Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Sirin, imanoen pa no naebatan yo so onggendan a tepetepet:

• Pigaran kapitulo so lugan na libro na Miqueas, kapigan itan nisulat, tan anto so kipapasen ed satan a panaon?

Say libro na Miqueas so walaan na pitoran kapitulo. Insulat nen propeta Miqueas so libro nen komawalon siglo K.K.P., a diad satan a panaon et say akisipanan a totoo na Dios so naapag ed duaran nasyon​—Israel tan Juda.​—8/15, pahina 9.

• Unong ed Miqueas 6:8, anto so kakaukolanen na Dios ed sikatayo?

Nepeg tayo so ‘manggawa na inkahustisya.’ Say estandarte na inkahustisya so panggagawa to ed saray bengatla, kanian nepeg tayon itandoro iray prinsipyo to nipaakar ed inkamatua tan katooran. Ibabaga to a sikatayoy ‘mangaro ed kaabigay-linawa.’ Ipapatnag na saray Kristiano so kaabigay-linawa diad ikikiwas dan tampol pian tulongan so arum ed saray pankaukolan da, a singa diad kayari na saray desyang. Pian ‘makapan-akar itayo a mauy-uyamo’ a kaiba si Jehova, nepeg tayon bidbiren iray limitasyon tayo tan mandependi ed sikato.​—8/15, pahina 20-2.

• No naandian na trabaho so sakey a Kristiano, anto so nayarin gawaen to?

Nepeg ya usisaen lamet na sakey so estiloy-kabibilay to. Nayarin pasimplien na sakey so bilay to diad iyalis ed simplin ayaman odino diad pamawas ed saray agnakaukolan a materyal a kayarian. Importantin tuloy so agpagmaliw a mapagpaga ed saray inagew-agew a pankaukolan, a manmatalek a sarag na Dios ya itarya iray pankaukolan tayo. (Mateo 6:33, 34)​—9/1, pahina 14-15.

• Anto so nepeg tayon tandaan sano mangiiter odino mangaawat na saray regalo ed kasal?

Agnakaukolan iray mablin regalo, nisay nepeg ya ilaloan iratan. Say sankablian et say awawey na puso na manangiter. (Lucas 21:1-4) Aliwan maabig so pangipakabat ed ngaran na angiregalo. Say panggawa ed satan so nayarin pakapabaingan. (Mateo 6:3)​—9/1, pahina 29.

• Akin a nepeg itayon manpikasi ya andi-tunda?

Say naynay a panagpikasi so nayarin mamaelet ed relasyon tayo ed Dios tan manginlong ed sikatayo a mangarap ed mairap iran subok. Saray pikakasi tayo so balanglan antikey odino andukey, depende ed pankaukolan odino saray kipapasen. Say pikakasi so mamabiskeg na pananisia tan ontulong ed sikatayon mangarap ed saray problema.​—9/15, pahina 15-18.

• Panon tayon nepeg a talosan so 1 Corinto 15:29, ya impatalos ed arum a bersion a “nabautismoan a parad inaatey”?

Say labay ya ibaga nen apostol Pablo et nabautismoan, odino nipalseb, iray alanaan a Kristiano ed sakey a kurso na bilay a mangitonton ed ipapatey lapud katooran a singa ed samay impatey nen Kristo. Kayari na satan, sikaray napaoli ed espiritun bilay a singa ed si Kristo.​—10/1, pahina 29.

• Panon tayon naseguro a say pagmaliw a Kristiano so aglabat mangilalanor ed ipaliis ed saray gawan-mauges ya asalambit diad 1 Corinto 6:9-11?

Agsinalambit nen apostol Pablo a kaukolan labat a paliisan iray gawan-mauges a singa say pilalawanan, panagtalintao, tan panagbuanges. Pian nipabitar a nakaukolan so kaaruman a pananguman, oniay inkuan to diad tinmumbok a bersikulo: “Ami ganagana nayari ra ed siak; balet aliwa ya amin onnepeg ira ed siak.”​—10/15, pahina 18-19.

• Siopa so pigara ed saray bibii ed kadaanan a panaon ya amaliket ed puso na Dios?

Kabiangan ed saratan iray manamianak a si Sefora tan Pua, ya agtinmulok ed Faraon a pateyen iray kapangiyanak a lalakin Israelita. (Exodo 1:15-20) Inyagel na Canaanitan balangkantis a si Rahab so duaran Israelitan espiya. (Josue 2:1-13; 6:22, 23) Lapud maong a pakatebek to, si Abigail so akapangisalba na saray bilay tan niyagel to si David manlapud pankasalanan ed dala. (1 Samuel 25:2-35) Sikara so ehemplo parad saray bibii natan.​—11/1, pahina 8-11.

• Panon a ‘manlapu ed tawen et akibakal so saray bitewen’ ed si Sisera, unong a nibaga diad Uko-ukom 5:20?

Moriaen na arum ya ontutukoy itan ed intulong na Dios. Arum so mangibabagan tulong itan na anghel, inyuran na meteor, odino impanmatalek nen Sisera ed saray parles na saray astrologo. Lapud ag-angiter na detalye so Biblia, natalosan tayo a say balikas so pakapatnagan na arum a nengneng na insalet na Dios diad biang na armada na Israel.​—11/15, pahina 30.

• Anggaman kasmak so agpananginenen tan panangibaliwala ed relihyon, akin a dakdakel nin siansia so mangibabagan manisia ira ed Dios?

Walaray mimimisa a manaanap na kareenan na nonot. Arum so maniilalo ed magnayon a bilay kayari ipatey, odino parad bunigas, kayamanan, tan itatalona. Diad arum a lugar et manggugunaet so totoo a napenek so espiritual a kakulangan da lapud say Komunistan ideolohiya so sinalatan la na saray pirawat a nibase ed kapitalismo. Say pakapikabat ed saratan a rason so makatulong ed sakey a Kristiano a makapangigapo na makabkabaliksan a pantotongtong.​—12/1, pahina 3.