Manbubunga so Maong a Balita Diad São Tomé tan Príncipe

NAYARIN maslak a totoo so agbalot mikabat ed São Tomé tan Príncipe. Kaslakan ya agnipaparungtal irayan isla diad saray brosyur a nipaakar ed bakasyonan. Diad mapa et singa iratan tulnek diad Gulpo na Guinea a nibanda’d sagur a baybay na Aprika, say São Tomé et walad asingger na equator tan say Príncipe et medyo nibanda’d amianen-bukig. Say mauran tan malinaew a klima so mamapawala na alay dakep iran rain forest, a manasakbong ed saray alosadsar na kapalandeyan a masulok a 2,000 metro ed katagey.

Sarayan tropikal ya isla, ya apaliberan na saray asul a dayat a diad gilig na saratan et atalunton iray palma, so panaayaman na saray makaaro tan maimis a totoo, a balibali so impanlaok na saray kultura ra lapud sikara so nanlalapud Aprika tan Europa. Say manunan anapan na saray manaayam ditan a manbilang na 170,000 et say panag-eksport na kakaw, odino panagdalus tan panagsigay. Diad agano niran taon et nagmaliw ya angat so panag-anap na anggan tagano parad sanagew.

Anggaman ontan, diad kaunoran a dekada na koma-20 a siglo et agawa so ebenton angapektan tuloy ed bilay na ondarakel a totoo diad sarayan isla. Nen Hunyo 1993, saray Tasi nen Jehova so legal a nirehistro ed gobierno na São Tomé tan Príncipe, a diad ontan et anampot so andukey tan alay irap a peryodo na awaran na saray Tasi nen Jehova diad sarayan isla.

Saray Bini a Nitanem Anggaman ed Kairapan

Ompatnag a say sankaunaan a Tasi so sinmabi ed sayan bansa diad kagapo na dekada 1950 sanen nibaki ed sarayan isla iray priso a nanlalapud arum a grupo na Portuges ed Aprika pian mantrabaho ed saray panamairapan a kampo.  Say Tasi, a sakey a payunir, odino sigpot-panaon a ministro a taga-Aprika, so pinatakyas manlapud Mozambique lapud pangipupulong to ed maong a balita na Panarian na Dios ed satan a bansa. Nantultuloy a nampulong iyan alenleneg a Tasi, tan diad loob na anem bulan et naaruman na 13 so mibibiang ed panangikayat na maong a balita. Diad saginonor et sinmabi so arum nin Tasi a taga-Angola a mipara iray kipapasen da. Legan na inkipriso ra, inanamot da so amin a pankanawnawa pian inabang so maong a balita diad saray manaayam diman.

Kasabi na 1966, amin ya agagi a walad saray panamairapan a kampo diad São Tomé so pinapawil ed sentro na Aprika. Say atilak a melag a grupo na saray manangipalapag na Panarian so makpel a nantultuloy. Sikaray pinasegsegang, nilelewet, tan impriso lapud sikaray nantitipon pian manaral na Biblia, tan anggapo so ombibisita odino mamapaseseg ed sikara. Nen 1975 et agamoran na bansa so kawayangan manlapud Portugal, tan kalkalna a nambunga iray bini na katuaan na Panarian.

Indaak tan Panagpaalagey

Diad samay mismon bulan na legal ya inkirehistro nen 1993, wala so pantok a 100 a manangipalapag na Panarian. Diad satan met a taon, sinmabi iray espisyal payunir a nanlalapud Portugal. Lapud saray impansagpot dan naaralan so salitan Portuguese Creole, sikaray pinabli na saray totoo diman. Diad saman et nagmaliw a prayuridad so pan-anap na lote a pangipaalageyan na Kingdom Hall. Sanen akabatan na sakey ya agin biin manngaran na Maria iyan pankaukolan, indonasyon to so kapaldua na dalin a kawalaan na melag ya abung to. Abalbaleg so lote parad sakey a baleg a Kingdom Hall. Ag-amta nen Maria a sayan dalin so paniinteresan a maong na saray ambisyoson developer, lapud anggapo la so mabilay a kakanayon to. Sakey ya agew et si Maria so kinatongtong na sakey a prominentin negosyante.

“Aliwan marakep so nadngelan ko nipaakar ed sika!” so inkuan to. “Nadngelan ko ya indonasyon mo so dalin mo. Agmo ta amta a mabmabli itan lapud wala itan ed syudad?”

