Iyabawag Komon na Amin so Gloria nen Jehova

“Ipabtang yo ed Jehova so gloria tan kabiskegan. Ipabtang yo ed Jehova so gloria a makana ed ngaran to.”​—SALMO 96:7, 8.

1, 2. Panlalapuan na panangidayew ed si Jehova, tan sioparay papasesegen a mibiang ed satan?

 SI David, ya anak nen Jesse, so binmaleg bilang managpastol ed liberliber na Betlehem. Maseguron sikatoy mabetbet ya ontangay ed mabitewen a katawenan diad malinlinak a labi legan ton babantayan iray pulok nen ama to diad saray mareen a panagpastolan na saray karnero! Seguradon sinmebang ed nonot to iratan a mabitabitar ya eksena sanen sikatoy pinuyanan na masanton espiritu na Dios a manibukel tan manganta ed alay dakep iran salita na koma-19 a Salmo: “Saray tawen ipaliwawa ra so gloria na Dios; tan say sansinakoban iparungtal to so gawa na saray lima to. Say gulis da kinmayat ed amin a dalin, tan saray salita ra angga ed kasampotan na mundo.”​—Salmo 19:1, 4.

² Anggapo iray salita, balikas, odino boses, ingen ta iyaabawag na makapakelkelaw a katawenan a pinalsa so gloria nen Jehova, diad inagew-agew tan nilabi-labi. Agbalot ontutunda so palsa a mangiyaabawag ed gloria na Dios, tan bidbiren na too so inkamelanting to sano umamengen to iyan mareen ya ebidensya a nipapatnag diad “amin a dalin” pian naimatonan na amin a manaayam ditan. Balet ta aliwan magenap so mareen a pantatasi na palsa. Papasesegen iray matoor a totoo a mibiang tekep na maksil a boses. Oniaran apuyanan a salita so inkuan na ag-angaranan a salmista ed saray matoor a managdayew: “Ipabtang yo ed Jehova so gloria tan kabiskegan. Ipabtang yo ed Jehova so gloria a makana ed ngaran to.” (Salmo 96:7, 8) Saramay walaan na maapit a relasyon ed si Jehova so maliket ya onkiwas unong ed satan a panamaseseg. Balet anto so lalanoren na panangigloria ed Dios?

3. Akin ya iglogloria na totoo so Dios?

³ Aliwa lambengat a pansalita so nakaukolan a gawaen. Saray Israelita ed panaon nen Isaias so angigloria ed Dios panamegley na saray bibil da, balet ta agmasimoon so karaklan ed sikara. Oniay inkuan nen Jehova panamegley nen Isaias: “Saya a baley onasingger ed siak, tan dia ed sangi ra tan dia ed saray bibil da igalang da ak, ingen saray puso ra inyarawi ra ed siak.” (Isaias 29:13) Anggapoy kakanaan na antokaman a panangidayew ya imbalikas na saratan a totoo. Pian makabaliksan itan, say panangidayew so nepeg a manlapud puso a napnoy aro ed si Jehova tan masimoon a panamidbir ed nikaduman gloria to. Si Jehova  labat so Manamalsa. Sikato so Makapanyarin-amin, say Maptek a Sakey, say personipikasyon na aro. Sikato so lapuan na kilalaban tayo tan makanepegan a Soberano a pampasakopan na amin a mabilay diad tawen tan dalin. (Apocalipsis 4:11; 19:1) No peteg a panisiaan tayo irayan bengatla, sikatoy igloria tayo diad interon puso tayo.

