‘Dia ed Amin a Dalin Pinmaway so Tanol Da’

“Manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo.”​—MATEO 28:19.

1, 2. (a) Anto so ingganggan nen Jesus ed saray babangatan to? (b) Akin a malaklaknab so agawaan na saray Kristiano nen inmunan siglo?

 SAKBAY ni na intokotok to ed tawen, walay ingganggan nen Jesus ed saray babangatan to. Oniay inkuanto ed sikara: “Manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo.” (Mateo 28:19) Agaylan kalaknab itan a kimey!

² Isipen pa labat! Nen Pentecostes 33 K.P. et niyibung so masanton espiritu ed manga 120 a babangatan tan ginapoan dan sumpalen itan a ganggan, ya imbaga ra ed arum a si Jesus so abayaglan iilaloan a Mesias, a pakagamoran na kilalaban. (Gawa 2:1-36) Panon a nasabi na satan a melag a grupo na totoo so “amin a nasyones”? Diad punto de bista na too et imposible itan, balet “diad Dios ami’ bengabengatla nayari.” (Mateo 19:26) Saray inmuunan Kristiano so tinulongan na masanton espiritu nen Jehova, tan sikara so angipatnag na pankaganatan. (Zacarias 4:6; 2 Timoteo 4:2) Sirin, diad loob na pigara labat a dekada et nibaga nen apostol Pablo a say maong a balita so niyabawag “ed amin a pinalsa ed leksab na tawen.”​—Colosas 1:23.

3. Anto so anaeg ed puron Kristianon “trigo”?

³ Nen inmunan siglo, nantultuloy a kinmayat so tuan panagdayew. Balet, impropesiya nen Jesus ya onsabi so panaon sano itanem nen Satanas so “sisanyas” tan nadaeg so tuan Kristianon “trigo” ed loob na pigaran siglo anggad isabi na panag-ani. Tinmua itan kayari impatey na saray apostol.​—Mateo 13:24-39.

Maples ya Idaraak Natan

4, 5. Manlapud 1919, anton kimey so inggapo na saray alanaan a Kristiano, tan akin ya angiparungtal itan na baleg ya angat?

⁴ Nen 1919 et nibiig iray puron Kristianon trigo manlapud saray sisanyas. Amta na saray alanaan a Kristiano a siansia nin onaplika so malaknab a ganggan nen Jesus. Mapekder dan panisiaan a manbibilay la ra ed ‘kaunoran iran agew’ tan sikakabat ira ed propesiya nen Jesus a: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (2 Timoteo 3:1; Mateo 24:14) On, amta ra a dakel ni so kimey a gawaen.

⁵ Anggaman ontan, singa ed saray babangatan nen 33 K.P., nidunget iratan ya alanaan a Kristiano ed baleg ya angat. Pigpigaran libo ira diad pigara labat a bansa. Panon dan nipulong so maong a balita “ed sankamundoan”? Nodnonoten pa so indakel na populasyon ed dalin manlapud manga 300 milyon ed panaon na saray Cesar anggad ngalngali 2 bilyon kayari na inmunan guerra mundial. Tan diad interon koma-20 a  siglo, nantultuloy so maples ya indakel na populasyon.

6. Anto so inaligwasan na panangikayat ed maong a balita kasabi na dekada na 1930?

⁶ Anggaman kuan, saray alanaan a lingkor nen Jehova, a singa saray agagi ra nen inmunan siglo, so angigapo ed kimey a niganggan ed sikara tekep na nagnap a pananisia ed si Jehova, tan niwala ed sikara so espiritu to. Kasabi na kapegleyan na dekaday 1930, manga 56,000 a manag-ebanghelyo so angiyabawag ed katuaan na Biblia diad 115 a daldalin. Malaknab lan kimey so agawaan, balet ta dakel ni so gawaen.

7. (a) Anton balon angat so nipaarap ed saray alanaan a Kristiano? (b) Diad tulong na ‘arum a karnero,’ kaunongan lay inyaligwas na panagtipon a kimey?

