Sikayoran Tobonbalo, Mankurang a Makana ed si Jehova

ARUM a Kristianon tobonbalo so kinaukolan a temporaryon manayam ed pasen ya arawi ed pamilya tan ed kongregasyon da. Ginawa itan na arum pian napalaknab da so ministeryo ra. Arum so kinaukolan ya ontaynan ed ayaman da lapud neutral a talindeg da ed saray pakurang na sayan mundo. (Isaias 2:4; Juan 17:16) Diad arum a daldalin, senentensiaan nen “Cesar” iray manamemben-katooran a tobonbalo a nipriso ira odino mantrabaho parad komunidad. *​—Marcos 12:17; Tito 3:1, 2.

Legan iran akapriso lapud inka-neutral da, sarayan tobonbalo so nayarin akapisok kaiba iray delinkuenti diad loob na mabayag a panaon. Say kiarawi ed ayaman lapud arum niran rason so amaskar met ed saray tobonbalo a mankimey ed imoral a kaliberliber. Panon a sarayan kalangweran a Kristiano tan arum nin nidunget ed ontan a situasyon so makatalona ed saray pananesdes tan kakaukolanen ya arapen da legan a pambabanikelan da so ‘mankurang a makanakana ed Dios?’ (1 Tesalonica 2:12) Panon ira a natulongan na atateng da pian naarap so antokaman a nayarin agmarakep iran kipapasen?​—Uliran 22:3.

Saray Nikaduman Angat

“Mairap tan makapatalaw so kiarawi ed mananalimbeng a panangasikaso na atateng ko ontan met ed maaron panangasikaso na mamatatken a mikabat ed siak a maong,” so inkuan na 21 años a si Tákis, a naobligan ontaynan ed abung ed loob na 37 a bulan. * Oniay inyarum to: “No maminsan et naliknak a pakaskasi ak.” Say 20 años a si Pétros so kinaukolan ya ontaynan ed ayaman da ed loob na masulok a duay taon. Inaksobi to: “Diad primeron pankanawnawa ed bilay ko, kinaukolan koy mandesisyon lan bukor nipaakar ed panligliwaan tan panlilimog, tan aglawas makabat iray desisyon ko.” Insan oniay inkomento to: “No maminsan et panduaruwaan ko so babaleg a responsabilidad a kakaukolanen na kaaruman a kawayangan.” Oniay inkuan nen Tássos, sakey a Kristianon matatken a maparanay a makapitotongtong ed saray Kristianon tobonbalo a walad ontan iran kipapasen: “Say agmalinis a panagsalita, panagrebeldi, tan maramsak ya ugali na agmananisia iran kaedaran so nayarin mangimpluensya ed agmaalwar tan mainomay a naapektoan iran tobonbalo.”

Diad pambilay tan pankimey ed limog na totoo ya andian na respeto ed saray prinsipyo na Biblia, saratan a Kristianon tobonbalo so nakaukolan a manbantay sumpad tukson mangalig ed imoral tan agmakasulatan iran dalan na saray kaedaran da. (Salmo 1:1; 26:4; 119:9) Say pamasiansia ed maong a rotina na personal a panagaral, iyaatendi ed miting, tan lawak a serbisyo so nayarin mairap. (Filipos 3:16) Nayarin aliwa met a mainomay so pangiletneg tan pankimey parad saray espiritual a kalat.

Maseguron kaliktan na saray matoor a Kristianon tobonbalo so mamaliket ed si Jehova panamegley na kondukta tan panagsalita ra. Matoor dan tatalinengen so makapasagyat ya imbitasyon na mangatatawen ya Ama ra: “Ana’ko, onkabat ka, tan paliketen mo so pusok, pian naebatan ko so mamalaw ed siak.” (Uliran 27:11) Bibidbiren da a say panag-ayos tan ugali ra so walaan na  impluensya ed panmoria na arum ed si Jehova tan ed totoo to.​—1 Pedro 2:12.