4. Antoran bilin so inter nen Jesus no panon so pangigloria ed Dios, tan panon tayon nagawaan iratan?

⁴ Imbaga nen Jesu-Kristo ed sikatayo no panon so pangigloria ed Dios. Inkuanto: “Dia ed saya so kigloriaan nen Amak, say pambunga yo na dakel tan dia ed ontan sikayo so babangatan ko.” (Juan 15:8) Panon itayon manbunga na dakel? Unona, diad interon-kamarerwa a pibibiang ed panangipulong na “ebanghelyo na panarian” tan diad ontan et mibibiang itayo ed amin a pinalsa a ‘mansasalita’ nipaakar ed “agnanengneng” iran kalidad na Dios. (Mateo 24:14; Roma 1:20) Niarum ni, amin tayo so makapibiang ed ontan a paraan​—direkta man odino andi​—diad panaggawa na saray balon babangatan a mamapakasil ed koro na panangidayew ed si Jehova a Dios. Komadua, bayuboan tayo so bunga a papawalaen ed sikatayo na masanton espiritu tan panggunaetan tayon aligen iray matalonggaring a kalidad nen Jehova a Dios. (Galacia 5:22, 23; Efeso 5:1; Colosas 3:10) Bilang resulta, say kondukta tayo ed inagew-agew so mangigloria ed Dios.

‘Dia ed Amin a Dalin’

5. Ipaliwawa no panon ya indanet nen Pablo so responsabilidad na saray Kristiano a mangigloria ed Dios diad panginabang da na pananisia ra dia ed arum.

⁵ Indanet nen Pablo ed sulat to ed saray taga-Roma so responsabilidad na saray Kristiano a mangigloria ed Dios diad panginabang da na pananisia ra dia ed arum. Say manunan tema na Roma et saraman lambengat so mangagamil na pananisia ed si Jesu-Kristo so niliktar. Diad kapitulo 10 na sulat to, impatnag nen Pablo a say natural ya Israel ed panaon to so manggugunaet nin siansia a makagamor na matunong a talindeg diad panutumbok da ed Mosaikon Ganggan, bangta “si Kristo so kasumpalan [la] na ganggan.” Kanian oniay inkuan nen Pablo: “No dia ed sangim ipatuam si Jesus a sikato so Katawan, tan sisiaen mo ed pusom a say Dios pinabangon to ed saray inatey, nilaban ka.” Manlapu la’d saman, “anggapo so nandumaan na Judio tan Griego: ta say dili a Katawan so Katawan na ganagana, tan mayaman ed ganagana ya ontawag ed sikato: ta, siopaman ya ontawag ed ngaran na Katawan, nilaban.”​—Roma 10:4, 9-13.

6. Panon so impangiyaplika nen Pablo ed Salmo 19:4?

⁶ Insan oniay makatunongan ya intepet nen Pablo: “Panon sirin so panawag da ed saman so agda sinisia? Tan panon so panisia ra ed agda nadngelan? Tan panon so pakadngel da no anggapo so mangipulong?” (Roma 10:14) Oniay inkuan nen Pablo nipaakar ed Israel: “Aliwan amin da so tinmalineng na magayagan balita.” Akin ya agtinmulok so Israel? Lapud andian ira na pananisia, aliwan lapud andian ira na pankanawnawa. Impabitar iya nen Pablo diad impangaon to ed Salmo 19:4 tan inyaplika to itan ed Makristianon kimey a panagpulong imbes a dia ed mareen a pantatasi na palsa. Inkuan to: “On, peteg, dia ed ami’ dalin pinmaway so tanol da, tan saray salita ra angga ed saray sampot na mundo.” (Roma 10:16, 18) On, no panon a saray andiay-bilay a palsa so mangiglogloria ed si Jehova, saray Kristiano nen inmunan siglo so angipulong ed maong a balita na kilalaban diad inerman a pasen kanian nidayew da so Dios ‘ed amin a dalin.’ Diad sulat to ed saray taga-Colosas, deneskribe met nen Pablo no panon kalaknab so inkayat na maong a balita. Inkuan to a say maong a balita so nipulong “ed amin a pinalsa ed leksab na tawen.”​—Colosas 1:23.

Saray Maseseg a Tasi

7. Unong ed si Jesus, anto so responsabilidad na saray Kristiano?

⁷ Nayarin sinulat nen Pablo iray taga-Colosas  manga 27 taon kayari na impatey nen Jesu-Kristo. Panon a kinmayat so panagpulong a kimey angga ed Colosas diad ontan a katikey na panaon? Agawa itan lapud maseseg iray inmunan-siglon Kristiano, tan benendisyonan nen Jehova so inkaseseg da. Impasakbay nen Jesus a saray patumbok to et magmaliw ya aktibon managpulong sanen inkuan ton: “Say ebanghelyo kaukolan a nipulong ya unona ed saray amin a nasyones.” (Marcos 13:10) Diad satan a propesiya, inyarum nen Jesus so ganggan a nikurit ed unor iran bersikulo na Ebanghelyo nen Mateo: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Kayarin tuloy na intokotok nen Jesus ed tawen, saratan a salita so sinumpal na saray patumbok to.

