‘Manliga Kayo ed si Jehova’

“Manliga ka a dili met ed Jehova: et iter to ed sika so saray pirawat na pusom.”​—SALMO 37:4.

1, 2. Siopa so Lapuan na tuan liket, tan panon itan ya impaimano nen Arin David?

 “MAPALAR iray duruka ed espiritu . . . mapalar iray mapangasi . . . mapalar iray managpareen.” Kalaktip so anemira nin panangideskribe ed saramay mapalar o maliket, tugyopen na saratan a balikas so alay abig ya impangigapo nen Jesus ed bantog a Sermon to ed Palandey, unong ya inkurit na managsulat na Ebanghelyo a si Mateo. (Mateo 5:3-11) Ipapaseguro na saray salita nen Jesus a posible ed sikatayo so makapanliket.

² Nipaimano ed sakey a salmo ya insulat nen Arin David ed Israel nensaman so Lapuan na tuan liket, si Jehova. “Manliga ka a dili met ed Jehova,” so inkuan nen David, “et iter to ed sika so saray pirawat na pusom.” (Salmo 37:4) Balet panon a magmaliw a “manliga” odino makapaliket so pakapikabat ed si Jehova tan ed dakel ya aspekto na personalidad to? Panon a say pangonsidera ed agawaan to la tan ed gawaen to ni pian nasumpal so gagala to et mangiyopresi ed sikayo na ilalo a makagamor ed ‘saray pirawat na puso yo’? Say maalwar a pangikonsidera ed Salmo 37, bersikulo 1 anggad 11, so mangiter na saray ebat.

‘Agkayo Oniibeg’

3, 4. Unong a nikurit ed Salmo 37:1, anto so imbilin nen David, tan akin a matukoy natan so italineng ed satan?

³ Manbibilay itayo ed “saray panaon a maatap” a mairap a pidenengan, tan onkakasmak so karelmengan. Naiimatonan tayo so kasumpalan na saray salita nen apostol Pablo: “Saray totoo a mauges tan saray managsaol onuges laran onuges, a managsaol ira, tan nasaol ira met a dili.” (2 Timoteo 3:1, 13) Agaylan inomay so pakaapektoan ed ompatnag ya aligwas tan iyaasenso na marelmeng a totoo! Amin na saratan so mangisuawi ed sikatayo, a mamuragas ed espiritual a panmoria tayo. Imanoen tayo so panamasakbay na saray manangigapon salita na Salmo 37 nipaakar ed sayan posiblin kapeligroan: “Agmo gonigonen so inkasika nisengeg ed saray managgawa na mauges, nisay makasisiblet [“makakaibeg,” NW] ka ed saray managgaway kasulitan.”

⁴ Inagew-agew ya ipaparungtal na media ed mundo so dakerakel ya agamil na ag-inkahustisya. Saray masaol a negosyante so agnadudusa ed panagsaol da. Aanamoten na saray kriminal iray agmakadepensa. Agnabibidbir no siopa iray managpatey nisay nadudusa ira. Amin na saratan ya alimbawa na panamikewet ed inkahustisya so nayarin mamasanok tan mangonigon ed kareenan na nonot tayo. Nayarin nasagyat tayo ni ingen a panibegan so ompatnag ya aligwas na saray managgaway-mauges. Balet kasin ondakep so kipapasen no maningongot itayo? Kasin nauman so epekto na saratan no panibegan tayo so ompatnag iran bentaha na saray marelmeng? Andin balot! Tan talagan agnakaukolan a ‘nagonigon’ itayo. Akin ya andi?

5. Akin a niyaliling ed dika iray managgaway-mauges?

⁵ Oniay ebat na salmista: “Ta sikara nasipsip ira a magano a singa dika, tan namagaan a singa malangbot a balansi.” (Salmo 37:2) Say berdi tan balon-tubo a dika so ompatnag a marakep, balet say bulobulong na saratan so maganon nalenes tan ompatey. Ontan met iray managgaway-mauges. Say ompatnag ya iyaasenso ra so aliwan permanente. Sano ompatey ira, agmakatulong ed sikara iray kayamanan da ya atipon da ed mauges a paraan. Diad kaunoran et awaten na amin so ipaakseb na hustisya. Oniay insulat nen Pablo: “Say bayar na kasalanan say patey.” (Roma 6:23) Diad kaunoran et say awaten labat na saray managgaway-mauges tan amin ya agmatunong et say “bayar” ed sikara. Talagan andiay-kakanaan so ontan a dalan na panagbilay!​—Salmo 37:35, 36; 49:16, 17.