“No ilakok ed sika so dalin, pigara so panaliw  mo?” so intepet nen Maria. Sanen ag-inmebat so laki, intuloy nen Maria: “Anggano iter mo ed siak so amin a kuarta ed mundo, kulang ni itan lapud agnasaliw na kuarta so bilay.”

“Agta anggapo so anak mo?” so intepet na laki.

Pian ontunda la so tongtongan da, oniay inkuan nen Maria: “Sayan dalin so kayarian nen Jehova. Satan so impabayes to’d siak diad loob na dakel a taon, tan natan et impawil ko la ed sikato. Siak so maniilalon manbilay ya andi-anggaan.” Insan tinepetan to so laki: “Agmo sarag ya iter so andi-anggaan a bilay, agta ontan?” Sikato so agla inmesel insan la tinmaynan.

Say resulta et nipaalagey so sakey a marakdakep a duaran-grado a bilding diad tulong na saray kualipikadon agagin lalaki a taga-Portugal. Walaan itan na silongan (basement), sakey a maawang a Kingdom Hall, tan saray kuarton painawaan. Walaan met itan na saray kuarto a napan-aralan na saray mamatatken, ministeryal a lingkor, tan saray payunir. Natan et duara lan kongregasyon so mantitipon ditan, a nagmaliw a maabig a sentro na edukasyon parad tuan panagdayew diad kabisera.

Diad Mé-Zochi et walay sakey a kongregasyon a tugyopen na 60 a maseseg a manangipalapag. Lapud sikaray mantitipon ed sakey a Kingdom Hall a tinuop-tuop lambengat a walad kapontian, mapatnag a nakaukolan so sakey a matukoy a Kingdom Hall. Nipakabat iya diad munisipyo, tan saray manangiyansakit ya opisyales so angiyopresi na sakey a balibalin lote a walad gilig na karsada. Diad loob na duay bulan et nipaalagey so sakey a marakep a Kingdom Hall diad tulong na saray agagin taga-Portugal, ya inkana so metodon maples a panagpaalagey. Saray totoo ditan so agmakapanisia ed anengneng da. Sakey a Suekon enhinyero a walaan na saray proyekton panagpaalagey ed syudad so nikelawan diad impakanengneng to ed saray agagin lalaki tan bibii a mankikimey. “Saya so makapakelkelaw!” so inkuan to. “Saray Tasi nen Jehova, dia ed Mé-Zochi, so angusar ed metodon maples a panagpaalagey! Onia a paraan so nepeg a panggawa tayo ed proyekto tayo.” Say Kingdom Hall so indedika nen Hunyo 12, 1999, a wala so 232 ya inmatendi. Say hall so manunan pakakasagyatan na saray ombibisita diad syudad na Mé-Zochi.

 Sakey a Maawaran a Kombension

Say maawaran ya ebento parad saray Tasi nen Jehova ed São Tomé tan Príncipe et say taloran-agew a “Madibinon Bangat” a Distriton Kombension nen Enero 1994​—say sankaunaan a kombension diad sarayan isla. Ginawa itan diad sakey a sankarakpan tan air-conditioned ya auditoryum diad bansa. Naisip yo ta so gayaga na 116 a manangipalapag na Panarian diad impakanengneng da ed 405 a nandaragup tan diad impakabantay da ed saray draman nibase ed Biblia tan impakaawat ed saray balon paway a literatura ed kombension diad inmunan pankanawnawa? Say tropikal a dayat so inusar parad bautismo na 20 a dedikadon totoo.

Say balon anagyat na imano na publiko et saray nikaduman lapel badge ya insulong na saray delegado. Say kombension et singa internasyonal lapud inkiwala na 25 a sankaili a nanlalapud Portugal tan Angola. Tampol ya apatnagan so maligsan panaaroan bilang Kristiano, tan akalua so dakel diad impanampot na sesyon sanen manpapataniran la ra.​—Juan 13:35.

Sinmabi iray dyurnalista na National Radio tan ininterbio ra so manangasikaso na kombension. Imbrodkas da met iray pinilin kabiangan na pigaran paliwawa. Talagan maawaran itan ya okasyon, tan satan so pakapatnagan a say nanengneng ya organisasyon nen Jehova so lalon onaapit ed sarayan matoor a Tasi ya abayag lan niarawi.

