Tepetepet Manlapud Saray Managbasa

Anto so iyaanino na say uksoyan nipaakar ed taon na Jubileo ya asalambit diad koma-25 a kapitulo na Levitico?

Espisipikon indatak na Mosaikon Ganggan a “dia ed komapito a taon sikato naani sakey a sabaton na masimpit a pampainawa ya onkana ed dalin.” Nipaakar ed satan a taon et oniay ingganggan ed saray Israelita: “Sika agmo nepeg a taneman so umam, nisay paltongan mo so kaubasan mo. Say ontubo ed inkasikato ed aanien mo agmo nepeg ya anien, tan saray ubas na agpinaltongan a wakal na ubas agmo nepeg a tiponen: nepeg na satan a taon so sakey a taon a masimpit a pampainawa ya onkana ed satan a dalin.” (Levitico 25:4, 5) Kanian, diad kada komapiton taon so taon na Sabaton parad dalin. Tan diad kada koma-50 a taon, kayari na taon na komapiton taon na Sabaton, so taon na Jubileo. Antoy nagawa ed satan a taon?

Oniay imbaga nen Jehova ed Israel panamegley nen Moises: “Ngilinan yo naani komalimamplon taon, tan ibawag yo so pankanawnawa ed amin a dalin ed saray amin ya ombaley ditan: sikato naani sakey a Jubileo ed sikayo; tan nepeg yo so ompawil ed saray kaykayarian na balang sakey a too, tan nepeg yo so ompawil ed pamilya na balang sakey a too. Say komalimamplo a taon sikato naani sakey a Jubileo ed sikayo: agyo nepeg so mantanem, nisay mangani ed ontubod’man ed inkasikato, nisay tiponen yo so saray bunga na ubas diman ya agpinaltongan a wakawakal na ubas.” (Levitico 25:10, 11) Say Jubileo et mankabaliksan na komaduan mantumbokan a taon na Sabaton parad dalin. Balet parad saray manaayam ditan, mankabaliksan itan na kawayangan. Siopaman a Judio ya inlako ed inkaaripen so nepeg a nibulos. Say tawir a kayarian a nayarin apaskar ya inlako na sakey a too so nepeg a nipawil ed pamilya to. Say Jubileo so taon na panangipawil tan kawayangan parad kadaanan ya Israel. Anto so iyaanino na satan parad saray Kristiano?

Lapud impanrebeldi na inmunan too, si Adan,  say katooan so naaripen ed kasalanan. Say probisyon na Dios pian nibulos so katooan ed panangaripen na kasalanan et say dondon bagat nen Jesu-Kristo. * (Mateo 20:28; Juan 3:16; 1 Juan 2:1, 2) Kapigan a nibulos iray Kristiano manlapud ganggan na kasalanan? Onia so imbaga nen apostol Pablo ed saray alanaan a Kristiano: “Say ganggan na espiritu na bilay ed Kristo Jesus imbulos to [kayo] ed ganggan na kasalanan tan patey.” (Roma 8:2) Agamoran na saramay walaan na ilalon manbilay ed tawen iyan kawayangan sanen alanaan ira na masanton espiritu. Anggaman sikaray silalaman tan ag-ayadyari, sikara so inyabawag na Dios a matunong tan tinagibi to ira bilang espiritual ya ananak to. (Roma 3:24; 8:16, 17) Parad saray alanaan bilang sakey a grupo, say Makristianon Jubileo so ginmapo nen Pentecostes 33 K.P.

Komusta balet iray ‘arum a karnero,’ a maniilalon manbilay ya andi-anggaan diad dalin? (Juan 10:16) Parad saray arum a karnero, say Sanlibon Taon ya Uley nen Kristo so magmaliw a panaon na panangipawil tan kawayangan. Legan na sayan Milenyon Taon na Jubileo, si Jesus so mangiyaplika ed saray gunggona na dondon bagat to ed mananisian katooan tan umanen to iray epekto na kasalanan. (Apocalipsis 21:3, 4) Diad sampot na Milenyon Uley nen Kristo, nadampot na katooan so inkayadyari tan sikara so sigpot lan nibulos ed atawir a kasalanan tan ipapatey. (Roma 8:21) Sano nasumpal itan, manampot la so Jubileo parad saray Kristiano.

[Paimano ed leksab]

[Litrato ed pahina 26]

Say Milenyon Taon na Jubileo​—sakey a panaon na panangipawil tan kawayangan parad saray ‘arum a karnero’