Makana so Panagmatalek Parad Maliket a Bilay

SAY pakasamalan ed panangan so makapadismayan tuloy. Say too ya aminpiga lan akasali ed satan so kaukolan a mas maalwar la ed panangan to. Balet say aglan balot pangan pian napaliisan so posiblin pakasamalan et aliwan realistiko. Pansengegan laingen itan na problema imbes a makaresolbi. Anggapo so makapambilay ya andukey no anggapo so tagano.

Mipadpara, ansakit so naloko na sakey. Say maminpigan pakaloko so nayarin mamakiwas ed sikatayo a mannonot a maong no sioparay pilien tayon pilimogan. Ingen, say sigpot ya iyarawi ed totoo pian napaliisan so posiblin pakaloko et aliwan solusyon. Akin? Lapud ag-itayo manliket a mismo no sikatayoy andian na panagmatalek ed arum. Pian magmaliw a makapenek so bilay, nakaukolan tayo iray relasyon a walaay panagmatalek ed sakey tan sakey.

“Say panagmatalek et sakey ed saray manunan nakaukolan pian mainomay a makapideneng ed arum diad inagew-agew,” so inkuan na libron Jugend 2002. “Pampipirawatan na balang sakey so panagmatalek,” so inreport na peryodikon Neue Zürcher Zeitung. “Say panagmatalek so mamaaligwas ed kalidad na bilay” unong a satan “so makana parad pakapambilay.” On, inkuan ni na peryodiko a no anggapo so panagmatalek, “say too so agmakapansungdo ed bilay.”

Lapud manunan nakaukolan tayo so panmatalek ed arum, siopa so napanmatalkan tayo ya agtayon balot pakadismayaan?

Manmatalek Kayo ed si Jehova ed Interon Puso

“Manmatale’ka ed Jehova ed simoon a pusom,” so ibabaga ed sikatayo na Biblia. (Uliran 3:5) On, naynay ya ipapaseseg na Salitay Dios a manmatalek itayo ed Manamalsa tayo, si Jehova a Dios.

Akin a makapanmatalek itayo ed Dios? Unona, lapud si Jehova a Dios et masanto. Oniay insulat nen propeta Isaias: “Santo, santo, santo, si Jehova.” (Isaias 6:3) Kasin agmakapasagyat ed sikayo so ideyan inkasanto? Diad tua et nepeg a managyat itan ed sikayo lapud say inkasanto nen Jehova et kabaliksan ton sikatoy matua, andian na gawan-mauges, tan sigpot a napanmatalkan. Agton balot nayarian so magmaliw a manamalikdo odino maabuso, tan imposiblin lokoen to itayo.

Niarum ni, makapanmatalek itayo ed Dios lapud sikatoy walaan na pakayari  tan pilalek ya ontulong ed saramay manlilingkor ed sikato. Alimbawa, nayarian to so onkiwas lapud supremon pakapanyari to. Say nagnap ya inkahustisya tan kakabatan to so mangigigiya ed paraan na ikiwas to. Tan say agnaparaan ya aro to so mamapakiwas ed sikato. “Say Dios sikato so aro,” so insulat nen apostol Juan. (1 Juan 4:8) Say aro na Dios so mangiimpluensya ed amin a gagawaen to. Say inkasanto nen Jehova tan arum niran matalonggaring a kalidad to so manggagawa ed sikaton sankamaongan ya Ama, say sakey a sigpot tayon napanmatalkan. Anggapo lay arum a mas napanmatalkan nen say si Jehova.

Manmatalek ed si Jehova Pian Manliket

Say sananey nin malet a basiyan na panmatalek ed si Jehova et lapud mas natalosan to itayo nen say siopaman ni. Amta to a manunan nakaukolan na kada too so maligen, magnayon, tan napanmatalkan a pisisiglaotan ed Manamalsa. Mas maligen iraman so walaan na ontan a pisisiglaotan. “Mapalar so too a mangako ed Jehova a katalkan to,” so inkuan nen Arin David. (Salmo 40:4) Minilyon natan so interon-puso a mangipapatnag ed kanonotan nen David.