8, 9. Unong ed Gawa, panon so inkiwas na saray Kristiano ed saray ganggan nen Jesus?

⁸ Sanen niyibung so masanton espiritu diad Pentecostes 33 K.P., say primeron ginawa na saray matoor a patumbok nen Jesus et nampulong ira, ya impasabi ra ed saray totoo ed Jerusalem so ‘makapakelaw iran gawa na Dios.’ Sankaepektiboan so impanpulong da, ta “ngalngali talon libo a kamarerwa” so abautismoan. Nantultuloy iray babangatan ed mapubliko tan maseseg a panangidayew da ed Dios, ya amawala na maabig iran resulta.​—Gawa 2:4, 11, 41, 46, 47.

⁹ Agnambayag et naimano na saray relihyoson papangulo so kimey na saratan a Kristiano. Lapud agonigon ira ed inkakpel nen Pedro tan Juan, ingganggan da iyan duaran apostol ya ontunda lan manpulong. Oniay ebat na saray apostol: “Agmi nayarin agsalitaen so anengneng tan nadngel mi.” Kayari da ran pinagyaw tan imbulos, pinmawil si Pedro tan Juan ed saray agagi ra, tan amin da so nankakasakey a nampikasi ed si Jehova. Oniay makpel dan inkerew ed si Jehova: “Iyabuloy mo ed saray aripen mo a salitaen da a makmakpel so salitam.”​—Gawa 4:13, 20, 29.

10. Anton isusumpa so ginmapo, tan panon so inkiwas na saray tuan Kristiano?

¹⁰ Satan a pikakasi so mitunosan ed linawa nen Jehova, unong ya apatnagan ed saginonor. Saray apostol so inerel balet sikaray mamilagron imbulos na sakey ya anghel. Oniay inkuan na anghel ed sikara: “Nakila, et alagey kayo ed templo, tan salitaen yo ed saray ombaley so amin a salita na sayan bilay.” (Gawa 5:18-20) Lapud tinmulok iray apostol, nantultuloy si Jehova ya amendisyon ed sikara. Kanian, “inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.” (Gawa 5:42) Malinew, say pirmin isusumpa so ag-amatunda ed saray patumbok nen Jesus diad mapublikon panangigloria ra ed Dios.

11. Anto so awawey na saray akadkaunan Kristiano nipaakar ed panagpulong a kimey?

 ¹¹ Agnambayag et inerel si Esteban tan sikatoy tinupak anggad inatey. Say impamatey ed sikato so amalesa na pirmin panamasegsegang ed Jerusalem, tan amin a babangatan nilikud ed saray apostol so apaskar ya onalis ed nanduruman pasen. Kasin adismaya ira ed panamasegsegang? Andin balot. Onia so nabasa tayo: ‘Saramay abuybuyak, nanakarakar ira ed amin a kadalinan ya angipulong na salita.’ (Gawa 8:1, 4) Satan ya inkaseseg ed panangiyabawag na gloria na Dios so tuloytuloy ya apatnagan. Diad Gawa kapitulo 9, nabasa tayo ya anengneng nen Fariseon Saulo na Tarso so pasingawey nen Jesus tan sikatoy abulag, sanen sikatoy mamapaarap ed Damasco pian pasegsegangen iray babangatan nen Jesus diman. Diad Damasco, si Ananias so mamilagron amaabig ed impakabulag nen Saulo. Anto so primeron ginawa nen Saulo, ya akabat ed saginonor bilang apostol Pablo? Oniay inkuan na salaysay: “Tampol ed saman, impulong to ed saray sinagoga a si Jesus sikato so Anak na Dios.”​—Gawa 9:20.

Amin so Akibiang ed Panagpulong

12, 13. (a) Unong ed saray manag-awaran, anto so makatantanda nipaakar ed akadkaunan Kristianon kongregasyon? (b) Panon a mipakna so libro na Gawa tan saray salita nen Pablo ed saray imbalikas na saray manag-awaran?