6. Anton leksion so nagamoran tayo ed Salmo 37:1, 2?

⁶ Nepeg kasin pagonigon itayo ed temporaryon iyaasenso na saray managgaway-mauges ya adampot da ed mauges a paraan? Saya so leksion ed primeron duaran bersikulo na Salmo 37: Agyo aabuloyan so aligwas da a mangikasipa ed sikayo manlapud panlilingkor yo ed si Jehova. Imbes, pantultuloyen yon akateen so imano yo ed saray espiritual a bendisyon tan kalat.​—Uliran 23:17.

‘Manmatalek ed si Jehova Tan Manggawa na Maong’

7. Akin a nepeg itayon manmatalek ed si Jehova?

⁷ Oniay impaseseg ed sikatayo na salmista: “Manmatalek ka ed Jehova tan manggawa ka na maong.” (Salmo 37:3a) Sano nagogonigon itayo ed saray kapagaan odino anggan saray panduaruwa, say kompiyansa tayo so nakaukolan a malet a niyapasakey ed si Jehova. Sikato so mangiyoopresi na sigpot a kaligenan ed espiritual. Onia so insulat nen Moises: “Say manayam ed maamot a pasen na Sankatageyan, mansiansia ed silong na sirum na Makapanyarin-amin.” (Salmo 91:1) Sano nagogonigon itayo ed idaraak na kaugsan ed sayan sistema na bengabengatla, nagkalalon nakaukolan tayo so manmatalek ed si Jehova. No alinggi itayo, maliket itayo ed pananulong na sakey a kaaro. Ontan met, sano panggugunaetan tayo so mankurang a matoor, nakaukolan tayo so tulong nen Jehova.​—Isaias 50:10.

8. Panon a makatulong ed sikatayo so pibibiang ed Makristianon ministeryo pian napaliisan so alablabas a pakagonigon ed iyaasenso na saray marelmeng?

⁸ Sakey a solusyon ed pakakagonigon tayo ed iyaasenso na marelmeng et say pagmaliw ya okupado ed panag-anap tan pananulong ed saray kinmarneron totoo a nawalaan na suston pikakabat ed gagala nen Jehova. Anggaman ed idaraak na karelmengan, nakaukolan a magmaliw itayon sigpot ya okupado ed pananulong ed arum. Inkuan nen apostol Pablo: “Agyo lingwanan so panaggawa na maabig tan say pannanabang: ta say Dios napaliket a maong ed sarayan bagat.” Say ‘sankaabigan’ a nagawaan tayo et say panginabang ed arum na maglorian maong a balita nipaakar ed Panarian na Dios. Say mapublikon panagpulong tayo et petepeteg a “bagat a panangidayew.”​—Hebreos 13:15, 16; Galacia 6:10.

9. Ipaliwawa so bilin nen David a “manayam ka dia ed dalin.”

⁹ Intuloy nen David: “Manayam ka dia ed dalin, tan tuatua a natagano ka [“mideneng ka tekep na inkamatoor,” NW].” (Salmo 37:3b) Say “dalin” ed panaon nen David et say teritorya ya inter nen Jehova ed Israel, say Insipan a Dalin. Legan na uley nen Solomon et onnatnat iray ketegan na satan manlapud Dan ed amianen anggad Beer-sheba ed abalaten. Ditan so nanayaman na Israel. (1 Arari 4:25) Natan, inerman so panaayaman tayo ed dalin, iilaloan tayo  so panaon sano say interon planeta et magmaliw lan paraiso diad balon mundo na inkatunong. Kaleganan ni, manbibilay itayo ed sakey a kipapasen a walay espiritual a kaligenan.​—Isaias 65:13, 14.

10. Anto so resulta sano ‘mideneng itayo tekep na inkamatoor’?

¹⁰ Anto so resulta sano sikatayo so ‘mideneng tekep na inkamatoor’? Papanonotan itayo na apuyanan ya uliran: “Say matoor a too naragasan [o makagamor] ed saray bendisyon.” (Uliran 28:20) Say matoor a pantultuloy tayo a pangipulong na maong a balita ed siopaman, tan inerman so panaayaman tayo, so maseguron pakagamoran tayo na saray bendisyon nen Jehova. Alimbawa, nampayunir si Frank tan say akulaw to, si Rose, diad sakey a baley ed amianen ya Scotland 40 taon lay apalabas. Say pigaran taga-diman ya angipatnag na interes ed katuaan so kinmasipa. Agtinmayer iyan sanasawan payunir kanian ginmapo ira ed panagpulong tan panaggaway-babangatan. Natan et wala la so onaaligwas a kongregasyon ed saman a baley. Say inkamatoor na sayan sanasawa so peteg a benendisyonan nen Jehova. Oniay mapaabeban insalaysay nen Frank: “Say sankabalegan a bendisyon et wala kami ni ed katuaan tan say panguusar nen Jehova ed sikami.” On, sano sikatayo so ‘mideneng tekep na inkamatoor,’ nagamoran tan naapresya tayo so dakel iran bendisyon.