Manbubunga Parad Kirayewan nen Jehova

Sano manbunga so mensahe na Panarian, niwawala so maabig a kondukta a mangitatarok na dayew tan galang ed si Jehova. (Tito 2:10) Nanggayagaan na sakey a tin-edyer a bii so naaaralan to diad sinimban panagaral ed Biblia. Balet, sikatoy pepegetan nen ama to ya onatendi ed saray miting ed kongregasyon. Sanen marespeto ton impaliwawa ed ama to so kaimportantian na saray Makristianon miting tan say pilalek ton onatendi, sikatoy tampol a pinataynan ed abung. Nayarin inisip na ama to a sikatoy miamong la ed sakey a lakin makalegpet ed sikato, a maslak a gagawaen na dakel a kalangweran. Sanen naamtaan nen ama to a sikatoy manbibilay a napan-uliranan tan masimpit bilang Kristiano, sikatoy pinapawil na ama to tan inikdan to na sigpot a kawayangan a manlingkor ed si Jehova.

Sananey nin alimbawa et say nipaakar ed lider na sakey a banda. Sikatoy adismaya ed imoral a paraan na kabibilay to. Legan ton aanapen so gagala na bilay, sikatoy dinalaw na saray Tasi. Sanen ginapoan to so manbilay unong ed saray estandarte na Biblia ed moral, sikatoy nagmaliw a pantotongtongan diad baley. Ag-abayag et atebek to a nakaukolan to lan ikaindan so amin a mauges a pililimog. (1 Corinto 15:33) Insan sikatoy nanggawa na makanan kundang a nampabautismo bilang simbolo na dedikasyon to ed si Jehova.

Wala so pigaran kalangweran a manaanap ed tuan relihyon. Bilang resulta et akapidiskusyon ira ed saray pastor na pigaran grupo na manag-ebanghelyo, balet sikara so lalon awetwet tan adismaya. Diad kaunoran et nagmaliw iran marawal a paakar tan niludlurey da so antokaman a relihyoson bengatla.

Sakey ya agew, sakey a Tasi nen Jehova a misionaryo, so linman mangiyaral na Biblia tan akakar ed kawalaan na sarayan kalangweran. Kinaliktan na grupo a paebatan ed misionaryo so pigaran tepet tan intagar da diad benegan na abung, a sikatoy pinayurong da ed sakey a bangketo. Kayurong to et dakdakel so intepet da nipaakar ed kamarerwa, impiernon-apoy, bilay ed tawen, tan say anggaan na mundo. Inebatan na Tasi so amin a tepet da manlapud Biblia ya inyawat ed sikato na say lider na grupo. Kayari sakey oras, oniay inkuan na lider, a manngaran na Law, ed misionaryo: “Sanen intagar mi ka pian paebatan iray tepet mi, say gagala mi et ludlureyen ka, a singa gagawaen mi ed saray totoo ed arum a relihyon. Moriaen mi ya anggapo so makaebat ed saraman a tepet. Balet naebatan mo iratan diad impangusar mo lambengat ed Biblia! Ibagam pa’d siak, panon ak nin makaaral nipaakar ed Biblia?” Nigapo so panangiyaral na Biblia ed si Law, tan sikatoy inmatendin tampol ed saray miting. Ag-abayag kayari na satan, tinaynan to so grupo tan intunda to la so marawal a kabibilay to. Kayari sakey taon, indedika to so bilay to ed si Jehova tan abautismoan. Sikatoy manlilingkor la natan bilang ministeryal ya aripen.

 Say sakey a lokal a kustombre a nilamot lan tuloy et say panamong lambengat na laki tan bii ya agkasal. Dakel so manaamong ed loob na saray taon, tan walaan lara na ananak. Mairap dan awaten so panmoria na Dios ed sayan pamaakaran. Makapalikliket ya imanoen no panon a tinulongan na Salita na Dios so sakey a too a manalona ed sayan babeng.​—2 Corinto 10:4-6; Hebreos 4:12.