¹² Kabkabat ya amin ed akadkaunan Kristianon kongregasyon et akibiang ed panagpulong a kimey. Oniay insulat nen Philip Schaff nipaakar ed saray Kristiano ed saraman a panaon: “Say kada kongregasyon et muyongan na saray misionaryo, tan say kada Kristianon mananisia et misionaryo.” (History of the Christian Church) Oniay inkuan nen W. S. Williams: “Say inkalapagan ya ebidensya et amin a Kristiano ed akadkaunan Kongregasyon, nagkalalo la ed saramay walaan na karismatikon langkap [saray langkap na espiritu], so angipulong ed ebanghelyo.” (The Glorious Ministry of the Laity) Mapekder to met ya inkuan: “Agbalot inggagala nen Jesu-Kristo a say panagpulong et magmaliw a nikaduman pribilehyo a para labat ed saramay walaan na posisyon ed ministeryo.” Anggan si Celsus, ya ombubusol nensaman ed Inkakristiano, so nansulat: “Saray manag-abel, managgawa na sapatos, managgawa na katat, saray aliwan edukado tan ordinaryon totoo, so maseseg a manangipulong na ebanghelyo.”

¹³ Nanengneng so inkasusto na saratan a balikas diad maawaran a rekord na Gawa. Diad Pentecostes 33 K.P., sanen niyibung so masanton espiritu, amin a babangatan, lalaki tan bibii, so mapublikon angiyabawag ed makapakelkelaw iran bengatla na Dios. Sanen agawa so panamasegsegang kayari na impamatey ed si Esteban, amin a Kristiano a nitaytayak ed nanduruman bansa so malaklaknab ya angikayat ed maong a balita. Kayari na manga 28 a taon, oniay insulat nen Pablo ed amin a Hebreon Kristiano, ya aliwan diad melag lambengat a grupo na klero: “Lapu ed sikato sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.” (Hebreos 13:15) Oniay impaneskribe nen Pablo ed panmoria ton mismo nipaakar ed panagpulong a kimey: “Ta no ipulong ko so ebanghelyo, anggapo so panggloriaan ko; ta say kapilitan sikato so amasoot ed siak; et abagey ak la no agko ipulong so ebanghelyo.” (1 Corinto 9:16) Mabitar ya ontan met so panmoria na amin a matoor a Kristiano nen inmunan siglo.

14. Anto so pansiglaotan na pananisia tan panagpulong?

¹⁴ On, kinaukolan a mibiang so tuan Kristiano ed panagpulong a kimey lapud maapit itan a nisiglaot ed pananisia. Inkuan nen Pablo: “Say too sisiaen to ed puso to so katunongan; tan say sangi so manggawa na panangipatua na onkana ed kilalaban.” (Roma 10:10) Kasin say melag lambengat a grupo ed loob na kongregasyon​—a singa say kleron klase​—so mangaagamil na pananisia kanian sikara labat so walaan na responsabilidad a manpulong? * Andin balot! Babayuboan na amin a tuan Kristiano so mabiskeg a pananisia ed Katawan a Jesu-Kristo tan napapakiwas ira a manggawa na mapublikon panangiyabawag ed  satan a pananisia dia ed arum. Ta no andi, inatey so pananisia ra. (Santiago 2:26) Lapud impatnag na amin a matoor a Kristiano nen inmunan siglo ed Komon a Panaon tayo so pananisia ra ed onian paraan, nadngelan so maksil a kelyaw na panangidayew ed ngaran nen Jehova.

15, 16. Mangiter na saray alimbawa a mangipapabitar ed inyaligwas na panagpulong a kimey anggaman ed saray problema.

¹⁵ Nen inmunan siglo, benendisyonan nen Jehova so totoo to tekep na ibubulaslas anggaman walaray problema ed loob tan paway na kongregasyon. Alimbawa, inkurit na Gawa kapitulo 6 so agpantatalosan na saray akombertin mansasalitay-Hebreo tan mansasalitay-Griego. Satan a problema so sinolbar na saray apostol. Bilang resulta, oniay nabasa tayo: “Manbaleg so salita na Dios; et say bilang na saray binangatan dinmakerakel a tuloy ed Jerusalem; et baleg ya ulop na saray saserdotes so tinmulok ed pananisia.”​—Gawa 6:7.