‘Manliga Kayo ed si Jehova’

11, 12. (a) Panon itayon ‘makapanliga ed si Jehova’? (b) Anton kalat so niletneg yo nipaakar ed personal a panagaral, tan tekep na anton posiblin resulta?

¹¹ Pian napaelet so relasyon tayo ed si Jehova tan napansiansia so panagmatalek tayo ed sikato, nepeg a ‘manliga itayo ed si Jehova.’ (Salmo 37:4a) Panon tayon nagawaan itan? Imbes a pinonot so mismon kipapasen tayo, mairap man itan, iyapasakey tayo so imano tayo ed si Jehova. Sakey lan paraan pian nagawaan itan et say pangipanaon ed panagbasa ed Salita to. (Salmo 1:1, 2) Kasin panliliketan yo so panagbasa na Biblia? Panliketan yo itan sano manbasa kayo tekep na kalat a lalon makaaral nipaakar ed si Jehova. Akin ta no manumameng kayon magano kayari yon basaen so sakey a parte tan tepetan yoy inkasikayo, ‘Anto so ibabangat ed siak na sarayan teksto nipaakar ed si Jehova?’ Nayarin makatulong ed sikayo so pakawalaan na kuaderno odino pansulatan sano manbabasa kayo na Biblia. Diad kada itunda yon manmolimoli ed kabaliksan na binasa yo, isulat iray balikas a mangipanonot ed sikayo ed sakey ed saray makapadinayew a kalidad na Dios. Diad sakey nin salmo, oniay inkanta nen David: “Abuloyan mo so saray salitak, tan say dalepdep na pusok naako ra ed pakanengneng mo, O Jehova, Dampay ko, tan Mananondon ko.” (Salmo 19:14) Say pangiyapasakey tayo na imano tayo ed Salitay Dios so ‘makapaliket’ ed si Jehova tan makapaliket met ed sikatayo.

¹² Panon tayon nagamoran so liket ed panagaral tan panagdalepdep tayo? Nayarian tayon gawaen a kalat so panaral a nagkalalo nipaakar ed si Jehova tan saray dalan to. Saray publikasyon a singa say The Greatest Man Who Ever Lived tan say Onapit ed si Jehova * so mangitarya ed sikatayo na daakan ya impormasyon a namolimoli tayo tekep na apresasyon. Bilang resulta, ‘iter [nen Jehova] ed sikayo so saray pirawat na puso yo,’ unong ya impaseguro nen David ed saray matunong. (Salmo 37:4b) Sayan nengneng na panagmatalek so peteg ya amakiwas ed si apostol Juan a mangisulat ed sarayan salita: “Saya so katalkan tayo ed sikato, a no mankerew itayo na bengatla unong ed linawa to, sikato dengelen to itayo: Tan no amta tayo a sikato dengelen to itayo ed bengatla a  kerew tayo ed sikato, amta tayo a wala ra so saray kerew a kinaliktan tayo ed sikato.”​—1 Juan 5:14, 15.

13. Diad apalabas iran taon, anton ilalaknab na kimey na panangipulong ed Panarian so naimano ed dakel a daldalin?

¹³ Bilang manamemben na katooran, say pirmin panliketan tayo et say pakanengneng ed kiyalangon na inkasoberano nen Jehova. (Uliran 27:11) Agta manleppua so gayaga ed kapusoan tayo sano naamtaan tayo a malaklaknab a panagpulong so agawaan na saray agagi tayo diad daldalin a datin diktador so pananguley? Pirawrawat tayon nanengneng no anto so nayarin pawalaen ni na kaaruman a kawayangan sakbay na anggaan na sayan sistema. Dakel a lingkor nen Jehova a manaayam ed saray bansa ed sagur so pirmin mibibiang ed panagpulong ed saray estudyante, refugee, tan arum niran temporaryon manaayam ed saratan a bansa tan panggagayagaan da so kawayangan ed panagdayew. Pilalek tayo a diad ipawil na saratan ya indibidual ed mismon bansa ra, mantultuloy ira a mangisindag ed liwawa na katuaan anggano diad saray bansa a sebel so panagpulong.​—Mateo 5:14-16.