Konsideraen so pigaran alimbawa. Si Doris so akapan-ayam diad Dominican Republic, Alemanya, Gresya, tan Estados Unidos. Oniay inkuanto: “Siak so malikeliket a manmamatalek ed si Jehova. Amta to no panon to ak ya asikasoen ed pisikal, espiritual, tan emosyonal a paraan. Sikato so sankaabigan a nayarin pikaaroan na sakey a too.” Oniay insalaysay nen Wolfgang, a legal a managkonseho: “Alay abig so panmatalek ed sakey a mapaga ed pankaabigan mo, ed sakey a nagawaan to​—tan talagan gawaen to​—so sankaabigan parad sika!” Oniay inkuan nen Ham, a nianak ed Asia balet manaayam natan diad Europa: “Matalek ak a walaan si Jehova na kontrol ed amin a pamaakaran, tan sikato so agnalingo, kanian siak so maliket a manmamatalek ed sikato.”

Siempre, aliwan say Manamalsa tayo lambengat so kaukolan a panmatalekan na balang sakey ed sikatayo, noagta saray totoo met. Kanian, si Jehova, bilang makabat tan eksperiensyadon kaaro, so manisimbawa ed sikatayo no anton klase na totoo so nepeg a panmatalkan tayo. Diad maseet a pambasa tayo ed Biblia, naimano tayo so simbawa to ed sayan pamaakaran.

Saray Totoo a Napanmatalkan Tayo

“Agkayo manmamatalek ed saray dederlengen, nisay dia ed anak na mangaraldalin a too, ya anggapo ed sikato so kilalaban,” so insulat na salmista. (Salmo 146:3, NW) Sayan impuyan a balikas et ontulong ed sikatayon mamidbir a dakel so totoon agmakanepegan na kompiyansa tayo. Anggan saramay rerespetoen a maong bilang “dederlengen” ed sayan mundo, a singa saray eksperto ed partikular iran lawak na pikakabat odino aktibidad, so ag-automatikon makanepegan na panagmatalek tayo. Mabetbet a lingo so panangiwanwan da, tan say panagmatalek ed saratan a “dederlengen” so manresulta a tampol ed pakadismaya.

Siempre, aliwa iyan rason pian agtayo la panmatalekan so amin. Anggaman ontan, mapatnag a kaukolan tayoy magmaliw a mapili ed saray totoo a panmatalkan tayo. Anto so estandarte a nepeg tayon tumboken? Makatulong ed sikatayo so  alimbawa ed kadaanan a nasyon na Israel. Sanen kinaukolan so manuro na saray indibidual a manakbat na ambelat a responsabilidad diad Israel, si Moises so binilin a ‘mamili ed saray katooan na lalaki a walaan na pakayari, saray lalaki a tatakotan da so Dios, lalaki na katuaan, a gugulaen da so kaaguman.’ (Exodo 18:21) Anto so naaralan tayo ed saya?

Sarayan lalaki so angipatnag la na saray maridios a kalidad sakbay iran naturo ed saray posisyon a napanmatalkan. Pinaneknekan da la a matakot ira ed Dios; sikaray walaan na mabunigas a panamagalang ed Manamalsa tan takot a sikatoy agnapaliket. Kabat la na balang sakey a ginawa la na sarayan lalaki so anggaay nayarian da pian iyalibansa iray estandarte na Dios. Ginula ra so inkaagum, a pakapatnagan na inkabiskeg ed moral a mangamper ed sikaran magmaliw a mauges lapud pakayari. Agda abusoen so panagmatalek pian paaligwasen da iray dilin pankaabigan da odino na kakanayon odino kakaaro ra.

Agta makabat met no tumboken tayo so parehon estandarte natan sano mamipili na saramay panmatalkan tayo? Kasin kabat tayo iramay indibidual a napatnagan ed walna ra a tatakotan da so Dios? Kasin determinado ira a manumbok ed saray estandarte to nipaakar ed kondukta? Kasin walaan ira na integridad ya ag-ira manggawa na saray makapuy a bengatla? Kasin matua ira, ya agda imaneobra so kipapasen parad pakagunggonaan dan dili odino ta pian nagamoran so kaliktan da? Seguradon saray lalaki tan bibii a walaan na saray ontan a kalidad so manepeg a panmatalekan tayo.