⁷ Insan, say aralem a pakatalos nipaakar ed pakabidbiran ed “baleg ya ulop” ya asalambit ed Apocalipsis 7:9 so amawala na balon angat balet nisipan met a natulongan iraman a makukulin Kristiano. Say agnabilang ya ulop na ‘arum a karnero,’ bilang saray mananisian walaan na mangaraldalin ya ilalo, so natipon ‘manlapu ed balang nasyon tan amin na saray kailalakan, tan binaleybaley, tan salita.’ (Juan 10:16) Sikara so ‘manlingkor ed si Jehova diad agew tan labi.’ (Apocalipsis 7:15) Mankabaliksan itan ya ontulong ira ed panagpulong tan panagbangat a kimey. (Isaias 61:5) Kanian, malikeliket iray alanaan a Kristiano diad pakaimaton ed indakel na saray manag-ebanghelyo manlapud nilibolibo anggad minilyon. Nen taon 2003, walay balon pantok a 6,429,351 ya akibiang ed panagpulong a kimey​—a karaklan ed sikara et kabiangan na baleg ya ulop. * Misalsalamat iray alanaan a Kristiano ed sayan tulong, tan panliliketan na arum a karnero so pribilehyon ontulong ed saray alanaan ya agagi ra.​—Mateo 25:34-40.

8. Panon so inkiwas na saray Tasi nen Jehova ed pirmin pananesdes ed sikara legan na komaduan guerra mundial?

⁸ Sanen pinmatnag lamet so trigon klase, satan so pirmin binakal nen Satanas. (Apocalipsis 12:17) Anto so reaksion to sanen pinmatnag lay baleg ya ulop? Sikato so maramramsak! Panduaruwaan tayo ni kasi a sikato so makasengeg ed sankamundoan a panangataki ed tuan panagdayew ya agawa legan na komaduan guerra mundial? Diad mandumaan a dapag, nidunget iray Kristiano ed pirmin pananesdes. Sinagmak na dakel a pinablin agagi so pirmin subsubok, ya arum so inaatey lapud pananisia ra. Siansia, inyaniweng da iray salita na salmista: “Dia ed Dios (idayew ko so salita to), dia ed Dios so anginan ko na panmatalek; agak antakot; anto so nayarian na laman a gawaen ed siak?” (Salmo 56:4; Mateo 10:28) Saray alanaan a Kristiano tan say arum a karnero, a pinabiskeg na espiritu nen Jehova, so nansiansian mapekder. (2 Corinto 4:7) Bilang resulta, binmulaslas odino ‘binmaleg so Salita na Dios.’ (Gawa 6:7) Nen 1939, sanen tinmerak so guerra, 72,475 a matoor a Kristiano so angireport ed impibiang da ed panagpulong a kimey. Balet, imparungtal na agkompleton report nen 1945, a taon ya impanampot na bakal, a walay 156,299 ya aktibon Tastasi ya angikayat ed maong a balita. Agayla so impakatalo nen Satanas!

9. Antoran balon eskuelaan so niyanunsio legan na Guerra Mundial II?

⁹ Malinew, agnanduaruwaan na saray lingkor nen Jehova no kasin nasumpal da so panagpulong a kimey lapud gulo nen komaduan guerra mundial. On, nen 1943, sanen kakkaktangan na bakal, niyanunsio so nipaakar ed duaran balon eskuelaan. Say sakey, a tatawagen natan a Teokratikon Eskuelaan Parad Ministeryo, so ikondukta ed amin a kongregasyon pian nipasal iray sinansakey a Tasi a manpulong tan manggawa na babangatan. Samay sakey et say Watchtower Bible  School of Gilead a mangipasal ed saray misionaryo a mamaaligwas ed panagpulong a kimey diad arum a bansa. On, sanen angangga so bakal et akaparaan laray tuan Kristiano parad apadaak a kimey.

