Anton Reputasyon so Gagawaen Mo Parad Inkasika?

KASIN akabasa ka la na kolum na obituaryo diad lokal a peryodiko odino akanengneng ka la na andukerukey a salaysay nipaakar ed bilay tan saray agawaan na sakey a toon inatey? Kasin intepet mo la ed inkasika ya, ‘Anto kasi so ibaga na totoo nipaakar ed siak?’ Pigara kasi so maniisip ed no panon iran nanodnonotan sano inatey la ra? Kanian saray prangkan tepet et: Anto kasi ibaga na totoo natan nipaakar ed sika no bilang ta inatey ka nen karuman? Anton klase na reputasyon so gagawaen mo parad inkasika? Anto so labay mon nanodnonotan ed sika na Dios tan saray totoon mikabat ed sika?

Oniay inkuan na makabat a nansulat ed libro na Biblia ya Eclesiastes: “Say sakey a maong a ngaran sikato so magmaong nen say mabli a larak; tan say agew na ipatey, nen say agew na kianak.” (Eclesiastes 7:1) Akin a magmaong so agew na ipatey na sakey a too nen say agew na kianak to? Lapud diad kianak na too et anggapo ni so niletneg a reputasyon to. Anggapo ni so personal a rekord to. Say bilay to so balanglan manresulta ed maabig odino makapuy a reputasyon. Parad saraman so akapanggawa na maabig a ngaran diad dakel a taon, peteg a magmaong so agew na ipatey da nen say agew na inkianak.

Kanian walaan itayo na pampilian. Diad tua et dakel so pampilian tayo ed inagew-agew a pakadeterminaan na reputasyon tayo diad agew na ipatey tayo, nagkalalo la no panon itayon nanodnonotan na Dios. Kanian, oniay insulat na saman lanlamang a makabat a Hebreo: “Say pakanodnonotan ed matunong sikato so bendito: balet say ngaran na marelmeng nabulok.” (Uliran 10:7) Agaylan pribilehyo a sikatayoy nanodnonotan na Dios pian bendisyonan to!

No makabat itayo, gawaen tayon kalat so pamaliket ed Dios diad pambilay a mitunosan ed saray estandarte to. Kabaliksan na satan a tumboken tayoray manunan prinsipyo ya imbalikas nen Kristo: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikato’ya so baleg tan unonan ganggan. Tan say komadua a mipadpara ed sikato saya, Aroen mo so kaparam a too unong ed sikan dili. Dia ed sarayan duaran ganggan so pansaksabitan na amin a katunongan tan say salita na saray Propeta.”​—Mateo 22:37-40.

Nanonodnonotan so arum bilang pilantropo, matulong ed kaparan too, manangiyagel ed saray kanepegan na mibabaley, odino lapud saray agawaan da ed negosyo, siensia, medisina, odino arum nin aktibidad. Balet, anto so labay mon nanodnonotan ed sika?

Imbalikas na manag-anlong a taga-Scotland a si Robert Burns (1759-96) so pirawat to ya ikdan itayo komon na Dios na abilidad a namoria so inkasikatayo unong ed pakamoria na arum ed sikatayo. Kasin nausisam so inkasika a petepeteg tan nibagam a maabig so reputasyon mo ed arum a totoo  tan ed Dios? Diad kaunoran, seguradon mas importante iray pisisiglaotan tayo ed arum nen saramay agawaan tayo ed loob na antiktikey a panaon diad lawak na isport odino negosyo. Say tepet sirin et: Panon a saray pidedeneng tayo ed arum, salanti say pitotongtong tayo, ugali tayo, tan andawes tayo, so mangaapekta ed sikara? Kasin momoriaen da itayo bilang mainomay ya asinggeran odino mabinbinta? Bilang mapangasi odino maramsak? Bilang mainomay ya onadapta odino mapegpeget? Bilang maligsa tan makaaro odino bilang agmananginenen tan maarawi? Bilang makapadismayan kritiko odino bilang makapabiskeg a mananimbawa? Usisaen tayo pa so pigaran alimbawa ed apalabas tan ed modernon panaon pian nanengneng no antoy naaralan tayo.

[Litrato ed pahina 3]

Pinirawat nen Robert Burns ya ikdan itayo komon na Dios na abilidad a namoria so inkasikatayo unong ed pakamoria na arum ed sikatayo

[Credit Line]

Nanlapu ed libron A History of England