Nakomendaan so maslak ed saratan a tobonbalo lapud gagawaen day anggaay nayarian da a magmaliw a singa saray agagi ra nen inmunan siglo ya impikasi nen apostol Pablo: “Mankurang kayo a makana ed Katawan ya onarap ed amin a makapaliket, mamabunga ed ganaganan maabig a gawa . . . nipaakar ed amin ya anos tan andukey a panagtepel a tinekepan na gayaga.” (Colosas 1:9-11) Itatarya na Biblia so pigaran alimbawa na matakot ed Dios iran tobonbalo a matalonan nankurang a makana ed Dios diad utel na nikadkaduma, agmakaaro, tan idolatroson kaliberliber.​—Filipos 2:15.

‘Si Jose so Inulop-ulop nen Jehova’

Diad malangwer ya edad, si Jose, say pinablin ilalak nen Jacob tan Raquel, so niyarawi ed mananalimbeng ya ayaman na matakot ed Dios ya ama to. Sikato so inlako bilang aripen diad Ehipto. Angipatnag si Jose na makapadinayew ya alimbawa bilang makuli, napanmatalkan, tan walaan na moral a kalangweran. Anggaman sikatoy aripen nen Potipar​—sakey a toon agmandadayew ed si Jehova​—si Jose so maalwar tan maseet, kanian diad saginonor et inmatalek ed sikato na katawan to so amin a pamaakaran diad sankaabungan to. (Genesis 39:2-6) Pinansiansia nen Jose so integridad to ed si Jehova, tan sanen nanresulta iya ed inkipangaw to, agto imbaga ya: “Anto so kakanaay panmamatoor ko?” Anggan diad prisoan et impatnag to iray maabig a kalidad to, tan agnambayag et impia ed sikato so dakel a pamaakaran diad loob na prisoan. (Genesis 39:17-22) Sikato so benendisyonan na Dios, tan unong ya inkuan na Genesis 39:23, ‘si Jose so inulop-ulop nen Jehova.’

Agaylan inomay komon ed biang nen Jose, a niyarawi ed matakot ed Dios a pamilya to, so pangitunos ed kondukta to diad saray paganon manaayam ed kaliberliber to tan mangalig ed imoral a kabibilay na saray Ehipsio! Imbes, sikato so nansiansia ed maridios a prinsipyo tan pinansiansia ton malinis so talindeg to anggaman ed sankairapan iran tukso. Sanen sikatoy aminpigan iningganyo na asawa nen Potifar, say determinadon ebat to et: “Panon sirin so pakayarik a manggawa ed saya ya abalbaleg a kabaglan tan kasalanan ya onsumpa ed Dios?”​—Genesis 39:7-9.

Natan, saray tobonbalon Tasi so nakaukolan ya ontalineng ed saray nibase ed Biblia a pasakbay sumpad agmanepeg iran pililimog, imoral a panliliket, pornograpiya, tan mabanday a musika. Moriaen da a “saray mata nen Jehova [so] wala ed balang pasen, a manbabantay ed mauges tan maong.”​—Uliran 15:3.

Inwaklit nen Moises so “Liket na Kasalanan”

Binmaleg si Moises ed idolatroso tan mapaglet ed liket a kaliberliber na maarin ayaman na Faraon. Oniay ibabaga na Biblia nipaakar ed sikato: “Lapu ed pananisia, si Moises . . . agto ginabay a nangaranan na anak na saman a marikit nen Faraon;  a pinili to a nilabi so mantepel ed irap na saman a baley na Dios, nen say minabang ed saray onlabas a liket na kasalanan.”​—Hebreos 11:24, 25.

Say pikakaaro ed mundo so nayarin manresulta ed pigaran bentaha, balet temporaryo labat itan. Diad sankalaknaban a paraan, mansiansia labat itan ed limitadon panaon a nakekeraan parad sayan mundo. (1 Juan 2:15-17) Agta magmaong no tumboken tayo so ehemplo nen Moises? Ibabaga na Biblia a sikato so “nansiansia a singa to nengnengnengen so agnanengneng.” (Hebreos 11:27) Inyapasakey to so kanonotan to ed espiritual ya impatawir na saray matakot ed Dios ya inmuunan atateng to. Ginawa ton gagala ed bilay to so gagala nen Jehova, ya inletneg ton kalat to so panggawa na linawa na Dios.​—Exodo 2:11; Gawa 7:23, 25.