10. Panon a naimatonan so inkaseseg na totoo nen Jehova legan na 2003?

¹⁰ Tan agaylan abig a kimey so agawaan da la! Lapud nipapasal ira ed Teokratikon Eskuelaan Parad Ministeryo, amin​—malangwer tan matakken, atateng tan ananak, anggan saray mabeblay la​—so akibiang tan nantultuloy a mibibiang ed pananumpal ed baleg a kimey ya ingganggan nen Jesus. (Salmo 148:12, 13; Joel 2:28, 29) Nen taon 2003, diad promedyo a binulan et impatnag na 825,185 so inkaganatan diad temporaryo odino tuloytuloy ya impibiang da ed panagpayunir a serbisyo. Diad saman met a taon, saray Tasi nen Jehova so angusar na 1,234,796,477 ya oras diad impitongtong da ed arum nipaakar ed maong a balita na Panarian. Maseguron panliketan nen Jehova so inkaseseg na totoo to!

Saray Lawak ed Arum a Bansa

11, 12. Antoran alimbawa so mangipatnag ed maabig a rekord na saray misionaryo?

¹¹ Diad inlabas na dakel a taon, alay abig a rekord so agawaan na saray nangraduar ed Gilead tan diad agano ni et saramay nangraduar ed Ministerial Training School. Alimbawa, diad Brazil et wala labat so kulang a 400 a manangipalapag sanen sinmabi iray inmunan misionaryo nen 1945. Sarayan misionaryo ontan met ed saramay tinmumbok ed sikara so benebenek ya akikimey ed maseseg iran agagi ra ed Brazil, tan si Jehova so mapalabon amendisyon ed saray sagpot da. Agaylan makapaliket itan parad siopaman a makanodnonot ed saratan ya akadkaunan panaon diad pakaimaton da ed balon pantok a 607,362 a nanreport ed Brazil nen 2003!

¹² Konsideraen met so Hapon. Sakbay na komaduan guerra mundial, wala so manga sanlasus a manangipulong na Panarian ed satan a bansa. Legan na bakal, kinmesay so bilang da lapud maruksan panamasegsegang, tan sanen angangga so bakal et wala lambengat so pigaran Tasi a mabilay ni ed espiritual tan pisikal. (Uliran 14:32) Maseguron manliket iratan a pigaran matalonggaring a manamemben-katooran nen 1949 a mangabrasa ed primeron 13 a misionaryo ya impasal ed Gilead, tan apablin tampol na saray misionaryo so maligsa tan maparawes iran agagin Hapones. Kayari na masulok a 50 taon, diad taon 2003 et inreport na Hapon so pantok a 217,508 a manangipalapag! Si Jehova so talagan mayamyaman ya amendisyon ed totoo to ed satan a bansa. Ontan met iray report ed dakel niran bansa. Saramay akasarag a manpulong ed arum a bansa so peteg ya akatulong ed inkayat na maong a balita, kanian nen 2003 et nadngelan itan ed 235 a daldalin, isla, tan teritorya ed interon mundo. On, say baleg ya ulop so ompapaway manlapud “amin a nasyones.”

‘Manlapud Amin na Saray Kailalakan, tan Binaleybaley, tan Salita’

13, 14. Diad anton paraan so impangipatnag nen Jehova ed kablian na panangipulong na maong a balita unong ed ‘amin a salita’?

¹³ Say inmunan nisalaysay a milagro kayari na inkilanaan na saray babangatan panamegley na masanton espiritu nen Pentecostes 33 K.P. et say impansalita ra na nanduruman lenguahe ed nandaragup a totoo. Amin ya akadngel ed sikara so nayarin mansasalita na lenguahe ya uusaren ed dakel a bansa, a nayarin Griego. Lapud ‘masimpit ira a lalaki,’ natalosan da met iray serbisyo na saray Hebreo diad templo. Balet asagyat so imano ra sanen nadngelan da so maong a balita ed mismon lenguahe ra.​—Gawa 2:5, 7-12.

