inyarum nen Jesus: “Siopaman a laki a mangisian naani na asawa to, nilikud ed impilawanan tan mangasawa na sananey a bii, mankasalanan ed pikakalugoran.” (Mateo 19:4-6, 9) Unong ed saya et mabitar a pikakalugoran so pangala na sakey odino dakel nin kaaruman ya asawan bii.

Akin balet a naabuloyan so poligamya nensaman? Nonoten ya aliwan si Jehova so angigapo ed satan ya agamil. Say sankaunaan ya abitla ed Biblia ya aliwan saksakey so asawa to et say apo nen Cain a si Lamec. (Genesis 4:19-24) Sanen intarok nen Jehova so Delap ed panaon nen Noe, si Noe tan balang sakey ed saray anak ton lalaki so walaay saksakey a kapareha. Amin a mangaagamil na poligamya so aderal ed Delap.

Pigaran siglo ed saginonor, sanen pinili nen Jehova iray Israelita bilang totoo to, arum ed sikara so mangaagamil la na poligamya, anggaman ompatnag a maslak ed saray kaasawaan a laki ed saman so walaay sakey labat a kapareha. Agkinaukolan na Dios a mansian iray pamilyan saray kaasawaan a laki et walaan na onsulok ed sakey ya asawa. Imbes, sikato so mapeget ya amuger ed satan ya agamil.​—Exodo 21:10, 11; Deuteronomio 21:15-17.

Aliwa labat a dia ed saray imbalikas nen Jesus nipaakar ed orihinal ya estandarte nen Jehova ed panangasawa so pakapatnagan a temporaryo labat so impangiyabuloy ed poligamya noagta ontan met ed insulat nen apostol Pablo a pinuyanan na masanton espiritu na Dios. Inkuanto: “Balang laki wala so asawa to a dili, tan balang bii wala komon so asawa to a dili.” (1 Corinto 7:2) Si Pablo so apuyanan met a mangisulat a siopaman a laki a naturon manangasikaso odino ministeryal a lingkor ed Kristianon kongregasyon so nepeg ya “asawa na saksakey a bii.”​—1 Timoteo 3:2, 12; Tito 1:6.

Sirin, anampot so panangiyabuloy nen Jehova ed poligamya sanen niletneg so Kristianon kongregasyon manga 2,000 taon lay apalabas. Nanlapu lad saman et nipawil so original ya estandarte ed panangasawa a niletneg ed gapo sanen pinalsay Dios so laki tan bii: nepeg a nawalaay sakey labat a kapareha so sakey ya asawan laki. Ontan so estandarte ed limog na totoo na Dios diad interon mundo.​—Marcos 10:11, 12; 1 Corinto 6:9, 10.