Report na Saray Manangiyabawag na Panarian

“Saray Alingwanan a Biktima” so Anodnonotan

DIAD kasakbayan na 2001, si Haykaz, sakey a 15-años a Tasi nen Jehova, so binmisita diad “Saray Alingwanan a Biktima,” sakey ya eksibit diad Bern, Switzerland, nipaakar ed impamasegsegang na Nazi ed saray Tasi nen Jehova. Kayari na imbisita to, oniay inkuan nen Haykaz: “Nadngelan ko so nipaakar ed maruksan impantrato tan impamairap ed saray Tasi nen Jehova legan na uley na Nazi, balet natan ko labat anengneng iray tuan dokumento tan litrato nipaakar ed saman a panaon. Saray akaparungtal, saray report na saray akatasi, tan saray komento na saray manag-awaran so nipaslep a maong ed nonot tan pusok.”

Ag-abayag, sanen niasain si Haykaz a manggawa na sakey a report parad saray kaklase to diad haiskul, pinili to so teman “Saray Tasi nen Jehova​—Saray Alingwanan a Biktima na Nazismo.” Inaprobaan na maestro to so tema balet inkuan to ed si Haykaz a kaukolan ton ilaktip iray impormasyon ed sekular a literatura. Si Haykaz so maliket ya inmabobon. “Nansulat ak na sumaryo ed pigaran libro a binasak nipaakar ed saray Tasi nen Jehova diad panaon na Nazi. Deneskribek met so personal iran impresyon ko ed eksibit nipaakar ed ‘Saray Alingwanan a Biktima.’ Say 43-pahina a report so angilaktip ed saray ilustrasyon tan litrato.”

Nen Nobyembre 2002, impresenta nen Haykaz so report to ed saray kaeskuela, managbangat, kapamilya, tan kakaaro to. Kayari na satan, niwala so tepet-tan-ebat a sesyon, ya angiter ed sikato na pankanawnawan nipaliwawa iray sisiaen to a nibase ed Biblia. Sanen tinepet na sakey a biin onderengel no akin a pinili to itan a tema, impaliwawa nen Haykaz a dakel a libro na awaran so ag-anaglawi ed saray Tasi nen Jehova kanian labay ton naamtaan na totoo no panon a saray Tasi so makpel ya angidepensa ed Makristianon sisiaen da. Anto so resulta na presentasyon to?

“Nikelawan iray kaeskuelak,” so inkuan nen Haykaz. “Agda amta a saray Tasi nen Jehova bilang sakey a grupo et anagmak na maruksan panamasegsegang. Ontan met, dakel so agmikabat a saray Tasi ya impangaw ed saray panamairapan a kampo na Nazi so walaan na nikaduman pakabidbiran​—sakey a lilan trianggulo.”

Kayari na presentasyon to, si Haykaz so awalaan na dakel nin pankanawnawan makapitongtong ed saray kaklase to tan singbaten so nibase ed Biblian talindeg na saray Tasi nipaakar ed panagpasaksak na dala, alkohol, tan moralidad. “Anggapo ed saray kaeskuelak so nanludlurey odino nambalaw ed siak,” so inkuan nen Haykaz. Niarum ni, say report to so akasalansan natan ed librarya na eskuelaan. Satan so makapangipaseguro ya agla nalingwanan so makpel a talindeg na saray Tasi nen Jehova.