‘Ipiam ed si Jehova so Dalan Mo’

14. Anto so walan ebidensya a makapanmatalek itayo ed si Jehova?

¹⁴ Agaylan makaparepreskon naamtaan a naandi iray pakakaaburidoan tayo tan ontan met ed nayarin mamapabelat ed sikatayon maong! Panon? “Ipiam ed Jehova so dalan mo; manmatalek ka met ed sikato: et sikato igawa to.” (Salmo 37:5) Diad loob na saray kongregasyon tayo et wala so daakan ya ebidensya a napanmatalekan tayo so pananulong nen Jehova. (Salmo 55:22) Napaneknekan na saramay walad sigpot-panaon a ministeryo, balanglan payunir, managbiahen manangasikaso, misionaryo, odino boluntaryo a manlilingkor ed Bethel, so inkanapanmatalkan na panangasikaso nen Jehova. Akin ta no katongtongen yo iray kabat yon walad sigpot-panaon tan tepeten no panon so impanulong nen Jehova ed sikara? Maseguron makarengel kayo na dakel ya eksperiensya a mangipabitar ed pananulong nen Jehova, anggan diad mairap iran panaon. Sikato so lawas mangitatarya na saray nakaukolan ed bilay.​—Salmo 37:25; Mateo 6:25-34.

15. Panon ya onsisinag so inkatunong na totoo na Dios?

¹⁵ Sano pankompiyansaan tan panmatalekan tayon maong si Jehova, naeksperiensya tayo iray kaaruman a salita na salmista: “Sikato papawayen to so inkatunong mo a singa say liwawa, tan say kaalasan mo a singa pegley-agew.” (Salmo 37:6) Bilang Tasi nen Jehova, sikatayo so mabetbet a papaugesen. Balet lulukasan nen Jehova iray  kamataan na saray matuan-impanpuson totoo pian namoria ra a say mapublikon ministeryo tayo et makasengeg ed aro ed si Jehova tan ed kaparan totoo. Ontan met, naiimano so maptek a kondukta tayo, anggaman papaugesen itayo na dakel a totoo. Sikatayo so tutulongan nen Jehova ed amin a nengneng na isusumpa tan panamasegsegang. Bilang resulta, say inkatunong na totoo na Dios so onsisinag a singa banwa ed pegley-agew.​—1 Pedro 2:12.

‘Manpainawa . . . Manalagar a Siaanos’

16, 17. Mitunosan ed Salmo 37:7, natan la so panaon parad anto, tan akin?

¹⁶ Oniay tinmumbok iran salita na salmista: “Manpainawa ka ed Jehova, tan sikato so alagden mo a sankaanosan: Agmo gonigonen so inkasika nisengeg ed satan so ombuna ed dalan to, nisengeg ed too ya igawa to so saray bagel a kanonotan to.” (Salmo 37:7) Indanet dia nen David a nakaukolan itayon maanos a manalagar ed ikiwas nen Jehova. Anggaman agni sinmabi so anggaan na sayan sistema, anggapo so sengegan na panreklamo. Agta lalon namomoria tayo natan so kipapatnag na panangasi tan panag-anos nen Jehova? Kasin nipatnag tayo natan so maanos met a panag-alagar legan na pantutultuloy tayon okupado ed panangipulong na maong a balita sakbay ya onsabi so anggaan? (Marcos 13:10) Natan la so panaon a paliisan so bengatbengat ya ikiwas a nayarin mamaandi ed gayaga tan kaligenan tayo ed espiritual. Natan la so panaon a resistian a nagkalalo so makaderal ya impluensya na mundo nen Satanas. Tan natan la so panaon pian pansiansiaen tayo so inkalinis ed moral tan agbalot dederalen so matunong a talindeg tayo ed si Jehova. Mantultuloy tayon iwaklit iray imoral a kanonotan tan paliisan so agmanepeg iran kiwas ed saramay agkapara ed sekso odino, anggan ed saramay kapara ed sekso.​—Colosas 3:5.

¹⁷ “Tundaan mo so petang na ulo, tan ikaindan mo so sanok,” so isisimbawa nen David ed sikatayo. “Agmo gonigonen so inkasika ed antokaman a mananangguyor ed panggawa na mauges. Ta saray managgawa na mauges napater ira; balet saray manalagar ed Jehova tawiren da so dalin.” (Salmo 37:8, 9) On, nayarian tayo so makapankompiyansa ed panaalagar tayo ed satan a panaon​—ya asingsingger la​—sano ekalen la nen Jehova ed dalin so amin a kaugsan tan saramay manggagawa ed satan.