Ag-onsusuko ed Sagpaminsan a Pakadismaya

Diad pamipili no siopa so napanmatalkan tayo, nepeg itayon man-anos, lapud say panagmatalek so niwala kayari na sakey a peryodo na panaon. Say makabat a kurang et say kalkalnan pangipatnag na panagmatalek tayo ed sakey a too. Panon? Bueno, nayarin obserbaan tayo so kondukta to diad sakey a peryodo na panaon, ya imanoen no panon so ikikiwas to ed pigaran kipapasen. Kasin sikato so napanmatalkan ed angkelag iran pamaakaran? Singa bilang, kasin ipapawil to iray binayes to unong ed insipan to tan onsasabi ed suston oras unong ed impipaknaan to? No ontan, makaseguro itayo sirin a sikatoy napanmatalkan tayo diad mas seryoso iran pamaakaran. Mitunosan iya ed prinsipyon: “Say matoor ed dagdaiset, matoor met ed dakel.” (Lucas 16:10) Say pagmaliw a mapili tan maanos so makatulong ed sikatayo pian napaliisan so pirmin pakadismaya.

Balet, panon to no sikatayoy dinismaya na sakey a too? Nonoten na saray manaaral na Biblia a diad samay labi na impangerel ed si Jesu-Kristo, sikato so pirmin dinismaya na saray apostol to. Si Judas Iscariote so angitapat ed sikato, tan binmatik so arum lapud takot. Si Pedro so amitlo ni ingen ya angiburi ed si Jesus. Balet atebek nen Jesus a si Judas lambengat so sigagagalan kinmiwas. Say impakadismaya nen Jesus ed satan ya importantin bekta so ag-angamper ed sikato a pekderan so panagmatalek to ed saray akeran 11 ya apostol kayarin tuloy na pigaran simba. (Mateo 26:45-47, 56, 69-75; 28:16-20) Ontan met, no liknaen tayon dineral na sakey so panagmatalek tayo, nepeg a nonoten tayon maong no kasin say ipapasen a panagderal et pakapatnagan na agnapanmatalkan ya awawey odino sakey a temporaryon kakapuyan na laman.

Kasin Siak so Napanmatalkan?

Nepeg a say sakey a toon mapili ed saray panmatalekan to so magmaliw a makatunongan tan tepetan toy inkasikato: ‘Kasin siak so napanmatalkan? Antoran makatunongan ya estandarte na inkanapanmatalkan so nepeg ya ilaloan ko ed inkasiak tan ed arum?’

Seguradon say too a napanmatalkan so lawas mansasalita na katuaan. (Efeso 4:25) Agto itutukoy-tukoy iray salita to ed saray katongtong to parad personal a pakagunggonaan to. Tan no sikatoy misipanan, gawaen na napanmatalkan a too so amin a nayarian to pian tooren so imbaga to. (Mateo 5:37) No walay angibaga ed sikato na kompidensyal a bengatla, say napanmatalkan a too so mamasiansia ed satan a maamot tan agto itongtong ed arum. Say napanmatalkan a too so matoor ed asawa to. Sikatoy ag-onnenengneng ed pornograpiya, agto iteteen so nonot to ed minumundo iran pantasya, tan agmikakarinyoan. (Mateo 5:27, 28) Say sakey a makanepegan na panagmatalek tayo so makulin manaanap na pambilay to tan say pamilya to tan agto panggunaetan so mainomay a pakatubo diad panganamot ed arum  a totoo. (1 Timoteo 5:8) Say pannodnonot ed saratan a makatunongan tan Makasulatan ya estandarte so ontulong ed sikatayon nabidbir iray totoon napanmatalkan tayo. Niarum ni, say panumbok ed pareho iran estandarte ed walna so manggawa ed sikatayon makanepegan parad panagmatalek na arum.

Makapaliket so pambilay ed sakey a mundo ya amin a totoo et napanmatalkan tan naandi met la iray pakadismayaan lapud kadederal na panagmatalek! Kasin kugip labat itan? Andi parad saray totoon manmamatalek ed saray sipan na Biblia, lapud impasakbay na Salitay Dios so isabi na marakep a ‘balon dalin’ ya anggapo lay panamalikdo, tilatila, tan panag-anamot tan anggapo met la so ermen, sakit, pati say ipapatey! (2 Pedro 3:13; Salmo 37:11, 29; Apocalipsis 21:3-5) Agta makabkabaliksan so pakaaral nin nagkalalo nipaakar ed sayan ilalo? Saray Tasi nen Jehova so maliket a mangitarya ed sika na dakel nin impormasyon nipaakar ed saya tan arum niran makanan tema.

[Litrato ed pahina 4]

Ag-itayo maliket no sikatayoy andian na panagmatalek

[Litrato ed pahina 5]

Si Jehova so manunan makanepegan na panagmatalek tayo

[Saray litrato ed pahina 7]

Amin tayo so mankaukolan na saray relasyon a walaay panagmatalek ed sakey tan sakey