Tepetepet Manlapud Saray Managbasa

Siopa so tutukoyen nen Jehova a “sakey ed sikatayo” diad Genesis 3:22?

Mapatnag a si Jehova so manutukoy ed inkasikato tan say bogbogtong ya Anak to sanen inkuan ton: “Say totoo agawa a singa sakey ed sikatayo a mikabat na maong tan mauges.” (Genesis 3:22) Konsideraen tayo no akin.

Imbaga nen Jehova irayan salita kayari ton senentensiaan so inmunan sanasawan too. Ipapasen na arum a sayan balikas a “sakey ed sikatayo” et plural na katageyan, no panon a nayarin ibaga na sakey a toon ari ya “ag-itayo apaliket” anta say tutukoyen to lambengat et say inkasikato. Balet, oniay inkuan na iskolar na Biblia a si Donald E. Gowan nipaakar ed Genesis 1:26 tan 3:22: “Anggapo so paneknek diad D[aan] a S[ipan] parad maslak a niproponin eksplinasyon: say ‘sikatayo’ a mankabaliksan na katageyan . . . odino say panangipatnag ed masulok a sakey a persona diad inka-Dios. . . . Anggapo ed sarayan eksplinasyon so ontukoy ed 3:22, ya anaglawi ed ‘sakey ed sikatayo.’”

Kasin nayarin tutukoyen nen Jehova si Satanas a Diablo, a ginapoan ton denesidi a bukor so “maong tan mauges” tan angimpluensya ed inmunan totoo a mangalig ed sikato? Ag-itan makatunongan. Dia et inusar nen Jehova so balikas a “sakey ed sikatayo.” Si Satanas so anggapo la ed muyongan na saray matoor ya anghel nen Jehova, kanian sikatoy agla kabiangan ed saramay wala ed dapag nen Jehova.

Kasin say tutukoyen na Dios et saray matoor ya anghel? Agtayo naseguro. Balet, say pampadpara na saray balikas diad Genesis 1:26 tan 3:22 so mangiiter ed sikatayo na panandaan. Diad Genesis 1:26, nabasa tayo ya inkuan nen Jehova: “Manggawa itayo na too a kaulibay na inalageyan tayo, a singa say impanuulibayan tayo.” Siopay pangibabagaan to ed sarayan salita? Oniay inkuan nen Pablo sanen tinukoy to so espiritun pinalsa a nagmaliw ya ayadyarin too a Jesus: “Sikato so talintaoy Dios ya agnanengneng, say panguloan ed amin a pinalsa; ta dia ed sikato apalesa so amin a bengatla, dia ed katawenan tan tapew na dalin.” (Colosas 1:15, 16) On, ompatnag a makatunongan a diad Genesis 1:26 et mitotongtong si Jehova ed bogbogtong ya Anak to, say “uloen a komikimey,” a kaabay to legan a papalsaen so katawenan tan say dalin. (Uliran 8:22-31) Isusuheri na pipadpara na balikas diad Genesis 3:22 a si Jehova so akitongtong lamet ed say sankaapitan ed sikato, say bogbogtong ya Anak to.

Mapatnag a say bogbogtong ya Anak na Dios so walaan na pikakabat ed “maong tan mauges.” Lapud abayag tan maapit a piuulop to ed si Jehova, segurado a naaralan ton maong so kanonotan, saray prinsipyo, tan saray estandarte nen Ama to. Lapud kombinsido a say Anak to so mikabat tan matoor ed saratan, si Jehova so angipagamor ed sikato na kawayangan a mangasikaso ed saray pamaakaran ya anggan agla direktan ontupleg ed Sikato diad kada pankanawnawa. Kanian diad sayan punto et say Anak so makayari tan autorisadon mandetermina ed maong tan mauges. Balet, aliwan singa si Satanas, Adan, tan Eva, ag-angiletneg si Jesus na estandarte a sumlang ed estandarte nen Jehova.