“Wala ni so Daiset”

18, 19. Anton panamaseseg so nagamoran yo ed Salmo 37:10?

¹⁸ “Wala ni so daiset, et say bagel onandi: on, imanom so pasen to, et onandi.” (Salmo 37:10) Agaylan makapabiskeg iratan a salita ed sikatayo legan na panasingger lay anggaan na sayan sistema tan say kapantokan na makadesyang ya isisian ed si Jehova! Makapasinagem a sinmaew so antokaman a klase na gobierno odino autoridad a ginawa na too. Tan asingger tayo la ed panaon a nipawil lay uley na Dios, say tuan teokrasya, say Panarian nen Jehova ya uleyan nen Jesu-Kristo. Satan so sigpot a mangontrol ed saray pakurang na mundo tan mangekal ed amin ya onsusumpa ed Panarian na Dios.​—Daniel 2:44.

¹⁹ Diad balon mundo ya uleyan na Panarian na Dios, agkayo lan balot makaromog na “bagel” anggaman mananap kayo. On, amin a manrebeldi ed si Jehova so tampol a nagalpong. Anggapo diman so mangataki ed inkasoberano to odino agmanpasakop ed pakauley na Dios. Amin a kapara yon totoo et parepareho lan walaay pilalek a mamaliket ed si Jehova. Agaylan kaligenan so itarok na satan​—anggapo laray kandado, anggapo laray balewet, anggapo lay maneral ed sigpot a panagmatalek tan liket!​—Isaias 65:20; Miqueas 4:4; 2 Pedro 3:13.

20, 21. (a) Siopa iray “mauyamo” ed Salmo 37:11, tan iner so pakaromogan da na “inkadaakan na kareenan”? (b) Antoran bendisyon so nagamoran tayo no aligen tayo so Babaleg a David?

²⁰ Insan, “saray mauyamo tawiren da naani  dalin.” (Salmo 37:11a) Balet siopa irayan “mauyamo”? Say salitan nipatalos a “mauyamo” so nanlapud pinagkalamot a salitan mankabaliksay “pairapen, ipaabeba, pabaingan.” On, “saray mauyamo” et saramay mapaabeban manaalagar ed si Jehova a mangipetek ed amin ya ag-inkahustisya a ginawa ed sikara. “Manliket ira a dili ed inkadaakan na kareenan.” (Salmo 37:11b) Anggan natan et makaromog itayo na daakan a kareenan ed espiritual a paraiso a nisiglaot ed tuan Kristianon kongregasyon.

²¹ Anggaman agtayo ni nibulos ed saray kairapan, mantutulongan itayo tan ligliwaen tayo iramay naeermenan. Bilang resulta, say tuan akindalem a liket so niyalibansa ed limog na totoo nen Jehova. Saray agagin aturo bilang managpastol so maaron manseserbi parad espiritual​—tan panapanaon et anggan say pisikal​—a pankaukolan tayo, ya ontutulong ed sikatayon mansungdo ed kairapan nisesengeg ed inkatunong. (1 Tesalonica 2:7, 11; 1 Pedro 5:2, 3) Agaylan mabmabli so pakawalaan na sayan kareenan! Walaan itayo met na ilalon andi-anggaan a bilay diad mareen a Paraison magano lan onsabi. Aligen tayo sirin so Babaleg a David, si Kristo Jesus, a lapud seseg to et sikatoy matoor a nanlingkor ed si Jehova anggad kasampotan. (1 Pedro 2:21) Diad panggawa ed satan, makapantultuloy itayon maliket, a mangidayew ed samay panliliketan tayo, say Dios tayo a si Jehova.

[Saray paimano ed leksab]

Sarag Yo Kasin Ebatan?

• Antoran leksion so naaralan yo ed Salmo 37:1, 2?

• Panon kayon ‘makapanliga ed si Jehova’?

• Anto so walan ebidensya a makapanmatalek itayo ed si Jehova?

[Tepetepet Parad Panagaral]

[Litrato ed pahina 9]

Saray Kristiano so ‘ag-oniibeg ed saramay manggagawa na kasulitan’

 [Litrato ed pahina 10]

‘Manmatalek ed si Jehova tan manggawa na maong’

[Litrato ed pahina 11]

Manliket kayo ed si Jehova diad panaral yon nagkalalo nipaakar ed sikato

[Litrato ed pahina 12]

“Saray mauyamo tawiren da naani dalin”