Panggawa na Maabig Diad Saray Panaon na Pankaukolan

“MANGGAWA itayo na maabig ed saray amin,” so impaseseg nen apostol Pablo, “nagkalalo ed saray kaamong [ed] pananisia.” (Galacia 6:10) Pambabanikelan na saray Tasi nen Jehova ed sankamundoan so pangiyaplika ed satan a prinsipyo diad bilay da, a manggagawa ra na maabig ed amin nagkalautla ed saray kapananisiaan da. Saya so aminpiga-piga lan naiimano diad saray panaon na pankaukolan. Konsideraen tayo pa so agano niran alimbawa manlapud taloran bansa.

Nen Disyembre 2002, binmasig ed Guam so makmaksil a bagyo, a masulok a 300 kilometro kada oras so kapeles na dagem na satan. Amayamay so ageraygeray a kaabungan, saray arum so sigpot ya aderal. Saray lokal a kongregasyon so tampol ya angorganisa na saray boluntaryon manguksoy pian tulongan iray pamilya na Tasi ya apirmian na desyang. Say sanga ed Guam so angitarya na saray materyales tan trabahador pian naapiger iray aderal ya abung, tan sinmuporta so sanga ed Hawaii. Ag-abayag, sinmabi so sakey a grupo na saray karpentero a nanlapud Hawaii pian ontulong ed pamaalagey lamet, tan pian naasistian ira, pigaran agagi a taga’d man so nambakasyon ed saray trabaho ra. Say espiritu na magayagan pantutulongan da et sakey a pantasi ed interon komunidad.

Diad syudad na Mandalay, Myanmar, walay biglan pinmool diad asingger ed Kingdom Hall. Asingsingger ditan so abung na sakey ya inaktibon agin bii tan say pamilya to. Paarap ed abung to so siplog na dagem, kanian sikato so binmatik ed Kingdom Hall pian patulongan. Peles na pangaapiger ed Kingdom Hall ed saman, kanian dakel iray wadman ya agagin lalaki. Abigla ra sanen anengneng da so agin bii lapud agda amta a diman manayay panaayaman to. Tinmulong a tampol iray agagi pian nasambot iray kagawaan na pamilya manlapud pool. Sanen akabatan na masiken ton aliwan Tasi so nipaakar ed pool, sikatoy nanapuran sinmempet ed abung a ditan et asabian to iray agagi a mangaasikaso ed pamilya to. Sikatoy nandinayew tan misalsalamat, a nainawaan ni lapud saray matakew so kaslakan lan mangaanamot ed ontan iran kipapasen. Sayan kaabigan ya impatnag na saray agagi so amakiwas ed agin bii tan say anak ton laki a milimog lamet ed Kristianon kongregasyon, tan sikara la natan so onaatendi ed amin a miting.

Diad apalabas a serbisyon taon, dakel a taga-Mozambique so nidunget ed eras lapud kelang tan aperdi iran tanem. Say lokal a sangan opisina na saray Tasi nen Jehova so tampol ya angitarya na tagano parad saray mankaukolan. Saratan  so imbubunog diad saray Kingdom Hall, a no maminsan et kayari na saray miting na kongregasyon. Sakey a mansusulon ateng ya agin bii so angikuan: “Maer-ermen ak a linma ed miting, ya agko amta no anto so ipakan ko ed saray ana’ko no onsempet kami la.” Say maaron impanulong na saray agagi so tampol ya amaligsa ed sikato. “Singano abilay ak lamet!” so inkuan to.

Saray Tasi met so ‘manggagawa na maabig’ diad espiritual a paraan diad panginanabang da na makaligliwa tan mangiiter na ilalon mensahe ed Biblia. Singa ed samay makabat a too nensaman manisia ra ya: “Anggan siopa ya ondengel ed [maridios a kakabatan] manayam ed katalkan, tan sikato naani mareen ya andi-takot ed mauges.”​—Uliran 1:33.

[Saray litrato ed pahina 31]

1, 2. Panangibunog na tagano ed saray mankaukolan diad Mozambique

3, 4. Say bagyo ed Guam so aneral ed dakel a kaabungan

[Credit Lines]

Ugaw, kawigi: Andrea Booher/FEMA News Photo; bii, tagey: AP Photo/Pacific Daily News, Masako Watanabe