Sano nidudunget iray matakot ed Dios a tobonbalo diad agmaridios tan agmakaaron kaliberliber, nayarian dan paeleten so personal a siglaotan da ed si Jehova panamegley na personal a panagaral, a kabaten dan maong ‘[imay Sakey ya] agnanengneng.’ Say nagnap a programa na saray Makristianon kimey, a mangilaktip ed maparanay ya iyaatendi ed miting tan lawak na serbisyo, so ontulong ed sarayan tobonbalo pian niyapasakey day nonot da ed saray espiritual a bengatla. (Salmo 63:6; 77:12) Nepeg dan panggunaetan a pabiskegen so pananisia tan ilalo ra a singa si Moises. Nepeg dan pambanikelan ya isentro so kanonotan tan kiwas da ed si Jehova, a maliket a magmaliw a kaaro to.

Inusar To so Dila To a Mangidayew ed Dios

Say sakey nin tobonbalo ya apaneknekan a napanuliranan sanen sikatoy niyarawi ed ayaman et say Israelitan manmarmarikit a dinakep na saray taga-Sirya diad panaon nen Eliseo a propeta na Dios. Sikato so nagmaliw ya aripen a bii na asawa nen akating a Naaman, hepe na armada na Sirya. Oniay imbaga na sayan ugaw a bii ed asawa nen Naaman: “No komon ta say katawan ko a laki onarap ed propeta a wala ed Samaria! Sirin onabig ed kating to.” Lapud impantasi to, si Naaman so linma ed si Eliseo diad Israel tan apaabig ed kating to. Niarum ni, si Naaman so nagmaliw a managdayew ed si Jehova.​—2 Arari 5:1-3, 13-19.

Idadanet na alimbawa na sayan ugaw a bii a nakaukolan ya usaren na saray tobonbalo so dila ra diad paraan a makapangigalang ed Dios, anggaman sikara so niyarawi ed atateng da. No niyugali  la na satan ya ugaw a bii so mansalita na “mabanday a panagsalsalita” odino “saray panaglurey,” kasin sikatoy epektibon makapangusar ed dila to a singa ginawa to sanen linmesa so pankanawnawa? (Efeso 5:4; Uliran 15:2) Oniay natandaan nen Níkos, sakey a kalangweran a masulok to lan 20 años, a nipangaw lapud neutral a talindeg to: “Sanen kaibak iray kalangweran ya agagi diad agricultural prison, a niyarawi ed impluensya na atateng tan kongregasyon, naimanok ya inmabeba lay kalidad na panagsalita mi. Seguradon ag-itan angitarok na dayew ed si Jehova.” Makapaliket ta si Níkos tan arum ni so atulongan ya ontulok ed simbawa nen Pablo nipaakar ed saya: “Say lawan, tan say amin a nengneng na karumsisan, odino say agum, agla komon nabitla ed sikayo, unong a manepeg ed saray sasantos.”​—Efeso 5:3.

Tudtua si Jehova ed Sikara

Say eksperiensya na taloran Hebreon kakaiba nen Daniel diad kadaanan a Babilonia so mamaneknek ed katuaan na prinsipyo a sinalambit nen Jesus a say inkamatoor ed angkelag iran bengatla so mangitonton ed inkamatoor ed angkabaleg iran bengatla. (Lucas 16:10) Sanen asubok ira a mangan ed saray tagano ya insebel na Ganggan nen Moises, nikatunongan da komon a sikara so akautibo ed sankailin dalin kanian anggapoy nagawaan da ed satan a bengatla. Balet agaylan panamendisyon so agamoran da lapud inkasimoon da anggan ed saray bengatlan ompatnag ya agtanto importante! Nagmaliw ira a mas mabunigas tan makabat nen saray arum nin akautibo a nantultuloy ya angan ed saray putahe na ari. Say inkamatoor ed sarayan melag a bengatla so maseguron amabiskeg ed sikara, kanian sanen nipaarap ira ed babaleg a subok ya ondakmomo ed talintao, ag-ira akikompromiso.​—Daniel 1:3-21; 3:1-30.

Tudtua si Jehova ed sarayan taloran kalangweran a lalaki. Anggaman niyarawi ira ed ayaman da tan ed sentro na panagdayew ed Dios, sikara so determinadon nansiansian andi-matik ed mundo. (2 Pedro 3:14) Mabmabli ed sikara so relasyon da ed si Jehova kanian mabulos ira ya angisakripisyo ed bilay da parad satan.