¹⁶ Diad saginonor, niwala so mapolitikan balingaan ed baetan nen Arin Herodes Agripa na Judea tan saray totoo ed Tiro tan Sidon. Saray manaayam ed saratan a syudad so akikareenan ed si Herodes, a sengegay impanpasirayew to, tan sikatoy nampaliwawa ed publiko. Oniay inkelyaw na nandaragup a totoo: “Say boses na Dios, ya aliwa a say boses na sakey a too.” Kabekta et si Herodes Agripa so tinigway na anghel nen Jehova, tan sikato so aragas lapud “agto angiter na galang ed Dios.” (Gawa 12:20-23) Agaylan makapatalagnaw itan ed saramay maniilalo ed manuley a totoo! (Salmo 146:3, 4) Balet, nantultuloy iray Kristiano ya angigloria ed si Jehova. Kanian, “say salitay Dios binmuna tan dinmakel” anggaman ed saratan ya ag-inkaligen ed politika.​—Gawa 12:24.

Kipapasen Nensaman tan Natan

17. Nen inmunan siglo, anto so akibiangan na ondarakel a bilang na totoo?

¹⁷ On, say sankamundoan a Kristianon kongregasyon nen inmunan siglo so tugyopen na maseseg tan aktibo iran manangidayew ed si Jehova a Dios. Akibiang so amin a matoor a Kristiano diad panangikayat na maong a balita. Aromog na arum iray interesado tan unong ya inkuan nen Jesus, imbangat da ira a mangunor ed amin a bengatla ya ingganggan to. (Mateo 28:19, 20) Say resulta et binmulaslas so kongregasyon, tan mas dakel ya indibidual so akibiang ed si Arin David nensaman diad panangidayew ed si Jehova. Amin da so mangiyaaniweng ed saray apuyanan a salita: “Idayew taka, O Katawan a Dios ko, a pati amin a pusok; tan ligligaen ko so ngaran mo lawas lan lawas. Ta baleg so abig na linawam ed siak.”​—Salmo 86:12, 13.

18. (a) Anton pandumaan so naimano ed baetan na inmunan-siglon Kristianon kongregasyon tan say Kakristianoan natan? (b) Anto so konsideraen ed ontumbok ya artikulo?

¹⁸ Nipaakar ed saya, makapaliing-kanonotan iray salita na propesor na teolohiya a si Allison A. Trites. Oniay inkuan to sanen inkompara to so Kakristianoan ed inmunan-siglon Inkakristiano: “Ondarakel iray membro na saray simbaan natan lapud biolohikon ibubulaslas (sano saray ananak na pamilya a membro na lokal a simbaan et personal a mangawat ed pananisia) odino diad iyaalis na arum (sano onalis so sakey a balon membro manlapud sananey a simbaan). Balet, diad Gawa, say ibubulaslas et makasengeg ed panangomberti, lapud kagapogapo ni labat na kongregasyon ed kimey to.” Kabaliksan kasi na satan a say tuan Inkakristiano et agla ombubulaslas unong ed paraan ya inkuan nen Jesus? Siempre, andi. Diad amin a paraan et maseseg iray tuan Kristiano natan ed mapublikon panangidayew ed Dios a singa saray Kristiano nen inmunan siglo. Naamtaan tayo itan diad ontumbok ya artikulo.

[Paimano ed leksab]

Kasin Nipaliwawa Yo?

• Diad antoran paraan a nigloria tayo so Dios?

• Panon so impangiyaplika nen Pablo ed Salmo 19:4?

• Anto so pansiglaotan na pananisia tan panagpulong?

• Anto so makatantanda ed inmunan-siglo a Kristianon kongregasyon?

[Tepetepet Parad Panagaral]

[Litrato ed pahina 8, 9]

Saray katawenan so lawas mamapaneknek ed gloria nen Jehova

[Credit Line]

Diad impangiyabuloy na Anglo-Australian Observatory, a nilitrato nen David Malin

[Saray litrato ed pahina 10]

Maapit a mansiglaotan so panagpulong a kimey tan pikakasi