“Maralato Ra ed Amin a Gawa a Maabig”

“IPANONOT mo ed sikara a pauleyan ira komon ed saray manuley, tan pakauley ya ontulok ira, tan maralato ra ed amin a gawa a maabig.” (Tito 3:1) Anton maabig a gawa so walad kanonotan nen Pablo sanen insulat to iratan a salita ed saray kapananisiaan to? Say iskolar na Biblia a si E. F. Scott so angipabitar ed sakey a nengneng na maabig a gawa, a kuanto: “Saray Kristiano so aglambengat ontulok ed autoridad, noagta nepeg ya akaparaan met ira parad antokaman a gawan maabig. . . . Sano kakaukolanen na kipapasen, saray Kristiano so nepeg a manunaan ed panangipatnag na panagpaga ed komunidad. Anggan mabetbet a niwala so pool, salot, nanduruman kalamidad, basta amin a maong a mibabaley so manpilalek ya ontulong ed kapara ran totoo.”

Saray Kristiano so mibibiang ed pigaran kimey a makagunggona ed publiko daput no ag-iratan misumlangan ed saray ganggan na Dios. (Gawa 5:29) Singa bilang, diad panutumbok da ed panangidirehi na lokal a fire department, say sangan opisina na saray Tasi nen Jehova ed Hapon, diad Ebina, so tinaon a manggagawa na panagpasal no antoray nepeg a gawaen bektaman a wala so pool. Diad saratan ya okasyon, amin a membro na pamilyan Bethel so mandaragup pian ontalineng ed saray instruksion ya iiter na manangilaman na lokal a fire department.

Nilikud ed satan, masulok lan samploy taon a mikokoopera so sangan opisina ed saray lokal ya autoridad diad sakey ya eksibisyon ya oorganisaen pian napaaligwas so kakabatan ed panangamper ed pool. Diad eksibisyon, saray kompanya ed syudad so angipatnag na inka-alerto ran mamatunda tan mangontrol ed pool. Say sanga so mabetbet a makakaawat na panamidbir lapud saray dunong tan pikokoopera na saray staff na satan. Nen 2001, sikaray akala na first prize diad eksibisyon. Akaparaan iran manggawa na maabig a makapangiliktar na bilay bektaman a walay pool.

Sakey a Makanan Serbisyo

Balet, saray Tasi nen Jehova so interesado ed mas importantin nengneng na maabig a kimey, a makapangiliktar met na bilay. Maparanay iran ondadalaw ed saray kakaabay da pian inabang so maong a balita na Panarian na Dios. (Mateo 24:14) Saray Tasi so mamapaseseg ed saray totoo a manaral tan mangiyaplika ed saray prinsipyo na Biblia ta pian napaaligwas so kalidad na bilay da tan nawalaan ira na ilalon manbilay ya andi-anggaan diad sakey a mundo ya ontalona so tuan kareenan tan kaligenan.

Nayarin agnatetebek na arum so kablian na panlilingkor na saray Tasi nen Jehova, ya ipapasen da ra a managdisturbo. Balet duma so opinyon nen Huis Jean Crepeau na Quebec Superior Court ed Canada. Saray Tasi nen Jehova diman so ag-inmabobon ed totontonen ed syudad na Blainville, Quebec, a nakaukolan so permit parad panagkabkaabungan da. Diad desisyon na korte, oniay inkuan nen Huis Crepeau: “Say idadalaw na saray Tasi nen Jehova et sakey a Makristianon serbisyo ed komunidad tan . . . saray publikasyon ya iyoopresi na saray Tasi ed saray interesadon mibabaley et importantin literatura, a manisingbat ed saray teman nipaakar ed relihyon, say Biblia,  druga, alkoholismo, panangibangat ed saray tobonbalo, saray problema ed panamaley tan diborsyo.” Oniay katuloyan ni na desisyon: “Say nibaga lambengat na korte et, say pangikompara ed saray Tasi nen Jehova ed saray managlako so makapainsulto, makapabanday, makapasakit, tan agpanagrespeto.”

Ontutulong iray Tasi nen Jehova parad pankaabigan na komunidad a panaayaman da diad panutulong ed totoo a makatalona ed saray problema ed inagew-agew a panagbilay da tan mangiiter ed sikara na ilalo ed arapen. Say Biblia so mangikinlong ed sikara pian nasumpal da itan a kimey. “Amin a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo so pankulangan to, a nabangatan a maong ed amin a gawa a maabig.”​—2 Timoteo 3:16, 17.

Labay mo ta a nakabatan no panon a saray Tasi nen Jehova so magmamaliw a ‘maralato ed amin a gawan maabig’? Papasesegen mi kan mangawat ed tulong da diad panaral nin nagkalalo nipaakar ed Biblia ta pian naanamot mo iyan importantin kimey ed komunidad a gagawaen da diad lugar yo tan diad interon mundo.

[Saray litrato ed pahina 30, 31]

Saray Tasi nen Jehova so manggugunaet a mikoopera ed saray sekular ya autoridad

[Litrato ed pahina 31]

Kabkabat iray Tasi lapud panutulong da ed kaparan ran totoo