Report na Saray Manangiyabawag na Panarian

Anapen so Totoo Diad Pantratrabahoan Da

ANTO so pamparparehoan di apostol Mateo, Pedro, Andres, Santiago, tan Juan? Amin da so tinawag nen Jesus sanen wala ra’d pantratrabahoan da. Si Pedro, Andres, Santiago, tan Juan so okupado ed anapan dan panagsigay sanen inimbitaan ira nen Jesus, a kuan to: “Tumbo’kayo ed siak.” Si Mateo so walad panagsingilan na buis sanen inimbitaan nen Jesus a magmaliw a babangatan to.​—Mateo 4:18-21; 9:9.

Makagunggona so pampulong ed totoo diad pantratrabahoan da. Lapud impakamoria ed saya, diad agano ni et saray Tasi nen Jehova ed Hapon so pirmin nansagpot pian mibiang ed sayan nengneng na ministeryo. Antoray resulta? Diad loob labat na pigaran bulan, niyarunsa so nilibon panagpawil, tan manga 250 a panangiyaral na Biblia so nigapo. Konsideraen iray onggendan ya eksperiensya.

Akabat na sakey a sigpot-panaon a ministro ed Tokyo so sakey a manedyer na restawran ya akapitongtong la ed Tasi manga 30 a taon lay apalabas legan a maneeskuela ni. Anggaman agtanto atalosan na manedyer so nibaga ed sikato nensaman, sikatoy nagmaliw ya interesado ed Biblia. Natan, lapud aliing lamet so interes to, inawat ton tampol so panangiyaral ed Biblia panamegley na libron Pikakabat a Mangitonton ed Andi-Anggaan a Bilay. * Likud ed satan, ginapoan ton binasa a mismo so Biblia kada labi antis a naugip.

Dinmalaw so sakey ya espisyal payunir a ministro diad sakey ya opisina. Anggaman anggapo’d man so manedyer, oniay intepet na malangwer a bii ya inmebat ed telepono na manedyer, “Labay mo ta so mitongtong ed siak?” Kayari na antikey ya impantongtong da ed telepono, pinmaway so bii tan inkuan to a sikatoy interesadon manbasa na Biblia. Inyarunsa na payunir so ompawil ya inyawitan to na Biblia tan ginapoan ton inyaralan na Biblia so bii, a ginawa diad asingger a parki diad kabkabuasan antis na kaloloob ed trabaho.

Diad sananey ya opisina, anengneng na sakey a laki so katrabahoan to ya angawat ed saray magasin a Panag-Bantayan tan Awake! balet imbantak to iratan kaalis na Tasi. Kasempet na laki diad abung, insalaysay to ed Tasin akulaw to so agawa tan imbaga to ya anggan panon et sikato so ondengel no sikatoy inopresian na saray magasin. Say anak ton bii, ya akadngel ed saray imbaga to, so angipasabi ed satan diad sakey a Tasi a manpupulong ed satan a teritorya a pasen na negosyo. Tampol a binisita na Tasi so asawan laki diad opisina tan sikatoy ginapoan ton inyaralan na Biblia. Ag-abayag et ginapoan na laki so inmatendi a regular diad saray miting ed Simba.

Say pampulong ed totoo diad pantratrabahoan da so mangitatarok na arum nin gunggona. Dakel a manangipalapag ed Hapon so nagmaliw ya epektibo ed saray panagpawil diad saray lakoan, pabrika, tan opisina. Nilikud ed satan, diad panamegley na sayan paraan na panagpulong, dakel ya inaktibo so akatongtong tan sikara so inyaralan lamet. Agaylan abig iray resulta. Diad agano ni et sakey a kongregasyon diad sentral Tokyo so angireport na 108 a panangiyaral na Biblia, a masulok a dobli ed bilang a nireport diad imbeneg a taon.

[Paimano ed leksab]