¹⁴ Natan, dakel met a lenguahe so nauusar ed  panagpulong a kimey. Nipropesiya a say baleg ya ulop et aglambengat manlapu ed saray nasyon noagta ontan met ed “saray kailalakan, tan binaleybaley, tan salita.” Mitunosan ed satan, oniay impasakbay nen Jehova panamegley nen Zacarias: “Samploran lalaki ompeket ira naani, manlapu ed saray amin a pansasalita na saray nasyon, sikara naani ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) Anggaman saray Tasi nen Jehova et andian lay langkap a makapansalita na nanduruman lenguahe, amta ra so kablian na pangibangat unong ed saray lenguahe na totoo.

15, 16. Panon ya inawat na saray misionaryo tan arum nira so angat ed panagpulong dia ed lokal iran lenguahe?

¹⁵ Tua, wala natan so pigaran lenguahe a malaklaknab ya uusaren, a singa say Español, Ingles, tan Pranses. Balet, nanggunaetan na saramay manlilingkor ed arum a bansa so makaaral ed lokal iran lenguahe ta pian nipasabi ra so maong a balita ed “saray wala a tinandaan ed bilay ya andi-anggaan.” (Gawa 13:48) Nayarin mairap itan. Sanen kinaukolan na saray agagi ed nasyon na Tuvalu ed Abalaten a Pasipiko iray publikasyon ed dili ran lenguahe, satan ya angat so inawat na sakey ed saray misionaryo. Lapud anggapo so diksionaryo, sikato so anugyop ed glosaryo na saray salita na Tuvalu. Sinmabi panaon et nipalapag so libron Makapambilay Kayo na Ando lan Ando ed Paraiso diad Dalin * ed lenguahen Tuvalu. Sanen sinmabi ed Curaçao iray misionaryo, anggapo so literatura na Biblia tan diksionaryo ed lokal a lenguahen Papiamento. Wala met so malaknab ya agpantutunosan ed no panon ya isulat so lenguahe. Anggaman ed saratan, diad loob na duay taon manlapu la’d insabi na inmuuna iran misionaryo, nipalapag a siansia so primeron tract na Biblia ed satan a lenguahe. Natan, say Papiamento so sakey ed 133 a lenguahe ya uusaren ed panangipalapag na Say Panag-Bantayan a mibabansag la’d Ingles.

¹⁶ Diad Namibia, saray inmunan misionaryo so agmakaromog na Tasi a taga-ditan pian ontulong a mangipatalos. Niarum ni, sakey a lenguahe ditan, say Nama, so kulang na saray salita parad saray kaslakan ya ideya ed publikasyon tayo, a singa say salitan “ayadyari.” Oniay inreport na sakey a misionaryo: “Diad panagpatalos, manunan uusaren ko iray managbangat ed eskuelaan a manaaral na Biblia. Lapud daiset ni so amta ra ed katuaan, kinaukolan ko so onyurong a kaiba ra pian naseguro a susto so kada estansa.” Anggaman kuan, say tract a Life in a Peaceful New World so nipatalos ed saginonor diad apatiran lenguahe ed Namibia. Natan et regular lan nipapalapag so Say Panag-Bantayan diad Kwanyama tan Ndonga.

17, 18. Antoran angat so aasikasoen ed Mexico tan ed arum niran bansa?

¹⁷ Diad Mexico, say manunan lenguahe et Español.  Balet, sakbay a sinmabi iray Kastila, dakel a lenguahe so uusaren diman, tan wala ni so pigaran uusaren natan. Kanian, say literatura na saray Tasi nen Jehova so nipapalapag la natan ed pitoran lenguahe ed Mexico ontan met ed Mexican Sign Languahe. Say Maya a Ministeryo ed Panarian so inmunan apetsaan a publikasyon diad lenguahen American Indian. On, pigaran libo a Maya, Aztec, tan arum nira so kabiangan ed 572,530 a manangipalapag na Panarian diad Mexico.