Agkayo Paulyanan nen Jehova

Sano niyarawi iray tobonbalo ed saray aaroen tan panmamatalekan da, maseguron nalikna ra so ag-inkaligen, agpakaseguro, tan panduaruwa. Balet, nayarian dan arapen iray subok tekep na nagnap a kompiyansa a “si Jehova so agmangikaindan” ed sikara. (Salmo 94:14, NW) No saratan a  tobonbalo et “manirap nisesengeg ed inkatunong,” si Jehova so akaparaan ya ontulong pian makapansiansia iran mankurang ed “dalan na inkatunong.”​—1 Pedro 3:14, NW; Uliran 8:20.

Si Jehova so lawas amabiskeg tan daakan ya amendisyon ed si Jose, Moises, say manmarmarikit ya Israelitan aripen, tan say taloran matoor a Hebreon tobonbalo. Natan et uusaren to so masanton espiritu to, say Salita to, tan say organisasyon to pian pabiskegen iramay ‘mibabakal ed maabig a pibabakal na pananisia.’ (1 Timoteo 6:11, 12) On, posibli so pankurang a makana ed si Jehova, tan makabat itan a bengatla a gawaen.​—Uliran 23:15, 19.

[Saray paimano ed leksab]

[Kahon sa pahina 25]

ATATENG​—IPARAAN YO IRAY ANANAK YO!

“Singa saray panapana ed lima na sakey a mabiskeg a too, ontan so saray anak na kalangweran.” (Salmo 127:4) Aliwan nibanbana labat so isabi na pana ed puntirya to. Satan so sidudunong ya ipatuyong. Ontan met, saray ananak so agniparaan a mangarap ed saray peteg a nagawa ed bilay sano niyarawi ira ed abung ya anggapoy manepeg a panangigiya na atateng.​—Uliran 22:6.

Saray kalangweran so walaan na tendensian magmaliw a bengatbengat odino mainomay ya onsuko ed “saray pilalek a nisipor ed inkatobonbalo.” (2 Timoteo 2:22, NW) Ipapasakbay na Biblia: “Say panaklay tan panamaat mangiter na kakabatan; balet say ugaw a napaulyan makapabaing ed ina to.” (Uliran 29:15) No agkontrolen so walna na tobonbalo, agniparaan so sakey ya ugaw ed saray kakaukolanen tan pakadesdesan ed bilay to sano niyarawi ed ayaman.

Diad malinew tan responsablin paraan, nepeg ya idatak na saray Kristianon atateng ed ananak da iray kairapan, desdes, tan saray peteg a nagawa ed bilay diad sayan sistema na bengabengatla. Diad agpagmaliw a negatibo odino makapadismaya, nayarian dan deskribien iray agmarakep a kipapasen a nayarin kidungetan na sakey a tobonbalo sano kinaukolan to so onarawi ed ayaman. Sayan panangipasal, ya atekepan na inter-Dios a kakabatan, so “mangiter na binta ed karaklan, ed tobonbalo pikakabat tan kalakal.”​—Uliran 1:4.

Saray atateng a mangipupurek na maridios iran ugali tan moral iran prinsipyo ed kapusoan na ananak da so makatulong ed sikaran ontalona ed saray angat ed bilay. Baleg so nagawaan na regular a panagaral na Biblia bilang pamilya, lukas a pitatalosan, tan peteg ya interes ed pankaabigan na saray ilalak da pian niwala so maaligwas a resulta. Saray atateng so mangitarya na maridios a panagpasal diad asimbang ingen ta positibo tan makatunongan a paraan, ya iparaan iray ananak dan ontalindeg a bukor ed bilay da diad saginonor. Diad panamegley na ehemplo na atateng a mismo, nibangat da iray ananak da a nayari so manayam ed mundo balet ta agkabiangan na satan.​—Juan 17:15, 16.

[Litrato ed pahina 23]

Kinaukolan ya ontaynan so arum a Kristianon tobonbalo diad abung da

[Saray litrato ed pahina 24]

Diad panresisti ed tukso, sarag na saray tobonbalo ya aligen si Jose tan mansiansian malinis ed moral

[Saray litrato ed pahina 26]

Aligen so manmarmarikit ya Israelitan aripen ya angusar ed dila to pian igloria si Jehova