Atalosan nen Antonio a kaukolan ton gawaen a legal so pikasamento to tan implano toy mankasal kayari na panagburbor na mais pian wala so gastosen to parad ponsia na kasal. Sakey a labi a sakbay a tuloy na pamburbor, sinmabi iray matakew tan tinakew da so mais to. Denesidi ton alagaren so ontumbok a taon na panagburbor, balet tinakew lamet itan. Sanen sinmaew lamet so getma ton mantipon parad pankasal to, amoria nen Antonio no siopa so peteg a kabusol to. “Agko la abuloyan a palikdoen ak ni nen Satanas,” so inkuan to. “Diad loob na sakey bulan tan kapaldua, sikami la so mankasal, wala man odino anggapo so ponsia!” Kanian nankasal ira, tan asurprisa ira sanen saray kakaaro ra so angitarya na saray manok, pato, tan sakey a kanding a para ed ponsia. Kayarin nirehistro so kasal da, si Antonio tan say asawa to​—pati anemiran ananak da​—so abautismoan bilang simbolo na dedikasyon da ed si Jehova.

Diad Isla na Príncipe

Diad agano niran taon et say manangasikaso na sirkito tan saray payunir a taga-São Tomé so sagpaminsan ya ondadalaw ed 6,000 a manaayam ed Príncipe. Maslak ed sarayan taga-isla so maparawes tan magunaet ya ondengel ed ipupulong na saray Tasi. Kayari ton binasa so sakey a tract ya intilak ed sikato, inanap na sakey a laki iray payunir ed tinmumbok ya agew tan sikatoy tinmulong ed sikara a mangibunog ni na saray tract. Impaliwawa na saray payunir a sikaray manepeg a manggawa ed sayan kimey, balet impilit na laki so mila ed sikara diad kabkaabungan pian nipakabat to ira ed saray unabung tan pasesegen iran ondengel a maong. Tinmaynan so laki kayari ton kinomendaan iray payunir ed importantin kimey a gagawaen da.

Nen 1998 et inmalis ed Príncipe so duaran payunir a nanlapud São Tomé, tan ag-abayag et sikaray akapangikondukta na 17 a panangiyaral na Biblia. Nantultuloy a linmaknab so kimey, tan ag-abayag et nagmaliw a 16 so promedyo na onaatendi ed Panagaral na Kongregasyon ed Libro tan masulok a 30 so onaatendi ed publikon paliwawa. Nipasabi ed munisipyo so pankaukolan parad pasen a pantitiponan, tan makapaliket ta niiter so lote a pangipaalageyan na Kingdom Hall. Saray agagi a taga-São Tomé so namboluntaryo a mangipaalagey na melag a Kingdom Hall a wala met so napanpundoan na duaran espisyal payunir.

Andi-duaruwan say maong a balita so manbubunga na dakel tan onaaligwas ed sarayan niyarawin isla. (Colosas 1:5, 6) Nen Enero 1990 et wala la so 46 a manangipalapag diad São Tomé tan Príncipe. Legan na 2002 a serbisyon taon, adampot da so pantok a 388 a manangiyabawag na Panarian! Masulok a 20 porsiento na saray manangipalapag so walad sigpot-panaon a serbisyo, tan manga 1,400 so iyaaralan na Biblia. Say inmatendi ed 2001 a Memoryal so sinmabi ed sankapantokan a 1,907. On, diad sarayan tropikal ya isla et mapmaples ya onlalaknab so salita nen Jehova tan satan so niglogloria.​—2 Tesalonica 3:1.

[Kahon/Litrato ed pahina 12]

Saray Popular a Brodkas ed Radyo

Say publikasyon ya aapresyaen a tuloy ed sarayan isla et say Questions Young People Ask​—Answers That Work. * Kada duay simba et iprepresenta so 15-minuto a programa a walaan na ontan a tema diad National Radio. Agaylan makapaliket a narengelan ya intepet na sakey a brodkaster, “Sikayoran kalangweran, panon yon amta a satan so tuan panangaro odino pantindek lambengat?” insan binasa so sakey a porsyon na libro! (Nengnengen so kapitulo 31.) Imparungtal met ed satan a programa iray pinilin kabiangan na libron Say Sekreto na Liket ed Pamilya. *

[Saray paimano ed leksab]

[Litrato ed pahina 9]

Say primeron Kingdom Hall diad São Tomé nen 1994

[Saray litrato ed pahina 10]

1. Maples a nipaalagey a Kingdom Hall diad Mé-Zochi

2. Agawa so sakey a maawaran a distriton kombension diad sayan auditoryum

3. Saray maliket a kandidato na bautismo diad kombension

[Picture Credit Line ed pahina 8]

Globo: Mountain High Maps® Copyright © 1997 Digital Wisdom, Inc.