¹⁸ Diad agano niran panaon, minilyon so binmatik ed arum a bansa bilang refugee, odino inmalis ira ed arum a bansa lapud panagbilay. Bilang resulta, dakel a bansa natan ed primeron pankanawnawa so awalaan na dakel a lawak ya uusaren so nanduruman lenguahe. Satan ya angat so inawat na saray Tasi nen Jehova. Alimbawa, diad Italya et walaray kongregasyon tan grupo a walaan na 22 a lenguahe nilikud ed Italyano. Pian natulongan iray agagi a makapanpulong ed arum a mansasalitay duman lenguahe, walaray klase ya agano nin inorganisa a mangibabangat na 16 a lenguahe, kalaktip lay Italian Sign Language. Diad dakel niran bansa, ontan met so pansasagpot na saray Tasi nen Jehova pian sabien so dakel a populasyon na dinmadayo iran totoo. On, diad tulong nen Jehova, say baleg ya ulop so talagan ompapaway manlapud dakerakel a pansasalita.

‘Dia ed Amin a Dalin’

19, 20. Antoran salita nen Pablo so makatantandan nasusumpal natan? Ipaliwawa.

¹⁹ Nen inmunan siglo, oniay insulat nen apostol Pablo: “Agda ta nadngel? On, peteg, dia ed ami dalin pinmaway so tanol da, tan saray salita ra angga ed saray sampot na mundo.” (Roma 10:18) No peteg itan nen inmunan siglo, nagkalalo lan tua itan ed panaon tayo! Minilyon​—a nayarin mas dakel ni nen say kapiganman ed awaran​—so mangibabagay: “Galangen ko si Jehova ed amin a panaon: say kigalang to naynay dia ed sangik.”​—Salmo 34:1.

²⁰ Niarum ni, ag-ontatayer so kimey. Tuloytuloy ya ondarakel so bilang na saray manangipalapag na Panarian. Ondarakel so oras a nauusar ed panagpulong a kimey. Minilyon a panagpawil tan nilasus nilibo a panangiyaral ed Biblia so nikokondukta. Tan tuloytuloy a nipapatnag so interes. Nen imbeneg a taon, walay balon pantok a 16,097,622 ya inmatendi ed panagselebra ed Memoryal na impatey nen Jesus. Malinew, dakdakel ni so kimey a gawaen. Komon ta mantultuloy tayon aligen so malet a katooran na agagi tayo a nansungdo ed pirmin panamasegsegang. Tan ipatnag tayo met komon so inkaseseg na amin ya agagi tayo a manlapu la’d 1919 et insekar day inkasikara ed panaglingkor ed si Jehova. Komon ta iyaniweng tayon amin so koro na salmista: “Amin a bengatla a wala so panlinlinawa to idayew to si Jehova. Idayew yo si Jehova.”​—Salmo 150:6.

[Saray paimano ed leksab]

Kasin Nipaliwawa Yo?

• Anton kimey so inggapon ginawa na agagi nen 1919, tan akin a sakey itan ya angat?

• Siopa so atipon pian onsuporta ed panagpulong a kimey?

• Anton rekord so agawaan na saray misionaryo tan arum nira a manlilingkor ed arum a daldalin?

• Anton ebidensya so nayarian yon saglawien pian nipatnag a bebendisyonan nen Jehova so kimey na totoo to natan?

[Tepetepet Parad Panagaral]

 [Tsart ed pahina 18-21]

2003 SERBISYON TAON A REPORT NA SARAY TASI NEN JEHOVA ED SANKAMUNDOAN

 (Nengnengen so tomo)

[Saray litrato ed pahina 14, 15]

Agnanduaruwaan na saray Kristiano a nipulong so maong a balita anggaman ed gulo nen komaduan guerra mundial

[Credit Line]

Insabog: U.S. Navy photo; arum ni: U.S. Coast Guard photo

[Saray litrato ed pahina 16, 17]

Ompaway so baleg ya ulop manlapud amin a kailalakan tan pansasalita